9
दाऊदमी शिशी पशो
1 मिनु दाऊदमी “मार, सावल आ खिं ङा मुर सुइ ब्रोंइशो बाक्नीमी? मेको आन कली गो योनाथन आ पर्बम शिशी पाइक्ने चाप्नुङा?” दे हिल्लो पवा बाक्त।
2 सावल आ खिं ङा सीबा नें पाइश्शो गेय पाइब मुर का बाक्माक्त। दाऊदम मेको कली ब्रेत्थ सोइक्ता बाक्त। मिनु पिपमी मेको कली “मार, गे सीबा नवे” देंमाक्त। मिनु मेकोम “ओं, गो इन गेय पाइब सीबा नङ” देंमाक्त। २सामुएल १६:१
3 मिनु पिपमी “सावल आ खिं ङा सुइ ब्रोंइशा लीशो बाक्नीमी? गो मेको कली परमप्रभु आ दाक्तीक कोंइचा दाक्नुङ?” देंमाक्त। मिनु सीबाम पिप कली “योनाथन आ तौ का ब्रोंइशा लीशो बाक्ब। मेको आ खोइल निम्फा मदुक्ब बाक्ब” देंमाक्त।
4 मिनु पिपमी मेको कली “मेको ते बाक्म?” दे हिल्लो पवा बाक्त। मिनु सीबामी “मेको लो-देबार सहर ङा अम्मीएल आ तौ माकीर आ खिंम बाक्ब” देंमाक्त। २सामुएल १७:२७
5 मिनु पिप दाऊदमी लो-देबार ङा अम्मीएल आ तौ माकीर आ खिंम मुर सोइश्शा मेको कली चाक्पदा बाक्त।
6 मिनु योनाथन आ तौ सावल आ चच मेफी-बोशेथ दाऊद आ बाक्तीके जाक्माक्त। मिनु मेकोमी खुम्की पा बाप्शा पिप कली सेउ पवा बाक्त। मिनु दाऊदम मेको कली “मेफी-बोशेथ” देंमाक्त। मिनु मेफी-बोशेथमी “गो इन गेय पाइब एक बाक्ती” देंमाक्त।
7 मिनु दाऊदम मेको कली “महिंनो, गो इ कली इ आफ योनाथन आ पर्बम शिशी पाइक्नुङ। गो इ कली इ बाजे सावल आ रू नेल्ल लेश्शा गेनन। मिनु गे गेना हना यो गो नु बाक्शा जाइनेवे” देंमाक्त।
8 मिनु मेफी-बोशेथम खुम्की पा बाप्शा “गो सु नङा ङा? पिपमी गो बेक्शो कुचुम खोदेंशो मुर, आं कली शिशी पाइय्यीनी?” देंमाक्त।
9 मिनु दाऊदमी सावल आ गेय पाइब सीबा कली ब्रेश्शा “सावल नु आं खिं ङा शोंप नेल्ल गो इ होव़प आ चच कली गेता। २सामुएल १९:२९-३०
10 गे, इ तौपुकी नु इ गेय पाइब नेल्लेमी मेको आ रूम गेय पचा माल्नीनी। मिनु गे इ होव़प आ चच आ खिं ङा मुर आन कली गेचा माल्नेवे। तन्न इ होव़प आ चच मेफी-बोशेथ गेना हना यो गो नु काथा बाक्शा जाइब” दे मदा बाक्त। सीबा के १५ जना तौ नु २० जना गेय पाइब बाक्मा बाक्त।
11 मिनु सीबाम पिप कली “आं प्रभु पिप, गो इन गेय पाइबमी इन देंशो खोदेंशो पा नेल्ल पाइक्नुङ” देंमाक्त। मेफी-बोशेथ पिप आ तौ का खोदेंशो पा पिप दाऊद आ खिंम बाक्शा, जवा बाक्त।
12 मेफी-बोशेथ आ तौ का बाक्माक्त। मेको आ नें मीका बाक्माक्त। मिनु सीबा आ खिं ङा मुर नेल्ल मेफी-बोशेथ आ गेय पाइब दुम्मा बाक्त।
13 तन्न मेफी-बोशेथ यरूसलेमम बाक्माक्त। मारदे हना मेकोमी गेना हना यो पिप नु जवा बाक्त। मेको आ खोइल निम्फा मदुक्ब बाक्माक्त। २सामुएल ९:३