20
शेबा आ मरिम्शो पशो
1 शेबा नें पाइश्शो मरिम्शो पाइब मुर का बाक्माक्त। मेको बेन्यामीन आ थर ङा बिक्री आ तौ बाक्माक्त। मेकोम तुराही ताप्शा ग्रीशा “दाऊद नु आंइ के मार बाक्बा ङा? येस्से आ तौ नु आंइ के मारेइ मबाक्ब। ए इस्राएली, गे इन ताम्बु ताम्बुम लने” देंमाक्त। १राजा १२:१६
2 मोपतीके इस्राएली नेल्लेमी दाऊद कली प्रोंइशा, बिक्री आ तौ शेबा आ नोले खोदमे बाक्त। तन्न यहूदा ङा मुरपुकी चहिं दाऊद कली मप्रोंइथु, यर्दन रे यरूसलेम सम्म आ नोले खोइक्स ङा खोइक्स पामे बाक्त।
3 मिनु दाऊद आ खिं यरूसलेमम जाक्माक्त। मिनु मेकोम आ खिं कोव़चा कली वोइश्शो मेको १० जना नोले चाक्शो मीश आन कली खिं कामी कोव़ब मुर का वोइश्शा वोइक्मी बाक्त। मेकोमी आन माल्शो नेल्ल गेमी बाक्त। तन्न मेको नु गेनायो मइम्माक्त। मोपा मेको आन बेक्ची नाक्त सम्म यो मप्रोंइथु वोइक्मी बाक्त। मोपा मेकोपुकी वोंइश बेक्शो मीश मुर खोदेंशो पा बाक्मा बाक्त। २सामुएल १६:२१
4 पिपमी आमासा कली “यहूदा ङा वोंइश मुर आन कली खुप्तीमी। मिनु नाक्त सांमी आं बाक्तीकेमी जाक्पाइक्मी। मिनु गे यो जाक्को” दे मदा बाक्त।
5 मोपतीके आमासा यहूदा ङा मुर आन कली खुप्चा कली गाक्माक्त। तन्न पिपमी देंशो क्येङा मेको कली शुश नाक्त माल्दा बाक्त।
6 मिनु दाऊदमी अबीशै कली “अब्सालोम क्येङा बिक्री आ तौ शेबामी इं कली शुश श्येत गेब। पिप आ गेय पाइब आन कली लाइश्शा, मेको कली खेदा पावो। मेको गारो हिरशो सहरम ओव़त हना, इं गुइ रे ब्रोंइब” दे मदा बाक्त।
7 मिनु योआबम केरेथी, पेलेथी नु लडाइ पाइब नेल्ल यरूसलेम रे लाइश्शा, बिक्री आ तौ शेबा कली खेदा पवा बाक्त। २सामुएल ८:१८
8 मिनु मेकोपुकी गिबोन ङा ठेयब फुल्लु बाक्तीक जाक्मानु, आमासा, मेको आन कली ग्रुम्थ जाक्माक्त। मिनु योआबम लडाइ पतीक वा फेक्शो बाक्माक्त। मेको तार किप्शुर किप्शो बाक्माक्त। मिनु खोतम शुइश्शा तरवार किप्शुरम पिप्शो बाक्माक्त। मिनु मेको ङोंइती गे लमेनु, मेको तरवार खोत रे दोक्माक्त। मत्ती २६:४८-५०
9 योआबम आमासा कली “आं लोक्ब आमासा गे रिम्शोन बाक्ङे?” दे हिल्लो पवा बाक्त। मिनु मेकोमी आमासा कली पुक्पु पाइक्चा कली आ ग्युरा गुइमी मेको आ गल शोक्रे ग्याइक्ता बाक्त।
10 आमासामी योआब आ गुइमी तरवार बाक्शो मतुइक्ता बाक्त। मिनु योआबमी मेको आ कोव़जम तूदा बाक्त। मिनु मेको आ गा क्यी खपीम दोक्शा बेक्माक्त। मेकोमी खेयप निक्शी तूचा ममाल्दा बाक्त। मिनु योआब नु आ लोक्ब अबीशै बिक्री आ तौ शेबा कली खेदा पना पन लसा बाक्त। १राजा २:५
11 मिनु योआब आ ठिटा मुर काम आमासा आ बेक्शो रां आ नेक्था राप्शा “योआब नु दाऊद आस नोले खोइक्बपुकीम योआब आ नोले खोदमेक्ल” देंमाक्त।
