1 ¿Paan nintimrataram ta nuka kakarman untsuatsuash? 2-3 Tura muranam jinta tsengkeakunam

aints nangkaminaun, tura yakta waitirin untsuri aints wayawartin ainaun jiis untsuak: 4 Aints ainautirmin

wikia untsuajrume. Tura mash antuktaram tusan chicharjarme. 5 Nekachutiram, nintip ataj tusaram wakerakrumka nuimiartaram. Tura nintinchau ainautirmesha, paan nintimratniusha nekaataram.

6 Wikia timiá pengker chichaman ujaktasan wakerajrume. Tura asamtai anturtuktaram.

7 Wi tajarme nuke nekasaintai. Anangkartin chichamnaka arantak nakitajai. 8 Wina chichamruka

mash nekas chicham ainawai. Kame, chichamruka mash wait chichamchau ainawai. 9 Nintip ainau wina chichamrun antinauka mash: Nu chichamka nekasar paan ainawai, tura nekau ainausha: Nuka waitchau

ainawai tinawai. 10 Tura asamtai wi nuikiartamur kuikian tura kurincha nangkamasrum wakeruktaram tajarme.

11 Kame, paan nintimratniuka kaya timiá akik aina nuna nangkamasang pengkeraitai.

Tura asamtai ju nungkanam aints ainau wakerina nujai metek chikichkisha atsawai tajarme.

12 Wiitjai paan nintimtikiartinaka. Wikia chichakchamin ayatun, nunak titasan wakerajrume.

Wikia nekatijaingkia tsaniasan pengker pujajai. Tura asan paan chicharkartin ainauka winar ainawai.

13 Iinu Apuri Yus umirkatniuka tunau nakitamujai metekaitai. Tura asan miajuitjai

tumamunka, tura pase turatniunka, tura tunau chichamnasha mash nakitajai. 14 Chikich ainaun pengker

chicharkartinasha, tura nuka pengkeraitai, antsu nusha nekas paseetai titincha wini wininauka paan nekaawartin ainawai. 15 Apu ainauka paan nintimtikrartin asar, ni aintsri ainaun inarartinuitiai.

Tura inakratin ainausha ni aintsri ainau umirkarti tusar, umirkatin chichaman najaninawai.

16 Wijaingkia ju nungkanmaya juun ainau ni aintsri ainaun akupinawai. Tura chichaman

nekamtikin ainau wijai ni aintsri ainaun inainawai. 17 Wina anentina nunaka wisha nunisnak aneajai.

Tura wina eatinauka waitkartin ainawai. 18 Wikia aints ainaun kuikiartin wajasarti tusan

yaingtinuitjai. Tura chikich aints ainauncha iniararti tusan pengker awajsartinuitjai.

19 Wikia aints ainaun suaja nuka kurin nangkamasang tura kuikian nangkamasang timiá pengkeraitai.

20 Wina jintarka tupin asamtai, aints ainau nu jintan amakar, nuni wekajinau asar,

nuka chikich aints ainaunka pengker awajsartas wakerinawai. 21 Tura wina anentina nuka kuikiartin wajasarti tusan tsangkatkatnuitjai, tusa Yus turamji

22 Apu Yus nu nangkamtaik nungkan najantsuk wina najatamiayi. 23 Tura nungkanka najantsuk nekamtikin ata tusa eemak inaitukmiayi. 24 Tura juun entsa, nunia, mash entsa ainausha atsuinai,

wikia tuke pujuyajai. 25 Tura mura ainauncha najantsuk Yuska wina najatamiayi.

26 Tura nungkancha tura ajancha, tura nungka tsetserin najantsuk wina najatamiayi.

27 Yus nayaimpin najanamtai, juun entsa yakinini wikia nijai pujuyajai. 28 Tura yurangmincha mukuntiuncha najanak, juun entsa nekas kuna aina nuna najanamurincha wainak.

29 Tura Yuus chichaak: Entsa nungkan amuru kuyuati tura mujurti tusa, tura juun entsa

nujangkruashti tusa, nungka esantiri tura wangkantirisha nekapmarmia nuni

30 wisha ni chichamen antinuyajai. Tura kintiajai metek nuna mash wainkan,

nijai tsaniasan pujau asan wararnuyajai. 31 Yus nungkan mash najanau asa,

aintsun najanau asamtai, nukap warasan pengker nintimnuyajai.

32 Tura asamtai uchitiram, yamaikia anturtuktaram. Wi tajarme nu umiakrumka warastinuitrume.

33 Wi unuiniarjarme nuka antukrum nintip wajasrum, nakitsuk umirtuktaram.

34 Aints wina anturtuk kintiajai metek wina jearun jea nakawa nuka nekas warastinuitai.

35 Tura, aints paan nintimratniurin eakka, tuke iwiaaku pujustinasha eawai. Tura asamtai

Apu Yus niin pengker awajsatnuitai. 36 Antsu aints wina eatsuk tuntupea nuka ningki

wiasmamkatnuitai. Tura, wina nakitrina nuka mash tuke jakatniunam wetasar wakerinawai.