1 Apuru wikia wait wajakun yuumakun pujau asamtai,

wait aneasam anturtukta.

2 Tura amin nintimtakun pujau asamtai,

wina yainkata.

Ameka wina Yusruitme.

Wikia aminu inatiram asan,

amin nintimtajme.

Tura asamtai uwemtikrurta.

3 Apuru kintajai metek seajme.

Tura asamtai wait anentrurta.

4 Yusru aminu inatiram asan,

amin tuke seajme.

Tura asamtai nintir waramtikrusta.

5 Apuru ame nekas pengker asam,

aintsu tunaari tsangkuratnuitme.

Tura amin seatmin ainauka pengker awajsatnuitme.

6 Yusru wi seamur anturtukta,

tura anturtukam nekartuata.

7 Wi napchau nintimsan amin untsuam anturtuktinuitme.

8 Apuru amijai metekka Yuska atsawai.

Tura aminu turamurmijai metekka kichkisha atsawai.

9 Apuru mash nungkanmaya ainau najanamiame nuka amin jear:

Ameketme juuntam turamiartinuitai.✡ Ap 15.4

10 Amek Yus asam,

nekas juuntaitme.

Tura asam wainchati takatcha mash najanawaitme.

11 Yusru jintim nekamtikruata.

Nu turakminka tuke nemarsatnuitjame.

Tura ami naarmin pachisan:

Ameketme juuntam titin nintimtikrurta.

12 Apuru wina Yusur asakmin,

tuke wina nintirjai:

Ameketme pengkeram titatjame.

Tura ami naarmin pachisan:

Ameketme kakarmam tuke titatjame.

13 Wina nukap anentruru asam,

mengkakatnunam we tusam uwemtikrurmiame.

14 Yusru jampesarang pujuinauka aminka nintimtsuk pujuinau asar,

wina pasé awajtinak mantuwartas winitrinawai.

15 Antsu ameka Apuru nekasam Yus asam,

jaimiasam wait anengkratnuitme.

Tura asamtai anengkratairumka nangkankashtinuitai.

Tura ami chichamim nekas aa nuka tuke nangkankashtinuitai.

16 Wina jiirsam wait anentrurta.

Turam kakarmaram surusta.

Wikia ami inatiram asamtai uwemtikrurta.

17 Ami pengkeerum inaktursata.

Tura wina pengker awajtakmin,

wina kajertin ainauka nuna wainkar natsaarartinuitai.

Apuru ameka wina yainkau asam,

wina pengker nintimtikrurmiame.