12
परमप्रभु कली थमा सुइक्चा माल्ब
मत्ती १०:२६-३३
1 मिनु हजार, हजार मुर खुम्सीशा, नेम्मुशा, चुमुशा, येसु आ लोव़ नेंथ जाक्मा बाक्त। मिनु येसुमी आ शेंसीब आन कली “फरिसी आन बोरपाइक्तीक ओख्ती रे होस पा बाक्कीन। मेको आन जोल पा शेंतीक बाक्ब। मत्ती १६:६; मर्कूस ८:१५
2 सुम्शा वोइश्शो नोले नेल्ल हाक्सीशा तांइसीब। ख्रुइश्शा वोइश्शो लोव़ नेल्ल नोले तुंइसीब। लूका ८:१७
3 मोपतीके इन छिङछिङम बाक्शा पशो लोव़ नोले छेङछेङम नेंसीब। मुल इन खिंमी बाक्शा, नोफाम मुइक्मुशा पशो लोव़ नोले ठेयब सेंदा पा देंनीम।
4 आं वारचपुकी, इन रां कली साइक्ने चाप्बपुकी तशा महिनीन। मारदे हना साइक्ने थुम्शा, नोले मारेइ पने मचाप्नीम।
5 तन्न परमप्रभु यावे कली मान पा हिनीन। मारदे हना मुर आन कली साइश्शा, नाराक सोइक्तीक सक्ति मेको नु बाक्ब। मोपतीके मेको कली तशा मान पा हिनीन। हिब्रू १२:२९
6 आस्सारीयोन निक्शीम ५ ओटा भंगेरा मग्याम्सीबा ङा? मो हना यो परमप्रभु यावेमी मेको आन कली कोव़शो बाक्ब। आस्सारीयोन का नेल्ल क्येङा आइक्च तांबा के क्येट बाक्त।
7 मेको आन कली ला ममाइ। इन पिया ङा चां का का पा हिक्शा, गिश बाक्मा, दे तुइश्शो बाक्ब। मोपतीके महिनीन। गे भंगेरा क्येङा शुश हिक्सीशो बाक्नीनी। लूका २१:१८
8 सुमी मुर आन कली ‘गो येसु आ मुर नङ’ देंबा, रागीम जरमेशोमी यो मेको आ पर्बम परमप्रभु यावे आ स्वर्ग ङा गेय पाइब आन ङोंइती ‘मेको आं मुर बाक्ब’ देंब।
9 सुमी चहिं मुर आन कली ‘येसु सु बाक्मे? मतुइक्नुङ’ देंबा, मेको आ पर्बम परमप्रभु यावे आ स्वर्ग ङा गेय पाइब आन ङोंइती ‘मेको कली मतुइक्नुङ’ देंब। लूका ९:२६; १सामुएल २:३०
10 सु सुमी रागीम जरमेशो आ पर्बम शुक्शी पामे, मेको का का पा माफ ताइनीम। सु सुमी चहिं परमप्रभु यावे आ सोक्त आ पर्बम शुक्शी लोव़ पामे, मेको आन पाप गेनायो मक्याम्सीब। मत्ती १२:३२; मर्कूस ३:२८-२९
11 इन कली आन ग्रुम्तीक खिं ङा ठेयब मुर नु हुकुम पाइब आन ङोंइती लाइश्शा राप्पदमेनु ‘मुल मार देंचा, मार लोव़ लेत्चा’ दे सुर्ता मपने।
12 मोपा राप्पदमेनु, परमप्रभु यावे आ सोक्तीमी इन कली मार देंचा दो देंचा तुइक्पाइश्शा देंपाइक्ब” दे शेंदीमी बाक्त।
शोंप गे थुं महिरचा, दे शेंशो
