2
Krist ecʼar ogŋ ɛs mamn
1 Ŋ, ɛm jim, ɛ̀ŋn ŋ e lɛc a bibm eke bʼanŋ Jesu Krist ɛm ow ɛŋn ɛy ab ɛm. 2 Low yecʼa ekʼiri mi dad adaŋku nↄnↄ ecʼany af a, òc abul agŋ ekʼↄny ↄmn ɛl ɛm eke bʼow ↄtu ↄny lɛc, ɛl yɛji oc im yɛgm agŋ ɛjecʼa.
3 Ŋ yɛji gbre ekʼit eke kʼɛbmʼŋ ɛsɛ Jesu Krist ecʼar ogŋ ɛs mamn af a, ɛ̀gŋ eb. 4 Ar ogŋ ɛs mamn ekʼɛgŋ ar ogŋ e low eb, ke am erur ekʼin ecʼɛgŋ ligbɛl a kʼawʼr a, li kókm agŋ ɛm ecʼów a eke agŋ ekʼelm ar ogŋ ɛsɛl a bi kok a ij. 5 Mum ogŋ ɛs ekʼam ogŋ mum a, ke nʼɛ́ŋn ow ecʼob ap ekʼanŋ ɛm a, ow it eke li kʼɛlum mum ogŋ a e sol a. 6 Wus juma kok ɛs it eke kʼij gbre kok juma, gbuŋ ke nʼɛ́ŋn ow ecʼegb ey a lʼij. 7 Tùtr ów amua eke mʼam dad a sɛnyn sɛnyn, ɛtŋ Ɛs Kↄtↄkↄ bʼow ɛlumʼŋ abu iri fɛŋ ow okʼŋ es sos ɛm.
8 Ɔ̀kn Jesu Krist ekʼel David e bosu ɛm ecʼɛgŋ ke anŋ luw ɛm igb ɛsɛ elel eke Amani Mamn a eke mʼam ↄb ow e kokoba a dad ab af a. 9 Amani Mamn na sosiɛm anake mʼam ij gbre, ke wɛl okm ŋgbraka ɛsɛ low ŋuŋ kok ɛs af a. Gbɛkↄ Nyam ecʼodad a in wɛl okmʼn ŋgbraka. 10 Na sosiɛm mʼam ɛgŋ low fɛŋ mʼeb agŋ a eke Nyam sↄsum ot a e nimamn eci, yecʼɛtŋ ke ɛl yɛji -nʼɛŋn sel ɛŋn a eke bʼow anŋ Jesu Krist ɛm ow a, lel anygbɛl a ekʼↄnym uwr ab ab. 11 Kin odad nawrɛ tasi:
Eke sʼuw Krist ab,
si bʼow sʼanŋ owr in ab;
12 eke si bʼinym es kikri,
si bʼow sʼel es ɛw ɛsɛl in ab;
eke si bʼigŋ sʼɛluʼl es,
in yɛji li bʼow lʼigŋ lʼɛlu ɛy es;
13 ekʼɛy sʼelm cɛcɛ,
ke in gbɛ lʼel cɛcɛ,
aŋke li kʼↄtum lʼɛgbram in sosi. † Rom 6.8; Matie 10.33 lele Luk 12.9 ab; Awl 23.19.
