Jud e lɛl ekʼawŋ
Ów ekʼit eke wɛl kʼuw any
Jud eke nↄn lɛl na a lele Jak ab el ɛy Ɛs Kↄtↄkↄ Jesu Krist lisijimɛl (Matie 13.55, Mark 6.3).
Sʼuwm Nyamel nuŋ nyam a eke Jud awŋ in e lɛl na ab any. Gbɛkↄ sʼam ↄny ↄmn eke lɛl na, ɛy Ɛs Kↄtↄkↄ Jesu ecʼɛrm ɛsɛl a e Sinyamel a eke sisigm es a, ni nↄn nʼawŋ. Ow e jam a, nʼim in obi in obi lʼↄb kokoba Sinyamel ab ɛm.
In e lɛl na ɛm ecʼów eke li dad a lele Piɛr e lɛl yony ɛm a, e nuŋ yony ɛm ecʼodad a, ↄl eke kʼotarir es.
Jud e lɛl na e low ekʼam ɛlu ↄkm a el low yɛgm ɛsɛl ayadŋu a, ekʼam ɛc Sinyamel ab ɛm yɛgm ɛl ów yadŋ ŋuŋn ɛl a. Agŋ amua ecʼes an ŋuŋ a sosiɛm, Jud am awŋ Sinyamel a lɛl na dad ɛl eke -li kʼinym es kikri ke -lʼogŋ mum ↄmn eci.
1
Ɛsŋn
1 Ɛm Jud, mʼel Jak lisijim lele Jesu Krist e juma kok ɛs ab; mʼam ɛsŋn agŋ a fɛŋ eke Nyam ɛsŋ, ke el agŋ eke Ɛs Nyam erur, ke nʼam ↄsu Jesu Krist ecʼa. 2 Ke Nyam e sↄrŋ ikŋ, ɛrm es ɛy lel erur ab ɛ́ny bobn ↄny.
Low ɛwar low yɛgm ɛsɛl ayadŋu e lís
2 Piɛr 2.1-17
3 Erur ɛm ecʼagŋ lisijimɛl, mʼↄny erur nↄnↄ eke mi kʼawŋ ↄny lɛl sel ɛŋn a ekʼel ɛy fɛŋ ecʼa sosiɛm. Gbɛkↄ sica, mʼɛkn eke ow it eke mi kʼawŋ ↄny lɛl na, yecʼɛtŋ ke mʼátr ↄny sos es. Dògŋnin sos ↄmn na eke Nyam ↄŋ ↄny kpɛkŋ kpɛkŋ a sosiɛm, ↄny eke eel in ecʼagŋ a. 4 Mʼam awŋ ↄny lɛl aŋke agŋ eŋuŋ, es lↄl ɛm, ow anŋ ↄny araŋn. -Li bʼↄny Nyam ecʼɛrm mamn ecʼodad a -li titŋn, yecʼɛtŋ ke -lʼↄtu -li kok yecʼeke -lʼerurir a, ɛtŋ Jesu Krist ekʼin sↄny coco el ɛy ecʼEs Ɛw lel ɛy Ɛs Kↄtↄkↄ ab a, -li bʼigŋ -lʼↄwl ow. Godʼɛtŋ Nyam Lɛl ikŋ anym dad ɛl eci gbre ekʼam eku ɛl a e low ɛw es.
5 Mʼuw any eke uwr low na eke mʼam mʼow mi dad ↄny ab any. Gbɛkↄ mʼerur eke mi kʼↄkn ↄny ów amua: Ɛs Kↄtↄkↄ eb in ecʼagŋ a ɛlu es Ejipt eyŋ ecʼabu ɛm, ɛtŋ ow e jam a, lʼibi ɛl a fɛŋ ekʼɛgŋm ubm nawrɛ a. 6 Ɛtŋ ɛbɛn cɛ afr ɛrm ɛsɛl a ekʼerurm anm ɛl ecʼusu a eke -nʼinymn es a, ke -nʼŋgbroŋn yogŋ a, Nyam ↄny ok ɛl ŋgbraka ɛtŋ -nʼanŋ ncebn ibr ab ɛm godo godo fɛŋ eci, jɛj ok e lɛgŋ ligbɛl a eci. 7 Sica ↄkan Sodↄm, Gomↄr lel ɛl ecʼɛb saw saw ab ab e low a: ɛl ecʼɛb eyŋ a ↄny es an ŋuŋ ekʼakplm ɛsɛ afr ɛrm ɛsɛl a ecʼab af. Ɛtŋ -lʼↄl ɛgŋ kaka fɛŋ ab ecʼɛrum ab, toŋ agŋ eke ɛlim sos megl nyam ɛsɛ ɛl ecʼab af a yɛji.† Nuŋ Ɔb 19.1-25. agŋ eke ɛlim sos megl nyam ɛsɛ ɛl ecʼab af: aŋa ow ↄtu eke kʼel afr ɛrm ɛsɛl. Sica odad na Grɛk ɛm a, wɛl ↄtu eke kʼitŋn ɛjecʼɛm dad ɛsɛ: -lʼↄl ɛgŋ igŋ lele lawl igŋ ab ecʼɛrum ab. Ow ↄŋ -nʼam ij gbre al ekʼↄnym es irm ab ɛm, ɛtŋ -lʼel agŋ fɛŋ ecʼɛwar eci sɛwl.
8 Ɛtŋ ↄny ecʼaraŋn a, agŋ eŋuŋ amua am ↄny es an nɛnyɛmbri nyam a ɛsɛ agŋ amua fɛŋ ecʼab af. -Li bi tutr ów yadŋ ɛtŋ ow bʼↄŋ ɛl -lʼus ɛl eci sos af ecʼów aw eŋuŋ a jam. -Li bʼifn Nyam ecʼes ɛw a ɛtŋ -li bi wɛwr afr ecʼabŋ any ɛsɛl a.† afr ecʼabŋ any ɛsɛl:Bɛ̀bmn 2 Piɛr 2.10 lel ow ecʼakr otar ab ab. 9 Ɛtŋ Mikaɛl in obi yɛji eke el afr ɛrm ɛsɛl ecʼes ɛw a kokm low na. Lɛgŋ a eke agn ab -nʼam dogŋn Mois eci sos megl a,† Aŋa Jud am dad Mois e lís e low nyam ekʼanŋ Jwifɛl e lɛl sig nyam ɛm, ke anm Nyam Lɛl ɛm. Mikaɛl ism nɛny igŋmʼn jɛjm okmʼn, kↄ ow cɛ eke li dad ow a el: «Ke Nyam íjrʼŋ gbre!» 10 Gbɛkↄ agŋ amua am wɛwr yecʼa eke -lʼuwm any a. Ɛtŋ yecʼa eke -lʼuwr any nyamb ɛm ɛsɛ akp ɛm eci mindey ekʼↄnym tutr af a, yɛji anake bʼirmn ɛl a. 11 Gbre él ɛl eci! -Lʼeb ebr a eke Kayɛn eb a, -nʼↄny yadŋ os sosiɛm ɛsɛ Balam af, -lʼuw, aŋke -lʼↄbr Nyam any ɛsɛ Kore af.† Kayɛn:ɛ̀kn Nuŋ Ɔb 4.3-8. Balam: ɛ̀kn Awl 22.1-35. Kore: ɛ̀kn Awl 16.1-35. 12 Ɛɛ, ɛl anake -li bi ŋuŋn ↄny ↄfr ɛm ecʼob eke bʼasr luku usu nyam ijr a. Yogŋ, -li bʼij ɛtŋ -li bʼɛgŋ lokɛyr ɛm, ɛ́s ↄ́nym ɛl ɛtŋ -li bi tutr ɛl sↄny cɛ e low. -Nʼanŋ ɛsɛ afr eke ibr es lɛf am oc im ke ánm mij okm wus ab af. -Nʼanŋ ɛsɛ ekŋ eke ↄ́sum ey iju egb ub e lɛgŋ ab af; ekŋ eke -lʼiil ok wus ke uw nimum nimum. 13 -Li bʼↄmun ɛl ecʼɛ́s owi ab es ɛsɛ elel eke okij bʼↄmun in e sarↄd es ok ákpaf ab af. -Nʼanŋ ɛsɛ mílɛ́l ekʼuwm yogŋ ogŋ eke kʼimn ab af, ɛtŋ Nyam ɛw ɛl usu es sɛgŋ fɛŋ eci ncok ibr ab ɛm.
