2
दाऊदमी सोलोमन कली अरेशो
1 मिनु दाऊद आ बेक्ची ना जाक्माक्त। मिनु मेकोमी आ तौ सोलोमन कली आ बाक्शो मारेइ मारेइ जिम्मा गेवा बाक्त।
2 मिनु मेकोमी “गो रागी ङा मुर नेल्ल आन खोदेंशो पा बेक्नुङ। मोपतीके गे बोल्यो नु महिंब दुमो।
3 मिनु गे परमप्रभु यावे, इ परमप्रभु आ देंशो टिवो। मेको आ लांम गाक्को। मिनु मोसा आ अरेशो लोव़म गेशो खोदेंशो पा परमप्रभु यावे आ फुल्लुम मुशा ब्रेक्शो लोव़, आ शेंशो, आ देंशो पतीक लोव़ नु आ गेशो अर्ती नेल्ल पावो। मिनु गे मार मार पाइनेवे, ते ते लाइनेवे, मेको नेल्ल रिम्शो दुम्ल। ब्यवस्था १७:१४-२०; यहोसु १:७
4 परमप्रभु यावेमी आं कली ‘इ तौ चच नेल्लेम आंमा दोपा बाक्चा माल्बा, दे मिम्ताक्म हना नु आन थुं नु आन सोक्त नेल्लेम आं कली मप्रोंइथु आं ङोंइती गाक्तेक्म हना, गेना हना यो इस्राएलम हुकुम पचा कली इ तौ चच का लीब’ दे लोव़ गेशा कबल पशो बाक्ब।
5 सेरूयाह आ तौ योआबम आं कली मार पवा? गे मेको तुइक्नेवे। मेकोमी इस्राएल ङा लडाइ पाइब आन ठेयब मुर नेर आ तौ आब्नेर नु येथेर आ तौ आमासा आस कली साइक्तीम्सी। मेको लोव़ गे आंमा तुइश्शो बाक्नेवे। मेकोमी मेको निम्फा आस कली लडाइ मदुम्थु, थुं नाइश्शा बाक्तीक ना साइक्तीम्सी। मिनु मेको हुशेमीन आ किप्शुर नु आ जुत्ता दोस ताइब सेल्तु। २सामुएल ३:२७; २सामुएल २०:१०
6 मोपतीके इ जोक्ब तुइक्ब थुंम मार पचा देंबा, मेको पावो। तन्न मेको आ बोइश्शो चां थुं मनाइक्थु बेक्शो मुर आन बाक्तीकेम लल।
7 गिलाद ङा बारजील्लाइ आ तौ आन कली चहिं मप्रोंइथु रिम्शो पावो। मेको गे नु काथा जाइब आन दातेमी बाक्मल। गो इ लोक्ब अब्सालोम क्येङा प्रोक्शा गाक्ङानु, मेकोपुकीम रिम्शो पाम्तेक्म। २सामुएल १७:२७; २सामुएल १९:३२-४१; २सामुएल १५:-
8 मिनु गे बाहुरीम ङा बेन्यामीन आ थर ङा गेरा आ तौ शिमेइ कली योव़की पावो। मेकोमी गो महा-नाइम लङा नाक्त आं कली थाम्पा सराप पाइक्ती। नोले मेको यर्दन खोलाम आं कली ग्रुम्थ जाक्त। मिनु मेना गो मेको कली ‘मसाइक्नन’ दे परमप्रभु यावे आ नें थिशा कसम जाता। २सामुएल १६:५; २सामुएल १९:१७-२४
9 तन्न मुल गे मेको कली दोस मताइब ममिम्तो। गे जोक्ब तुइक्ब मुर बाक्नेवे। मोपतीके मेको कली मार पचा माल्बा, मेको तुइक्नेवे। मेको आ बोइश्शो चां हुश सुन्दा बेक्शो मुर आन बाक्तीकेम सोइक्तो” देंमाक्त।
10 मिनु दाऊद बेक्माक्त। मिनु दाऊद आ सहरम थिम्चा पुंइसे बाक्त।
