1 Ekꞌuchiriꞌ kꞌa kꞌo ri Apolos pa ri tinamit Corinto, ri Pablo xeꞌek pa taq ri tinamit kꞌo lo chwi taq juyubꞌ y jelaꞌ xopon pa ri tinamit Éfeso. Chilaꞌ xebꞌuꞌriqa jujun chike ri kikojom rubꞌiꞌ ri Cristo 2 y xutzꞌonoj kꞌu chike:

—¿Xkꞌul alaq ri Santowilaj Ruxlabꞌixel ri Dios echiriꞌ xkoj alaq rubꞌiꞌ ri Cristo? —xcha chike.

Yey rike xkikꞌul uwach:

—¿Saꞌ riꞌ waꞌ? Ma riꞌoj na qatom tane kꞌenoq we kꞌo Ruxlabꞌixel ri Dios —xechaꞌ.

3 Ekꞌu ri Pablo xutzꞌonoj chike:

—¿Saꞌ kꞌu ri bautismo xkꞌul alaq? —xchaꞌ.

Rike xkikꞌul uwach:

—E ri bautismo re ri Juan —xechaꞌ.

4 Xubꞌiꞌij kꞌu ri Pablo chike:

—Ri bautismo xuya ri Juan e kꞌutubꞌal re ri tzelebꞌal tzij chwach ri Dios, yey xtzijon chikiwach ri tinamit chaꞌ kakikoj rubꞌiꞌ ri Jun katajin lo chirij rire;* Mt. 3:11; Hch. 13:24-25 waꞌ e ri Jesús, ri Cristo —xchaꞌ.

5 Echiriꞌ xkita waꞌ, asu xkikꞌul ri bautismo pa rubꞌiꞌ ri Qanimajawal Jesús. 6 Ekꞌuchiriꞌ ri Pablo xuya ruqꞌabꞌ pakiwiꞌ, ri Santowilaj Ruxlabꞌixel ri Dios xqaj pakiwiꞌ y xkijeq kꞌu riꞌ kechꞌaꞌt pa jujun chik chꞌaꞌtem na kimajom taj y kakiqꞌalajisaj ri tzij uyaꞌom ri Dios chike. 7 Chi konoje waꞌ laj e juna kabꞌlajuj chi achijabꞌ.

8 Xok kꞌu ri Pablo pa ri sinagoga, yey oxibꞌ ikꞌ kꞌu riꞌ xutzijoj ri Utzilaj Tzij y na xuxiꞌij ta kꞌana ribꞌ che uꞌanik waꞌ. Kꞌolik kakichapalaꞌ kibꞌ kukꞌ raj judiꞌabꞌ puwi ri kukꞌutu y lik xutij uqꞌij chaꞌ kukoj pa kijolom ri usukꞌ puwi rutaqanik ri Dios.

9 Pero e kꞌo jujun chike xkiꞌan lik ko che kibꞌ y na xkaj ta kꞌu xkikoj rubꞌiꞌ ri Cristo; xkijeq kꞌu riꞌ tzel kechꞌaꞌt chirij ri Kꞌakꞌ Bꞌe re ri Utzilaj Tzij e laꞌ chikiwach rukꞌiyal winaq. Ekꞌu ri Pablo xresaj bꞌi ribꞌ chikixoꞌl y xebꞌukꞌam bꞌi ri kikojom rubꞌiꞌ ri Cristo. Chujujunal qꞌij kꞌut, ri Pablo katzijonik y lik kachꞌaꞌt chwi taq rukꞌutunik chikiwach, pa ri luwar pa kakꞌutun wi jun achi Tirano rubꞌiꞌ. 10 Pa kebꞌ junabꞌ e riꞌ jelaꞌ xuꞌan ri Pablo, kakꞌutunik. Ruma kꞌu laꞌ, konoje ri e aj judiꞌabꞌ y ri na e ta e aj judiꞌabꞌ e kꞌo pa taq ri luwar re Asia, xkita ri Utzilaj Tzij re ri Qanimajawal Jesús.* Xtik iglesias pa Colosas, Laodicea, Hierápolis (Col. 4:13) y jujun chik tinamit re Asia (Ap. 2–3).

11 Yey ruma kꞌu ri Pablo, ri Dios xuꞌan nimaq taq milagros na jinta kꞌana ilitajinaq wi. 12 Xuꞌana ne riꞌ, kakꞌam bꞌi suꞌt o kꞌul ikꞌowisam chirij ri Pablo y kayaꞌ chike ri yewaꞌibꞌ, y jelaꞌ kekunutajik yey ri itzel uxlabꞌixel kebꞌel bꞌi chike tikawex.

13 Pero e kꞌo jujun aj judiꞌabꞌ xa ebꞌikꞌowel pa taq tinamit yey e kiwach kekesaj itzel uxlabꞌixel chike ri tikawex. Rike xkitij uqꞌij kakesaj bꞌi ritzel taq uxlabꞌixel chike ri winaq pa rubꞌiꞌ ri Qanimajawal Jesús, jewaꞌ kakibꞌiꞌij: «Chupa rubꞌiꞌ ri Jesús ri kutzijoj ri Pablo, kintaqan piwiꞌ chaꞌ kixel bꞌi» kechaꞌ.

