1 »Ri kuꞌan chupa rutaqanik ri Dios petinaq chilaꞌ chikaj e jelaꞌ pachaꞌ ri xuꞌano echiriꞌ juna rajaw chak anim tan xel bꞌi che kitzukuxik aj chakibꞌ kebꞌajawax chupa rutikoꞌn re uva. 2 Xchꞌaꞌt kukꞌ raj chakibꞌ puwi ri kajil y xkanajik kuya jun denario re jun qꞌij chak chike. Tekꞌuchiriꞌ, xebꞌutaq bꞌi chupa rutikoꞌn. 3 Laj che ri ubꞌelej ora* “Ri ubꞌelej ora”: Kil “hora” pa vocabulario. anim, xel tanchi ubꞌi y xeburiq jujun chik kimolom kibꞌ pa kꞌayibꞌal na jinta kakiꞌano.

4 »Xubꞌiꞌij kꞌu chike: “Jix riꞌix, jixeꞌchakuna wukꞌ chupa ri nutikoꞌn re uva y tzꞌaqat kixintojo” xchaꞌ. Ekꞌu rike xebꞌek.

5 »Pa tikꞌil qꞌij† “Tikꞌil qꞌij”: Kil “hora” pa vocabulario. kꞌu riꞌ, ri rajaw ri chak xel tanchi ubꞌi che kitzuquxik más aj chak. Yey je tanchi laꞌ xuꞌan che ri urox ora bꞌenaq qꞌij.

6 »Laj che kꞌu ri uroꞌ ora bꞌenaq qꞌij, xel tanchi ubꞌi y xebꞌuꞌriqa lo jujun chik na jinta kakiꞌano. Xubꞌiꞌij kꞌu chike: “¿Suꞌchak riꞌix ix kꞌo wara y na jinta kꞌo xiꞌan wa jun qꞌij?”

7 »Xkikꞌul kꞌu uwach rike: “E ruma na jinta junoq xojchokowik.”

»Ekꞌuchiriꞌ, xubꞌiꞌij ri rajaw ri chak chike: “Jix, jixeꞌchakuna chupa ri nutikoꞌn re uva y tzꞌaqat kixintojo.”

8 »Echiriꞌ xok raqꞌabꞌ, ri rajaw ri chak xubꞌiꞌij che ri caporal: “Chebꞌasikꞌij konoje raj chakibꞌ y chebꞌatojo bꞌi. E kebꞌatoj nabꞌe ri xebꞌok kꞌunaj, y kꞌisbꞌal kꞌu re, kebꞌatoj ri xebꞌok nabꞌe pa chak.”

9 »Ekꞌuchiriꞌ, xekꞌun raj chak ri xebꞌok bꞌenaq qꞌij che ri uroꞌ ora. Y chikijujunal kꞌu riꞌ xkikꞌul jun denario. 10 Tekꞌuchiriꞌ, xekꞌun lo ri ebꞌokinaq nabꞌe pa chak. E chikiwa rike más kꞌi ri kajil kakikꞌulu. Noꞌj na je ta laꞌ xuꞌano, ma xkikꞌul chikijujunal jun denario, pachaꞌ ri xkikꞌul ri jujun chik.

11 »Echiriꞌ xkikꞌul ri kajil re jun qꞌij, xkijeqo kechꞌaꞌt chirij ri rajaw ri tikoꞌn, 12 jewaꞌ xkibꞌiꞌij che: “Waꞌ wa xebꞌok bꞌenaq qꞌij chik, xa jun ora xechakunik yey xetoj la junam qukꞌ riꞌoj, tobꞌ kꞌu riꞌ riꞌoj xqakuy lo rukꞌatanil ri qꞌij” xechaꞌ.

13 »Noꞌj ri rajaw chak xukꞌul uwach, jewaꞌ xubꞌiꞌij che jun chike: “Wamigo, mabꞌiꞌij we na usukꞌ ta ri xinꞌan chawe. ¿Na xojkanaj ta nebꞌa laꞌ katintoj jun denario? 14 Chakꞌama kꞌu rawajil riꞌat y jat. Yey we riꞌin kuaj kanya che ri xok kꞌunaj pa chak, junam rukꞌ ri xinya chawe riꞌat, 15 ¿na jinta nebꞌa panuqꞌabꞌ riꞌin kanꞌan saꞌ ri kuaj rukꞌ ri nupuaq? ¿O kꞌax akꞌuꞌx chwij xa ruma xinkꞌut ri rutzil nukꞌuꞌx chike jujun chik?” xcha ri rajaw ri chak.

16 »Jelaꞌ kꞌu riꞌ, lik e kꞌi chike ri na jinta kiwach woꞌora, e lik kakꞌojiꞌ kiwach chwach apanoq; yey lik kꞌu e kꞌi chike ri lik kꞌo kiwach woꞌora, chwach apanoq na jinta chi kiwach. Ma lik e kꞌi ri esikꞌim, tobꞌ kꞌu xa e jujun ri echaꞌtalik —xcha ri Jesús.

17 Echiriꞌ kꞌo chi ri Jesús chi bꞌe re keꞌek Jerusalem, xebꞌukꞌam bꞌi ri kabꞌlajuj utijoꞌn kitukel pa jun luwar y xubꞌiꞌij chike:

18 «Chitapeꞌ: E waꞌ kojpaqiꞌ Jerusalem, yey ekꞌu Ralaxel Chikixoꞌl Tikawex kayaꞌ pakiqꞌabꞌ ri nimaq e aj chakunel pa Rocho Dios y raj kꞌutunel re ri tzijpixabꞌ chaꞌ kakiqꞌat tzij puwiꞌ re kamik. 19 Tekꞌuchiriꞌ, kakiya pakiqꞌabꞌ ri na e ta aj judiꞌabꞌ chaꞌ rike kakichꞌamij, kakijichꞌ upa y kakikamisaj chwa cruz. Noꞌj churox qꞌij kꞌut kakꞌastaj bꞌi chikixoꞌl ri ekaminaq» xchaꞌ.

