1 Ri Cristo lik xuya ranimaꞌ kutij kꞌax quma riꞌoj. Jekꞌulaꞌ riꞌ, lik chirajawaxik che alaq kaya animaꞌ alaq katij alaq kꞌax ruma Rire. Ma e janipa ri kakiya kanimaꞌ kakiꞌan ri utz tobꞌ kape kꞌax pakiwiꞌ, qꞌalaj kꞌu riꞌ na e jinta chi puqꞌabꞌ ri mak. 2 Ruma kꞌu laꞌ, janipa chi qꞌij e kꞌo che ruwachulew, na kakiꞌan ta chi janipa ri rayibꞌal ke ri winaq, ma e kakiꞌan janipa ri karaj ri Dios. 3 Ri uꞌanom loq e xꞌan lo alaq pachaꞌ ri kakiꞌan ri winaq na ketaꞌam ta uwach ri Dios. Ma xya ibꞌ alaq che uꞌanik taq ri rayibꞌal re ri tiꞌjil alaq, yey xya ibꞌ alaq pa qꞌabꞌarik y xmol ibꞌ alaq che uꞌanik chꞌulilaj mak; xya ibꞌ alaq che ri lik na chom ta uwach yey lik itzel taq uwach ri xꞌan alaq echiriꞌ xloqꞌnimaj alaq taq ri tiox.* Rojertan e kꞌo winaq kakikamisaj ri kalkꞌoꞌal re qasaꞌn chwach taq ri kitiox. 4 E taq kꞌu ri xkachbꞌilaj alaq che uꞌanik waꞌ wuꞌkꞌiyal uwach mak, xkam kanimaꞌ che echiriꞌ xesaj ibꞌ alaq che taq waꞌ; yey ruma riꞌ lik kꞌax kechꞌaꞌt chiꞌij alaq. 5 Pero kopon kꞌu ri qꞌij echiriꞌ konoje rike kakiya na kibꞌ chupa ri kimak chwach ri Jun kuqꞌat tzij pakiwi ri e kꞌaslik y ri ekaminaq. 6 Ruma ne kꞌu laꞌ, xtzijox ri Utzilaj Tzij chike ri ekaminaq chupa ri kimak chaꞌ kakꞌojiꞌ kikꞌaslemal na jinta utaqexik chwach ri Dios, tobꞌ chikiwach taq ri winaq, na utz ta ri xkiꞌan rike ruma xkikoj rubꞌiꞌ ri Cristo.

7 Lik xa naqaj chi kꞌo wi lo ruqꞌijol echiriꞌ kakꞌis ri na utz ta uwach y kajalkꞌatisax kꞌu ronoje ri kꞌolik. Ruma kꞌu riꞌ, lik kꞌola naꞌoj alaq puwiꞌ saꞌ taq ri kaꞌan alaq y xaqi e yaꞌa ibꞌ alaq pa oración chwach ri Dios. 8 Yey ri más chirajawaxik wi e rukꞌ ronoje kꞌuꞌx alaq kꞌax kanaꞌ ibꞌ alaq chiwach alaq, ma we lik kꞌo rutzil kꞌuꞌxaj ukꞌ alaq, riꞌ kakuy alaq taq rukꞌiyal mak ke ri nikꞌaj chik. 9 Chekꞌulu alaq chi utz ri kebꞌopon chi ocho alaq y mawunwut ne alaq che uꞌanik waꞌ. 10 Ekꞌu chirij ri uyaꞌom ri Dios paqꞌabꞌ alaq, chetoꞌo alaq ri jujun chik, chaꞌ jelaꞌ kuꞌan alaq saqil aj chakibꞌ re ri Dios y kachakun alaq chi utz rukꞌ rukꞌiyal uwach toꞌbꞌal uyaꞌom ri Dios che alaq. 11 We kꞌo junoq kakꞌutun chikiwach ri hermanos, e chukꞌutu puwi ri kubꞌiꞌij Ruchꞌaꞌtem ri Dios y na xa ta pa re kachꞌaꞌtik. We kꞌo junoq karaj kebꞌutoꞌ ri tikawex, chuꞌana waꞌ rukꞌ ri chuqꞌabꞌ yaꞌtal che ruma ri Dios. Ronoje kꞌu ri kaꞌan alaq, ꞌana alaq re yakbꞌal uqꞌij ri Dios ruma ri Qanimajawal Jesucristo, ri lik taqal che kꞌo yakbꞌal uqꞌij y kataqan kꞌu pakiwi konoje waqꞌij ora y chiqawach apanoq na jinta utaqexik. Amén.

12 Hermanos, makam animaꞌ alaq che taq runimal kꞌaxkꞌobꞌik kape pawiꞌ alaq re kukꞌam pa alaq, ma qonoje kojikꞌow chupa waꞌ. 13 Ri ꞌana alaq e kiꞌkota alaq, ma alaq bꞌare jun che taq ri kꞌaxkꞌobꞌik xikꞌow wi ri Cristo, chaꞌ echiriꞌ kuqꞌalajisaj runimal uchomalil, ralaq lik kakiꞌkot alaq che. 14 We e kꞌo tzel kechꞌaꞌt chiꞌij alaq ruma kojom alaq rubꞌiꞌ ri Cristo, riꞌ lik nim qꞌij alaxik alaq ma ri chomilaj Ruxlabꞌixel ri Dios kꞌo ukꞌ alaq. Qatzij wi, e kꞌo ri tzel kechꞌaꞌt chirij Rire, noꞌj ralaq lik kayak alaq uqꞌij Rire. 15 We kꞌo junoq che alaq kutij kꞌax, lik kꞌixbꞌal uwach we waꞌ e ruma kamisanel o eleqꞌom o ruma uꞌanom ri na utz taj che junoq o ruma uminom ribꞌ chupa ri na jinta re che. 16 Noꞌj we kꞌo junoq kutij kꞌax ruma ukojom rubꞌiꞌ ri Cristo, makꞌix kꞌu riꞌ che; ri chuꞌanaꞌ e chuyaka uqꞌij ri Dios ruma waꞌ. 17 Ma e qꞌij waꞌ kajeqer bꞌi ri qꞌatbꞌal tzij pakiwi ri e ralkꞌoꞌal ri Dios. Yey we nabꞌe kꞌut kajeqer qukꞌ riꞌoj, ¿saꞌ nawi keꞌkikꞌisa wi riꞌ ri na kikojom ta ri Utzilaj Tzij re ri Dios? 18 Ma jewaꞌ kubꞌiꞌij pa Ruchꞌaꞌtem ri Dios: