1 Tekꞌuchiriꞌ xinwil jun kꞌakꞌ uwa kaj y jun kꞌakꞌ uwachulew, ma ri nabꞌe uwa kaj y ri nabꞌe uwachulew xemalkaꞌnik, yey ri mar na jinta chik. 2 Riꞌin in Juan xinwil ri santowilaj tinamit, ri kꞌakꞌ Jerusalem, e riꞌ xqaj lo chilaꞌ chikaj petinaq rukꞌ ri Dios, yey lik wiqital chi utz pachaꞌ juna ali lik uwiqom ribꞌ echiriꞌ kuꞌkꞌulu rala kakꞌuliꞌ rukꞌ. 3 Y xinta kꞌu jun qulaj xel lo pa ri tzꞌulibꞌal re taqanik, lik ko xchꞌawik, jewaꞌ kubꞌiꞌij:

«¡Chatapeꞌ! Ri Dios kakꞌojiꞌ chikixoꞌlibꞌal ri tikawex y kajeqiꞌ kukꞌ; ma rike e utinamit, y Rire e Dios ke rike. 4 Ekꞌu ri Dios kusuꞌ ruwaꞌal kiwach konoje rike. Chwi kꞌu woꞌora na jinta chi kamik, na jinta chi oqꞌej, na jinta chi kejuyuyik y na jinta chi kꞌaxkꞌobꞌik; ma ronoje taq ri kꞌo lo ojertan, ya xikꞌowik» kachaꞌ.

5 Ekꞌuchiriꞌ, ri Jun tzꞌul pa ri tzꞌulibꞌal re taqanik, jewaꞌ xubꞌiꞌij:

«Chatapeꞌ: Riꞌin kanꞌan kꞌakꞌ che ronoje taq ri kꞌolik» xchaꞌ.

Yey xubꞌiꞌij chwe:

«Chatzꞌibꞌaj taq waꞌ, ma wa chꞌaꞌtem lik areꞌ y lik qatzij» xchaꞌ.

6 Je tanchi waꞌ xubꞌiꞌij chwe:

«Ekꞌu waꞌ xutzir ronoje. Riꞌin in ri jeqebꞌal re yey in ri kꞌisbꞌal re, jelaꞌ pachaꞌ ri kaꞌibꞌ letra A y Z.* “A y Z”: Kil “Alfa y Omega” pa vocabulario. Chike kꞌu konoje ri katzajin kichiꞌ, kansipaj ri yaꞌ kalax lo che ri akꞌal re kꞌaslemal. 7 China kꞌu ri kachꞌijow uchuqꞌabꞌ taq ri na utz taj, kukꞌul ronoje taq waꞌ, yey in kꞌu u Dios riꞌ, y rire kuꞌana walkꞌoꞌal. 8 Noꞌj ri e turun,† “Turun”: Waꞌ e ri kakixiꞌij kibꞌ y kekꞌix che utzijoxik Ruchꞌaꞌtem ri Dios. y taq ri xkijolij ri kubꞌulibꞌal kikꞌuꞌx wukꞌ, ri kakiꞌan ri lik kꞌixbꞌal uwach y ri e kamisanel, ri kaketzꞌabꞌej uwa kiqꞌij kukꞌ jujun chik na kikꞌulel taj y ri e aj itz, ri e aj tioxabꞌ y konoje ri kakiꞌan raqꞌubꞌal, konoje kꞌu rike keyaꞌ pa ri jun luwar kayenen che aqꞌ y kajinow rukꞌ azufre. Ekꞌu ukaꞌm kamik waꞌ» xchaꞌ.

9 Tekꞌuchiriꞌ, xqibꞌ lo wukꞌ jun chike ri wuqubꞌ ángeles, ri xyaꞌtaj ri wuqubꞌ copas chike, ri nojinaq che ri wuqubꞌ kꞌisbꞌal kꞌaxkꞌobꞌik.* Ap. 15:1; 16 Xchꞌaꞌt kꞌu wukꞌ, jewaꞌ xubꞌiꞌij: «Saꞌa na wara, ma kankꞌut rali chawe ri kakꞌuliꞌ rukꞌ ri Qꞌapoj Bꞌexex» xchaꞌ. 10 Ekꞌu laꞌ chupa ri xkꞌut chinuwach ruma ri Ruxlabꞌixel ri Dios, ri ángel xinukꞌam bꞌi chwi jun nimalaj juyubꞌ lik naj uwiꞌ y xukꞌut chwe ri nimalaj santowilaj tinamit Jerusalem, e riꞌ katajin lo uqajik chilaꞌ chikaj petinaq rukꞌ ri Dios. 11 Waꞌ lik kawon che runimal uchomalil ri Dios; ruwonibꞌal e pachaꞌ juna chomilaj abꞌaj pachaꞌ ri jaspe, lik kajuljut upa pachaꞌ chi vidrio. 12 Sututal kꞌu rij rukꞌ jun nimalaj tapia lik naj uwiꞌ; kꞌo kabꞌlajuj okibꞌal che y chujujunal okibꞌal kꞌo jun ángel aj chajal re, yey che taq ri okibꞌal tzꞌibꞌital jun bꞌiꞌaj ke ri kabꞌlajuj tinamit re Israel. 13 Yey e taq ri okibꞌal che ri tapia oxibꞌ kꞌo pa relebꞌal qꞌij, oxibꞌ kꞌo pa norte, oxibꞌ kꞌo pa sur y oxibꞌ kꞌo putzaqibꞌal qꞌij. 14 Ri nimalaj tapia re ri tinamit tzꞌaqom lo kabꞌlajuj nimaq taq abꞌaj pa raqanibꞌal; yey chujujunal ri nimaq abꞌaj, tzꞌibꞌital rubꞌiꞌ jun chike ri kabꞌlajuj taqoꞌn re ri Qꞌapoj Bꞌexex.

