1 Riꞌin ¿na in ta nebꞌa jun chike rutaqoꞌn* “Taqoꞌn”: Pa ri chꞌaꞌtem griego y pa kaxtila waꞌ e “apóstol”. Kabꞌiꞌx “taqoꞌn” chike ri kabꞌlajuj utijoꞌn ri Jesús, ri xetaq ruma Rire chaꞌ kakitzijoj ri Utzilaj Tzij y kakitik iglesias. Yey ri Pablo xtaq lo ruma ri Jesús chaꞌ kutzijoj ri Utzilaj Tzij y kutik iglesias. ri Jesús yey kꞌo kꞌu panuqꞌabꞌ kanꞌan ri taqal che kuꞌan juna taqoꞌn? In utaqoꞌn ma xinwil uwach ri Jesús ri Qanimajawal, yey ralaq alaq kꞌutubꞌal re ri nuchak ma wuma riꞌin xkꞌojiꞌ alaq puqꞌabꞌ Rire. 2 Laj chikiwach jujun chik riꞌin na in ta jun taqoꞌn re ri Jesús; noꞌj ralaq lik etaꞌam alaq in utaqoꞌn Rire, ma wuma riꞌin xkꞌojiꞌ alaq puqꞌabꞌ Rire yey waꞌ e kꞌutubꞌal re paqatzij wi riꞌin in taqoꞌn re ri Qanimajawal. 3 Chike kꞌu ri kakitzꞌaq nuchiꞌ, e kambꞌiꞌij waꞌ re toꞌbꞌal wibꞌ: 4 Ri oj utaqoꞌn ri Qanimajawal, ¿na taqal ta nebꞌa chiqe kayaꞌ ri qawa y ri qayaꞌ? 5 ¿Yey na taqal ta nebꞌa che juna taqoꞌn kꞌo rixoqil ukojom rubꞌiꞌ ri Cristo yey karachbꞌilaj echiriꞌ kuꞌana ruchak ri Qaqaw? Taqalik, ma jelaꞌ kiꞌanom ri Cefas† “Cefas”: E jun chik ubꞌiꞌ ri Pedro. kukꞌ ri jujun chik taqoꞌn yey taq ruchaqꞌ ri Qanimajawal. Taqal kꞌu waꞌ chiqe ma oj taqoꞌn jelaꞌ pachaꞌ rike. 6 Ri nikꞌaj chik taqoꞌn e kꞌo pa ruchak ri Qaqaw, ketojik y na kechakun ta pa juna chik chak. ¿Na taqal ta nebꞌa waꞌ che ri Bernabé y chwe riꞌin? ¿O xew kami riꞌ riꞌoj na taqal ta waꞌ chiqe?

7 Ma ¿kꞌo nebꞌa juna soldado kataq che kuloqꞌ rukꞌ rumeyo ri kajawax che? Na jintaj, ma ronoje waꞌ kayaꞌ che. Jekꞌulaꞌ juna aj tikoꞌn, ¿na taqal ta nebꞌa che kutij re ri uva xutiko? Y juna aj chajal chikop, ¿na taqal ta nebꞌa che kutij re ri leche kuyitzꞌo? 8 Y wa kambꞌiꞌij, ¿xa nawi naꞌoj re tikawex? Na e taj, ma jelaꞌ tzꞌibꞌital kan pa Rutzij Upixabꞌ ri Dios. 9 Ma chupa ri taqanik tzꞌibꞌital kan ruma ri Moisés, jewaꞌ kubꞌiꞌij: «Makoj bꞌozal che ri bꞌoyex echiriꞌ kuqil uwi ri trigo, ma taqal che katzuqik.»* Dt. 25:4 ¿Xubꞌiꞌij nebꞌa waꞌ ri Dios xew ruma kꞌax kebꞌunaꞌ ri bꞌoyexabꞌ? 