14 Jujun chike ri kakiꞌan waꞌ e ri wuqubꞌ ukꞌajol jun achi Esceva rubꞌiꞌ. Rire e kukꞌil raj judiꞌabꞌ yey e kukꞌil ri nimaq e aj chakunel pa Rocho Dios.

15 Kꞌo kꞌu jun qꞌij, jun itzel uxlabꞌixel xukꞌul uwach chike ri wuqubꞌ ukꞌajol ri Esceva: «Wetaꞌam uwach ri Jesús y wetaꞌam china ri Pablo; noꞌj riꞌix, ¿ix chinoq?» xchaꞌ.

16 Ekꞌu rachi, ri kꞌo puqꞌabꞌ ri itzel uxlabꞌixel, xukꞌaq ribꞌ pakiwiꞌ y rukꞌ unimal uchuqꞌabꞌ xebꞌuchapo, yey ekꞌu riꞌ rire ri xuchꞌij kichuqꞌabꞌ y lik xuꞌan kꞌax chike. Jekꞌuriꞌlaꞌ, rike echꞌanalik xebꞌanimaj bꞌi chupa ri ja e kꞌo wi. 17 Y konoje ri ejeqel chupa ri tinamit Éfeso xketaꞌmaj waꞌ. Ekꞌu ri e aj judiꞌabꞌ y ri na e ta aj judiꞌabꞌ lik xkixiꞌij kibꞌ che; jekꞌuriꞌlaꞌ, waꞌ xeꞌeloq re yakbꞌal uqꞌij rubꞌiꞌ ri Qanimajawal Jesús.

18 Lik kꞌu e kꞌi riꞌ chike ri kikojom rubꞌiꞌ ri Cristo, xekꞌunik e laꞌ chiwachil kakiqꞌalajisaj taq janipa ri na utz taj kiꞌanom. 19 Lik kꞌu e kꞌi chike ri ebꞌuꞌanom aj itz y aj qꞌij, xkikꞌam taq lo ri kiwuj re majbꞌal itz y xkiporoj chikiwach konoje. Xajilax kꞌu riꞌ janipa kuꞌana ri rajil waꞌ y xuꞌana cincuenta mil chi saqil puaq re plata. 20 Jekꞌuriꞌlaꞌ xukich wubꞌi ribꞌ ri Utzilaj Tzij re ri Qanimajawal y xeꞌek uqꞌalajisaxik rukꞌ unimal chuqꞌabꞌ; yey lik katajin kikꞌiyarik ri kekojow re.

21 Ikꞌowinaq chi taq waꞌ, ri Pablo xutik pa ranimaꞌ keꞌek pa ri tinamit Jerusalem echiriꞌ ikꞌowinaq chi pa taq ri luwar re Macedonia y re Acaya. Jewaꞌ xubꞌiꞌij: «Echiriꞌ inikꞌowinaq chi chupa ri tinamit Jerusalem, lik chirajawaxik chwe kinopon pa ri tinamit Roma.» 22 Xebꞌutaq kꞌu bꞌi pa taq ri luwar re Macedonia kebꞌ chike ri ketoꞌw re, waꞌ e ri Timoteo y ri Erasto. Yey rire xkanaj chi kan jujun qꞌij pa taq ri luwar re Asia.

23 Chupa taq kꞌu laꞌ la qꞌij, pa ri tinamit Éfeso xkijeq ketukuk ri winaq chirij ri Kꞌakꞌ Bꞌe re ri Dios y na xa ta jubꞌiqꞌ ri xkiꞌano. 24 Waꞌ e ruma jun achi Demetrio rubꞌiꞌ, aj chakunel rukꞌ chꞌichꞌ re plata. Rukꞌ waꞌ wa chꞌichꞌ re plata kuꞌan raltaq ko ja, ukꞌaxwach ri rocho ri kitiox Diana.† “Diana”: E ubꞌiꞌ kakibꞌiꞌij ri e aj Roma che wa jun tiox, noꞌj ri e aj Grecia “Artemisa” kecha che. Yey chwach waꞌ, na xa ta jubꞌiqꞌ ri kakichꞌak janipa ri kechakun rukꞌ.

25 Ekꞌu waꞌchi xebꞌumol wa raj chak, kukꞌ jujun chik aj chakibꞌ junam ri kichak y xubꞌiꞌij chike:

«Alaq achijabꞌ, ralaq etaꞌam alaq e ruma wa jun chak lik kꞌo qabꞌeyomalil. 26 Pero ilom kꞌu alaq y tom alaq ri uꞌanom lo ri Pablo. Ri kuꞌano e kukoj pa kijolom ukꞌiyal tikawex na e ta dios ri xa e ꞌanom rukꞌ kiqꞌabꞌ ri tikawex. Yey na xew ta kukꞌut waꞌ pa ri qatinamit Éfeso, ma ya laj kumaj ronoje pa taq ri luwar re Asia. 27 Ruma kꞌu waꞌ, kꞌo ne pa saq na kaloqꞌ ta chi ri qakꞌay, yey laj kuꞌana ne riꞌ chikiwach ri winaq na jinta chi uqꞌij ri rocho ri nimalaj qatiox Diana. Jekꞌulaꞌ, kujeq na jinta chi uwach ri qatiox, ri kaloqꞌox uqꞌij pa taq ronoje ri luwar re Asia y che ronoje ruwachulew» xchaꞌ.

