1 Tobꞌ na jinta kutiqoj che junoq kuꞌan nim che ribꞌ, na rukꞌ ta kꞌu riꞌ kantzijoj saꞌ rukꞌutum y ruqꞌalajisam ri Qajawal chinuwach. 2 Lik wetaꞌam kꞌu uwach jun achi uyaꞌom ribꞌ puqꞌabꞌ ri Cristo. Ekꞌu kajlajuj junabꞌ waꞌ rikꞌowik echiriꞌ rire xkꞌam bꞌi kꞌa chilaꞌ chikaj. Na wetaꞌam ta kꞌut we xkꞌam bꞌi rukꞌ rucuerpo o xa e ri ranimaꞌ xeꞌek, xew ri Dios etaꞌmayom re. 3 Xew kꞌu wetaꞌam xkꞌam bꞌi, tobꞌ pachaꞌ ri nubꞌiꞌim chik, na wetaꞌam taj we xkꞌam bꞌi rukꞌ rucuerpo o xa e ri ranimaꞌ xeꞌek, xew ri Dios etaꞌmayom re. 4 Ri wetaꞌam, e xkꞌam bꞌi chupa ri chomilaj luwar chilaꞌ chikaj. Chilaꞌ kꞌu riꞌ xuta chomilaj taq tzij yey waꞌ na yaꞌtal tane kꞌana che junoq kutzijoj. 5 Kambꞌiꞌij kꞌu riꞌ, utz kanyak uqꞌij ri xilow re y ri xtaw re waꞌ. Pero we kanyak nuqꞌij riꞌin, na e ta kantzijoj ri qꞌalajisam chwe, ma xew kantzijoj ri kꞌaqibꞌal bꞌi nuqꞌij. 6 Ma we ta kuaj kanyak nuqꞌij ruma ruqꞌalajisam ri Dios chwe, riꞌ na raqꞌubꞌal ta ri kambꞌiꞌij, ma lik e ubꞌe riꞌ. Pero na kanꞌan taj, ma na kuaj taj kꞌo junoq kukoj uwi ri ilitajinaq y ri tatajinaq chwe.

7 Yey chaꞌ na kanyak ta kꞌu nuqꞌij ruma na jinta kꞌana kꞌo wi ri qꞌalajisam chwe, xyaꞌtaj kꞌu che ri Satanás kukoj jun kꞌax che ri nucuerpo pachaꞌ juna kꞌiix xaqi kuchꞌikichꞌaꞌ chwe. 8 Ruma kꞌu riꞌ, oxlaj xinelaj che ri Qajawal chaꞌ karesaj waꞌ chwe. 9 Noꞌj Rire jewaꞌ xubꞌiꞌij chwe: «Ri unimal rutzil nukꞌuꞌx kꞌo awukꞌ, e waꞌ ri lik kajawax chawe. Ma ri nuchuqꞌabꞌ más kaqꞌalajin kukꞌ ri na jinta kichuqꞌabꞌ» xchaꞌ. E uwariꞌche riꞌin lik kinkiꞌkot che echiriꞌ na jinta nuchuqꞌabꞌ, ma jelaꞌ e kakꞌojiꞌ ruchuqꞌabꞌ ri Cristo wukꞌ. 10 Ruma kꞌu laꞌ, rukꞌ kiꞌkotemal kanchꞌij taq ri kꞌax kape panuwiꞌ ruma in re ri Cristo, tobꞌ na jinta nuchuqꞌabꞌ, tobꞌ e kꞌo ri tzel kechꞌaꞌt lo chwij, tobꞌ nukuyum nibꞌaꞌil, tobꞌ inyaꞌom pa kꞌax y pa bꞌis; ma echiriꞌ kannaꞌo na jinta nuchuqꞌabꞌ, e más kannaꞌ ruchuqꞌabꞌ ri Cristo kꞌo wukꞌ.

11 Xa uma kꞌu ralaq xintakꞌabꞌaꞌ nuqꞌij pachaꞌ kuꞌan junoq na jusukꞌ ta runaꞌoj, pero e ralaq xinminow alaq chupa. Ekꞌu ri lik usukꞌ e ralaq ri kayakaw alaq nuqꞌij. Ma tobꞌ na jinta nuwach riꞌin, pero waꞌ wa nimaq e taqoꞌn ri xa kakiꞌan nim che kibꞌ, rike na jinta más kiwach chinuwa riꞌin. 12 Echiriꞌ xinchakun chixoꞌlibꞌal alaq, xqꞌalajin chiwach alaq in utaqoꞌn ri Cristo. Ma echiriꞌ xinkꞌojiꞌ ukꞌ alaq, na xinkos ta che ukꞌutik chiwach alaq taq ri kꞌutubꞌal re ruchuqꞌabꞌ ri Dios rukꞌ nimaq taq milagros. 13 ¿Saꞌ nawi ri xinjaljobꞌ wi chiwach alaq? ¿Na xinꞌan ta nebꞌa che alaq pachaꞌ ri xinꞌan chike ri nikꞌaj chik iglesias? Laj e ri xinjaljobꞌ wi ma na xinya ta alkꞌayew che alaq ruma na xintzꞌonoj ta wajil che alaq. We e numak waꞌ, kuyu alaq numak.

