1 Yusru wikia ami anengkratairmin tura ami pengkeerumnasha warartustasan wakerajai.

Tura asan amincha kantamruatasan wakerajme.

2 Turasha tunaarinchau pujustasan wakerajai.

¿Amesha winisha warutik winitam?

Wina jearun pujaknasha pengké tunaarinchau pujustasan wakerajai.

3 Tura pasé turutniunka wikia pengké nintimrashtatjai.

Yusen umirtan nakitinaunka wikia nakitajai.

Tura asan wini pengké winicharti tusan nakitratatjai.

4 Tura pasé nintimtancha pengké nintimrashtatjai.

Tura pasé aa nunaka turutnasha nakitajai.

5 Aints anumkar ni irutkamurin pachisar pasé chichari nauncha itatmamtikiatatjai.

Tura miajuitjai tumamin ainaunka jiitnasha nakitajai.

6 Antsu aints anangmichu ainau wijai tsaniasar pujusarti titatjai.

Tura Yusen umirkaru ainau nuke wina inatir arti tusan tsangkatkatatjai.

7 Anangkartin ainauka kichkisha wina jearningkia pujuschartin ainawai.

Tura wait chichamrintin ainausha kichkisha wijaingkia tsaningchartin ainawai.

8 Kintajai metek wina nungkarun pasé aints ainaunka itatmamtikiatnuitjai.

Tura pasé takau ainaunka mash Yuse yaktarinian jiiktinuitjai.