Pↄl e lɛl ekʼawŋ Tit
Ów ekʼit eke wɛl kʼuw any
Pↄl awŋ Tit ekʼel in e juma ɛm e lawl a lɛl na. Tit elm Jwif, kↄ Pↄl e Nyam odad eke lʼiri a ↄŋ ɛtŋ lʼel kretiɛn. Lʼel Nyamel nyimn ɛs mamn tasi; ɛtŋ li bʼɛlum Pↄl abu ow eci Sinyamel ekʼanŋ Jerusalɛm, Efɛs lele Korɛnt ab eci ɛc ɛkn ab ɛm. Eke Pↄl sigm Sinyamel es Krɛt lekr ab af a, Tit anake nʼↄŋ abusu eke kʼɛkn Sinyamel a ekʼanŋ lekr a e sɛb sɛb ab ɛm a (1.5).
Wɛl uw Krɛt eyŋ any ɛl e suksuk, ɛnyɛmbri yony yony, ob ij gbrugbru lel ɛl e kpↄrŋ ɛm ecʼɛb eke -li bʼir ab ɛm. Agŋ amua na ɛm a, Pↄl am ↄm Tit ów Nyamel nyimn ɛs ecʼelel eke kʼaan es lele Nyamel lokm a ecʼagŋ akpasu akpasu ekʼanŋ ɛsɛ: agŋ ekpekp, ↄyↄw, ŋgbafrɛ lele madu ab, ecʼelel eke li kʼaan es wɛl e lís a. Kretiɛnɛl a fɛŋ it eke kʼↄny es an pɛtɛ pɛtɛ lele ɛrm es ɛy ab, ke -nʼam ↄkn eke gbuŋ ke Jesu Krist ɛm -nʼɛŋn sel a, ɛl yɛji, ɛb ir ŋuŋ -nʼↄny. Ow it eke -li ki kok ów ekʼakpl, ke -li kok juma -nʼↄny abusu, -li ki kok ɛl e ses babur, Abŋ Lala e lɛc a eke am nyimn ɛl ab ɛm.
1
Ɛsŋn
1 Ɛm bↄwri Tit, † Tit:2 Korɛnt 8.23; Galat 2.3; 2 Timote 4.10. ɛm Pↄl, Nyam e juma kok ɛs lele Jesu Krist ecʼɛrm ɛs ab, ɛm mʼam awŋ lɛl na. Nyam abulʼm eke mi kʼɛsŋ agŋ a eke li sↄsum lʼot a ↄny ↄmn, ke mi yɛ́gm ɛl -lʼuw low nawrɛ any, ke -lʼir ɛb ekʼokr af ɛy ecʼↄmn eke sʼↄny ab ab, 2 yecʼɛtŋ ke -nʼↄny low eku sel ekʼↄnym uwr a eci. Nyam ekʼↄ́nym yadŋ a, ɛwar ɛy ɛb ir ikŋ na gbuŋ eke low fɛŋ kʼanŋ a. 3 Lɛgŋ a eke wɛl bɛbm ɛw es a, Nyam ɛy e Sↄg Ɛs ɛlu in ecʼodad a ↄkm. Odad a anake el amani a eke nʼↄŋʼm, ke nʼↄŋʼm abusu eke mi kʼↄb a.
4 Tit, mʼam nↄn lɛl na mʼawŋʼŋ, ŋ ekʼanŋ ɛsɛ ɛm ecʼiy tasi af, ↄmn a ekʼokr ɛy af ab ɛm. Ke Nyam Ɛs lele Jesu Krist ɛy e Sↄg Ɛs ab ɛ́dŋʼŋ ↄwrↄ, ke ↄ́ŋʼŋ ɛrm es ɛy.
Tit e juma e wɛl abul Krɛt lekr ab ɛm
5 Mʼɛwʼŋ es Krɛt eke kʼuwar ów sisigm ekʼanŋ a, ke ɛb ɛb a e Sinyamel ab ɛm sↄ́sum agŋ ekpekp ot ɛsɛ idr ɛsɛl af, ɛsʼelel eke mʼↄŋʼŋ ow ecʼabusu ab af. 6 Ɛgŋ likpekp a it eke kʼel ɛgŋ ekʼabr ɛnym anm lís; yↄw nyam cɛ ecʼigŋ, † yↄw nyam cɛ ecʼigŋ:odad na Grɛk ɛm a wɛl ↄtu eke kʼitŋn ɛjecʼɛm dad ɛsɛ igŋ ekʼɛbi yↄw akp nyam cɛ. ke in ecʼey a él Nyam e nawrɛ ub ɛsɛl eke wɛl kʼↄtum okm ów af ɛl ecʼes an keskes eci, oglog ɛl ecʼɛgŋ ɛluam eci. 7 Tasi ɛm a, Nyamel ecʼidr ɛs eke bʼɛkn Nyam ecʼów a, it eke kʼir ɛb mɛwl ɛm. Li kʼélm es ɛfuu, ɛrm beblu, mar ɛgŋu, lʼélm ɛgŋ ekʼↄny gaŋgaŋ, lʼélm ɛgŋ e bʼↄl os ↄny es yadŋ ɛm. 8 Ow it eke li kʼeb agŋ eke bʼow in ogŋ a mɛwl ɛm, ke lʼél low nimamn e lawl. Ke lʼél ɛgŋ e bʼiri ɛgŋ owi, ɛgŋ nyim nyim, eke bʼeb Nyam ecʼebr a, ke lʼél ɛgŋ e bʼↄnyn sos es. 9 Ow it eke li kʼucu odad tasi a ekʼit a nʼↄny es nɛnyɛmbri nyam ɛm, odad a ekʼokr af yecʼa eke wɛl yɛgm ab ab a. Ɛbɛn ke lʼↄ́tu lʼatr agŋ likpr a sos es low yɛgm nawrɛ tasi ab ɛm, ke li yɛ́gm agŋ a ekʼɛgŋm low yɛgm a ebm a ɛl ecʼirm a. † Akr 6 toŋ 9: bɛ̀bmn 1 Timote 3.2-7 ab.
