1 Riꞌin in nimalaj winaq, in aj wach re riglesia; kantzꞌibꞌaj pan wa carta cheꞌla, hermano Gayo, ma lik paqatzij wi kꞌax kannaꞌ la. 2 Lal nu hermano, riꞌin kantzꞌonoj che ri Dios chaꞌ ronoje kel chi utz chwi qꞌabꞌ la yey chaꞌ lik e xaqi utz wach la jelaꞌ pachaꞌ ri bꞌinik silabꞌik la lik utz chwach ri Dios. 3 Riꞌin lik xinkiꞌkotik echiriꞌ xekꞌun jujun hermanos y xkitzijoj chwe puwi ri jusukꞌ bꞌinik silabꞌik la, ma e lik taqem la ri Qꞌijsaq re ri Dios. 4 Na jinta kuya más kiꞌkotemal chwe chwa ri kanwetaꞌmaj ri e walkꞌoꞌal chupa rubꞌiꞌ ri Dios e lik kitaqem ri Qꞌijsaq.

5 Lal nu hermano, lik utz ri katajin la che uꞌanik echiriꞌ ketoꞌ la ri hermanos, yey lik ewi ri kaꞌan la chike ri kepe naj. 6 Ekꞌu rike lik kiqꞌalajisam chikiwach ri tinamit re ri Cristo janipa ri rutzil kꞌuꞌx la chike. Yey lik utz we ketoꞌ bꞌi la chaꞌ kebꞌek chi che ri chak re ri Dios e kꞌo wi. Lik e taqal waꞌ chike rike 7 ma e petinaq chupa rubꞌiꞌ ri Qanimajawal ruma kꞌax kakinaꞌ Rire, y na jinta toꞌbꞌal ke kakikꞌam chike ri winaq na ketaꞌam ta uwach ri Dios. 8 Ekꞌu riꞌoj, lik chirajawaxik kaqaya qibꞌ che kitoꞌik waꞌ wa qa hermanos chaꞌ jelaꞌ kojtoꞌbꞌ kukꞌ che utzijoxik ri Qꞌijsaq.

9 Riꞌin xintzꞌibꞌaj pan chike ri tinamit re ri Cristo puwi wa toꞌbꞌal taqal chike ri e aj chak re ri Dios, pero ri Diótrefes na kukꞌul ta ri pixabꞌanik kaqaya riꞌoj, ma ri karaj e lik xew rire kataqan pakiwi konoje. 10 E uwariꞌche we xinopon chilaꞌ, kanchꞌaꞌbꞌej upa ruma taq ri raqꞌubꞌal uyakom chiqij. Yey na xew ta waꞌ, ma na karaj taj kebꞌukꞌul ri hermanos kepe naj y kebꞌuqꞌatej ne ri hermanos kakaj kekikꞌulu. Ekꞌu ri kekꞌuluw ke kebꞌeresaj bꞌi chikixoꞌl ri tinamit re ri Cristo.

11 Lal nu hermano, maꞌan e la ri na utz taj; e ꞌana la ri utz. Ma e junoq kuꞌan ri utz, riꞌ re ri Dios; noꞌj e junoq kuꞌan ri na utz taj, riꞌ na retaꞌam ta uwach ri Dios. 12 Konoje chom kechꞌaꞌt puwi ri hermano Demetrio y lik qatzij ri kakibꞌiꞌij ma waꞌ lik kaqꞌalajin che rubꞌinik usilabꞌik. Jenelaꞌ riꞌoj, chom ruchꞌaꞌtibꞌexik kaqaꞌano yey etaꞌam alaq lik qatzij ri kaqabꞌiꞌij.

13 Lik kꞌi taq ri kuaj kantzijoj cheꞌla, pero waꞌ na kuaj taj kantzꞌibꞌaj cheꞌla 14 ma ri kuaj riꞌin e kinopon tan ukꞌ la y jekꞌulaꞌ kojchꞌaꞌt chiqawach.

15 Kꞌola kꞌu rutzil chomal ukꞌ la. Janipa ri hermanos ketaꞌam wach la kakiya pan rutzil wach la. Kantzꞌonoj cheꞌla, yaꞌa la rutzil kiwach chikijujunal janipa ri ketaꞌam qawach chilaꞌ.