1 Yus wina anturtukat tusan kakarman untsuajai.

2 Tsawai wake mesekan pujakun,

Apurun seajai.

Tura kashisha tuke inaitsuk uwejrun takuin,

Yusnasha seajai.

Turayatun tuke napchau nintimsan pujajai.

3 Wikia Yusen nintimsan pujakun juutjai.

Turasha nukap nintimsan pujaknaka katsurman nekapeajai.

4 Apuru ameka kanurta tusamka tsangkamrukchamame.

Timiá wake mesekan pujau asan chichakchamin nekapeajai.

5 Turayatun yaanchuik pujuyaja nuna nintimsan pujajai.

6 Turasha kashi kantamnuyaja nunasha aneakjai.

Tura nintirjai nintimsan ininmamkun:

7 ¿Apurka iinka tuke kajertamkatatjik?

¿Tura iinka ataksha pengkerka awajtamkashtatjik?

8 ¿Turasha ni anengkratairingkia amukamkia?

¿Turasha Yus yaanchuik wi turatatjai tímia nunaka tuke umitsuk pujustatuak?

9 ¿Turasha Yuska ni pengkerinka kajinmarmakia?

¿Turasha iincha timiá kajertamkau asa,

wait anentramtsuk pujustatuak? tu nintimsan pujajai.

10 Yus nayaimpinam puja nuka yamaikia iijaingkia pujatsui,

tu nintimsan pujakun nintir najamrutawai.

11 Antsu ii Apuri yaanchuik pengké wainchatin turinuya nunaka aneartatjai.

12 Turasha ni turinamurin mash nintimratatjai.

13 Yusru ami turamuram nekasar pengker ainawai.

Amijai metek Yuska pengké atsawai.

14 Amek Yus asam,

wainchati takat untsuri turinuyame.

Tura mash nungkanmaya ainau ami kakarmaram nekamtiknuyame.

15 Tura ami kakarmarmijai ami aintsrum ainau angkanmamtiknuyame.

16 Yusru ame nase akupkam,

juun entsaka akankamiame.

Tura asakmin entsa timiá kuna ayat kukar wajasmiayi.

17 Tura mukuntiuka yumin jitumtikramiayi.

Turasha nayaimpinam ipiamat untsuri chichaarmiayi.

Turasha chaarim untsuri ayaararmiayi.

18 Tura katurang winamtai,

ipiamtancha antukarmiayi.

Tura chaarim ayainamtai,

nungka jiitsumir wajakmiayi.

Tura uu uurmatai,

nungkaka muchikmiayi.

19 Yusru juun entsanam ame kukarak katingtaj tusam,

entsaka akankamiame.

Antsu ami nawemjai najamamunka wainkacharmiayi.

20 Uwija wainin ni uwijarin ayas wekaamtikua nunismek ami aintsrum ainau wekaamtiksarti tusam,

Moisés tura Aarónsha inarmiame.