11 दाऊदम इस्राएलम ४० बर्स सम्म सासन पवा बाक्त। मेकोम ७ बर्स हेब्रोनमी नु ३३ बर्स यरूसलेमम सासन पवा बाक्त। २सामुएल ५:४-५; १इतिहास २९:२७
12 मिनु सोलोमन आ आफ दाऊद आ पा ङा पिप दुम्माक्त। मिनु मेको आ राज्य बोल्यो दुम्माक्त।
सोलोमनमी अदोनीयाह साइश्शो
13 मिनु हग्गीथ आ तौ अदोनीयाह, सोलोमन आ ममा बाथ्शेबा बाक्तीक जाक्माक्त। मिनु बाथ्शेबाम मेको कली “मार गे रिम्शो मिम्शा जाक्ङे” दे हिल्लो पवा बाक्त। मिनु मेकोमी “ओं रिम्शो पान जाक्ती” देंमाक्त।
14 मिनु मेकोम लेंशा “गो इन कली लोव़ का देंनुङ” देंमाक्त। मिनु मेकोम “दुम्ब देंनो” देंमाक्त।
15 मिनु अदोनीयाहम “राज्य आं के बाक्त। गे मेको तुइक्नीनी। मिनु इस्राएली नेल्लेम आं कली पिप दुम्ब, दे मिम्शो बाक्तेक्म। तन्न मारेइ मारेइ दूली दुम्त। मुल राज्य आं लोक्ब के दुम्त। मारदे हना परमप्रभु यावे आ दाक्शो मेकोन बाक्त।
16 मुल गो इन कली लोव़ का पाइनुङ। आं पशो लोव़ मदुम्ब मदेनीन” देंमाक्त। मिनु मेकोमी “मेको मार बाक्बा? देंनो” देंमाक्त।
17 मिनु अदोनीयाहम “गो शुनेम सहर ङा अबीशाग कली ग्युंबे पचा तङल, दे पिप सोलोमन कली पुनीन। मेकोमी इन कली मदुम्ब मदेंब” देंमाक्त। १राजा १:३; २सामुएल ३:७
18 मिनु बाथ्शेबाम “मेको रिम्शो बाक्ब। गो इ पर्बम पिप नु लोव़ पाइनुङ” देंमाक्त।
19 मोपतीके बाथ्शेबा अदोनीयाह आ पर्बम लोव़ पथ पिप सोलोमन आ बाक्तीक लमाक्त। मिनु पिप मेको कली मान पथ बोक्माक्त। मिनु आ ममा आ ङोंइती बाप्शा मान पा, आ नित्तीकेम निस्से बाक्त। पिप सोलोमनम आ ममा कली नित्चा कली नित्तीक का चाक्पदा बाक्त। मिनु मेको पिप आ ग्युरा गे निस्से बाक्त।
20 मिनु मेकोमी “गो गे नु आइक्च लोव़ का पचा माल्नुङ। मेको आं लोव़ मदुम्ब मदेनो” देंमाक्त। मिनु पिपमी आ ममा कली “मार देंनीनी? आं ममा गो इन लोव़ मदुम्ब मदेंनुङ” देंमाक्त।
21 मिनु मेकोमी “इ लोक्ब अदोनीयाह नु शुनेम सहर ङा अबीशाग आस कली ग्युंबे पाइक्सी” देंमाक्त।
22 मिनु पिप सोलोमनम आ ममा कली “गे मारदे शुनेम सहर ङा अबीशाग नु अदोनीयाह आस कली ग्युंबे पाइक्चा कली पुंइनी? गे मेको कली राज्य पुंइतीनी हना यो दुम्ब। मारदे हना मेको आं ठेयब लोक्ब बाक्ब। चढ़ेब अबीयाथार नु सेरूयाह आ तौ योआब आस पर्बम यो पुनीन” देंमाक्त। १राजा १:६-७
23 मिनु पिप सोलोमनम परमप्रभु यावे आ नें थिशा “एको आ पर्बम अदोनीयाह साइक्चा मपुंइसाक्व हना, परमप्रभुम आं कली थम मरिम्शो सजाइ गेयील” दे कसम जवा बाक्त।
