34
परमप्रभुमी कोव़शो
दाऊद आ कुम्सो। दाऊदमी पिप अबीमेलेक क्येङा हिंशा, निप्स ग्यशो दुम्ची ना पशो कुम्सो। अबीमेलेकमी दाऊद कली खेरानु, दाऊद लशो। १सामुएल २१:१४-१६
1 गो परमप्रभु यावे कली गेना हना यो ठेयब सेल्नुङ। मेको कली ठेयब सेल्तीक लोव़ गेना हना यो आं शोव़म बाक्ब।
2 परमप्रभु यावे कली मिम्तीके आं थुं बारशा, ग्येरब। ब्रेम्शो थुं पाइश्शोपुकी यो एको नेंशा, ग्येरसीनीम।
3 गे गो नु परमप्रभु यावे कली ठेयब सेलीन। मिनु गो नेल्ल गारशा, आ नें ठेयब सेल्य।
4 मिनु गो परमप्रभु यावे कली माल्ता। मेकोमी आं लोव़ लेत्ताक्यी। मेकोमी आं कली हिंतीक नु श्येत रे प्रोंइती।
5 मेको आ लां कोव़बपुकी ग्येरशो दुम्नीम। मेकोपुकी मुने मदोक्मल।
6 एको श्येत जाइबम पुंइतु। मिनु परमप्रभु यावेमी आ लोव़ नेंशा, आ श्येत रे प्रोंइतु।
7 परमप्रभु यावे आ स्वर्ग ङा गेय पाइबम परमप्रभु कली मान पा हिंब नेल्ल आन एर ओंथ बाक्शा, खाल पाइब। मिनु मेको आन कली आन श्येत रे प्रोंइब। भजन संग्रह ९१:११; उत्पत्ती ३२:२-३; २राजा ६:१७
8 परमप्रभु यावे कली कोव़ङीन, मेको रिम्शो बाक्ब। मेको कली जिम्मा गेंसीबपुकी ग्येरसीशो बाक्नीम। १ पत्रुस २:३
9 परमप्रभु यावे आ मुरपुकी मेको कली मान पा हिनीन। मारदे हना मेको कली मान पा हिंबपुकी मारेइ मारेइम गाप्शो बाक्नीम।
10 शुश क्येट थीब आन तमी तौ जचा ब्वचा मतथु, शोव़लु बेक्नीम। तन्न परमप्रभु यावे कली माल्ब मारेइ मारेइम गाप्शो बाक्नीम। लूका १:५३
11 आलपुकी, एक जाक्कीन। मिनु आं लोव़ नेनीन। गो इन कली परमप्रभु यावे कली मान पा हिंतीके आ पर्बम शेंनन्नी।
12 सु सुमी शुश नाक्ती ब्रोंइचा नु रिम्शो तचा दाक्नीमी,
13 मेको मरिम्शो लोव़ नु जोल पतीके रे ङोन बाक्चा माल्नीम।
14 मरिम्शो पतीके रे लेश्शा, रिम्शो पने। थुं नाइश्शा बाक्तीके माल्शा बाक्कीन।
15 परमप्रभु यावेमी ठीक पाइब आन गे कोव़शा, मेको आन पुंइशो नेंब।
16 परमप्रभु यावेमी मरिम्शो पाइब आन कली कोव़ना कोव़न बाक्ब। मिनु मेको आन कली मिम्तीके का यो मवोइक्थु रागी रे क्याम्ब। हितोपदेस १०:७
17 ठीक पाइबपुकीमी पुंइनीम। मिनु परमप्रभु यावेमी मेको आन पुंइशो नेंशा, आन श्येत नेल्ल रे प्रोंइब।
18 परमप्रभु यावे थुं लुक्च लशो आन नेक्था बाक्ब। आन थुं बेक्शो आन कली प्रोंइब। भजन संग्रह ५१:१९
19 ठीक पाइबपुकी शुश श्येत जाइनीम। तन्न परमप्रभु यावेमी मेको आन कली श्येत नेल्ल रे प्रोंइब। २कोरिन्थी १:५
20 मिनु मेकोमी आन रुश नेल्ल कोव़ब। मुरुम का यो मजिक्नीम। यूहन्ना १९:३६; प्रस्थान १२:४६
21 मिनु परमप्रभु आ अरेशो मटीब आन मरिम्शो पतीकेमी साइक्चा पुंइसीनीम। ठीक पाइब आन कली मदाक्बपुकी दोस तशा सजाइ ताइनीम।
22 परमप्रभु यावेमी आ गेय पाइब आन कली श्येत रे प्रोंइब। मेको कली जिम्मा गेंसीबपुकी दोस मतथु, काइ सजाइ मताइनीम।