1 Yusru wina kajertakmesha wait aneasam jiyatkaip.

Tura wina kajertukam pujayatmek wait aneasam wait wajaktinka surusaip.✡ Sal 6.1

2 Aints tishimkurijai chikich aintsun kettuk ijumua

nunisnak nekapmamjai.

Tura ami uwejem yakairun meram patatua nunisnak nekapmamjai.

3 Wina tunaar jiisam kajertuku asakmin namangkruka mash najamrutawai.

Tura wina ukunchrusha kupinakua nunisnak nekapmamjai.

4 Tura wina tunaaruka piakuitai tu nekapmamu asan,

merman entsakua nunisnak tsantrachmin nekapmamjai.

5 Wikia timiá nintinchau asan tunaun takau asamtai,

wina namangkruka kuchap kawaawa nunisang mejeawai.

6 Tura asamtai wikia kintajai metek wake mesekan tsuntsuman wekaajai.

Tura pengker nintimsan pujustatkaman tujintajai.

7 Wi tsuweamtai,

wina tuntupruka ji kapawa nunisnak nekapmamkun,

wina namangkruka mash najamrutawai.

8 Tura wina kakarmarka pengké atsau asamtai,

wikia napchau nintimsan juutmin nekapeajai.

9 Apuru wina nintimauruka mash nekau asakmin,

wi chichaktatkaman mayairukan pujaja nusha waitme.

10 Wina nintirka kakarman teetui.

Tura wina kakarmarka atsawai.

Tura jiirusha kusuawai.

11 Tura wina amikur pengker ainia nu tura wina wear ainausha kuchaprun wainkar,

winaka jiirtancha nakitrinawai.✡ Sal 31.11; 88.18

12 Tura wina mantuwartas wakerutinauka ejatkanam kuntinun achikiartas wakerina nunisarang achirkartas wakerutinawai.

Tura wina pasé awajtusartas wakerutinauka kintajai metek mesturartas chichaman najatrinawai.

13 Antsu wikia aints antichua nunisnak pasé aints ainau chichamenka antutsuk pujajai.

Turasha chichachua nunisnak takamtaik pujajai.

14 Wikia aints antichua tumau asan,

ayamrumaktatkaman chichaschamin nekapeajai.

15 Apuru wina Yusur asakmin,

ameketme wina ayamrutkatnumka tusan,

wina nemasur ainau amek nepetkata tusan nakajme.

16 Antsu wina nepetukar warasarai tura wishikrurarai tusan seajme.

17 Wikia nekasan jatanak wajasjai.

Tura asan tuke najaimiamur mijantratsui.

18 Wina tunaar ainau waurmamtikrinau asaramtai,

wikia etserkatasan wakerajai.

19 Wina nemasur nukap yujarari.

Tura nangkamiar kajertin ainausha untsurintai.

20 Niinka wikia pengker awajinamaitiat,

winaka pasé awajtusarmayi.

Wi pengker aa nunak takastasan wakerai waitinayat,

wina nakitrinak pasé nintimtursar pujuinawai.

21 Apuru winaka ajapruamka ukurkiip.

Yusru wijai tuke pujusta.

22 Yusru wina uwemtikrurtin asakmin,

wári yainkata tusan seajme.