20 Ekꞌuchiriꞌ, xqibꞌ rukꞌ ri Jesús ri kichu ri kebꞌ ukꞌajol ri Zebedeo,‡ “Ri kebꞌ ukꞌajol ri Zebedeo”: Waꞌ e ri Jacobo y ri Juan. y ekꞌu laꞌ e rachbꞌiꞌil ri ralabꞌ; xuxukubꞌaꞌ ribꞌ chwach ri Jesús ma kꞌo karaj kutzꞌonoj che.

21 Ri Jesús xutzꞌonoj che:

—¿Saꞌ ri kaꞌaj la? —xchaꞌ.

Rixoq xukꞌul uwach:

—Wajawal, yaꞌa la chike wa kebꞌ walabꞌ ketzꞌuyiꞌ ukꞌ la pa ri taqanik la, jun pawikiqꞌabꞌ la y ri jun chik, pa mox la —xchaꞌ.

22 Ekꞌu ri Jesús xukꞌul uwach, y jewaꞌ xubꞌiꞌij chike ri kebꞌ utijoꞌn:

—Riꞌix na iwetaꞌam taj saꞌ ri kitzꞌonoj. ¿Kichꞌij nebꞌa riꞌix ri kinikꞌow wi riꞌin y ri kꞌax kape panuwiꞌ? —xchaꞌ.

Rike xkibꞌiꞌij:

—Kaqachꞌijo —xechaꞌ.

23 Ri Jesús xubꞌiꞌij chike:

—Qatzij, riꞌix kichꞌij na ri kꞌax kinikꞌow wi riꞌin y ri kꞌaxkꞌobꞌik kape panuwiꞌ. Pero ri kixtzꞌuyiꞌ pa nuwikiqꞌabꞌ y pa numox, riꞌ na in ta kinyaꞌw re. Ma xew kayaꞌtaj chike ri echaꞌtal chi ruma ri Nuqaw chaꞌ kuꞌana na ke —xchaꞌ.

24 Echiriꞌ xkita waꞌ ri lajuj chik utijoꞌn, lik xpe koyowal chikij ri kebꞌ kichaqꞌ kibꞌ. 25 Ekꞌu ri Jesús xebꞌusikꞌij y xubꞌiꞌij chike:

—Iwetaꞌam riꞌix, ri ketaqan pakiwi ri nimaq tinamit kebꞌuꞌana pachaꞌ e rajaw ronoje; yey ri lik kꞌo kiwach kikꞌow uwiꞌ ri taqanik kakiꞌan pakiwi ri eyaꞌtal pakiqꞌabꞌ. 26 Noꞌj chixoꞌl riꞌix na ubꞌe taj jelaꞌ kuꞌano. Ma we kꞌo junoq chiwe riꞌix karaj kuꞌana aj wach, e chuyaꞌa ribꞌ kuꞌan nimanel iweꞌix. 27 Yey e junoq chiwe karaj kuꞌana nabꞌe chixoꞌlibꞌal, e chuyaꞌa ribꞌ kuꞌan nimanel ke konoje 28 jelaꞌ pachaꞌ ri kuꞌan Ralaxel Chikixoꞌl Tikawex. Ma Rire na xkꞌun taj re kanimaxik; xkꞌunik re koꞌlnimanoq y re koluꞌyaꞌa ribꞌ pa kamik che kikolobꞌexik ukꞌiyal tikawex —xchaꞌ.

29 Echiriꞌ ri Jesús kukꞌ rutijoꞌn katajin bꞌi kelik pa ri tinamit Jericó, lik ukꞌiyal winaq xeterej bꞌi chirij Rire. 30 E kꞌo kꞌu kaꞌibꞌ potzꞌ etzꞌul chuchiꞌ ri bꞌe. Echiriꞌ xkito katajin rikꞌowik ri Jesús, lik xesikꞌin pan che:

—¡Qajawal, lal ri Ralkꞌoꞌal kan ri rey David, choj-juchꞌ kaꞌn ko cheꞌla! —xechaꞌ.

31 Ekꞌu ri winaq xekichꞌaꞌbꞌej kipa chaꞌ na kesikꞌin ta chik, noꞌj ri kaꞌibꞌ potzꞌ más ne ko xesikꞌinik, xkibꞌiꞌij:

—¡Qajawal, lal ri Ralkꞌoꞌal kan ri rey David, choj-juchꞌ kaꞌn ko cheꞌla! —xechaꞌ.

32 Ekꞌuchiriꞌ, xtakꞌiꞌ ri Jesús, xebꞌusikꞌij y xutzꞌonoj chike:

—¿Saꞌ ri kiwaj kanꞌan chiwe? —xchaꞌ.

33 Ri kaꞌibꞌ potzꞌ xkikꞌul uwach:

—Qajawal, chojkunaj ko la chaꞌ kojtzuꞌnik —xechaꞌ.

34 Ekꞌu ri Jesús xejuchꞌ kaꞌn pa ranimaꞌ y xuya ruqꞌabꞌ puwi ri kiwach. Na jampatana kꞌu riꞌ xetzuꞌnik y xeterej bꞌi chirij ri Jesús.