1 Riꞌin in Pablo, in kꞌo pa cárcel ruma xintzijoj rubꞌiꞌ ri Qanimajawal Jesucristo che ralaq ri na alaq ta aj judiꞌabꞌ. 2 Lik tom chi kꞌu alaq ri chak uyaꞌom ri Dios chwe: Waꞌ e ri kantzijoj che alaq ri unimal rutzil ukꞌuꞌx ri Dios. 3 Ma ri Dios xukꞌut chinuwach ri na etaꞌmatal ta ojertan, yey puwi waꞌ nutzꞌibꞌam chi pan jubꞌiqꞌ che alaq. 4 We xajilaj alaq wa nutzꞌibꞌam, kamaj alaq usukꞌ saꞌ ri xqꞌalajisax chwe puwi ri Cristo. 5 Ojertan waꞌ na qꞌalajisam ta chikiwach ri tikawex; noꞌj woꞌora ruma ri Ruxlabꞌixel ri Dios xqꞌalajisax chikiwach ri e taqoꞌn y ri qꞌalajisanelabꞌ echaꞌtal ruma ri Dios. 6 Rukꞌuꞌxibꞌal ri qꞌalajisam chik e waꞌ: Ri bꞌiꞌtisim lo ruma ri Dios na xew ta ke raj judiꞌabꞌ, ma ke ne ri na e ta aj judiꞌabꞌ; uꞌanom kꞌu xa jun chike y junam koyeꞌem janipa rubꞌiꞌtisim lo ri Dios chike ri kakikoj ri Utzilaj Tzij re ri Qanimajawal Jesucristo. 7 Ruma kꞌu ri unimal rutzil ukꞌuꞌx ri Dios wukꞌ riꞌin, xyaꞌtaj chwe xinuꞌan raj chak ri Cristo re kantzijoj ri Utzilaj Tzij. Y xew kꞌu ruma ruchuqꞌabꞌ ri Dios, kel pan chi utz ri chak chwi nuqꞌabꞌ.

8 Riꞌin tobꞌ lik na jinta ko nuwach chikiwa konoje ri echaꞌtal ruma ri Dios; na rukꞌ ta kꞌu riꞌ, xyaꞌtaj chwe rutzijoxik ri Utzilaj Tzij chike ri na e ta aj judiꞌabꞌ. Kantzijoj kꞌu chike saꞌ taq ri chomilaj bꞌeyomalil re ri Cristo, ri na jinta ne junoq kachꞌijow uchꞌobꞌik ruchomalil taq waꞌ. 9 Y yaꞌom chwe kanqꞌalajisaj chikiwach konoje ri tikawex saꞌ ri uchꞌobꞌom lo ri Dios, ri xꞌanaw re ronoje ri kꞌolik. Kanqꞌalajisaj kꞌu ri na etaꞌmatal ta lo rojertan, ri kꞌa e woꞌora kel lo chi saq. 10 Ma ri karaj ri Dios woꞌora e chaꞌ ruma riglesia kilitaj chi utz rukꞌiyal taq uwach unaꞌoj Rire chikiwach taq ri kꞌo kiwach y ri kꞌo kichuqꞌabꞌ, waꞌ e ri ketaqan xa pa tew. 11 E janipa kꞌu ri uchꞌobꞌom lo ri Dios echiriꞌ kꞌamajaꞌ ne kuꞌan ruwachulew, e uꞌanom riꞌ ruma ri Jesucristo, ri Qanimajawal. 12 Ruma kꞌu ri Cristo xyaꞌtaj chiqe kojopon chwach ri Dios; lik kꞌu jikil uwach, ri Dios kojukꞌul chi utz ruma ri kubꞌulibꞌal qakꞌuꞌx rukꞌ ri Cristo. 13 E uwariꞌche kambꞌiꞌij che alaq, mapax kꞌuꞌx alaq ruma wa kꞌaxkꞌobꞌik in kꞌo wi, e ne kiꞌkota alaq ma uma ralaq na jinta kubꞌiꞌij nukꞌuꞌx kinikꞌow chupa waꞌ.

14 Ruma taq kꞌu waꞌ, kanxuk wibꞌ chwach Ruqaw ri Qanimajawal Jesucristo, 15 ma che ri Qaqaw e petinaq wi konoje taq ri familia e kꞌo chilaꞌ chikaj kukꞌ ri e kꞌo che ruwachulew. 16 Kantzꞌonoj che ri Qaqaw chaꞌ e chirij taq ri chomilaj ubꞌeyomalil, kuya lo unimal chuqꞌabꞌ pa ri animaꞌ alaq y jekꞌulaꞌ kachuqꞌubꞌej ibꞌ alaq ruma ri Ruxlabꞌixel Rire. 17 Kantzꞌonoj che ri Dios chaꞌ kajeqiꞌ ri Cristo pa animaꞌ alaq ruma ri kubꞌulibꞌal kꞌuꞌx alaq y katikiꞌ kꞌu alaq chi utz chupa ri rutzil ukꞌuꞌx pachaꞌ juna cheꞌ lik naj bꞌenaq wi ri ratzꞌayaq. 18 Chuyaꞌa kꞌu che alaq junam kukꞌ konoje ri e re Rire, ri ketaꞌmaj alaq chi utz ri rutzil ukꞌuꞌx ri Cristo chaꞌ jelaꞌ kamaj alaq usukꞌ janipa runimal uwach, runajtijil raqan, ruchoyil upa y runajtijil uwiꞌ ri rutzil ukꞌuꞌx. 19 Chetaꞌmaj kꞌu alaq ri unimal rutzil ukꞌuꞌx ri Cristo, tobꞌ na jinta junoq lik kumaj usukꞌ ronoje waꞌ. ꞌAna kꞌu e alaq che janipa ri utz kꞌo rukꞌ Rire chaꞌ kaqꞌalajin taq waꞌ che ri bꞌinik silabꞌik alaq. 20 Ruma ruchuqꞌabꞌ ri Dios qukꞌ, Rire kuya más uwiꞌ ronoje ri kaqatzꞌonoj che o ri kaqachꞌobꞌo kuꞌano. 21 ¡Chetaꞌmaxoq nim uqꞌij ri Dios ruma ri kuꞌan rukꞌ ru iglesia ruma ri Qanimajawal Jesucristo! Kaloqꞌnimax kꞌu uqꞌij waqꞌij ora y chiqawach apanoq na jinta chi utaqexik. Amén.