14 Tape alaq: Riꞌin nuyijbꞌam chi wibꞌ chaꞌ kinopon ukꞌ alaq churox laj. Y we xinoponik, na kanya ta alkꞌayew che alaq, ma na jinta kꞌo kantzꞌonoj che alaq. Ekꞌu ri kuaj che alaq na e ta ri kꞌo ukꞌ alaq, ma e ri kakꞌut alaq ri rutzil kꞌuꞌx alaq chwe. Xew kꞌu lik kuaj kantoꞌ alaq pachaꞌ kuꞌan juna achi kukꞌ ri ralkꞌoꞌal. Ma chike ri kichu-kiqaw taqal wi kakitzukuj ri kajawax chike ri chꞌutiꞌq; na e ta ri chꞌutiꞌq ri taqal chike kakitzukuj ri kajawax chike ri kichu-kiqaw. 15 Ekꞌu riꞌin rukꞌ ronoje nukꞌuꞌx na xew ta kankꞌis ronoje ri kꞌo wukꞌ, ma kanya ne wibꞌ che toꞌik alaq rukꞌ ri kꞌaslemal alaq chwach ri Dios. Pero e kanwil riꞌin, echiriꞌ más kankꞌut ri kꞌaxnaꞌbꞌal nukꞌuꞌx che alaq, e más kaqꞌobꞌ ri kꞌaxnaꞌbꞌal kꞌuꞌx ralaq chwe riꞌin.

16 Etaꞌam kꞌu alaq na xinya ta alkꞌayew che alaq. Na rukꞌ ta kꞌu riꞌ, e kꞌo ri kakibꞌiꞌij xinwesaj ne puaq che alaq xa xeꞌlaqꞌay. 17 ¿Suꞌchak kachꞌobꞌ alaq waꞌ? ¿Kꞌo nebꞌa juna sokosoꞌnel nutaqom bꞌi ukꞌ alaq? 18 Riꞌin xintzꞌonoj che ri Tito keꞌrila alaq y xintaq bꞌi ri jun hermano rukꞌ. ¿Xuꞌan nebꞌa eleqꞌ ri Tito che alaq? Rire junam wukꞌ riꞌin xa jun qakꞌuꞌx che ri kaqaꞌano.

19 Hermanos, laj kachꞌobꞌ alaq e ronoje wa nubꞌiꞌim loq xa re toꞌbꞌal qibꞌ, pero na e ta riꞌ. Ma paqatzij wi chwach ri Dios y chupa rubꞌiꞌ ri Cristo qabꞌiꞌim lo waꞌ re toꞌbꞌal e alaq, ri lik kꞌax kaqanaꞌ alaq. 20 Kubꞌisoj nukꞌuꞌx ma kꞌaxtaj we xinopon ukꞌ alaq, na utz ta ꞌanom alaq y jelaꞌ kꞌu riꞌ na kukꞌul ta nukꞌuꞌx ri kiꞌnriqaꞌ. Yey we e riꞌ, laj na kukꞌul ta kꞌuꞌx alaq ri woponibꞌal ma riꞌ yaj ri kiꞌnꞌanaꞌ. Kubꞌisoj kꞌu nukꞌuꞌx ma kꞌaxtaj kꞌo chꞌaꞌoj chixoꞌlibꞌal alaq, kꞌo ri kꞌax kikꞌuꞌx chikij jujun chik, kꞌo oyowal chiwach alaq, jachom pa alaq, kꞌo ri kakichꞌamij kibꞌ, kꞌo ri e aj molot, kꞌo ri kakiꞌan nim che kibꞌ yey e kꞌo ri e soqꞌosaq e kiwach e tzukul chꞌaꞌoj. 21 Kubꞌisoj kꞌu nukꞌuꞌx ma kꞌaxtaj we xinopon tanchi ukꞌ alaq, laj kiꞌnriqaꞌ e kꞌi che alaq kꞌa e kꞌo pa mak y na kitzelem ta kitzij chwach ri Dios; ma kakiꞌan taq ri chꞌulilaj mak, kaketzꞌabꞌej uwa kiqꞌij kukꞌ jujun chik na kikꞌulel taj y kiyaꞌom kibꞌ che uꞌanik ronoje taq ri rayibꞌal re ri kitiꞌjil. We xiꞌnriqa kꞌu riꞌ waꞌ, lik kinkꞌix chwach ri Dios uma ralaq y kebꞌenuwoqꞌej kꞌu riꞌ ri kebꞌanaw re waꞌ.