14
इस्राएलीपुकीमी थमा मसुइश्शो
1 मिनु मेको नाक्दो मेको मुर नेल्ले वाइ ब्रेश्शा ङाक्तेक्म। ब्यवस्था १:२६-४४
2 मिनु इस्राएली नेल्ल मोसा नु हारून आस पर्बम गन गन पाम्तेक्म। मिनु नेल्लेमी मेको आस कली “गोपुकी इजीप्त उइ बेक्शो नकी हना, रिम्शो दुम वा। एको गोरशो रागीम बेक्शो नकी हना यो, दुम वा। गन्ती ११:१; प्रस्थान १६:२-३; प्रस्थान १७:२-३
3 मारदे परमप्रभु यावेमी आंइ कली तरवारम साइक्पाइक्चा कली एको रागी चाक्गा? गो आंइ मीशपुकी नु आंइ आलपुकी रोइश्शा लाइक्नीम। गोपुकी इजीप्त रागी लेत्चा रिम्शो ममाइ ङा?” देंतेक्म। भजन संग्रह १०६:२४-२६
4 मिनु मेकोपुकी “मुल गो लां कोंइब मुर का योव़शा, इजीप्त रागीम लेय्य” देंमुम्तेक्म।
5 मिनु मोसा नु हारून मेकेर बुक्शो इस्राएली नेल्ल आन ङोंइती खुम्की पा बाप्ताक्स। गन्ती १६:४
6 मिनु मेको रागीम क्यारी पथ लाइब नून आ तौ यहोसु नु यपुन्ने आ तौ कालेबमी सुर्ता पा आस आस वा खाक्ताक्स। गन्ती १३:६,८,१६,३०
7 मिनु मेको निक्शीमी इस्राएली नेल्ल आन कली “गोपुकी आंइ क्यारी पथ लशो रागी थम रिम्शो बाक्ब।
8 परमप्रभु यावे गोपुकी इं कली तशा ग्येरसाक्व हना, मेकोमी इं कली मेको रागीम चाक्दीप्ब। मिनु मेको रागी दूध नु खुदो शुश बाक्शो रागी बाक्ब। मेको रागी इं कली गेब। गन्ती १३:२७
9 गेपुकी परमप्रभु यावे कली गन गन मपने। मिनु मेको रागी ङा मुर आन क्येङा महिनीन। मारदे हना गो मेको आन कली शोब्ले खोदेंशो पा नेक्नय। मेको आन कली प्रोंइब सुइ मबाक्नीम। परमप्रभु यावे गोपुकी नु बाक्ब। मेको आन क्येङा महिंनीन” देंताक्स। गन्ती १३:३२
10 तन्न मुर नेल्लेमी मेको आस कली “फुल्लु आप्नीकी” दे हिंच कोंइताक्म। मेना परमप्रभु यावे आ छेङछेङ इस्राएली नेल्ल आन कली ग्रुम्तीक ताम्बुम तपांइसाक्व। प्रस्थान १७:४; प्रस्थान १६:१०
11 मिनु परमप्रभु यावेमी मोसा कली “एको मुरपुकीम गेना सम्म आं कली मटीनीमी? एको आन दातेम आं कोंइशो चिन्ड तशा यो, गेना सम्म आं कली थमा मसुइक्नीमी?