13 मिनु काबु आ लोव़ नेंथ शुश मुर खुम्समानु, मुर कामी “शेंब, आं लोक्ब कली आं तचा ङा अङस योक्शा गेवो, दे मतीन” दे पुना बाक्त।
14 मिनु येसुमी “मार गो इस अङस योक्ब नङा ङा? मनङ” देंमाक्त।
15 मिनु नोले मुर आन कली “नेनीन, होस पा बाक्कीन। शिंम मदुमीन। मारदे हना शुश शोंप बाक्शा ला ब्रोंइशा बाक्चा मतांइसीब” देंमाक्त। उपदेसक ५:९; १तिमोथी ६:९-१०
शोंप पाइश्शो मूर्ख
16 मिनु कथा सेल्शा “शोंप पाइश्शो मुर का आ बाली नाली शुश ग्रेल्माक्त।
17 मिनु मेकोमी शुश ग्रेल्शो तशा ‘मुल अन्न वोइक्तीके खिं मजाक्दीप्ब।
18 मोपतीके खिं प्रेश्शा अन्न वोइक्तीक ठेयब खिं सेल्शा, बाक्शो अन्न नेल्ल मेकेर उप्नुङ’।
19 मिनु मेकोमी ‘शुश बर्स कली जाक्दीप्ब। शुश शोंप गे नु बाक्ब। मोपतीके जशा तूशा ग्येरशा बाक्को’ दे आंम थुं कली देंमाक्त। भजन संग्रह ४९:१-२०
20 मिनु परमप्रभु यावेमी मेको कली ‘गे मूर्ख नवे। मारदे हना मुलाक्दो बेक्नेवे। मिनु इ खुप्शा उप्शो शोंप सुम जाइबा?’ दे मदा बाक्त।
21 परमप्रभु यावे कली ममिम्थु, शोंप ला मिम्ब मुर नेल्ल मोदेंशो दुम्नीम” दे शेंदीमी बाक्त। मत्ती ६:२०
सुर्ता मपचा, दे शेंशो
मत्ती ६:२५-३३
22 मिनु आ शेंसीब आन कली “मार जचा, मार फेक्चा, दे सुर्ता मपने।
23 मारदे हना जचा क्येङा ब्रोंइचा ठेयब बाक्ब। फेक्चा क्येङा इन रां ठेयब मिम्तीने।
24 खद आन कली कोव़ङीने। मेकोपुकीमी मशोक्नीम, मारेइ मरुप्नीम मखुप्नीम। आन अन्न वोइक्तीक खिं यो मबाक्ब। तन्न परमप्रभु यावेमी मेको आन कली कोव़शा थुल्ब। मिनु गे मेको चिक्ब आन क्येङा हिक्सीशो मबाक्नीनी ङा?
25 मार, गेपुकीमी सुर्ता पा इन ब्रोंइतीक नाक्त बारपाइक्ने चाप्नीनी ङा?
26 मोदेंशो लायो मचाप्तीनी हना, मारदे अरु थोव़क आन कली सुर्ता पाइनीनी?
27 लिली फू कली कोव़शा मिम्तीने। गिश रिम्शो तांइसीनीमी। श्येत पा गेय मपाइनीम। पांइतो मपांइनीम। पिप सोलोमन गिश ग्योम्साक्व हना यो, मेको लिली फू खोइ दारशो मदुम्माक्त।
28 परमप्रभु यावेमी मेको घांस रिम्शो पा ग्योम्ताक्व बाक्त हना यो, याम का बाक्चा गेब। नोले मेको घांस मीम हुम्चा पुंइसीब। घांस कली लायो मिश रिम्शो पा ग्योम्ताक्व हना, गे रिम्शो पा थमा सुइक्ने मचाप्ब इन कली मग्योम्बा ङा?