15 Ri ángel kachꞌaꞌt wukꞌ rukꞌaꞌam jun vara re pajabꞌal ꞌanom rukꞌ oro chaꞌ kupaj ri tinamit, taq ri okibꞌal y ri tapia. 16 Ri tinamit cuadrado uꞌanom; ri raqan junam rukꞌ ruwach. Ekꞌu ri ángel xupaj ri tinamit rukꞌ ri vara kꞌo puqꞌabꞌ. Y xeꞌeloq kaꞌibꞌ mil rukꞌ kaꞌibꞌ ciento kilómetros runajtijil ri raqan, jelaꞌ runajtijil uwiꞌ, y jelaꞌ runimal uwach. 17 Tekꞌuchiriꞌ, xupaj runajtijil ri raqan ri tapia; sesenta y cinco metros‡ Pa versículo 16 ri chꞌaꞌtem griego kubꞌiꞌij “doce mil estadios” (waꞌ keꞌeloq 12 x 1,000 = 12,000). Yey pa ri versículo 17 kubꞌiꞌij “ciento cuarenta y cuatro codos” (waꞌ keꞌeloq 12 x 12 = 144). Ojertan “12” keꞌelawi “tzꞌaqat uwach”. kꞌo che. Ri pajabꞌal xuchapabꞌej wa ángel e junam rukꞌ ri kakichapabꞌej ri tikawex.

18 Ri tapia e ꞌanom rukꞌ abꞌaj jaspe; noꞌj ri tinamit e ꞌanom rukꞌ saqil oro, kawon upa jelaꞌ pachaꞌ chi vidrio. 19 Taq ri pa raqanibꞌal ri tapia re ri tinamit wiqital rukꞌ ronoje chomilaj taq abꞌaj. Ri nabꞌe, rukꞌ abꞌaj jaspe; rukaꞌm, rukꞌ zafiro; rurox, rukꞌ ágata; rukaj, rukꞌ esmeralda; 20 ruroꞌ, rukꞌ ónice; ruwaqaq, rukꞌ cornalina; ruwuq, rukꞌ crisólito; ruwajxaq, rukꞌ berilo; rubꞌelej, rukꞌ topacio; rulajuj, rukꞌ crisopraso; ri junlajuj, rukꞌ jacinto y rukabꞌlajuj, rukꞌ amatista. 21 Taq ri kabꞌlajuj okibꞌal e kabꞌlajuj perlas; chujujunal okibꞌal e jun nimalaj perla. Y ri nimabꞌe kꞌo chunikꞌajal ri tinamit ꞌanom rukꞌ saqil oro, lik kajuljut upa pachaꞌ chi vidrio.

22 Yey chupa kꞌu wa tinamit na xinwil ta juna templo pa kaloqꞌnimax wi ri Dios; waꞌ na kajawax ta chik, ma chilaꞌ pa ronoje luwar kꞌo ri Dios Qajawxel, ri kꞌo ronoje unimal chuqꞌabꞌ puqꞌabꞌ, y kꞌo ri Qꞌapoj Bꞌexex. 23 Che wa tinamit na kajawax tane uwonibꞌal ri qꞌij y ri ikꞌ, ma runimal uchomalil ri Dios kutzij upa yey ri Qꞌapoj Bꞌexex e uwonibꞌal riꞌ. 24 Ekꞌu ri jujun chik tinamit kebꞌin chwa ri qꞌijsaq re wa jun tinamit; yey ri e taqanelabꞌ che ruwachulew kakikꞌam lo chupa wa tinamit ri chomilaj kibꞌeyomalil re yakbꞌal uqꞌij ri Dios.* Is. 60:3, 5 25 Taq ri okibꞌal re wa tinamit na katzꞌapiꞌ ta chi kꞌenoq, ma chiriꞌ na jinta chi aqꞌabꞌ. 26 Ri chomilaj bꞌeyomalil ke taq ri tinamit e kakꞌam lo che wa tinamit re yakbꞌal uqꞌij. 27 Chupa kꞌu waꞌ wa tinamit na jinta kꞌana chꞌul kok loq, na kok ta uloq ri kuꞌan ri lik kꞌixbꞌal uwach y ri kuꞌan raqꞌubꞌal; ma xew kebꞌok lo ri tzꞌibꞌital kibꞌiꞌ chupa ri libro re kꞌaslemal re ri Qꞌapoj Bꞌexex.