12 आमासा आ बेक्शो रां हुशेम गिल्शा ठेयब लांमी गोल्शा बाक्माक्त। मिनु मुर नेल्ल लांमी दिक्शा बाक्शो बाक्मा बाक्त। मिनु मेकोम आमासा आ बेक्शो रां कली लां रे लाइश्शा आइक्ची खेतम ताइक्ता बाक्त। मिनु मेको कली वा काम सुमा बाक्त।
13 मेको कली ठेयब लां रे लदमे नोले, मुर नेल्लेम बिक्री आ तौ शेबा कली खेदा पचा कली योआब आ नोले खोदमे बाक्त।
14 शेबा इस्राएल ङा थर नेल्ल लाक्शा, आबेल ङा बेथ-माकाहम जाक्मा सम्म बिक्री आ खिं ङा मुर नेल्ल तेइ तेइ रे ग्रुम्मा बाक्त। मिनु मेको आ नोले सहर ओव़मा बाक्त।
15 योआब आ लडाइ पाइब मुर नेल्ल जाक्शा, आबेल ङा बेथ-माकाह कली पुम्दमे बाक्त। मिनु सहर ङा गारो गे मार मार तेल्शा, गारो ङोइक्तीक ठीक पामे बाक्त। मिनु योआब आ लडाइ पाइबपुकीमी गारो प्रेत्चा गोव़मे बाक्त।
16 मिनु जोक्ब तुइक्ब मीश मुर काम सहर रे ब्रेश्शा “नेनीन, नेनीन, योआब कली ब्रेश्शा सोइक्तीन। मिनु गो मेको नु लोव़ पाइनुङ” देंमाक्त।
17 मिनु योआब आ ङोंइती जाक्माक्त। मिनु मेको मीश मुरुमी “मार, गे योआब ननी?” देंमाक्त। मिनु योआबम “ओं, गो नङ” देंमाक्त। मिनु मेको मीश मुरुमी “इन गेय पाइब आं लोव़ रिम्शो पा नेनीन” देंमाक्त। मिनु मेकोमी “नेंता” देंमाक्त।
18 मिनु मेकोमी “साइ रे मुरपुकीमी लोव़ नेंचा कली ‘आबेल सहर लचा माल्नीम’ देंशो बाक्ब। मिनु मोपा निसाफ दुम्बाक्त।
19 आं सहर इस्राएल ङा सहरपुकीम लडाइ मपाइब, पिप कली दाक्शा मान पाइब सहरम हिक्सीब। मिनु गे एको सहर, इस्राएली आन कली कोव़ब ममा खोदेंशो सहर कली खतम सेल्चा माल्नीनी? मारदे गे परमप्रभु यावे आ शोंप कली खतम पोक्चा माल्नीनी?” देंमाक्त। ब्यवस्था ३२:९
20 मिनु योआबमी “गो खतम मपोक्नुङ, मक्याम्नुङ।
21 गो मो पचा माल्शो मनकी। तन्न एफ्राइम पहाड ङा बिक्री आ तौ शेबामी पिप दाऊद कली मरिम्शो पचा माल्शो बाक्ब। मेको मुर कली आंइ कली गेने। मिनु गो सहर प्रोंइशा गाक्नीक” देंमाक्त। मिनु मेको मीश मुरुम योआब कली “मेको आ पिया सहर रे लाङगा ब्वारनीकी” देंमाक्त।
22 मिनु मेको मीश मुरुम आ लोव़ मुर नेल्ल आन कली नेंपाइक्मी बाक्त। मिनु मेकोपुकीम बिक्री आ तौ शेबा आ पिया ख्रोइश्शा, योआब कली ब्वारदमे बाक्त। मिनु योआबम तुराही तबा बाक्त। मिनु लडाइ पाइब नेल्ल सहर प्रोंइशा आन खिं खिं लेम्मा बाक्त। योआब चहिं पिप आ बाक्तीके यरूसलेम लेश्शा लमाक्त।
ठेयब मुर आन नें
23 योआब इस्राएल ङा लडाइ पाइब आन नेल्ल क्येङा ठेयब मुर बाक्माक्त। येहो-यादा आ तौ बेनायाह केरेथी नु पेलेथी पिप कली खाल पाइब आन ठेयब मुर बाक्माक्त। २सामुएल ८:१६-१८; १राजा ४:४-६
24 अदोराम वाइलीम वाइल आन ठेयब मुर बाक्माक्त। अहीलुद आ तौ येहो-शाफात ब्रेक्ब बाक्माक्त।
25 शेवा चहिं लडाइ पाइब आन ब्रेक्ब बाक्माक्त। सादोक नु अबीयाथार चहिं चढ़ेब बाक्सा बाक्त।
26 याइर आ मुर इरा चहिं दाऊद आ चढ़ेब बाक्माक्त।