29 मार जचा मार तूचा, दे थुंमी सुर्ता मपने।
30 रागी रागी ङा मुर नेल्लेमी मोदेंशो मिम्नीम। इन आफ, परमप्रभु यावेमी इन माल्शो नेल्ल तुइक्ब।
31 मोपतीके मोदेंशो मिम्चा प्रोंइशा, परमप्रभु यावे आ राज्य मालीने। मिनु मारेइ मारेइ यो ताइनीनी।
32 गे आइक्च बगाल, महिनीन। मारदे हना इन आफोमी इन कली आ राज्यम वोइक्चा दाक्ब। लूका २२:२९
33 इन के बाक्शो लेयशा, मथीब आन कली योक्शा गेने। मो पनीनु, स्वर्गम इन शोंप लीब। मिनु मेको मोपा वोइश्शो शोंप खुइमी खुइ पने मचाप्नीम, खिया मजोइब मराक्ब, गेनायो मजाम्ब। लूका १८:२२
34 तेकेर इन शोंप बाक्बा, मेकेरन इन थुं यो लीशो बाक्ब।
सासीशा बाक्कीन, दे शेंशो
मत्ती २४:४३-५१
35 बत्ती दाशा वा फेक्शा सासीशा बाक्कीन। प्रस्थान १२:११; १पत्रुस १:१३; मत्ती २५:१-१३
36 होव़प ग्युंबे भोज जथ लमेनु, आ गेय पाइबपुकीमी ‘इं होव़प लेश्शा जाक्ब। मोपतीके लेश्शा मजाक्म सम्म मइप्थु बाक्य, दे रिम्नीम। मिनु होव़प जाक्शा, लाप्चो ख्रोकोल पदानु, गु रोक्शा ओव़चा गेनीम। प्रकाश ३:२०
37 मोदेंशो गेय पाइब आसीक ताइब बाक्नीम। होव़प लेश्शा जाक्मेनु, आ गेय पाइब आन कली मइप्थु रिम्शा बाक्शो थित्तु हना, आ होव़प थाम्पा ग्येरसीशा, मेको आन कली निप्पाइश्शा थुल्ब।
38 होव़प नाक्दो नाक्ती गेना हना यो लेश्शा जाक्मेनु, आ गेय पाइब मइप्थु बाक्तेक्म हना, मेको मुर रिम्शो दुम्शा आसीक ताइनीम’।
39 नेनीने, खिं ङा मुरुमी ‘मुल खुइ जाक्नीम’ दे तुइश्शो नम हना, मेकोम खिं मप्रोंइथु मइप्थु बाक्शा, खुइ पचा मगेम वा। १थिस्सलोनिकी ५:२
40 मोदेंशो पा गे यो मइप्थु सासीशा बाक्कीन। मारदे हना रागीम जरमेशो इन मतुइक्थु जाक्ब” दे शेंदीमी बाक्त।
41 मिनु पत्रुसमी “प्रभु, एको लोव़ गो आंइ कली ला शेंदीनी देय मुर नेल्ल आन कली शेंदीनी?” दे हिल्लो पवानु,
42 प्रभुमी “होव़पमी आ खिं कोव़ब कली जची जाक्मेनु जचा गेचा, दे अरेशा वोइक्चा पुंइसीब। मेको खोदेंशो निप्स पाइश्शो थमा सुइक्चा पुंइसीशो गेय पाइब सु बाक्बा?
