ठेयब कुम्सो
ब्रेक्ब मुर: एको कुम्सो सोलोमनमी ब्रेक्शो बाक्ब।
गेना ब्रेक्शो: सोलोमनमी ९५६-९२६ बि. सी. आ सासन पची ना ब्रेक्शो बाक्त।
मार ब्रेक्शो: एको किताबम शुनाम सहर ङा गोठाल्नी मीश आल आ कथा बाक्ब। मेको सोलोमन आ दरवार चाक्चा पुंइसीशो बाक्त। तन्न मेकोमी सोलोमन आ शोंप नु दारस तशा, यो आ दाक्शो नु ग्युंबे पचा चिक्शो गोठला मप्रोंइथु दाक्ना दाक्न बाक्त। एको किताबम भाग सां बाक्ब:
१. पिप आ दरवारम वोइक्चा पुंइसीशो, ठेयब कुम्सो १:-३:५ मेकेर ङा मीश आलम पिप आ ठेयब दुम्तीके
कुम्सो पशो, सोलोमनमी शुलामीथ नु लोव़ पशो आ
दाक्शो मुर कली मिम्ना मिम्न बाक्शो,
२. आ दाक्शो गोठला हेरा प्रोंइशो, ठेयब कुम्सो ३:६-८:४
सोलोमनम शुलामीथ कली ग्युंबे पचा मिम्शो
शुलामीथम आ दाक्शो गोठला कली मिम्शो सोलोमन आ नोले ङा पशो लोव़
३. आ गोठला कली मप्रोंइथु, आ दाक्तीकेम ग्राशो ठेयब कुम्सो ६:५-८:१४
शुलामीथ खिं लेश्शा, दरवार ङा शोंप मिम्शो
आ दाक्शो गोठलामी शुलामीथ आ सेंदा नेंचा दाक्शो
1
“पिप ठेयब बाक्ब” दे कुम्सो पशो
1 सोलोमन आ नेल्ल क्येङा ठेयब कुम्सो।
2 मेकोमी आं कली पुक्पु पवल। मारदे हना इन दाक्तीके अङगुर शांबु क्येङा यो रिम्शो बाक्ब।
3 इन ख्रेक्तीक तेल ब्रोव़शो रिना पाइश्शो बाक्ब। इन नें ब्रोव़शो रिना पाइश्शो तेल मोइश्शो खोदेंशो बाक्ब। मोपतीके मीश आलपुकीमी इन कली दाक्नीमी।
4 गे आं कली लाइय्यीनी। गो रीब पा लय। पिपमी आं कली आ बाक्तीकेम लाइक्ती। गो इन कली तशा ग्येरसीनीकी। गोपुकी अङगुर शांबु क्येङा यो, इन दाक्तीक कली ठेयब सेल्नीकी। मेकोपुकीम गे दारशो दुम्तीके इन कली दाक्नीमी।
आं कली आइक्च ममिम्तीन
5 गो क्येर बाक्ती हना यो, दारशो बाक्नुङ। ए यरूसलेम ङा तमीपुकी, गो केदार आ ताम्बु नु सोलोमन आ फारतीक वा खोदेंशो क्येर बाक्नुङ। आं कली आइक्च ममिम्तीन।
6 आं कली क्येर तशा, मकोव़यीनी। मारदे हना चोक्शो नांमी आं कली क्येर सेल्ती। आं ममा आ तौपुकी गो नु गाइक्तीके आं कली अङगुर रू कोव़ब सेल्तीमी। तन्न गो आंम अङगुर रू कली चहिं मकोव़ङु।
7 ए आं दाक्शो मुर, इन क्यारश भेडा आन कली ते योव़नीनी? मिनु नाक्त मेको ते नाइक्नीमी? गो मारदे हेंथे गाक्ब मीश मुर खोदेंशो पा इन वारच आन बगाल आ नेक्था लचा माल्नुङा?
सोलोमनम शुलामीथ नु लोव़ पशो
8 मीश आल आन दाते ङा नेल्ल क्येङा दारशो मीश आल, गे क्यारश भेडा आन गाक्तीक लां खोइश्शा, गोठला आन गोठ आ नेक्था इ पाठा आन कली योव़ङो।
9 आं दाक्शो मीश आल, गो इ कली फाराओ आ बग्गी ङा नेल्ल क्येङा दारशो छाउरी शारा नु थाप्शो बाक्नुङ।
10 गहना पांइसीशो इ चोव़चो गिश दारशो बाक्ब। सिक्री पांइसीशो इ शुर थम दारशो बाक्ब।
11 गो इ कली सुन नु चांदी ख्राक्शा सिक्री सेल्नीकी।
12 पिप आ इप्तीकेमी बाक्मेनु, आं तेल थम ब्रोव़शो रिना पाइक्तु।
13 आं दाक्शो मुर आं कुचु आ दातेम ब्रोव़शो रिना पाइब मूरेम ब्रीशो थैली खोदेंशो बाक्ब।
14 आं दाक्शो मुर एन-गेदी ङा अङगुर रूमी वाशो हेन्ना फू खोदेंशो बाक्ब।
15 ए, आं दाक्शो मीश आल गे दारशो बाक्नेवे? शुश दारशो बाक्नेवे। इ मिक्च ढुकुर के खोदेंशो बाक्ब।
16 ए आं दाक्शो मुर, गे यो दारशो बाक्नेवे। थमा पा दारशो बाक्नेवे। इस ब्राख्ये गिग बाक्ब।
17 इस खिं ङा पैद्रा लेबानोन ङा लाइश्शो रवा के बाक्नीम। सला के फलेकम साप्शो बाक्ब।