11
दाऊदमी पाप पशो
1 नक बर्स जाक्मेनु, पिपपुकी लडाइ पथ ग्रूमा बाक्त। दाऊदमी योआब, लडाइ पाइब आन ठेयब मुर नु इस्राएल ङा लडाइ पाइब नेल्ल आन कली सोइक्तीमी बाक्त। मिनु मेकोपुकीम अम्मोन खतम पोक्गमे बाक्त। रब्बाह सहर कली पुम्दमे बाक्त। तन्न दाऊद चहिं यरूसलेम सहरमी बाक्माक्त। १इतिहास २०:१
2 काबु नाक्ती नाक्नाक्दो दाऊद आ इप्तीक रे बोक्शा, खिं तार हिरसेनु, मेकोमी मीश मुर का चिक्शो तवा बाक्त। मेको थम दारशो बाक्माक्त। मत्ती ५:२८-२९
3 मेको सु बाक्म, दे हिल्लो पथ, मुर का सोइक्ता बाक्त। मिनु मेकोमी “मेको एलीआम आ तमी, हित्ती उरीयाह आ मीश बाथ्शेबा बाक्त” देंमाक्त। २सामुएल २३:३९
4 मिनु दाऊदम मेको कली ब्रथ सोइक्ता बाक्त। मिनु मेको जाक्माक्त। मिनु दाऊद मेको नु इम्माक्त। मेको मीश मुर मेना आ रां ब्रोल्शा चिक्शो बाक्माक्त। मिनु नोले बाथ्शेबा आ खिं लेम्माक्त। प्रस्थान २०:१४; लेवी २०:१०; ब्यवस्था २२:२२; लेवी १५:१९
5 मिनु मेकोमी कोव़ज कुरा बाक्त “गो कोव़ज कुरशो दुम्ती” दे दाऊद कली लोव़ सोइक्ता बाक्त।
6 मिनु दाऊदमी योआब कली “मेको आ वोंइश हित्ती उरीयाह कली आं बाक्तीक सोइक्तो” दे लोव़ कुरब सोइक्ता बाक्त। मिनु योआबमी मेको कली दाऊद आ बाक्तीक सोइक्ता बाक्त।
7 मिनु उरीयाह जाक्मेनु, दाऊदमी “लडाइ दोदेंशो दुम्मे, योआब नु अरु लडाइ पाइबपुकी मार पामे?” दे हिल्लो पवा बाक्त।
8 मेको नोले दाऊदमी हित्ती उरीयाह कली “उइ इ खिं लशा नांइसो, इ खोइल चिक्सो” दे मदा बाक्त। मिनु मेको पिप आ खिं रे ग्रूशा गाक्मेनु, पिपमी मेको आ नोले कोसेली सोइक्ता बाक्त।
9 तन्न उरीयाह उइ आ खिं मलथु, पिप आ ओव़तीक लाप्चो आ नेक्था इम्माक्त। मेकेर आ प्रभु आ गेय पाइबपुकी यो इप्शो बाक्मा बाक्त।
10 मिनु दाऊदम उरीयाह उइ आ खिं मला देंशो लोव़ नेना बाक्त। मिनु मेको कली “गे लाइश्शो लां गाक्शा जाक्शो बाक्नेवे। मारदे गे उइ इ खिं मलवे?” दे मदा बाक्त।
11 मिनु उरीयाहमी “परमप्रभु आ सन्दोस, इस्राएल नु यहूदा ङा मुर नेल्ल, आं प्रभु योआब नु इन गेय पाइब नेल्ल दिंम ङा बाक्तीकेम बाक्शो बाक्नीम। मिनु गो दोपा जचा तूचा नु आं मीश नु इप्चा कली खिं लाइक्नुङा? गे इन ब्रोंइशा बाक्शो खोदेंशो पा, गो मो पने मचाप्नुङ” देंमाक्त।
12 मिनु दाऊदमी उरीयाह कली “मो हना मुलाक्त का एक बाक्को। मिनु दीसा लेश्शा सोइक्नन” देंमाक्त। मोपतीके उरीयाह मेको नाक्ती यरूसलेम उइ बाक्माक्त।
