1-2 Aints Yus wina ejarkati tusa,

Yusen nekas juuntan tura nekas kakarman seatas wakerakka tu seatnuitai:

“Ameketme wina ayamrutkatnumka,

tura wina ejarkatnumka.

Tura wina Yusur asakmin,

wikia amin nintimtusan pujajme”.

3 Yusek ningki amin ayamrutmaktinuitai.

Tura sungkur ainamunmasha ningki amin tsuwarmartinuitai.

4 Atash ni uchichirin nanapejai tektuk pujawa nunisang waitmaktinuitai.

Tura ni wait anengkratairi tantaara tumau asamtai,

nekasam wina ejarkatnuitme tusam, pengker nintimsam pujustinuitme.✡ Sal 61.4

5 Tura kashisha mantuwarai tusam,

tura tsawaisha tsentsak wina tukuri tusam,

shamtsuk pujustinuitme.

6 Tura teetisha iwianch achirkai tusam,

tura tsawai sungkur achirkai tusam,

nuka nintimtsuk shamtsuk pujustinuitme.

7 Ame menarminini untsuri aints sungkurjai jainau wainiatmek,

tura ami untsurminini untsuri aintsun maainau wainiatmek,

ameka jakashtinuitme.

8 Yus pasé ainaun wait wajaktiniun susatnuitai,

antsu ameka waitka wajakchatnuitme.

9-10 Yus nayaimpinam puja nuka wina ejarkatnuitai tusam,

tura wina ayamrutkatnuitai tau asam,

pasé aa nuka wainkashtinuitme,

turasha sungkursha jeemningkia utuashtinuitai.

11 Ame tuni wekaame nunisha Yus ni awemamuri irunun amin waitmakarat tusa inatmartatui.

12 Tura nawemin kayan tukumkai tusar,

ni uwejejai achirmakartatui.✡ Mat 4.6; Luc 4.10-11

13 Tura asamtai juun yawaa tura napisha tura titingsha tura pachim ainamunmasha wekaasatnuitme.✡ Luc 10.19

14 Yus chichaak:

“Aints wina anentinak:

Ameketme Apum turutinaunka wikia uwemtikratnuitjai,

turan ayamruktinuitjai.

15 Tura wina yainkata turutinamtaikia,

wikia yaingtinuitjai,

tura nijai tsaniasan pujustinuitjai.

Tura napchau nintimsar pujuinamtaikia angkanmamtikiatnuitjai.

Tura nu aintsnaka pachisan:

Nekas pengkeraitai titinuitjai.

16 Tura nukap musach pujusti tusan wainkatnuitjai,

tura pujut nangkankashtinun susatnuitjai”,

Yus tawai.