1 Agŋ lisijimɛl, Nyam ↄny ɛy eci sↄrŋ ikŋ. Ow sosiɛm, mʼam ↄm ↄny ów eke kʼocr ↄny ecʼɛgŋ el a nimum lele ↄny ecʼowr anŋ ab ab ápr ir, ɛsɛ egb waw ekʼayl ke akpl af. Na anake el nuŋ igŋ tasi a ekʼit eke kʼↄŋn in a. 2 Kʼùsr wus eke sʼir af a ecʼagŋ ɛm ecʼów a jam, kↄ yɛ̀br Nyam itŋn ↄny e tutr a nimum. Ɛbɛn ke ↄ́tur uwr yecʼeke lʼerur ab any: yecʼeke akpl, yecʼeke akplʼl sos ɛm lele yecʼeke iy nɛny bɛbmn ab ab.

3 Bibm ɛm ecʼob ap ↄfr ɛm a eke Nyam ↄŋʼm a sosiɛm, mʼam dad ↄny ɛm ecʼɛgŋni nyam nyam fɛŋ eke kʼocrm in sosi ɛgŋ ligbɛl. Kↄ òkr nuŋ ɛm es, ke jɛ́jr ↄny sosi okr ↄmn a eke Nyam ↄŋ ɛy ab ɛm. 4 Tasi ɛm a, ɛy e sos megl ab ɛm susu ogog nↄnↄ anŋ, kↄ ɛl fɛŋ -li kokmn juma nɛnyɛmbri nyam a. 5 Nɛnɛ anake sʼanŋ Krist ab ecʼaf okr ab ɛm a. Sʼɛny nↄnↄ, kↄ ɛy fɛŋ a sʼel sos megl nyam. Ɛtŋ ɛy fɛŋ sʼokr af ɛy ↄfr ɛm, ɛgŋ ɛgŋ ecʼusu ekʼanŋ a, ɛsɛ sos megl nyam ecʼogog ogog ecʼab af. 6 Bibm ɛm, Nyam ↄŋ ɛy sob ap ↄfr ɛm, ɛtŋ ɛgŋ ɛgŋ ɛŋn in eci. † Ɛ̀kn 1 Korɛnt 12.4-11, 27-31; 1 Piɛr 4.10-11. Ow sosiɛm, ekʼɛgŋ nyam ɛŋn bibm ekʼel odad dad eci ɛsɛ kokoba ↄb ɛs af a, ke li dád yecʼa eke okr af ɛy ecʼↄmn ab ab a. 7 Ekʼɛgŋ nyam ɛŋn bibm ekʼel juma ecʼabu ɛlum eci, ke nʼám kok abu ɛlum ɛs e juma, ekʼɛgŋ nyam ɛŋn bibm ekʼel low yɛgm eci, ke nʼám yɛgm agŋ low, 8 ke ɛgŋ ekʼɛŋn bibm ɛgŋ e sos es atr ecʼa, ám atr agŋ sos es. Ɛgŋ ekʼam ↄŋ agŋ ob a, ↄ́ŋ ɛrm nyam ɛm, ɛgŋ ekʼam nyimn agŋ a, nyímn ɛl gbragbra kok ɛm. Ɛgŋ ekʼam ɛlum ↄgbↄru abu a, ɛ́lum ɛl abu sos ɛm iŋn ɛm.

9 Ke ↄny ecʼerur a él nɛnyɛmbri nyam ɛm; ìfan low ŋuŋ kok, ke úcur low mamn e kok ↄnyn es. 10 Èrurir ↄny ↄfr ɛrm frↄrↄ ɛm, ɛsɛ Krist ɛm ecʼagŋ lisijimɛl af. Èel agŋ eke bʼogŋ es ɛlum ɛl lawlɛl. 11 Kòkr Ɛs Kↄtↄkↄ eci juma gbragbra kok ɛm, ke sos am kaka kʼánm ɛm, ke ow él ↄny ecʼɛrm fɛŋ ɛm. 12 Ànŋn sos ɛm iŋn ɛm ↄny e low ↄmn a sosiɛm. Ɔ̀nyn ɛrm susu gbre ij ɛm, ùcur Nyam ŋↄŋn ↄnyn es. 13 Ɛ̀lumn Nyam ecʼagŋ ekʼↄny es abur a abu, ke sɛgŋ fɛŋ bɛ́bmn sos ebr agŋ a eke bʼow ↄny ogŋ a sɛnyn sɛnyn.

14 Ìbrmn Nyam e low mamn ↄŋn agŋ eke bʼijr ↄny gbre a, ìbrmn low mamn, kↄ ow kʼél low ŋuŋ. † Bɛ̀bmn Matie 5.44 lele Luk 6.28 ab. 15 Ànŋn sos ɛm iŋn ɛm agŋ a eke bʼanŋ sos ɛm iŋn ɛm ab ab, ke íkŋn ↄŋn, agŋ a eke am ikŋ ↄŋn ab ab. 16 Nɛny ókr ↄny af ↄny ↄfr ɛm. Kʼèel es ɛfuu, kↄ ɛ̀gŋn es is ɛm e juma kok ebr. † ɛ̀gŋn es is ɛm e juma kok ebr:odad na Grɛk ɛm wɛl ↄtu ekʼitŋn ɛjecʼɛm dad ɛsɛ: ɛ̀gŋn ↄgbↄru ab ecʼiririr ebr. Kʼↄ̀nyn tutr eke ↄny eel agŋ eke uw low fɛŋ any.

17 Low ŋuŋ eke ɛgŋ kok ↄny a, kì kokr kʼↄbar ir any, kↄ ↄↄl low mamn kok es agŋ fɛŋ ecʼany af. 18 Eke ow el ↄny obi ɛm, ɛtŋ ow ↄtu eke ow kʼel ɛbɛn, ìir ɛb ɛrm es ɛy ɛm agŋ fɛŋ ab. 19 Erur ɛm ecʼagŋ lawlɛl, low eke ɛgŋ kok ↄny a, ↄny obi kì kokr ir, kↄ ɛ̀gbr Nyam ecʼɛrm bebl ab es kok ow e low. Tasi ɛm a, Nyam Lɛl ɛm a, Nyam dad ninɛ: Ɛm mi bʼusr ɛgŋ usu mi kok low eke wɛl kokʼr a! Ɛm mi bʼow mʼↄŋ ɛgŋ ɛgŋ ecʼekʼit eke kʼɛbm a!† Ol Ɔkn 32.35. 20 Gbɛkↄ li dad yɛjʼeke: Eke ŋ ecʼifnu namn am ↄny, ↄŋʼn ob lʼíj, eke mij amn am ↄnyʼn, ↄŋʼn mij lʼɛ́gŋ. Eke batŋ bi kok ɛbɛn a, ow anŋ ɛsɛ almali ekʼam ot okʼr nuŋ af.† Nyandrɛ 25.21-22, Sɛptant ɛm ecʼodad eke wɛl oc. 21 Kì yɛb low ŋuŋ kʼakmʼŋ es, kↄ òc low mamn akmn low ŋuŋ es.