28 Echiriꞌ xkita taq waꞌ, lik xpe koyowal y xkijeq kesikꞌinik: «¡Nim uqꞌij ri tiox Diana ke ri aj Éfeso!» kechaꞌ.

29 Xpe kꞌu jun nimalaj sachibꞌal naꞌoj chike konoje ri tinamit. Ketenenik xeꞌkiyaꞌa kibꞌ pa ri nimalaj estadio pa kakimol wi kibꞌ ri tinamit. Y xekichap kꞌu ri Gayo y ri Aristarco; rike e aj pa ri luwar re Macedonia y e rachbꞌiꞌil ri Pablo.

30 Xraj kꞌu ri Pablo kok pa ri estadio chaꞌ kachꞌaꞌt chikiwach rukꞌiyal winaq, noꞌj ri kikojom rubꞌiꞌ ri Cristo xkiqꞌatej. 31 Yey e kꞌo ne jujun chike ri e aj qꞌatal tzij re pa taq ri luwar re Asia, e ramigos ri Pablo; rike xkitaq ubꞌiꞌxikil che y lik xebꞌelaj che chaꞌ na kok tubꞌi pa ri estadio pa etenel wi ri winaq.

32 Ekꞌu ri winaq etenel chiriꞌ lik xsach kinaꞌoj y xkijeq kesikꞌinik. Junwi taq ri kakibꞌiꞌij y na katataj ta chi nenareꞌ saꞌ taq ri kakibꞌiꞌij. Yey lik e kꞌi chike na ketaꞌam ta nenareꞌ suꞌchak kimolom kibꞌ.

33 E kꞌo kꞌu jujun aj judiꞌabꞌ xkiminenej bꞌi chikiwach konoje, jun achi Alejandro rubꞌiꞌ. Ekꞌuchiriꞌ, jujun chik xeꞌkijekꞌa pan chikixoꞌl rukꞌiyal winaq. Ekꞌu rire xuꞌan jun kꞌutubꞌal rukꞌ ruqꞌabꞌ chaꞌ kayaꞌiꞌ che kutoꞌbꞌej ribꞌ.

34 Pero echiriꞌ ri winaq xketaꞌmaj rire e kukꞌil raj judiꞌabꞌ, konoje xa jun ubꞌiꞌxikil kesikꞌinik, laj kebꞌ ora xkichꞌijo kakibꞌiꞌij: «¡Nim uqꞌij ri tiox Diana ke ri aj Éfeso!» kechaꞌ.

35 Ekꞌu ri aj tzꞌibꞌ re ri tinamit, echiriꞌ xuchꞌij kikubꞌaxik rukꞌiyal winaq, jewaꞌ xubꞌiꞌij:

«Alaq achijabꞌ aj Éfeso, ¿china ri na etaꞌmayom ta re we ri tinamit ke ri aj Éfeso e chajal re ri rocho ri nimalaj tiox Diana yey junam rukꞌ rukꞌaxwach, ri qajinaq lo chikaj? 36 Yey che taq waꞌ, na utz ta kꞌu riꞌ kꞌo junoq kubꞌiꞌij na qatzij taj. E uwariꞌche lik chirajawaxik kakubꞌiꞌ alaq. Makꞌo maꞌan alaq pa chꞌuꞌjilal; nabꞌe na chꞌobꞌo alaq raqan chi utz ri kaꞌan alaq. 37 Kambꞌiꞌij waꞌ, ma ekꞌamom lo alaq waꞌ waꞌchijabꞌ tobꞌ rike na e tane makuninaq chirij ri templo o chirij ri qatiox.

38 »Yey we ri Demetrio kukꞌ ri rachbꞌiꞌil kꞌo kichꞌaꞌoj chirij junoq, ri lik ubꞌe e kiyaꞌa waꞌ pa qꞌatbꞌal tzij; ma e kꞌo e aj qꞌatal tzij yaꞌtal pakiqꞌabꞌ kakita ke ri winaq kakiraqꞌuj kibꞌ chikiwach. 39 Yey we kꞌa kꞌo kaꞌaj alaq katzꞌonoj alaq chikij, ri lik ubꞌe e kayaꞌiꞌ waꞌ chikiwach konoje ri tinamit y kayijbꞌax chi usukꞌlikil. 40 Ma ruma ri xꞌaniꞌ waqꞌij, kꞌo ne pa saq katzꞌaq qachiꞌ kojchꞌoꞌjin chirij ri qꞌatbꞌal tzij y na jinta kꞌo kel wi we xtzꞌonox chiqe saꞌ la kojtukuk wi» xchaꞌ.

41 Xew kꞌu xubꞌiꞌij waꞌ xukꞌisbꞌej utzaꞌm ri kimolom wi kibꞌ.