4
Ri yacbal ukꞌij ri Dios chilaꞌ chicaj
1 Qꞌuisbal cꞌu re tak waꞌ, xintzuꞌn chicaj y xinwil jun puerta jakatal che ruwa caj. Y ri Jun, ri cachꞌaw pachaꞌ uchꞌawibal trompeta, xchꞌaꞌt tanchi wucꞌ, jewaꞌ xubiꞌij: «Chatakꞌana lo wara y Riꞌin cancꞌut chawe saꞌ tak ri catajin lok we xicꞌow tak waꞌ wa xbiꞌx chawe» xchaꞌ. 2 Xakicꞌateꞌt, riꞌin xincꞌojiꞌ pukꞌab ri Ruxlabixel ri Dios. Xinwil cꞌu jun tzꞌulibal re takanic chilaꞌ chicaj y cꞌo Jun tzꞌul chupa. 3 Ri Jun tzꞌul chupa jelaꞌ catzuꞌnic pachaꞌ ri chomilaj abaj jaspe rubiꞌ y pachaꞌ ri chomilaj cak abaj cornalina rubiꞌ. Ri tzꞌulibal sututal rij rucꞌ jun arco iris lic cawonic jelaꞌ pachaꞌ ri chomilaj abaj esmeralda rubiꞌ. 4 Yey wa tzꞌulibal sutum rij rucꞌ veinticuatro tzꞌulibal chic. Y xinwil veinticuatro nimak winak etzꞌul pa ri veinticuatro tzꞌulibal, quicojom quikꞌuꞌ lic sak y cꞌo corona re oro che ri quijolom. 5 Chupa cꞌu ri tzꞌulibal quebel lo uyocꞌbal uxeꞌ caj y catataj uchꞌawibal jab caraklajic y cajininic. Chwach cꞌu ri tzꞌulibal, lic cawolol wukub candil, waꞌ e ri wukub uwach Uxlabixel re ri Dios. 6 Chwach ri tzꞌulibal cayenen jun yaꞌ jelaꞌ pachaꞌ ri mar y cajuljut upa pachaꞌ chi vidrio. Y ri tzꞌulibal sutum rij cuma cajib cꞌo quicꞌaslemal pachaꞌ e ángeles yey jelaꞌ quetzuꞌn pachaꞌ awaj y cꞌo uqꞌuiyal quiwach chiquij y chiquiwach. 7 Ri nabe jelaꞌ catzuꞌnic pachaꞌ juna coj, rucaꞌm jelaꞌ catzuꞌnic pachaꞌ juna mekꞌ, rupalaj rurox jelaꞌ catzuꞌnic pachaꞌ upalaj winak y rucaj jelaꞌ catzuꞌnic pachaꞌ juna águila caxiqꞌuiqꞌuic. 8 Chiquijujunal wa cajib cꞌo wakitak quixicꞌ. Y lic cꞌo uqꞌuiyal quiwach che ronoje ri quij y ruxeꞌ ri quixicꞌ. Yey na quecos ta cꞌu che ubiꞌxiquil chipakꞌij chichakꞌab:
«¡Lic Santo, Santo, Santo ri Dios Kajawxel,
ri cꞌo ronoje unimal chukꞌab pukꞌab,
ri xex chi cꞌo lo wi, ri cꞌo wakꞌij ora y ri cꞌo chikawach apanok!» quechaꞌ.
9 Ecꞌu ri cajib caquiyac ukꞌij ri Dios, caquibixoj rubiꞌ y caquiya quikasaꞌn re tioxibal che ri Jun tzꞌul pa ri tzꞌulibal re takanic, ri na jinta utakexic rucꞌaslemal. 10 Ecꞌuchiriꞌ rique caquiꞌan waꞌ, ri veinticuatro nimak winak caquixucubaꞌ quib chwach ri Jun tzꞌul pa ri tzꞌulibal y caquilokꞌnimaj ukꞌij ri na jinta utakexic rucꞌaslemal yey caquesaj ri quicorona re oro che ri quijolom y caquiya chwach ri tzꞌulibal y jewaꞌ caquibiꞌij:
11 «Dios Kajawxel, xew Rilal takal cheꞌla
cacꞌul la ri yacbal kꞌij
ruma lic saꞌchi ri chomal la y ri chukꞌab la;
ma Lal xꞌanaw la re ronoje ri cꞌolic
y lic e rajawal cꞌuꞌx la ri quecꞌojiꞌ tak waꞌ
yey ruma ne laꞌ xeꞌan tak la» quechaꞌ.