सेफन्याह
ब्रेक्ब मुर: एको किताब सेफन्याहमी ब्रेक्शो बाक्ब। मेको मुर आ पर्बम शुश मतुंइसीब। मेको हिज्कीयाह आ युइ बाक्ब। मेको हिज्कीयाह पिप हिज्कीयाह यो दुम्ने चाप्ब। एको किताब आइक्च बाक्त हना यो, ख्रीस्त आ पर्बम शुश लोव़ बाक्ब।
गेना ब्रेक्शो: पिप योसीयाहम सासन पची ना ६४१-६१० बि. सी. मेर सेफन्याहमी एको किताब ब्रेक्शो बाक्त। अरेशो किताब थित्चा क्येङा ङोंइती एको किताब ब्रेक्शो बाक्त, दे मिम्नीम।
मार ब्रेक्शो:
१. परमप्रभु यावे आ निसाफ पतीक नाक्त जाक्ब। सेफन्याह १:१-४
२. निसाफ पशो मार कली बाक्बा? सेफन्याह १:५-१८
३. अर्को रागीम यो निसाफ ताइनीम। सेफन्याह २:१-३:८
४. नोले ङा रिम्शो दुम्तीके जाक्ब। सेफन्याह २:-३:-
1
ङोंइती ङा लोव़
1 यहूदा ङा पिप आमोन आ तौ योसीयाहमी सासन पवा ना परमप्रभु यावेमी सेफन्याह कली लोव़ पाप्तु। सेफन्याह आ आफ कूशी बाक्माक्त। कूशी आ आफ गेदाल्याह बाक्माक्त। गेदाल्याह आ आफ अमारयाह बाक्माक्त। मिनु अमारयाह आ आफ हिज्कीयाह बाक्माक्त। येरमीया १:२
नेल्ल खतम दुम्तीक नाक्त जाक्ब
2 परमप्रभु यावेमी मार लोव़ पाप्तु देंशा हना “गो रागी नेल्ल ङा मारेइ मारेइ खतम सेल्नुङ।
3 मुर नु बी ब्यफ, क्यारश भेडा, जन्तु नेल्ल आन कली खतम सेल्नुङ। सरीङ ङा चिक्ब, समुन्द्र ङा ङांइ नेल्ल आन कली साइक्नुङमी। रागी ङा मुर नेल्ल आन कली खतम सेल्नुङ। परमप्रभु यावे आ अरेशो मटीब आन कली दाइल पपाइक्नुङ। गो मुर नेल्ल आन कली रागी नेल्ल रे क्याम्नुङ। मत्ती १३:४१
यहूदा ङा मुर आन कली हुइश्शो
4 गो यहूदा रागी नु यरूसलेममी बाक्ब मुर नेल्ल आन पर्बम आं गुइ क्युक्नुङ। मिनु मेकेर बाल देवता कली पूजा पतीके नु मेको कली चढ़ेब आन नें मलीचा ङा पा क्याम्नुङ। २राजा २३:५; होसे १०:५
5 खिं तार बाक्शा, नां तास्ला नु सोरुल आन ङोंइती बाप्ब, परमप्रभु यावे आ ङोंइती बाप्शा आ नें थिशा कसम जाइब। मोलेक आ नें यो थिशा कसम जाइब। येरमीया १९:१३; येरमीया ४९:१
6 गो, परमप्रभु यावे, आं कली ममाल्थु, मपुंइथु आं नोले खोइक्चा प्रोंइशा, नोले शोंइसीब आन कली खतम पोक्नुङमी।
7 परमप्रभु, परमप्रभु यावे आ ङोंइती सिक्सी पने। मारदे हना परमप्रभु यावे आ नाक्त जाक्चा चिक्शो बाक्ब। परमप्रभु यावेमी चढ़ेतीक चाड का ठीक पाप्तु। परमप्रभु यावेमीआ ब्रेश्शो मुर आन कली ठीक सेल्तीमी। हबकुक २:२०