13 मिनु आ दीसा दाऊदमी मेको कली आ बाक्तीकेम जथ ब्रेत्ता बाक्त। मिनु मेको कली दुक्पदा बाक्त। तन्न नाक्दो मेको लाङगा ग्रूशा आ प्रभु आ गेय पाइबपुकी नु आ ब्राख्येम इम्माक्त। तन्न मेको उइ आ खिं मलमाक्त।
14 आ दीसा दाऊदमी योआब कली चिठी का ब्रेक्शा, उरीयाह आ गुइमी सोइक्ता बाक्त।
15 मेको चिठीम “तेकेर ठेयब लडाइ दुम्मे मेकेर उरीयाह कली सोइश्शा, गेपुकी चहिं नोले शोंइसीन। मिनु मेको बेक्ल” दे ब्रेक्ता बाक्त। प्रस्थान २०:१३
16 योआब नु लडाइ पाइबपुकीमी सहर कली पुम्दमे बाक्त। मिनु मेकोमी उरीयाह कली थम ठेयब लडाइ दुम्तीकेम सोइक्ता बाक्त।
17 मिनु सहर ङा मुरपुकी फो फु ग्रूशा योआब नु लडाइ पामे बाक्त। दाऊद आ मुरपुकी का निक्शी बेक्मा बाक्त। हित्ती उरीयाह यो साइक्चा पुंइसे बाक्त।
18 मिनु योआबमी लडाइ ङा लोव़ नेल्ल देंशा, मुर का दाऊद आ बाक्तीकेम सोइक्ता बाक्त।
19 योआबमी लोव़ कुरब मुर कली “गे लडाइम मार मार दुम्मे, मेको लोव़ नेल्ल पिप कली शेंने थुमी नोले,
20 पिप गाइश्शा ‘लडाइ पनीनु सहर आ नेक्था मारदे लनी? गारो तार रे आप्नीम, दे मतुइक्नीनी?
21 येरूब-बाल आ तौ अबीमेलेक कली सुम सदा? मीश मुर कामी थेबेस ङा गारो रे यात तोक्शा साइश्शो बाक्ब। मारदे गे गारो आ नेक्था लनी?’ देंत हना, गे मेको कली ‘इन गेय पाइब हित्ती उरीयाह यो बेक्त’ मतो” दे मदा बाक्त। न्यायाधीस ९:५३-५४
22 मिनु मेको लोव़ कुरब मुर दाऊद आ बाक्तीक जाक्माक्त। मिनु योआब आ देंशो खोदेंशो पा लोव़ नेल्ल शोव़ङा बाक्त।
23 मिनु मेको लोव़ चाक्ब मुरुमी दाऊद कली “मुरपुकी आंइ कली लडाइ तोचा कली बुक्तेक्म। मिनु फो फु ग्रूशा दिंमम आंइ कली लडाइ तोम्तेक्म। गोपुकीम मेको आन कली सहर आ लाप्चो सम्म खेदा पा लाइतक।
24 मिनु ब्रा आप्बपुकीम इन गेय पाइब आंइ कली गारो तार रे ब्रा आप्तेक्म। मिनु इन मुर का निक्शी बेक्तेक्म। इन वाइल हित्ती उरीयाह यो बेक्त” देंमाक्त।
25 मिनु दाऊदम मेको कली “गे योआब कली ‘गे मेको साइश्शो मुर आन पर्बम सुर्ता मपावो। मारदे हना तरवारम गेना हना यो मुर साइक्ब। गे सहर कली लडाइ तोस ङा तोस बाक्शा, ग्रानीनी’ दे आ थुं बारपतीन” देंमाक्त।
26 मिनु उरीयाह आ मीशेम आ वोंइश बेक्शो लोव़ नेंशा, मेको आ पर्बम रोंका पवा बाक्त।
27 मिनु रोंका पतीक नाक्त नुम नोले दाऊदम मुर सोइश्शा आ खिं चाक्गा बाक्त। मिनु मेको दाऊद आ मीश दुम्शा, तौ का थिमाक्त। तन्न दाऊद आ पशो परमप्रभु यावे आ ङोंइती थम मरिम्शो बाक्माक्त।