12 गो मेको आन कली बेक्तीक रोइमी साइक्नुङमी। मेको आं मुर खोदेंशो मबाक्नीम। मिनु गो इ रे मेको आन क्येङा शुश नु बोल्यो जात का सेल्नुङमी” देंत। प्रस्थान ३२:१०-१४
13 मिनु मोसामी परमप्रभु यावे कली “मोदेंशो पाइतीनी हना, इजीप्त ङा मुरपुकीमी एको लोव़ नेंनीम। मारदे हना गे मेको आन कली इन सक्तिमी मेकेर रे ग्रुंइताक्नी।
14 एको रागी ङा मुरपुकीम मेको आन कली नेंपाइक्नीम। परमप्रभु यावे, गे इन मुर आन दातेम बाक्शो बाक्नीनी, दे मेकोपुकीमी देंशो लोव़ नेंने थुम्शो बाक्नीम। परमप्रभु यावे, गे मेको आन ङोंइतीन तपांइसीशो बाक्नीनी। मिनु इन गोस्स मेको आन तार बाक्शो बाक्ब। मिनु गे नाक्ती गोस्स के थामम नु नाक्दो मी के थामम बाक्शा, मेको आन ङोंइती गाक्नीनी। प्रस्थान १३:२१-२२; गन्ती ९:१५-२३
15 मिनु मुल गे एको मुर आन कली कालेमी साइक्तीनी हना, इन पशो नेंब रागी रागी ङा मुरपुकीमी
16 ‘परमप्रभु यावेमी मेको आन कली गेनुङ, दे कसम जशो रागीम चाक्दीन्ने मचब। मोपतीके मेको आन कली गोरशो रागीम साइक्तु’ देंनीम। ब्यवस्था ९:२८; यहोसु ७:८-९
17 मोपतीके, परमप्रभु, इन ठेयब सक्ति कोंइदीन। गे इन थोक्शो पशो लोव़ खाप्पीन।
18 ‘परमप्रभु यावे रीब पा मगाइक्ब नु गेना हना यो दाक्ब, प्रस्थान ३४:६-७ मेकोमी मरिम्शो पशो नु दूली पशो क्याम्ब, तन्न दोस ताइब कली दोस मताइब मदेंब। आन आंम आफ आन पशो पाप मेको आन आल, चच, युइ नु युइ आन आल सम्म रपाइक्ब’ दे थोक्शा लोव़ पशो बाक्तीनी।
19 मिनु गे मेको मुर आन मरिम्शो पशो इन ठेयब नु गेना हना यो दाक्तीकेमी क्याम्दीन। गे इन मुर आन कली इजीप्त रे एक सम्म आन मरिम्शो पशो क्याम्शो खोदेंशो पने” दे पुंइतु। प्रस्थान ३४:१०
20 मिनु परमप्रभु यावेमी “गे इ पुंइशो खोदेंशो पा एको मुर आन मरिम्शो पशो क्याम्नुङ।
21 मो हना यो गो थमा पा, रागी नेल्ले आं सक्तिमी प्रिंनुङ। प्रस्थान ९:१६
22 मेकोपुकीमी इजीप्तमी नु गोरशो रागीमी आं ठेयब सक्ति नु छक लाक्चा ङा गेय तशा यो, आं कली १० खेयप नाक्शा, मटीब दुम्शा, मेको नेल्लेमी
23 मेको आन किकी पिपी आन कली कसम जशा ‘गेनुङ’ देंशो रागी ओव़चा मताइनीम। मिनु आं कली काइ मदाक्बपुकीम मेको रागी मताइनीम। भजन संग्रह ९५:११; हिब्रू ३:११,१७-१९
24 तन्न आं गेय पाइब कालेब आ थुंमी अर्को सोक्ती बाक्ब। मिनु मेकोमी आ थुं नेल्लेमी आं कली टिशो बाक्ब। गो मेको कली आ क्यारी पथ लशो रागी चाक्दीत्नुङ। मिनु मेको आ तौ चच युइ आन रागी दुम्ब। यहोसु १४:६-९
25 मिनु अमालेक आ मुर नु कनानीपुकी बेंसीम बाक्तीके, गेपुकी दीसा लने। मिनु लल समुन्द्र गे पा गोरशो रागी लने” देंत।
26 मिनु परमप्रभु यावेमी मोसा नु हारून आस कली
27 “गेना सम्म एको मरिम्शो मुरपुकीम आं पर्बम गन गन पाइनीमी? गो इस्राएली आन आं कली गन गन पशो नेंता। मेकोपुकीम आं कली गन गन पाइनीम। प्रस्थान ३२:३४-३५
28 गे मेको आन कली ‘परमप्रभु यावेमी थमा पा इन देंशो खोदेंशो पा इन कली पाइनुङ।
