19
Ri e kꞌo chilaꞌ chikaj kakiyak uqꞌij ri Dios
1 Kꞌisbꞌal re waꞌ xinta ukꞌiyal winaq chilaꞌ chikaj jewaꞌ kakibꞌiꞌij:
«¡Aleluya!
¡Ri Dios Qajawxel taqal che kayak uqꞌij
ruma ri kolobꞌetajik uyaꞌom chiqe
y ruma runimal uchomalil y ruchuqꞌabꞌ!
2 Rire paqatzij wi lik usukꞌ
y lik jusukꞌ ri qꞌatbꞌal tzij kuꞌano.
Ma xuqꞌat tzij puwi ri jun ixoq lik na chom ta rubꞌinik,
ri xebꞌumin ri tikawex re ruwachulew chaꞌ kemakun rukꞌ.
Ekꞌu ri Dios xuꞌan ukꞌaxel che
ruma xebꞌukamisaj ri e aj chak re ri Dios» kechaꞌ.
3 Je tanchi waꞌ xkibꞌiꞌij:
«¡Aleluya!
Na jinta utaqexik kabꞌuqlan chikaj rusibꞌol ri aqꞌ
pa xkꞌaq wubꞌi rixoq» xechaꞌ.
4 Ekꞌuchiriꞌ, ri veinticuatro nimaq winaq kukꞌ ri kajibꞌ kꞌo kikꞌaslemal pachaꞌ e ángeles,* Ap. 4:6-8 xkiqasaj kimejelem kꞌa chuꞌlew y xkiloqꞌnimaj uqꞌij ri Dios ri tzꞌul pa ri tzꞌulibꞌal re taqanik, jewaꞌ kakibꞌiꞌij:
«¡Amén! ¡Aleluya!» kechaꞌ.
5 Chupa kꞌu ri tzꞌulibꞌal xtataj jun qulaj, jewaꞌ kubꞌiꞌij:
«Chiyaka uqꞌij ri qa Dios,
iwonoje ri kixchakun chupa ruchak,
iwonoje ri kꞌo xiꞌin ibꞌ iwukꞌ chwach,
chinimaꞌq chichꞌutiꞌq» kachaꞌ.
6 Tekꞌuchiriꞌ, xinta pachaꞌ kiqul ukꞌiyal winaq jelaꞌ pachaꞌ ruchꞌawibꞌal utzaꞌm yaꞌ echiriꞌ kakꞌunik y pachaꞌ uchꞌawibꞌal unimal jabꞌ, jewaꞌ kakibꞌiꞌij:
«¡Aleluya!
Ma e kataqan ri Dios Qajawxel,
ri kꞌo ronoje unimal chuqꞌabꞌ puqꞌabꞌ.
7 Chojkiꞌkotoq, lik chojkiꞌkotoq y qayaka uqꞌij Rire,
ma xopon ruqꞌijol ri kꞌulanikil re ri Qꞌapoj Bꞌexex
y ri rixoqil lik uwiqom chi ribꞌ.
8 Ma che rire yaꞌtal wi kuwiq ribꞌ
rukꞌ chomilaj uqꞌuꞌ ꞌanatal rukꞌ kꞌul lino
lik kawolqꞌinik» kechaꞌ.
Waꞌ wa kꞌul lino e kꞌutubꞌal re ri jusukꞌ kibꞌinik kisilabꞌik rutinamit ri Dios.
Ri nimaqꞌij re rukꞌulanikil ri Qꞌapoj Bꞌexex
9 Ekꞌu ri ángel jewaꞌ xubꞌiꞌij chwe: «Chatzꞌibꞌaj waꞌ: Lik nim kiqꞌij kalaxik konoje ri esikꞌim pa ri waꞌim re rukꞌulanikil ri Qꞌapoj Bꞌexex» xchaꞌ.
Yey jewaꞌ tanchi xubꞌiꞌij chwe: «Wa chꞌaꞌtem e re ri Dios y lik qatzij» xchaꞌ.
10 Ekꞌu riꞌin xinxukubꞌaꞌ wibꞌ xeꞌraqan uqꞌabꞌ ri ángel re kanloqꞌnimaj uqꞌij. Pero rire jewaꞌ xubꞌiꞌij chwe: «Chata peꞌ, lik maꞌan laꞌ, ma riꞌin xa in jun aj chak re ri Dios jelaꞌ pachaꞌ riꞌat y jelaꞌ pachaꞌ ri hermanos, ri kitaqem ri Qꞌijsaq uqꞌalajisam ri Qanimajawal Jesucristo. Xew chayaka uqꞌij ri Dios, ma ri Qꞌijsaq re ri Qanimajawal Jesucristo e ukꞌuꞌxibꞌal ri saqil qꞌalajisanik» xcha chwe.