8 परमप्रभु यावे आ चढ़ेतीक नाक्त गो सरकार आ ठेयब मुर, पिप आ तौपुकी नु अर्को रागी ङा मुर आन वा फेक्ब नेल्ल आन कली सजाइ गेनुङमी। हबकुक २:२०
9 मेको नाक्त सु सु लाप्चो रे ओव़नीमी, मेको आन कली सजाइ गेनुङ। मारदे हना मेकोपुकीमी आन होव़प आ खिं तुम्मुचा, जिचा खेचा नु जोल पतीकेमी प्रिंनीम” देंत।
10 मिनु परमप्रभु यावेमी “मेको नाक्त ङांइ लाप्चो रे ठेयब सेंदा पा ङाक्शो, नक सहर रे रोंका पशो नु डांडा रे पा ठेयब रेयके पशो नेंसीब।
11 गे माकतेशम बाक्बपुकी रोंका पने। मारदे हना ग्याप्ब लेयब नेल्ल खतम दुम्तेक्म। चांदी नाक्ब नेल्ल क्याम्चा पुंइसाक्म। माकतेश यरूसलेम सहर ङा बजार का बाक्त।
12 मेना गो यरूसलेममी बत्ती दाशा मुर आन कली माल्शा, सजाइ गेनुङ। मारदे हना मेकोपुकीमी अल्सी पा आन थुंमी ‘परमप्रभु यावेमी रिम्शो नु मरिम्शो मारेइ यो मपाइब’ दे मिम्नीम।
13 मेको आन शोंप नेल्ल रोइक्चा पुंइसीनीम। मेको आन खिं ब्रेत्नीम। मेकोपुकीमी खिं सेल्तेक्म हना यो, मेकेर बाक्चा मताइनीम। मेकोपुकीम अङगुर ख्रुम्तेक्म हना यो, अङगुर शांबु तूचा मताइनीम। ब्यवस्था २८:३०,३९; आमोस ५:११
परमप्रभु आ ठेयब नाक्त
14 परमप्रभु यावे आ ठेयब नाक्त जाक्चा चिक्शो बाक्ब। मेको रीब पा जाक्ब। नोफा दाइश्शा नेनीन। परमप्रभु यावे आ ठेयब नाक्त, श्येत ङा नाक्त बाक्ब। लडाइ पाइबपुकी थम ठेयब सेंदा पा ग्रीनीम। योएल १:१५
15 मेको नाक्त गाइक्चा ङा नाक्त दुम्ब। श्येत नु हिंचा ङा नाक्त दुम्ब। नेल्ल ब्रेत्तीक नु खतम दुम्तीक नाक्त दुम्ब। मेको नाक्त छिङछिङ नु हिंचा ङा दुम्ब। गोस्सुम गिल्शो नु शुश छिङछिङ ङा नाक्त दुम्ब।
16 गारोम हिरशो सहरपुकी नु गारो ङा कुनाम बाक्शो लाइश्शो खिं आन कली लडाइ तोचा कली तुराही ताप्शो नु लडाइ ङा रेयके पशो नेंसीब। येरमीया ३०:७
17 गो मुर आन कली शुश श्येत गेनुङ। मिनु मेको मिक्च मताइब खोदेंशो पा गाक्नीम। मारदे हना मेकोपुकीम परमप्रभु यावे आ ङोंइती पाप पाम्तेक्म। मेको आन हुश फुरक खोदेंशो नु श्ये ख्री खोदेंशो पा ताइक्नीम।
18 परमप्रभु यावे गाइक्ची नाक्ती मेको आन चांदीमी मप्रोंइब। मेको आन सुनमी यो मेको आन कली प्रोंइने मचाप्ब। मेको आ मी खोदेंशो पा गाइक्तीकेमी रागी नेल्ल क्रोइक्ब। मेकोमी रागीम बाक्ब नेल्ल आन कली थम मरिम्शो पा साइश्शा क्याम्ब” दे परमप्रभु यावेमी देंत। इजीकीएल ७:१९