15
अब्सालोम पिप दुम्चा माल्शो
1 मिनु नोले अब्सालोमम बग्गी का, शारा नु आ ङोंइङोंइती दोरचा कली ५० जना मुर आंम कली वोदा बाक्त। १राजा १:५
2 अब्सालोम सुनी कना बोक्शा, सहर ओव़तीक ठेयब लाप्चोमी बाक्बाक्माक्त। मिनु मुरपुकी पिप कली निसाफ पुंइथ जाक्बाक्तेक्म। अब्सालोममी मेको आन कली का का पा “तेको सहर रे जाक्शो नवे” देंबाक्माक्त। मिनु मेकोमी “इन गेय पाइब इस्राएल ङा एको थर रे जाक्शो नङ” देंबाक्मा बाक्त।
3 मिनु अब्सालोमम मेको कली “इ लोव़ ठीक बाक्ब। तन्न पिपमी इ कली ठीक निसाफ पा मनेंपाइक्ब” देंबाक्माक्त।
4 मिनु नोले अब्सालोममी “गो एको रागी ङा निसाफ पाइब दुम्शो नङ हना, सु सु कली निसाफ माल्दा, गो मेको नेल्ल आन कली निसाफ गेङ वा” देंबाक्माक्त।
5 सुइ मुर मेको कली सेउ पथ जाक्मेनु, मेको कली आ गुइ हाम्शा मुप्शा, पुक्पु पाइक्बाक्माक्त।
6 अब्सालोममी पिप आ निसाफ पतीकेम इस्राएली सु सु जाक्बाक्मा, मेको आन कली मोपा आन थुं खुइ पाइबाक्माक्त।
7 मिनु ४ बर्स नोले अब्सालोमम पिप कली “गे आं कली हेब्रोन लचा गेयीनी। गो परमप्रभु यावे कली पशो कबल खाप्चा दाक्नुङ।
8 मारदे हना गो, इन गेय पाइबम अराम ङा गेशुरम बाक्ङानु, कबल का पाता। गो मार कबल पाता देंशा हना, ‘परमप्रभु यावे, गे आं कली थमा पा यरूसलेमम लेश्शा चाक्ती हना, गो हेब्रोनम परमप्रभु यावे, इन कली ठेयब सेल्नुङ’ दे कबल पाता” देंमाक्त। उत्पत्ती २८:२०-२१; २सामुएल १३:३७-३८
9 मिनु पिपमी “गे इ थुं नाइश्शा लावो” देंमाक्त। मिनु मेको बोक्शा, हेब्रोन लमाक्त।
10 मिनु अब्सालोमम इस्राएल ङा थर नेल्ल आन कली सुइम मतुइक्चा ङा पा, लोव़ कुरब सोइश्शा “तुराही ग्रीशो नेंनी चोटी, गेपुकीम ‘अब्सालोम हेब्रोनम पिप दुम्त’ देंनीन” देंपाइक्मी बाक्त।
11 यरूसलेम ङा सहे निक्शी जना मुर अब्सालोम आ नोले खोइक्ब दुम्मा बाक्त। मेको आन कली अब्सालोमम ब्रेश्शो बाक्माक्त। तन्न मेकोपुकी मारेइ मतुइक्थु, लशो बाक्मा बाक्त।
12 अब्सालोमम आ क्योरशा चढ़ेतीकेम चढ़ेवानु, गिलोह सहर ङा अहीथोफेल कली ब्रेत्थ सोइक्ता बाक्त। मेको अहीथोफेल चहिं गिलोह सहर ङा दाऊद कली अर्ती गेब मुर बाक्माक्त। मोपा पिप कली मरिम्शो गेय पना पन लशा अब्सालोम आ मुर शुश दुम्ना दुम्न लमा बाक्त। २सामुएल २३:३४; यहोसु १५:५१
दाऊद प्रोक्शो
13 मिनु लोव़ कुरब मुर का दाऊद आ बाक्तीकेम जाक्शा “इस्राएल ङा मुरपुकी अब्सालोम आ नोले खोइक्तेक्म” देंमाक्त।
14 मिनु दाऊदम यरूसलेमम आं नु बाक्ब आ ठेयब गेय पाइब आन कली “बोक्कीन, गोपुकी रीब पा प्रोक्चा माल्नय। मो मपाइतय हना, गो सुइ अब्सालोम आ गुइ रे ब्रोंइचा मताइनय। रीब पा पने, मो मदुम्त हना, मेकोमी इं क्येङा लाक्शा, इं कली शुश श्येत गेशा, सहर कली लडाइ तोइब” देंमाक्त।
15 मिनु पिप आ ठेयब गेय पाइबपुकीमी “गे आंइ प्रभु पिपमी, मार देंनी, गो इन गेय पाइबम मेको पाइनीकी” देंमा बाक्त।
16 मिनु पिपमी आ खिं ङा सुइ सुइ आन कली लाइश्शा गाक्माक्त। मेकोमी १० जना नोले चाक्शो मीश आन कली खिं कोव़चा कली प्रोंइशा वोइक्मी बाक्त।
17 मिनु पिप गाक्माक्त। मिनु मुर नेल्ल आ नोले खोदमे बाक्त। मिनु नोले ङा खिंम चहिं दिक्मा बाक्त।
18 मिनु पिप आ ठेयब गेय पाइब, केरेथी नु पेलेथी नेल्ल, गाथ सहर रे जाक्शो ६ सहे गित्त आ खिं ङा नु मुर नेल्ल पिप आ ङोंइती लाक्गमे बाक्त। २सामुएल ८:१८; १सामुएल २७:२