Ɔ̀b Amani Mamn a e kokoba nawrɛ ɛm
14 Ɔ̀kn agŋ a fɛŋ ów a ekʼiri a, ke íbrm tasi Nyam ecʼany af eke -li kʼɛsumn ów sodad ebl sosiɛm. Ów ɛsu amua elm low kaka, ow el agŋ a eke bʼiri a ecʼirmn cɛ. 15 Ŋ ecʼa, àtr sos es ke Nyam ecʼany af a él gbawru, ɛsɛ juma kok ɛs ekʼitm ekʼɛ́s kʼↄny in e juma e li kok a eci, ke am ↄb nɛny nyam ɛm low nawrɛ ecʼamani a. 16 Ów es atar ↄfr ↄfr a, ekʼelm ↄmn ecʼa, àru ɛgb es, aŋke agŋ a eke bʼanŋ ow ecʼów ɛm a, ow bʼow ↄŋ ɛl -nʼam kpab es Nyam e lís. 17 Ɛl eci sodad ebl a bʼow anŋ ɛsɛ lɛbi ekʼugŋ es ke am ij sos megl a lokm ɛm ab af. Agŋ amua ɛm anake Imene lele Filɛt ab anŋ a. 18 -Li digŋ low nawrɛ a -lʼɛlu es. -Nʼam dad eke Nyam in ↄny agŋ in igbm luw ɛm lɛgŋ a ɛtŋ, ow ↄŋ -nʼam ŋuŋn agŋ nↄnↄ ecʼↄmn a. 19 Gbɛkↄ Nyam ecʼodad ebl nawrɛ tasi a eke sigm es ɛsɛ êl eci lebn eke wɛl ɛlu nↄmu ɛm af a, itŋnm. Kin sodad eke wɛl nↄn af yogŋ a: Ɛs Kↄtↄkↄ uw agŋ ekʼel in ecʼab any. Ɛtŋ ɛmɛny wɛl igŋ af eke: Ɛgŋ kaka fɛŋ eke bi dad ɛsɛ in el Ɛs Kↄtↄkↄ ecʼa, ↄtu eke ki kpab es low ŋuŋ e lís.† Awl 16.5; Selu 97.10.
20 Êl ligbɛl nyam ɛm, ow elm sikpokpo eke wɛl kok sika ɛm lele jɛtɛ ufu ɛm ab cɛ ánm, kↄ kpokpo eke wɛl aku ekŋ ɛm lele yecʼeke wɛl kok kpeŋ ɛm ab yɛji bʼanŋ. Ekʼes gbɛgbl bʼanŋ a, jɛtɛ ufu ɛm lele sika ɛm e sikpokpo a wɛl bʼot, ɛtŋ lɛgŋ ↄfr ↄfr ɛm ecʼa, wɛl bʼot ekŋ ɛm lele kpeŋ ɛm ab ecʼa. 21 Ow sosiɛm ɛgŋ yecʼeke bʼocr sos es ów yadŋ na fɛŋ ɛm a, bʼow anŋ ɛsɛ kpokpo amamn a eke wɛl bʼijr ob es gbɛgbl e lɛgŋ ab af. Wɛl bʼow oc ɛwʼr es in ecʼEs Ɛw a eci. Li bʼow nʼanŋ ow e juma eci ɛtŋ wɛl bʼow oc kokrʼr juma nimamn fɛŋ.
22 Àru ŋgbafrɛ ɛm e low aw fɛŋ ɛgb es; ↄl ɛb ir nyim nyim, ↄmn, erur lele ɛrm es ɛy ab es, agŋ a ekʼɛrm lala ɛm bʼɛsŋ Ɛs Kↄtↄkↄ ab ab. 23 Ów es atar ↄfr ↄfr eke low kaka anm ɛm a, àru ɛgb es, aŋke uw any ekʼow bʼɛdŋ nuŋ ów ɛsu ɛm. 24 Ɛtŋ Ɛs Kↄtↄkↄ e juma kok ɛs itm eke kʼɛsu ów. Ow it ekʼin e low kʼakpl agŋ fɛŋ e lís, ɛgŋ ekʼↄtu eke ki yɛgm agŋ low, ke ɛ́gŋ agŋ eci cak eke bi cakʼr a e low eb. 25 Ow it ekʼɛrm frↄrↄ ɛm, li ki yɛgm agŋ a eke bʼocʼr odad es nɛnym a low, aŋke Nyam ↄtu eke kʼↄŋ ɛl abusu -lʼitŋn ɛl ecʼes an a, ke -lʼuw low nawrɛ any. 26 -Li bʼow -nʼŋgboŋ agn eci meb a ekʼucu ↄny ɛl es ab ɛm, -li kʼow -li kokmn agn ecʼerur ij, ɛtŋ -li bʼow -lʼↄg es -nʼam ↄny sow tutr amamn.