24 मनु “मुल आं कली आं आफ दाऊद आ राज्यम वोइक्ब नु आ पाइनुङ देंशो लोव़ खाप्शा, आं थर आन कली सेल्ब परमप्रभु यावे ब्रोंइशा बाक्शो खोदेंशो पा, गो कसम जशा देंनुङ, अदोनीयाह मुलाक्तीन साइक्चा पुंइसीब” देंमाक्त।
25 मेको नोले पिप सोलोमनम येहो-यादा आ तौ बेनायाह कली “अदोनीयाह कली तुप्शा सतो” दे हुकुम गेवा बाक्त। मिनु मेकोम अदोनीयाह कली तुप्शा सदा बाक्त।
26 मिनु पिपम चढ़ेब अबीयाथार कली “अनाथोथम बाक्शो इ खिंम लावो। गे साइक्चा पुंइसीब बाक्नेवे। मो हना यो मुल गो इ कली मसाइक्नन। मारदे हना गे आं आफ दाऊद आ ङोंइती परमप्रभु यावे आ सन्दोस कुरब बाक्ते। मिनु गे मेको आ श्येत नेल्लेम बाक्शो बाक्ते” देंमाक्त। १राजा १:७; १सामुएल २२:२०-२३; १सामुएल ३०:७; २सामुएल १५:२४
27 मोपतीके सोलोमनम अबीयाथार कली परमप्रभु यावे कली चढ़ेतीक गेय रे ग्रुंइदा बाक्त। मोपा परमप्रभु यावेमी शिलोम एली आ खिं आ पर्बम देंशो लोव़ गाम्माक्त। १सामुएल २:३१-३२
28 मिनु मेको लोव़ नेल्ल योआबम नेना बाक्त। मेको अब्सालोम गे ममाइ, तन्न अदोनीयाह गे बाक्शो बाक्माक्त। मिनु योआब प्रोक्शा परमप्रभु यावे आ ताम्बुम लमाक्त। मिनु चढ़ेतीक आ ग्रोव़ ग्याइश्शा बाक्माक्त। १राजा १:५१
29 मिनु पिप सोलोमनम “योआब प्रोक्शा लशा, परमप्रभु यावे आ ताम्बुम चढ़ेतीक आ नेक्था जाक्दीश्शा बाक्शो बाक्ब” देंशो लोव़ नेना बाक्त। मिनु मेकोम येहो-यादा आ तौ बेनायाह कली “योआब कली तुप्शा सतो” दे अरेशा सोइक्ता बाक्त। प्रस्थान २१:१२-१४
30 मोपतीके बेनायाह परमप्रभु यावे आ ताम्बुम ओव़शा, योआब कली “पिपम लाङगा ग्रूङो देंशो बाक्ब” दे मदा बाक्त। तन्न मेकोम “गो एक उइ बेक्नुङ” देंमाक्त। मिनु बेनायाहमी लशा पिप कली योआब आ लोव़ नेंपदा बाक्त।
31 मिनु पिपमी बेनायाह कली “मेको आ देंशो खोदेंशो पावो। मेको कली साइश्शा थिमीन। मोपा योआब आ मोशा हुश ख्राक्श पोक्शो दोस गो नु आं आफ आ खिं रे क्याम्दीन।
32 मिनु परमप्रभु यावेमी मेको आ हुश ख्राक्श पोक्शो मेको आ पियामीन मोइक्ब। मारदे हना मेकोमी आं आफ दाऊद आ मतुइक्थु आ क्येङा ठीक पाइब इस्राएल ङा लडाइ पाइब आन ठेयब मुर निक्शी नेर आ तौ आब्नेर नु येथेर आ तौ यहूदा ङा ठेयब मुर आमासा आस कली साइश्शो बाक्त। १राजा २:५
33 मेको आस हुश आ दोस गेना हना यो योआब नु मेको आ तौ चच आन पिया तार लील। तन्न दाऊद नु मेको आ तौ चच आन तार, मेको आन खिंम नु आन राज्यम परमप्रभु यावे आ ङोंइती गेना हना यो थुं नाइश्शा बाक्तीक दुम्ल” देंमाक्त।
