1 Meram nekapmatai ainau metekchau arti tusangka Apu Yuska nakitawai.

Antsu tuke metek arti tusa wakerawai.

2 Wikia miajuitjai tumamin ainaun chikich aints ainau nakitinawai.

Tura jampechu ainauka paan nintimrartin ainawai.

3 Aints pengker nintimsar pujuinauka ni turinamurinka tuke pengker nintimsar turinawai.

Antsu jimiar nintimtin ainauka jimiaran nintimu asaramtai, mengkakartin ainawai.

4 Yus mash aints ainau takatrin tura nintimaurincha itiur ainawa tusa jiistin kintia jeamtai, nu aintsu kuikiaringkia niin pengké yaingchatnuitai. Antsu Yusen nintimsar pujuinauka tuke jakatniunam

wetsuk uwemrartin ainawai. ✡ Rom 14.10-11

5 Tunau takachu ainauka pengker nintimu asar, jinta tupin aa nuni wekaasartin ainawai. Antsu tunau takau ainauka ni tunaarijai iyainawai.

6 Aints Yusen nintimsar pujuinauka tu nintimu asar, angkanmamtikiatin ainawai.

Antsu anangkartin ainauka ni pase wakeramurijai ejatkanam achikmawa nunisarang ainawai.

7 Aints Yusen nintimtichu jakamtai, ni wakeramuri mash amukaru asaramtai, jakausha ¿warinak nakasat?

8 Yusen nintimsar pujuinauka kuntuchu pujuinamtai, Yus niin angkan awajsartinuitai.

Tura Yusen nintimtichu ainauka kuntuchu pujusar wait wajaktinnum weartiniutai.

9 Pase aints ni tunau chichaamurijai chikich aints ainaun meseawai. Tura pengker nintitin

ni nekaamurijai chikich aints ainaun angkanmamtikiatnuitai.

10 Pengker nintintin ainau takatrijai emtikiar pengker wajainamtai, nu yaktanam pujuinauka warainawai. Antsu pase aints ainau jainamtaikia, aints mash warainawai.

11 Pengker nintintin ainau yayamujai aints ainau yaktan eemtikin ainawai.

Antsu pase aints ainau ni pase chichaamurijai nu yaktanka mesen ainawai.

12 Aints nintimchauka ni irutkamurin pachis pase chichaayi. Tura pengker nintiniuka chichatsuk pujuuyi.

13 Aints aujmakratin ainau chichaman jukiar, etserkaip tinamaitiat, pachitsuk etserkini wekain ainawai. Antsu aujmakartichau ainauka chichaman antukariat etserchau ainawai.

14 Aintsu apuri ni aintsrin tu pujustaram tutsuk pujamtai, nu yaktanmangka itiurkachmin nukap atinuitai. Antsu chicharkartin nintip untsuri pujusar, ni yaktarin emtikiartinuitai.

15 Aints wainchatai chikich aintsun chicharak: Wikia tumaashitjai. Antsu

akiimiakchamin asamtai, wina tumaashruka akiimiaktrukta, ukunam akikmijinam tamataikia,

ni ayu tinu asa, nekas itit nintimtuminiutia. Antsu chikich aints: Atsa, turashtatjai tusa

nakitnua nuka itit nintimtsuk angkan pujustinuitai. ✡ Prov 6.1-5

16 Tsangka nuwanka pengker nintimtusmin ainawai.

Tura aintsun takamtikin ainauka kuikian nukap achiinawai.

17 Aints wait anengkratnuka ningki pengker awajmamui.

Antsu aints wait anengkratchauka ningki timiá pase awajmamui.

18 Aints anangkartin asa, chikich ainaun anangkak kuikian achiawai. Antsu pengke aints

pengkeran takaawa nuka ukunam tuke pengker pujustinasha jukitnuitai.

19 Aints pengker nintitin ainauka tuke iwiaaku pujusartin ainawai.

Antsu tuke pase turuki turuki weenauka tuke jakatniunam jeartinuitai.

20 Apu Yus pase nintintin ainaun nakitawai. Antsu tunaarinchau ainaun jiis waraawai.

21 Pase aints ainauka nekasar ni wait wajaktintrin jukiartin ainawai.

Antsu pengker nintintin ainauka angkan pujusartin ainawai.

22 Nuwa shiirmawach ayat, nintinchau pujakka, uwejnum uwejtai kuri najanamun

kuchi nujin nujkamua nunisketai.

23 Aints pengker nintintiniu wakeramuri tuke pengker artinuitai.

Antsu pase aints ainau ni wakeramurijai tuke suwiran sumamtikinawai.

24 Aints surichu ni waririn suritsuk chikich aints ainaun suinayat,

ni waririn nuna nangkamasarang untsurin jukiartin ainawai.

25 Aints surichu kuikiartin wajastinuitai. Tura aints chikichan ni yuumamurin sua nusha

ni yuumamurincha tuke wainkatnuitai.

26 Aints trigon uuk ukuawa nunaka usukrartin ainawai. Antsu aints ainau: Wait aneasam

sumamtikrukta tinamtai, suritsuk surawa nu aintsnaka: Yus yainmakti tinawai.

27 Aints pengkeran turataj tusa tu nintimias pujaunka pachisar: Nuka nekas pengkeraitai tiartinuitai.

Antsu aints tunaun turatas wakerakka, nekas pase pujustinuitai.

28 Aints kuikiartin: Wina kuikiarjai yuumatsuk pujajai tauka itiurkachminnum iyaartinuitai.

Tura asa numi nukee kaarua nunisketai. Antsu pengker nintinniuka numi nukee samek aina nunisketai.

29 Aints ni jeen pujuinaun wait anentsuk pujauka ukunam ningki juwaktinuitai.

Tura aints nintinchauka tuke aints paan nintimniu inatiri atinuitai.

30 Pengker nintintin ainauka numi nerek wajawa nunisarang ainawai. Tura asar tuke iwiaaku

pujusartinuitai. Tura chikich ainaun: Yus umirkata. Turakmeka uwemratatme tinu ainauka

nekasar paan nintimsar pujuinawai.

31 Yusen umirkaru ainauka ju nungkanam ni turamurijai metek pengkeran juwinamtai, Yusen

umirkacharu ainauka tunau asar, ni turamurijai metek wait wajakartiniun juinawai. ✡ 1 Pe 4.18