10 Mi dad sodad amua aŋke agŋ nↄnↄ ↄ́nym ɛlum, ab brobro Jwifɛl eke bʼus Jesu jam, ke am erur ekʼagŋ kʼubr likr es ab ɛm; † Jwifɛl... ekʼagŋ ekʼubr likr es ab ɛm:ow el Jwifɛl ekʼus Jesu jam, ke sica am erur eke nawrɛ ub ɛsɛl a fɛŋ kʼubr likr es. -li bʼirmn agŋ ɛl e nɛnym ↄb e sodad ebl ab ɛm. 11 Ow it eke kʼabl ɛl nɛny es, aŋke -li bi ŋuŋn sibosu nimum ɛtŋ -li bi yɛgm low ekʼitm a, yecʼɛtŋ ke -nʼɛŋn os yadŋ ɛm. 12 Krɛt iy nyam in obi, ɛl e nuŋ ɛm ↄny ɛs nyam anake dad ninɛ: «Godʼɛtŋ Krɛt eyŋ el ayadŋu, mindey eŋuŋ, ↄkpↄrŋu e bi tutr ɛl e lok iy owi cɛ.» † Odad na el Krɛt iy e wɛl bʼɛsŋ Epimenid ekʼel Knↄs baŋn iy a ecʼodad eke dad (bɛ̀bmn akr 5 a). Li dad odad na ow ij akpo duw akpo ekŋ yen gbuŋ ɛtŋ wɛl ow ew Jesu Krist. 13 Ɛtŋ ow eke li dad a el low nawrɛ tasi. Na sosiɛm anake ki dad ɛl odad lebl tuↄtuↄ ɛm, ke -lʼub nawrɛ tasi, 14 yecʼɛtŋ ke -li kʼucumn Jwifɛl e kpↄkpↄ ɛm ecʼów yadŋ a e dad a -nʼↄnymn es; -lʼɛluamn agŋ a eke bʼigŋ low nɛnyɛmbri nyam ɛlu es e sol a. 15 Fɛŋ el lala † Fɛŋ el lala:aŋa ow kʼↄdm ke Pↄl erur eke ki yɛgm sol eke bi dɛdŋn ob ij a. Bɛ̀bmn 1 Timote 4.3-5 lele Kolↄs 2.16-19 ab. agŋ a eke bʼɛlum Nyam e sol a eci; kↄ agŋ a ekʼɛluam, ke ɛ́gŋm ubm nawrɛ ecʼa, kaka elm lala, aŋke ɛl e nuŋ ɛm ↄny a lel ɛl sow tutr ab ab yɛji ikpi. 16 -Li bʼij nɛny -lʼɛsɛ ɛl uw Nyam any, kↄ ɛl ecʼów eke -li bi kok a bʼanŋ ɛjeci. -Lʼel agŋ ↄbr tasi, -lʼɛluamn ɛgŋ kaka ɛtŋ -lʼↄtumn -li kokmn low nimamn kaka.
†1:1 Tit:2 Korɛnt 8.23; Galat 2.3; 2 Timote 4.10.
†1:6 yↄw nyam cɛ ecʼigŋ:odad na Grɛk ɛm a wɛl ↄtu eke kʼitŋn ɛjecʼɛm dad ɛsɛ igŋ ekʼɛbi yↄw akp nyam cɛ.
†1:9 Akr 6 toŋ 9: bɛ̀bmn 1 Timote 3.2-7 ab.
†1:10 Jwifɛl... ekʼagŋ ekʼubr likr es ab ɛm:ow el Jwifɛl ekʼus Jesu jam, ke sica am erur eke nawrɛ ub ɛsɛl a fɛŋ kʼubr likr es.
†1:12 Odad na el Krɛt iy e wɛl bʼɛsŋ Epimenid ekʼel Knↄs baŋn iy a ecʼodad eke dad (bɛ̀bmn akr 5 a). Li dad odad na ow ij akpo duw akpo ekŋ yen gbuŋ ɛtŋ wɛl ow ew Jesu Krist.
†1:15 Fɛŋ el lala:aŋa ow kʼↄdm ke Pↄl erur eke ki yɛgm sol eke bi dɛdŋn ob ij a. Bɛ̀bmn 1 Timote 4.3-5 lele Kolↄs 2.16-19 ab.