10 ¿Na paqawiꞌ ta nebꞌa riꞌoj kubꞌiꞌij wi waꞌ? Qatzij, e paqawiꞌ riꞌoj xtzꞌibꞌax wi. Ma jelaꞌ pachaꞌ rabꞌixom taqal che kꞌo royeꞌem che ruchak kuꞌano; yey ri aj chak kꞌo pa qiloj trigo kꞌo royeꞌem chwa ri kuꞌano; 11 jekꞌulaꞌ ruma riꞌoj xqatik chixoꞌlibꞌal alaq Rutzij Upixabꞌ ri Dios, ¿na taqal ta kami riꞌ chiqe riꞌoj kaqakꞌul che alaq ri kajawax chiqe wara che ruwachulew? 12 Ma e kꞌo jujun tojom alaq ri kichak piglesia. We taqal kꞌu riꞌ chike rike ketoj alaq, más lik taqal chiqe riꞌoj, ma oj xojtikow riglesia alaq. Na rukꞌ ta kꞌu riꞌ, riꞌoj na jinta kꞌo qatzꞌonom che alaq, tobꞌ taqal chiqe. Ri qaꞌanom e kojchakun pa qe wi y lik qachꞌijom lo ronoje chaꞌ na kaqakoj ta qꞌatbꞌal che rutzijoxik ri Utzilaj Tzij re ri Cristo.‡ Ri Pablo na xraj taj kuꞌan alkꞌayew chike ri e aj Corinto, yey na xraj taj kꞌo junoq kuchꞌobꞌo rire kutzijoj ri Utzilaj Tzij xa ruma kachꞌakan chirij. 13 Yey ralaq etaꞌam alaq raj chakibꞌ pa Rocho Dios taqal chike kewaꞌ chirij ri qasaꞌn yaꞌom puqꞌabꞌ ri Dios; yey ri keniman chwa raltar, taqal chike kꞌo kakikꞌul che ri keꞌyoꞌq chiriꞌ.* Lv. 7:6-9, 31-34; Dt. 18:1 14 Yey ri taqanik uyaꞌom kan ri Qanimajawal pakiwi ri kakitzijoj ri Utzilaj Tzij, e waꞌ: E lik taqal chike kakikꞌasbꞌaꞌ kibꞌ e chirij ruchak ri Cristo kakiꞌano.* Mt. 10:10; Lc. 10:7 15 Na rukꞌ ta kꞌu riꞌ, riꞌin na jinta kꞌo nutzꞌonom che alaq tobꞌ taqal waꞌ chwe. Y na e tane uwach waꞌ kintzꞌibꞌan pana che alaq chaꞌ kintoj alaq. Ma chinuwach riꞌin, más utz we kinkamik chwa kesax chwe ri saqil kiꞌkotemal kannaꞌo echiriꞌ kantzijoj ri Utzilaj Tzij y na jinta wajil kantzꞌonoj.

16 Riꞌin na kanyak ta nuqꞌij ruma kantzijoj ri Utzilaj Tzij. Xew wetaꞌam chirajawaxik kanꞌan waꞌ wa chak ma e ri Cristo intaqayom che. ¡Lik toqꞌoꞌ kꞌu nuwach we na kanꞌan taj! 17 We ta in xinchaꞌw wa chak, laj woyeꞌem kꞌu riꞌ ri tojbꞌal weꞌin. Noꞌj ruma e ri Nuqaw intaqayom che uꞌanik waꞌ, na jinta panuqꞌabꞌ kanjekꞌ wibꞌ che. 18 ¿Saꞌ kꞌu ri kanchꞌak che ri chak kanꞌano? E ri unimal kiꞌkotemal kannaꞌo echiriꞌ kantzijoj ri Utzilaj Tzij y na kantzꞌonoj ta wajil tobꞌ taqal waꞌ chwe.

