1 Papeachmaitiat pase aintska nukap sapijmiaku asa tupikiaktinuitai.

Antsu pengkera nuna turinauka juun yawaaya nunisarang sapijmiatsuk wajainawai.

2 Pase aints yujainamtaikia, aints untsuri chikich ainaun inarartas wakerinawai. Antsu apu paan nintimniuka tura nekauka aints ainau taetet wajascharti tusa pengker inartinuitai.

3 Pase aints kuikiartichu ainaun itit awajea nuka yumi nukap jitur arakan meseawa nunisketai.

4 Umiktin chichaman umirchau ainauka pase aintsun pachisar: Nuke pengkeraitai tinawai.

Antsu umiktin chichaman umirinauka pase aints ainaun kiishmakartin ainawai.

5 Pase aints ainauka pengker turatniunka nekainatsui. Antsu Apu Yusen seaina nuka

pengker turatniuka warimpita tusar mash nekaawartin ainawai.

6 Aints kuikiartichu ayat, anangmichuka nekas pengkeraitai.

Antsu kuikiartin pase nintimias puja nuka nekas paseetai.

7 Aintsu uchiri Yusen umiktin chichaman umirkauka, nekas paan nintimias pujawai.

Antsu chikich aints aya yurumkanak wakerin ainaujai tsanias pujakka, aparin inatsartinuitai.

8 Aints kuikian ikiasuka niin tumaashmawaru ainaun chicharak: Atum akirkamarume nuna nangkamasrumek akirkataram taa nuka jakamtai, kuikian nukap ikiauntukmia nuna

chikich aints wait anenkartin kuikiartichu ainaun susati tusa ukuktinuitai.

9 Aints Yusen umiktin chichaman umitan nakitamtaikia, Yus ni seamurincha antukchatnuitai.

10 Aints pengke aintsun tunaun takamtikin asa, kuntin ejatkanam niapua nunisang mengkakatnuitai.

Antsu tunaun nakitin ainau Yusnum pujusartin ainawai.

11 Aints kuikiartin ningki nintimtumas: Wikia nintipitjai tumamui. Antsu kuikiartichuka nintip asa,

nu kuikiartinka paanka nintimtsui tusa nekamtikiatnuitai.

12 Pengker turin ainauka pase aints ainaun nepetinamtai, aints mash warasartinuitai.

Antsu pase aints ainauka pengker ainaun nepetinamtai, aints mash anumkartinuitai. ✡ Prov 28.28

13 Aints ni tunaarin uwauka pengkerka pujuschamnawaitai.

Antsu ni tunaarin ujaak nunia inaiyamtaikia, Yus tsangkuratnuitai.

14 Yusen tuke umirak puja nuka nukap warastinuitai.

Antsu Yusen umiitan nakitauka itiurkachminnum wait wajaktinuitai.

15 Apu pase nintiniuka ni aintsri kuikiartichu ainaun wait anentsuk inawa nuka

juun yawaa kajeu tura yaparak pujawa nunisketai.

16 Apu wait anengkratchauka: Aintsur kuikiartichu ainawai tusa nekayat, kuikian nukap akirkarti ta nuka nintinchawaitai. Antsu aints kuikian nukapka nakitauka untsuri musach angkan pujustinuitai.

17 Aints mangkartinka ni turamurin tuke kajinmatsuk nintimua nuka wekaakini waja wajaka jakatnuitai. Tura mangkartin asamtai, chikich aints ainau: Iijai pujusmi tichartin ainawai.

18 Aints anangmichuka itiurkachminnum pujayat, angkan wajastinuitai.

Antsu pase nintiniuka itiurkachminnum aneachmau mengkakatnuitai.

19 Aints ni ajarin takakmawa nuka tsukamashtinuitai.

Antsu naki ainaujai tsanias wekawa nuka kuikiartichu wajastinuitai.

20 Aints anangmichun pachisar chikich aints ainau: Nuke pengke aintsuitai tiartin ainawai. Tura chikich aints waurak wári kuikiartin wajastas wakerakka, wait wajaktinuitai.

21 Aints ainauti mash metek ainaji. Turayatrik aints yaparak tantan kasamak juwawa nuna pachis:

Nu aintska paseetai tichamin ainaji.

22 Aints wári kuikiartin wajastas wakerayat: Ukunmaka kuikiartichu wajastinuitjai tusangka nekaachminuitai.

23 Aints chikich aintsun chicharkamia nuna pachis ukunam: Nuka pengke aintsuitai titinuitai.

Tura chikich aints anangkak: Ameka pengke aintsuitme ta nuna chichamenka wári kajinmaktinuitai.

24 Aints ni aparin tura nukurincha kasarkayat: Wi turaja nuka tunaachawaitai tauka meskartinu amikrintai.

25 Wikia miajuitjai tumamtinka maaniktas wakerawai. Antsu Apu Yusen nintimtina nuka

waring achat ni turina nuka mash pengker turinawai.

26 Aints ningki nintimtumas: Nintipitjai ta nuka nintimchawaitai.

Antsu paan nintimniuka angkan pujustinuitai.

27 Aints kuikiartichun yayaa nuka pengké yuumakchatnuitai.

Antsu kuikiartichun yaaitan nakitina nuka nukap usukramu ainawai.

28 Pase aints ainauka pengker aints ainaun nepetinamtai, aints ainau anumrukartin ainawai. Antsu

pase aints ainau mengkakaramtai, pengker nintintin ainauka eemkartin ainawai. ✡ Prov 28.12