19 मिनु पिपमी गित्त आ खिं ङा इत्ताइ कली “मारदे गे यो गो नु पिवे? लेश्शा लशा, पिप नु बाक्को। मारदे हना गे अर्को रागी ङा मुर नवे। गे इ रागी रे ग्रुंइचा पुंइसीशो मुर नवे।
20 गे सिनाक्त साबेर नाक्त ला जाक्शो मुर नवे। गो मुलाक्त इ कली दोपा गो नु गाक्को देंनुङा? गो ते लाइक्नुङा आंमान मतुइक्नुङ। गे खिं लावो। मिनु इ मुर आन कली यो लाइक्मी। परमप्रभु यावेमी इ कली आ गेना हना यो दाक्शा मप्रोंइतीके कोंइदल” देंमाक्त।
21 तन्न इत्ताइमी पिप कली “परमप्रभु यावे ब्रोंइशा बाक्शो खोदेंशो पा नु आं प्रभु पिप इन ब्रोंइशा बाक्शो खोदेंशो पा, गे ते लाइतीनी हना यो, गो मेक लाइक्नुङ। ब्रोंइतीनी हना यो, बेक्तीनी हना यो, गो इन गेय पाइब, इन नु बाक्नुङ” दे मदा बाक्त।
22 मिनु दाऊदमी इत्ताइ कली “लो, दुम्ब गाक्को” दे मदा बाक्त। मोपा गित्त आ खिं ङा इत्ताइ, आ मुर नेल्ल नु आ आल नेल्ल नु गाक्मा बाक्त।
23 पिप मोपा गाक्मेनु लांम बाक्ब मुर नेल्ल ङाक्मा बाक्त। पिप किद्रोन खोला शोक्शा गोरशो रागी गे लमा बाक्त।
24 मिनु अबीयाथार, सादोक नु लेवी नेल्ल परमप्रभु आ कबल पशो सन्दोस कुरशा, जाक्मा बाक्त। मेकोपुकी चहिं सहर ङा मुर नेल्ल ग्रूशा मगाक्मा सम्म सन्दोस नाइश्शा रिम्शा बाक्मा बाक्त।
25 मिनु पिपमी सादोक कली “परमप्रभु आ सन्दोस सहर लेश्शा लतीन। परमप्रभु यावेमी आं कली शिशी पाइक्ती हना, आं कली लेश्शा जाक्चा गेब। मिनु सन्दोस नु मेको वोइक्तीके लेंशा कोव़चा गेब।
26 तन्न परमप्रभु यावेमी ‘गो इ कली शिशी मपाइनुङ’ देंत हना, गो एक उइ बाक्नुङ। मेकोम आं कली आ दाक्शो पवल।
27 कोव़ङीन, गे नु इ तौ अहीमाज नु अबीयाथार नु आ तौ योनाथन एको ठिटा निक्शी आस कली लाइश्शा, सहर लेतीन। १राजा १:४२
28 गो गोरशो रागी आ सुरमी इन लोव़ मनेंनु सम्म रिम्शा बाक्नुङ। एको लोव़ मप्रेंदीन” देंमाक्त।
29 मिनु सादोक नु अबीयाथारम परमप्रभु आ सन्दोस यरूसलेम लेश्शा लदसे बाक्त। मिनु मेको मेक उइ बाक्सा बाक्त।
30 तन्न दाऊद जैतून डांडा ङा ग्येत्थ लांमी ङाक्ना ङाक्न लमाक्त। मेकोम आ पिया सुम्शो बाक्माक्त। श्येत्थ खोइल गाक्शो बाक्माक्त। मेको नु गाक्ब नेल्ल यो आन पिया सुम्शा ङाक्ना ङाक्न गाक्मा बाक्त।
31 मिनु दाऊद कली अहीथोफेल मरिम्शो पाइब आन दातेम अब्सालोम नु बाक्त देंशो लोव़ नेंपदमे बाक्त। मिनु दाऊदम “परमप्रभु यावे अहीथोफेल आ अर्ती शोर गाक्शो सेलीन” दे पुंना बाक्त। २सामुएल १७:१४
32 मिनु दाऊद परमप्रभु कली ठेयब सेल्तीक डांडा तार जाक्माक्त। मेना अरकी आ खिं ङा हुशाइ आ वा खाक्शा, आ पियाम खप फुंइसीशा दाऊद कली ग्रुम्थ जाक्माक्त। १राजा ३:२; यहोसु १६:२
33 दाऊदम मेको कली “गे गो नु गाक्ते हना, आं कली श्येत ला दुम्ब।
34 तन्न गे सहर लेश्शा लशा अब्सालोम कली ‘गो इन आफ आ गेय पशो खोदेंशो पा इन गेय पाइब दुम्नुङ’ देंते हना, मिनु मेक बाक्ते हना, अहीथोफेल आ अर्ती खतम सेल्चा कली आं कली वारच पाइनेवे। २सामुएल १७:७
35 चढ़ेब सादोक नु अबीयाथार गे नु मेक बाक्नीस। पिप आ खिंम मार मार लोव़ नेंनी, मेको नेल्ल मेको आस कली शेंदीम्सी।
36 मेको निक्शी नु आस तौ मेको नु बाक्नीस। सादोक आ तौ अहीमाज नु अबीयाथार आ तौ योनाथन रे इन नेंशो लोव़ नेल्ल आं कली नेंपाइक्ने चाप्नीनी” देंमाक्त। २सामुएल १७:१५-२१
37 मिनु दाऊद आ वारच हुशाइ, अब्सालोम यरूसलेमम ओव़न ओव़ना, सहर जाक्दीम्माक्त। १इतिहास २७:३३