Rukꞌunibꞌal ri Qanimajawal Jesucristo
11 Tekꞌuchiriꞌ, xinwil ruwa kaj jaqalik y xinwil kꞌu jun kawayuꞌ saq rij. Yey ri kojoyom re jewaꞌ rubꞌiꞌ: “Jusukꞌ y Usukꞌ”, ma chi usukꞌlikil kuqꞌat tzij y kuꞌan chꞌaꞌoj. 12 Taq ruwach lik kewonik pachaꞌ aqꞌ kareprotik y chwi rujolom kojom ukꞌiyal diademas; yey kꞌo jun bꞌiꞌaj tzꞌibꞌital che y na jinta junoq kamajaw usukꞌ, xew Rire kumaj usukꞌ. 13 Yey ruqꞌuꞌ bꞌalaꞌl pa kikꞌ y rubꞌiꞌ Rire e: “Ri Tzij re ri Dios.” 14 Taq ri ejércitos re chilaꞌ chikaj eteran chirij, e kꞌo lo chwi kawayuꞌ saq kij. Kikojom kiqꞌuꞌ ꞌanatal rukꞌ kꞌul lino lik saq y lik chom. 15 Puchiꞌ ri Jun ukojom lo ri kawayuꞌ saq rij, kel lo jun espada lik tꞌisiꞌs utzaꞌm chaꞌ rukꞌ waꞌ kuꞌan kꞌax chike taq ri tinamit. Rire kataqan pakiwiꞌ rukꞌ jun vara chꞌichꞌ yey kuꞌan chike pachaꞌ junoq kuyiqꞌiyaꞌ upa ri uva chaꞌ kel ruwaꞌal. Rukꞌ kꞌu waꞌ kaqꞌalajin wi runimal royowal ri Dios, ri kꞌo ronoje unimal chuqꞌabꞌ puqꞌabꞌ. 16 Che kꞌu ruqꞌuꞌ chwi raꞌ jewaꞌ tzꞌibꞌitalik:
«TAQANEL PAKIWI RI TAQANELABꞌ
Y AJ WACH PAKIWI TAQ RI KꞌO KIWACH.»
17 Tekꞌuchiriꞌ, xinwil jun ángel takꞌal chwach ri qꞌij, jewaꞌ ri kasikꞌin che ubꞌiꞌxik chike konoje rawaj kexikꞌikꞌ lik chikaj, ri etijol ke ri ekaminaq chik: «Chixpetoq, chimolo iwibꞌ che ri nimalaj waꞌim kuya ri Dios 18 chaꞌ kixwaꞌ rukꞌ ri kitiꞌjil ri e taqanelabꞌ, ri e aj wach ke soldados y taq ri lik kꞌo kichuqꞌabꞌ; ri kitiꞌjil taq ri kawayuꞌ y ri ekojoyom ke; yey ri kitiꞌjil ri eloqꞌotal ruma kajaw y ri na e jinta puqꞌabꞌ juna kajaw, ri kꞌo kiwach y ri na jinta kiwach» kachaꞌ.
19 Xinwil kꞌu ri jun nimalaj itzel chikop* Waꞌ e kachꞌaꞌtibꞌex Ap. 13:1-18. yey ri e taqanelabꞌ che ruwachulew kukꞌ ri ki ejércitos, kimolom kibꞌ re kechꞌoꞌjin rukꞌ ri Jun ukojom lo rukawayuꞌ y kukꞌ ru ejércitos eteran chirij. 20 Xchap kꞌu ri nimalaj itzel chikop, junam rukꞌ ri jun qꞌalajisanel sokosoꞌnel, ri uꞌanom ukꞌiyal kꞌutubꞌal chwach ri nimalaj itzel chikop yey rukꞌ waꞌ ebꞌusokom lo konoje taq ri kikꞌulum ri retalil ri nimalaj itzel chikop y xkiloqꞌnimaj uqꞌij ri jun ukꞌaxwach. Kikabꞌichal kꞌu riꞌ, e laꞌ chikikꞌaslikil xekꞌaq bꞌi chupa jun luwar kayenen che aqꞌ y kajinow rukꞌ azufre. 21 Ekꞌu ri nikꞌaj chik xekamisax rukꞌ ri espada kel lo puchiꞌ ri Jun ukojom lo ri kawayuꞌ saq rij; yey e taq kꞌu rawaj kexikꞌikꞌ lik chikaj, ri etijol ke ri ekaminaq chik, lik xewaꞌ chi utz rukꞌ ri kitiꞌjil.