34 मोपतीके येहो-यादा आ तौ बेनायाह इर लमाक्त। मिनु योआब कली तुप्शा सदा बाक्त। मिनु मेको कली गोरशो रागी, आ खिं आ नेक्था आ रूम थिम्मे बाक्त।
35 मिनु पिपमी येहो-यादा आ तौ बेनायाह कली योआब आ पा ङा लडाइ पाइब आन ठेयब मुर सेला बाक्त। मिनु चढ़ेब अबीयाथार आ पा ङा सादोक कली चढ़ेब सेला बाक्त। १राजा ४:४
36 मेको नोले पिपमी शिमेइ कली ब्रथ सोइश्शा, मेको कली “यरूसलेममी खिं का सेल्शा, मेक उइ बाक्को। मिनु सहर प्रोंइशा तेइ मलावो।
37 सहर प्रोंइशा, किद्रोन खोल्सा शोक्साक्वे हना, गे थमा पा साइक्चा पुंइसीनेवे। मो पाप्तीवी हना, इ हुश आ दोस इ पियामीन मोंइसीब” दे मदा बाक्त।
38 मिनु शिमेइम पिप कली “गे मार देंनी मेको रिम्शो बाक्ब। आं प्रभु पिपम आ वाइल कली देंशो खोदेंशो पा गो पाइनुङ” देंमाक्त। मोपतीके शुश नाक्त सम्म शिमेइ यरूसलेममीन बाक्माक्त।
39 तन्न बर्स सां नोले मेको आ वाइल निक्शी प्रोक्शा, गाथ ङा पिप माकाह आ तौ अकीश आ बाक्तीक लसा बाक्त। मिनु शिमेइम “इ वाइल निक्शी गाथ सहरम बाक्ताक्स” देंशो लोव़ नेना बाक्त।
40 मिनु शिमेइ रीब पा आ गधाम लगम पाइश्शा, आ वाइल आस कली माल्थ गाथ ङा अकीश आ बाक्तीक लमाक्त। मोपा शिमेइमी गाथ रे आ वाइल निक्शी आस कली चाक्सी बाक्त।
41 मिनु पिप सोलोमन कली शिमेइ यरूसलेम रे गाथ जाक्दीश्शा लेश्शा जाक्शो लोव़ नेंपदमे बाक्त।
42 मिनु पिपमी शिमेइ कली ब्रथ सोइक्ता बाक्त। मिनु मेको कली “मार, गो इ कली परमप्रभु यावे आ नें थिशा कसम जपाइश्शो मनङा ङा? गे अर्को रागी लचा कली एको सहर रे गाक्ते हना, साइक्चा पुंइसीनेवे, देंशो मनङा? मिनु मेना गे आं कली ‘इन देंशो लोव़ रिम्शो बाक्ब देंशो मनवे?’ मेना गे ‘इन देंशो टीनुङ’ देंशो नवे।
43 मिनु मारदे गे परमप्रभु यावे आ नें थिशा कसम जशो नु आं देंशो लोव़ मटिवी?” दे हिल्लो पवा बाक्त।
44 मिनु पिपम शिमेइ कली “आं आफ दाऊद आ पर्बम पशो मरिम्शो नेल्ल गे तुइश्शो बाक्नेवे। मुल परमप्रभु यावेमी मेको मरिम्शो पशो आ क्येक्क इ पियामीन मोइक्ब। १राजा २:८
45 तन्न पिप सोलोमन आसीक ताइब। मिनु परमप्रभु यावे आ ङोंइती दाऊद आ राज्य गेना हना यो लीब” देंमाक्त।
46 मिनु पिपमी येहो-यादा आ तौ बेनायाह कली हुकुम गेवा बाक्त। मिनु मेको लशा, शिमेइ कली तुप्शा सदा बाक्त। मिनु मेको बेक्माक्त। मोपा पिप सोलोमन आ राज्य बोल्यो दुम्माक्त।