29 गे नेल्ल गोरशो रागीमी बेक्चा माल्नीनी। नें ब्रेक्शो नेल्ले, २० बर्स गाप्शो नु मेको क्येङा लाक्शो आं कली गन गन पाइब बेक्चा माल्नीम। १कोरिन्थी १०:१०
30 आं कसम जशा, इन कली गेनुङ देंशो रागीमी सुइ ओव़चा मताइनीम। यपुन्ने आ तौ कालेब नु नून आ तौ यहोसु ला ओव़चा ताइनीस।
31 मिनु रोइक्चा पुंइसीनीम, देंशो इन आल आन कली चहिं गो मेक चाक्दीत्नुङमी। मिनु मेकोपुकीमी इन मदाक्शो रागीम बाक्शा, तुइक्नीम।
32 गेपुकी चहिं एको गोरशो रागीमी बेक्नीनी।
33 मिनु इन आल मेको गोरशो रागीमी ४० बर्स सम्म गोठला दुम्शा हिरचा माल्नीम। मोपा इन मटिशो आ पर्बम श्येत जाइनीम। गे नेल्ल इन नेल्ल क्येङा नोले ङा मुर मबेक्नी सम्म मोदेंशो पा हिरचा माल्नीम। प्रस्थान १६:३५; ब्यवस्था २:७; ब्यवस्था ८:४
34 गेपुकीमी मेको रागी क्यारी पचा कली ४० नाक्त सम्म माल्शो बाक्तीनी। मोपतीके नाक्त का ङा बर्स का पा ४० बर्स सम्म गेपुकीम इन मरिम्शो पशो आ पर्बम श्येत जचा माल्नीनी। मिनु गो इन पर्बम गाइक्ताक्ङ, दे तुइक्नीनी’ दे येरमीया २:१९; गन्ती ३२:१३
35 गो, परमप्रभु यावेमी, लोव़ पाता। मिनु गो एको आं कली गन गन पा बुक्शो मरिम्शो मुर आन कली थमा पा मो पाइनुङ। मेको नेल्ल एको गोरशो रागीमीन बेक्शा नुप्नीम” देंत।
36 मिनु मोसाम क्यारी पथ सोइश्शो मुरपुकी लेश्शा जाक्शा मेको रागी आ पर्बम मरिम्शो लोव़ पा मुर नेल्ल आन कली परमप्रभु यावे कली गन गन पपाइक्तेक्म। १कोरिन्थी १०:५,१०; यहूदा:५
37 मेको रागी आ पर्बम मरिम्शो लोव़ चाक्ब मुर नेल्ल परमप्रभु यावे आ ङोंइती बेक्चा माल्नीम।
38 मिनु मेको रागी क्यारी पथ लाइब आन दाते ङा नून आ तौ यहोसु नु यपुन्ने आ तौ कालेब ला ब्रोंइनीस।
39 मिनु मोसाम मुर नेल्ल आन कली एको लोव़ नेंपदानु, मुर नेल्ल शुश रोंका पाम्तेक्म।
40 मेकोपुकीमी सुनी कना बोक्शा इर पहाड गे ङोइश्शा “गोपुकी मुल एक रे परमप्रभु यावे आ कबल पशो रागी लाइनीकी। मारदे हना, गोपुकीम पाप पशो बाक्नीकी” देंतेक्म। ब्यवस्था १:४१
41 तन्न मोसामी मेको आन कली “मारदे गेपुकीमी परमप्रभु यावे आ लोव़ लाक्नीनी? गे मग्रानीनी।
42 गे इर मङोंइसीन। मारदे हना परमप्रभु यावे गेपुकी नु मबाक्ब। मो पाइतीनी हना, इन जोरी सत्रुपुकीमी इन कली साइक्नीम।
43 मिनु अमालेक आ मुर नु कनानीपुकीमी इन कली लडाइ तोइनीम। मिनु गेपुकी तरवारम साइक्चा पुंइसीनीनी। मारदे हना गेपुकी परमप्रभु यावे कली टिचा प्रोंइतीनी। मोपतीके परमप्रभु यावे इन दातेमी मबाक्ब” देंत।
44 मो हना यो मेकोपुकीम लोव़ मनेंथु, इर पहाड गे ङोंइसाक्म। तन्न परमप्रभु यावे आ कबल पशो सन्दोस ग्रुम्तीक ताम्बुम बाक्त। मिनु मोसा मुर आन बाक्तीक उइ बाक्त।
45 मिनु मेको पहाडम बाक्ब अमालेक आ मुर नु कनानीपुकी उइ तोइश्शा, मेको आन कली साइक्ना साइक्न होरमा सम्म खेदा पाम्तेक्म। गन्ती २१:३; ब्यवस्था १:४४