6
जोरी सत्रुमी हिंच कोंइशो
1 मिनु नोले सान्बल्लत, तोबीयाह, अराबी गेशेम नु आंइ जोरी सत्रुपुकीमी “गोपुकीमी गारो प्रोव़शा, पोव़ला नेल्ल यो सुने थुम्तक” देंशो नेंतेक्म। गो ठेयब लाप्चो थारने मथुम्शो बाक्ती।
2 मेना सान्बल्लत नु गेशेममी आं कली “ओनो दिंम ङा गाउं काम ग्रुम्य” दे लोव़ सोइक्ताक्यीमी। तन्न मेकोपुकीमी आं कली मरिम्शो पचा माल्शो बाक्तेक्म।
3 मिनु गो मेको आन कली “मुल आं के ठेयब गेय का बाक्ब। मोपतीके यिने मचाप्नुङ। मेक यिशा, आं गेय क्योल्चा मदाक्नुङ” दे लोव़ सोइक्ताक्ङ।
4 मिनु मेकोपुकीमी आं कली ४ खेयप सम्म “यिने” दे लोव़ सोइक्ताक्यीमी। मिनु गो यो ङोंइती ङा खोदेंशो पा लोव़ लेश्शा सोइक्ताक्ङमी।
5 मिनु सान्बल्लतमी लेंशा, ५ खेयपमी आं गेय पाइब मुर, नेल्ल आन कली पढेचा ङा पा, ब्रेक्स का सोइक्ताक्व।
6 मिनु मेको ब्रेक्समी “अर्को जात ङा मुरपुकीमी ‘गे नु यहूदीपुकी गारशा सरकार कली तुल्चशो बाक्नीनी’ देंतेक्म। गेशेममी यो मोन देंत। मोपतीके गे गारो सेल्ना सेल्न बाक्नीनी। गे चहिं मेको आन पिप दुम्चा माल्शो बाक्नेवे, देंशो यो नेंसाक्व। नेहेम्याह २:१९; एज्रा ४:१२
7 मिनु ‘यहूदामी पिप का बाक्ब’ देंपाइक्चा कली परमप्रभु यावे आ लोव़ पाइब आन कली यो योव़शा, यरूसलेमम लोव़ पथ, वोइश्शो बाक्ते। मिनु पिपमी एको लोव़ थमा पा नेंब। मोपतीके एको आ पर्बम लोव़सी पचा कली रीब पा यिने” दे ब्रेक्शो बाक्त।
8 मिनु गो “इ देंशो लोव़ नेल्ल जोल बाक्ब। आंम इ मिम्शो बाक्ब” दे लोव़ लेश्शा, सोइक्ताक्ङ।
9 मिनु मेको नेल्लेमी आंइ कली हिंच कोंइचा माल्तेक्म। मेकोपुकीमी “एको गारो प्रोव़चा प्रोंइनीम। मथुम्नीम” दे मिम्त्मे बाक्त। मिनु गो “परमप्रभु, आं थुं बारपतीन” दे पुंइता।
शेमायाहम रिम्शो लोव़ पखु पशो
10 मिनु काबु गो देलायाह आ तौ, मेहेताबेल आ चच शेमायाह आ खिंमी लती। मेको आ खिंमी चोक्सीशा बाक्शो बाक्त। मेकोमी आं कली “गो निक्शी परमप्रभु यावे आ खिं नेल्ल क्येङा आगा ओव़शा, लाप्चोपुकी चोक्शा, बाक्स। मारदे हना मेकोपुकी इन कली साइक्थ पिना पिन बाक्नीम। नाक्दो इन कली साइक्थ जाक्नीम” दे माइक्ती।
11 तन्न गो मेको कली “मार, आं खोदेंशो मुर प्रोक्बा ङा? गो परमप्रभु यावे आ खिंम ओव़शा, ब्रोंइनुङा ङा? गो मलाइनुङ” दे माइक्ता।
12 मिनु गो “परमप्रभु आ सोइश्शो ममाइ, आं कली मरिम्शो पचा, दे सान्बल्लत नु तोबीयाहमी मेको कली नोले दुम्ब लोव़ पपाइक्खु पशो बाक्ताक्स।
13 आं कली हिंच कोंइचा नु पाप पपाइक्चा माल्ताक्से। मोपा मेकोमी आं पर्बम मरिम्शो लोव़ ब्रपाइक्चा कली क्येट ताक्शो बाक्त” दे तुइक्ताक्ङ।
14 मिनु गो “आं परमप्रभु, तोबीयाह नु सान्बल्लत आस पशो मिम्तीन। आं कली हिंच कोंइचा दाक्ब नोले दुम्ब लोव़ पाइब नोआदीयाह माइश्शो मीश मुर नु अरु नोले दुम्ब लोव़ पाइब, नेल्ल आन पतीके यो मिम्तीन” दे परमप्रभु कली पुंइता। नेहेम्याह ३:३३-३७
यरूसलेम ङा गारो सेल्ने थुम्शो
15 एलुल महिना ङा २५ नाक्त गोपुकीमी गारो सेल्ने थुम्तक। सेल्ने थुम्चा कली ५२ नाक्त माल्ताक्क।
16 मिनु आंइ जोरी सत्रुपुकीमी एको लोव़ नेंतेक्म, देंशो नेंशा, आंइ एर ओंथ बाक्शो अर्को जात ङा मुर नेल्ल शुश हिंतेक्म। मिनु मेकोपुकीमी “इं परमप्रभुम पशो बाक्त” दे तुइक्ताक्म।
17 मेना यहूदा ङा ठेयब मुरपुकीमी तोबीयाह कली शुश ब्रेक्स ब्रेक्शा, सोइक्ना सोइक्न बाक्तेक्म। मिनु तोबीयाहमी यो मेको आन कली ब्रेक्स सोइक्ना सोइक्न बाक्त।
18 मिनु यहूदा ङा शुश मुरुमी तोबीयाह आ लोव़ बिश्शा “इन मुर दुम्नीकी” दे कसम जशो बाक्तेक्म। मारदे हना तोबीयाह आ चांइवा आराह आ तौ शेकन्याह बाक्त। मिनु आ तौ येहो-हानानमी बेरेक्याह आ तौ मेशुल्लाम आ तमी चाक्शो बाक्त।
19 मेको मुरपुकीमी आं ङोंइती तोबीयाहमी मार मार रिम्शो गेय पाप्तु, दे आं कली लोव़ पाम्तेक्म। मिनु आं देंशो लोव़ यो तोबीयाह कली शोव़तेक्म। मिनु तोबीयाहमी आं कली हिंच कोंइशा चिठीपुकी सोइक्ताक्यी।