43 आ होव़प लेश्शा जाक्मेनु, आ गेय पाइबमी आ अरेशो गेय पना पन बाक्शो थित्तु हना, मेको गेय पाइब आसीक राइब दुम्ब।
44 नोफा दाइश्शा नेनीने, मेको होव़पमी आ बाक्शो मारेइ मारेइ मेको गेय पाइब कली जिम्मा गेब।
45 तन्न मेको गेय पाइबमी ‘आं होव़प इच्का नोले जाक्ब’ दे मिम्शा, मेकोमी गेय पाइब वोंइश मुर, मीश मुर आन कली तुप्शा श्येत गेशा, जशा तूशा, दुक्शा पाप्तु हना,
46 आ ममिम्शो मतुइश्शो नाक्त आ होव़प लेश्शा जाक्ब। मिनु मेकोमी मेको गेय पाइब कली सजाइ गेशा, मरिम्शो गेय पाइबपुकी नु काथा वोइक्ब।
47 मिनु होव़प आ देंशो रुप्शा यो मतुइश्शो खोदेंशो पा मेको आ देंशो मटीब गेय पाइब शुश तुप्चा पुंइसीब। याकूब ४:१७
48 होव़प आ देंशो मतुइक्थु, मरिम्शो पाप्तु हना, इच्का ला तुप्चा पुंइसीब। सुमी शुश रुप्शा तुइश्शो बाक्मे, मेकोम शुश जिम्मा ब्राइबा। मिनु सुमी शुश जिम्मा ब्राइबा, मेको शुश जिम्मा वारी दुम्ब” दे शेंदीमी बाक्त।
फ्राचा कली जाक्ती
मत्ती १०:३४-३६
49 मिनु येसुमी शेंना शेंन “गो एको रागीम मी जेत्थ जाक्शो नङ। एको मी आं क्येङा ङोंइती जेश्शो हना, रिम्शो दुम वा।
50 गो श्येत का जचा माल्नुङ। मेको बेक्चा ङा श्येत मजङा सम्म परमप्रभु यावेम गेशो गेय पाइनुङ। लूका १८:३१; मत्ती २०:२२; मत्ती २६:३८
51 गो रागीमी नेल्ल आन कली गारपाइक्थ जाक्शो बाक्नुङ, दे मिम्नीनी? तन्न गो इन कली फ्राथ कका जाक्ती।
52 खिं कामी ५ जना मुर बाक्तेक्म हना, मेको ५ जना ब्रानीम। सांमी थमा सुइक्नीम, निक्शीमी थमा मसुइक्नीसी। निक्शीम थमा सुइक्नीसी, सांमी थमा मसुइक्नीम।
53 आफोमी थमा सुइक्ब, आ तौमी थमा मसुइक्ब। मिनु आफ कली आइक्च सेल्ब। तौमी थमा सुइक्ब, आ आफोम थमा मसुइक्ब। मिनु आ तौ कली आइक्च सेल्ब। ममामी थमा सुइक्ब, तमीमी थमा मसुइक्ब। तमीमी थमा सुइक्ब, ममामी थमा मसुइक्ब। शिमीमी थमा सुइक्ब, चाइमीमी थमा मसुइक्ब। चाइमीमी थमा सुइक्ब, शिमीमी थमा मसुइक्ब। मोपा थुं का पा बाक्ने मचाप्नीम” दे शेंदीमी बाक्त।
54 मिनु मेकेर खुम्सीशो शुश मुर आन कली “नां पेरतीकेम गोस्स ग्रूमेनु, ‘इच्ची ना रेउ यीब’ देंनीनी। मिनु रेउ यीब। मत्ती १६:२-३
55 दक्खिन रागी रे फश पवानु ‘मुलाक्ती हुप्ब’ देंनीनी। मिनु हुप्ब।
56 गे कपटीपुकी, सरीङ, रागी कोव़शा, मुल मार दुम्बा, दे तुइक्नीनी। मुल मार दुम्चशो बाक्मे, मेको चहिं मारदे मरुप्नीनी?
57 तेको गेय पशोमी रिम्शो दुम्बा, तेको गेय पशोमी मरिम्शो दुम्बा, मेको मिम्ने मचाप्नीनी?
58 इन कली दोस गेमेनु, दुशा बाक्कीन। मारदे हना इन कली दोस गेशा, निसाफ पाइब आ ङोंइती लाइक्तेक्म हना, मेकोमी इन कली लल पिया आन गुइमी जिम्मा गेशा, जेल्खानम चोक्पाइक्नीम। मत्ती ५:२५-२६
59 नोफा दाइश्शा नेनीने, मेकोम इन कली नोले ङा लेप्तोन सम्म मथाप्पाइक्थु मप्रोंइनीम” दे माइक्मी बाक्त। लेप्तोन का नेल्ल क्येङा आइक्च रोमी आन तांबा के क्येट बाक्ब।