19 Riꞌin na in jinta puqꞌabꞌ juna patrón; na rukꞌ ta kꞌu riꞌ, nuyaꞌom wibꞌ che kinuꞌana nimanel ke konoje chaꞌ jelaꞌ e kꞌi ri kakikoj rubꞌiꞌ ri Cristo. 20 Echiriꞌ in kꞌo chikixoꞌl ri watz-nuchaqꞌ e aj judiꞌabꞌ, kanꞌan che wibꞌ jelaꞌ pachaꞌ rike chaꞌ kakikoj rubꞌiꞌ ri Cristo. Ekꞌuchiriꞌ in kꞌo chikixoꞌl rike, kantaqej ri kitaqanik, tobꞌ wetaꞌam na in jinta chuxeꞌ waꞌ. Nuꞌanom kꞌu waꞌ chaꞌ rike kakikoj rubꞌiꞌ ri Cristo. 21 Jekꞌulaꞌ echiriꞌ in kꞌo chikixoꞌlibꞌal ri na kitaqem ta ri taqanik tzꞌibꞌital kan ruma ri Moisés, kanꞌan che wibꞌ pachaꞌ in jun chike, tobꞌ in kꞌo chuxeꞌ rutaqanik ri Dios y rutaqanik ri Qanimajawal. Nuꞌanom kꞌu waꞌ chaꞌ rike kakikoj rubꞌiꞌ ri Cristo. 22 Jekꞌulaꞌ echiriꞌ in kꞌo chikixoꞌlibꞌal ri hermanos na jinta ukowil ri kinaꞌoj, kꞌo ri na kanꞌan ta riꞌin xa ruma e mak chikiwach rike, tobꞌ riꞌin wetaꞌam na mak taj, pero rike kꞌamajaꞌ kakimaj usukꞌ waꞌ. Jelaꞌ kanꞌano chaꞌ rike kakijikibꞌaꞌ kibꞌ chi utz puqꞌabꞌ ri Dios. Rukꞌ kꞌu ronoje ri kanꞌan chikiwach konoje ri tikawex, kantzukuj saꞌ ri lik kebꞌutoꞌo chaꞌ jelaꞌ e kꞌo jujun chike kekolobꞌetajik. 23 Rukꞌ ronoje kꞌu ri kanꞌano, kanqꞌalajisaj ri Utzilaj Tzij chaꞌ junam kaqakꞌul ri utz rukꞌaꞌam lo wa Utzilaj Tzij.

24 Etaꞌam alaq pa juna etzꞌanem re kꞌalalem, konoje ri kekꞌalalik lik kakitij uqꞌij kakichꞌak ri premio, tobꞌ ketaꞌam xa jun ri kakꞌuluw ri premio. Jekꞌulaꞌ chuqꞌubꞌej ibꞌ alaq chaꞌ kakꞌul alaq ri premio kuya ri Dios che alaq. 25 E junoq lik kutijoj ribꞌ che juna etzꞌanem, lik kuchꞌij uchuqꞌabꞌ ronoje xa ruma jun premio xa kasach uwach. Noꞌj riꞌoj kaqachuqꞌubꞌej qibꞌ che ukꞌulik jun premio na kasach ta kꞌana uwach. 26 Ekꞌu riꞌin lik wetaꞌam saꞌ ruchak ri nukꞌaslem. Na kanꞌan ta kꞌu pachaꞌ junoq xa kajumumik pero na retaꞌam taj pa karaj kopon wi o pachaꞌ junoq kachꞌoꞌjin pa tꞌoꞌy§ “Kachꞌoꞌjin pa tꞌoꞌy”: Waꞌ kachꞌaꞌt puwi jun “boxeador”. pero xa pa tew kachꞌayanik. 27 Ma riꞌin kintaqan puwi ri nucuerpo tobꞌ kantij kꞌax ruma. Jekꞌulaꞌ na kanya ta kꞌana luwar che taq ri rayibꞌal re ri nutiꞌjil kataqan panuwiꞌ. Ma riꞌin xinqꞌalajisaj ri chomilaj bꞌe re ri Qꞌijsaq chikiwach ukꞌiyal tikawex; lik toqꞌoꞌ kꞌu nuwach riꞌ we e laꞌ na kanchꞌak ta ri premio kuya ri Dios.