1 Ɛm Pↄl, mʼel Jesu Krist e sobel ɛm ɛs, ↄny ekʼelmn Jwifɛl a sosiɛm eci. 2 Ɔny, mʼↄny ↄmn eke irir juma eke Nyam, in ecʼɛrm mamn ab ɛm abulʼm eke mi ki kok ↄny ecʼa e low. 3 Lʼɛlu low a eke lↄl es a ↄkm mʼɛkn, low a eke mi nↄn ow e low tɛl cɛ afr ɛm a. 4 Ɛm e lɛl a ecʼawl ɛm, bʼow ɛkan elel eke mʼuw Krist e lís e low eke lↄl es ab any a. 5 Low ikŋ a, lɛgŋ ekʼɛc ab ɛm a, Nyam ɛlumʼn ↄkm yɛgam ɛy lagŋɛl. Kↄ yɛfɛnyna ɛm a, lʼɛcr in ecʼAbŋ ab ɛm lʼɛlu ow ↄkm, li yɛgm in ecʼɛrm ɛsɛl a lele kokoba ↄb ɛsɛl lala ab ab eke li sↄsum lʼot lʼok saw a. 6 Kin low a eke lↄl es a: agŋ a eke elm Jwifɛl ke okr af Jesu Krist ab Amani Mamn ab ɛm a, bʼow ɛŋn aja nyam a cɛ ɛsɛ Jwifɛl ab af. -Li bʼow -lʼel sos megl nyam ecʼagŋ, ɛtŋ low a eke Nyam ɛwar ɛw es a -li bʼow -nʼanŋ ɛm.

7 Nyam, in ecʼɛrm mamn ab ɛm, ↄŋʼm abusu eke mi kʼel Amani Mamn na e juma kok ɛs, in e lɛc a ecʼabu ɛlum ɛm. 8 Ɛm, mʼel nawrɛ ub ɛsɛl ab ɛm ecʼɛgŋ saka sakali. Gbɛkↄ mʼɛŋn bibm na eke mi kʼↄb Krist ecʼob ↄny a ekʼↄnym nuŋ a ecʼamani, mʼok agŋ a ekʼelm Jwifɛl a. 9 Tasi ɛm a, godʼɛtŋ, Nyam eke el mob mob fɛŋ eci kok ɛs a, lↄl low a eke li bɛbm lʼɛw es ab es in ɛm. Ɛtŋ elel eke Nyam bʼow kokr low na eke lↄl es a e low iy nɛny a, mʼɛŋn bibm eke mi ki yɛgm kpata. 10 Ow bʼow ↄŋ ɛtŋ Nyam bʼow ɛcr Nyamel a eke lʼɛsŋ ab ɛm, nʼↄ́ŋ mob a fɛŋ ekʼanŋ afr ke ↄny es ɛw lel abusu ↄny ab a † Kolↄs 1.16. úw in e sɛwr ab any. Nuŋ ɛm ↄny na Nyam bʼɛluʼl ↄkm sakunda ɛrŋ ɛrŋ ɛm, 11 low a eke lʼikŋ anym li bɛbm lʼɛw es godʼɛtŋ a sosiɛm eci. Low ikŋ na, lʼɛcr ɛy Ɛs Kↄtↄkↄ Jesu Krist ɛm, li kok ow iy nɛny. 12 Ɛy eke sʼokr af Krist ab ke sʼubʼr nawrɛ a, sica abusu ɛru ɛy es eke si kʼↄwl abu sʼim Nyam ecʼany af ↄmn ɛm. 13 Na sosiɛm anake mʼam ŋↄŋn ↄny ekʼɛm e gbre e mʼam ɛgŋ mʼeb ↄny sosiɛm a, kʼↄ́wrm ↄny sos es a. Tasi ɛm a, ow bʼow el ↄny ecʼanygbeŋ ligbɛl.

14 Ow sosiɛm mʼam ok ↄwrↄkp wus Nyam ɛy Ɛs ecʼany af, 15 in ɛm eke bosu fɛŋ ekʼanŋ afr lele wus ab anŋ a. 16 Mʼam ŋↄŋnʼn ekʼin ecʼanygbɛl e gbreŋgbi eke lʼij ab ɛm, li kʼɛcr in ecʼAbŋ ab ɛm nʼↄ́ŋ ↄny lɛc inymn es kikri ↄny ecʼɛrm ab ɛm. 17 Ke Krist ír ↄny ecʼɛrm ab ɛm ↄny ecʼↄmn a sosiɛm, yecʼɛtŋ ke ókr min erur ɛm, ke ↄny nimum a sígr es erur ab ɛm. 18 Ɛtŋ bʼow ↄnyn abusu, ↄny lele Nyam ecʼagŋ lala a fɛŋ ab, írir mɛwl ɛm tasi Krist ecʼerur a ecʼes ar, sↄfu, sigb lel ow e sibn ab ab. 19 Ɛɛ, mʼam erur eke kʼuwr Krist ecʼerur ab any, eke lʼagb lʼakm low fɛŋ ekʼɛgŋ ↄtu eke kʼuw any a yɛji, yecʼɛtŋ ke ɛ́ŋan Nyam ecʼowr anŋ a, ke lʼír ↄny ɛm nimum.

20 Nyam e lɛc a am kok juma ɛy ɛm ɛtŋ eke si bʼibrmʼn low a, lʼↄtu eke li ki kok ow afŋ es! In e lɛc a agb akm yecʼa e sʼↄtu eke si ki tutr a. 21 Anygbɛl él in eci, in e Nyamel ab ɛm lele Jesu Krist ɛm ab akpo akpo fɛŋ lele sɛgŋ fɛŋ ab! Amɛn.