14 Enↄk ekʼel ɛy lagŋ lↄbŋ ɛm Adam eci jam a, ikŋ anym dad agŋ amua e low ninɛ: «Kin, Ɛs Kↄtↄkↄ am ow lel afr ɛrm ɛsɛl lala nↄnↄ gbɛl ab, 15 wus nimum e jɛj ok eci. Li bʼow lʼↄb agŋ eŋuŋ a fɛŋ low, ów eŋuŋ a fɛŋ eke -li kokr -lʼↄbar ow a sosiɛm. Li bʼow lʼↄb sikpl ɛsɛl es ɛfuu amua low, low ↄbr any odad fɛŋ eke -li dadr ow e lís a nuŋ af.» 16 Sɛgŋ fɛŋ agŋ amua bʼucu any es. -Li bʼanŋ abr ɛny ɛm ɛtŋ -li bʼir ɛb ɛsɛ elel ekʼɛl ecʼów aw eŋuŋ a bʼↄŋn ɛl ab af. -Li bi dad low any ↄbr odad ɛtŋ -li bi pop agŋ ob ɛŋn ij eci.
Ɛwar lel ów ↄm ab
17-18 Gbɛkↄ ↄny, erur ɛm ecʼagŋ lisijimɛl, ↄkan ɛy Ɛs Kↄtↄkↄ Jesu Krist ecʼɛrm ɛsɛl a e sodad eke dad ↄny lɛgŋ ekʼɛc ab ɛm a: «Sɛgŋ es abal el ɛm a, agŋ bʼow kokr ↄny miyɛr ɛtŋ ɛl ecʼów aw eŋuŋ a bʼow ↄŋ ɛl -lʼir ɛb eke bi kpab ɛl es Nyam e lís.» 19 Ɛl anake -li bi bubr Nyamel ecʼagŋ ab ɛm a. Ɛl e sow tutr a el agŋ e sow tutr cɛ, ɛtŋ -nʼↄnym Nyam ecʼAbŋ a. 20 Gbɛkↄ ↄny, erur ɛm ecʼagŋ lisijimɛl, ùsr ↄny ecʼɛb ir a ↄny ecʼↄmn ekʼↄnyn Nyam ɛm ab af, ŋↄŋan Nyam Abŋ Lala ecʼabu ɛlum ɛm. 21 Ànŋn Nyam ecʼerur ab ɛm, ke ám ekur ɛy Ɛs Kↄtↄkↄ Jesu Krist eci sↄrŋ ikŋ a eke bʼow ↄŋ ↄny sel ekʼↄnym uwr a.
22 Agŋ a ekʼɛl ecʼↄmn a ɛwm leg leg a, ↄnyn ɛl eci sↄrŋ ikŋ. 23 Ɔ̀nyn okr ɛl ↄkm al ab ɛm ke éb ɛlul ɛl es.† Ɛ̀kn Amↄs 4.11; Zakari 3.2. Ɔ̀nyn agŋ bɛb a yɛji eci sↄrŋ ikŋ. Gbɛkↄ ɛ̀wr sos ɛrm, kì yɛbr -li kʼibar ↄny ɛl ecʼów eŋuŋ kok ab ab.
Anygbɛl él Nyam eci
24-25 Anygbɛl él Nyam nyam coco a eke bʼɛcr ɛy Ɛs Kↄtↄkↄ Jesu Krist ɛm sↄg ɛy a eci! Lʼↄtu eke li kʼɛdŋn ↄny abu any ke kʼɛ́ymn low ŋuŋ ɛm; lʼↄtu eke li kʼok ↄny ↄkm in ecʼanygbɛl a ecʼany af, eke low ↄbr kaka kʼánm ↄny ɛm, ke sos ɛm iŋn íy ↄny ɛm gbↄŋ. In ecʼél anygbɛl, sagb, abusu lel es ɛw ab godʼɛtŋ, sicaca lel sɛgŋ fɛŋ ab! Amɛn.
†1:7 Nuŋ Ɔb 19.1-25. agŋ eke ɛlim sos megl nyam ɛsɛ ɛl ecʼab af: aŋa ow ↄtu eke kʼel afr ɛrm ɛsɛl. Sica odad na Grɛk ɛm a, wɛl ↄtu eke kʼitŋn ɛjecʼɛm dad ɛsɛ: -lʼↄl ɛgŋ igŋ lele lawl igŋ ab ecʼɛrum ab.
†1:8 afr ecʼabŋ any ɛsɛl:Bɛ̀bmn 2 Piɛr 2.10 lel ow ecʼakr otar ab ab.
†1:9 Aŋa Jud am dad Mois e lís e low nyam ekʼanŋ Jwifɛl e lɛl sig nyam ɛm, ke anm Nyam Lɛl ɛm.
†1:11 Kayɛn:ɛ̀kn Nuŋ Ɔb 4.3-8. Balam: ɛ̀kn Awl 22.1-35. Kore: ɛ̀kn Awl 16.1-35.
†1:23 Ɛ̀kn Amↄs 4.11; Zakari 3.2.