6
यरीको सहर कली ग्राचशो
1 मिनु यरीको ङा मुरपुकीमी इस्राएली आन कली तशा, आन गारो ङा ठेयब लाप्चो चोक्तेक्म। मिनु सुइ मुर सहर रे खिंङगा लाङगा मपाम।
2 मिनु परमप्रभु यावेमी यहोसु कली “गो यरीको, मेकेर ङा पिप नु मेकेर ङा लडाइ पाइब नेल्ल इ कली गेता।
3 मोपतीके ६ नाक्त सम्म, नाक्तीमी खेयप का इ लडाइ पाइब वोंइश मुर नेल्ल आन कली मेको यरीको सहर एर ओंथ हिरपतो।
4 मिनु ७ जना चढ़ेब ७ ओटा ताप्तीक ग्रोव़ कुरशा, परमप्रभु यावे आ सल्ला पतीक सन्दोस कुरशो चढ़ेब आन ङोंइङोंइती गाक्चा माल्नीम। मिनु ७ नाक्तीमी गे ७ खेयप मेको सहर एर ओंथ हिरचा माल्नीनी। मेना मेको ७ जना चढ़ेबपुकीमी आन ग्रोव़ ताम्ना ताम्न गाक्चा माल्नीम।
5 मिनु मेकोपुकीमी शुश रेयके पा ग्रोव़ ताम्ना ताम्न बाक्मानु, इन मुर नेल्लेमी मेको रेयके नेन्मे नोले, ठेयब सेंदा पा ग्रीचा माल्नीम। मोपा ग्रीमानु, मेको सहर ङा गारो नेल्ल ब्रेप्ब। मिनु मुर नेल्ल आंम आंम ङोंइती बारशा, ब्रेश्शो गारो ङोइक्चा माल्नीम” दे परमप्रभुम माइक्तु।
6 मिनु नून आ तौ यहोसुमी चढ़ेब आन कली ब्रेश्शा, मेको आन कली “परमप्रभु यावे आ कबल पशो सन्दोस कुरीन। मेको ७ जना अरु चढ़ेबपुकी चहिं ७ ओटा ताप्तीक ग्रोव़ कुरशा, परमप्रभु यावे आ कबल पशो सन्दोस कुरब आन ङोंइती गाक्पतीन” देंत।
7 मिनु मेकोमी मुर आन कली “गे यो सहर एर ओंथ हिरसीन। मिनु या कुरशो मुरपुकी परमप्रभु यावे आ कबल पशो सन्दोस आ ङोंइङोंइती गाक्चा माल्नीम” देंत।
8 मिनु यहोसुमी देंशो खोदेंशो पा मेको ७ जना चढ़ेब परमप्रभु यावे आ ङोंइती ताप्तीक ग्रोव़ कुरशा, ताम्ना ताम्न गाक्तेक्म। मिनु परमप्रभु यावे आ कबल पशो सन्दोस कुरबपुकी मेको आन नोले खोइक्तेक्म।
9 मिनु या कुरब चहिं ग्रोव़ ताप्ब चढ़ेब आन ङोंइङोंइती गाक्तेक्म। मिनु मुर नेल्ल सन्दोस आ नोनोले गाक्तेक्म। चढ़ेबपुकी ताप्तीक ग्रोव़ ताम्ना ताम्न गाक्तेक्म।
10 मिनु यहोसुमी नोनोले गाक्ब मुर आन कली “गे काइ मग्रीङीन। इन सेंदा काइ मनेंसेक्ल। सिक्सी पा गाक्कीन। तेको नाक्त गो इन कली ‘ग्रीङीन’ देंनुङा, मेको नाक्त ला वाइ ब्रेश्शा ग्रीचा माल्नीनी” दे माइक्तु।
11 मोपा मेकोपुकी परमप्रभु यावे आ कबल पशो सन्दोस नाक्त कामी खेयप का सहर आ एर ओंथ हिरताक्म। मिनु मुर नेल्ल आन बाक्तीकेमी लशा, बास बाक्तेक्म।
12 मिनु यहोसु सुनी कना बोक्त। मिनु चढ़ेबपुकीमी परमप्रभु यावे आ कबल पशो सन्दोस कुरतेक्म।
13 मिनु परमप्रभु यावे आ कबल पशो सन्दोस आ ङोंइती गाक्ब ताप्तीक ग्रोव़ कुरब ७ जना चढ़ेबपुकीमी ग्रोव़ ताम्ना ताम्न गाक्तेक्म। या कुरब मेको आन ङोंइङोंइती गाक्तेक्म। अर्को नेल्ल परमप्रभु यावे आ कबल पशो सन्दोस आ नोले मेको ताप्शो नेंना नेंन खोइक्तेक्म।
14 मोपा आ दीसा नाक्त यो खेयप का सहर आ एर ओंथ हिरताक्म। मिनु आन बाक्तीकेमी लेत्तेक्म। मोपा ६ नाक्त सम्म मोदेंशो पाम्तेक्म।
यरीको सहर ङा गारो ब्रेश्शो
15 मिनु मेको आ ७ नाक्ती नां सोव़चा क्येङा ङोंइती बोक्शा, ङोंइती ङा खोदेंशो पा मेको सहर एर ओंथ हिरसाक्म। तन्न मेको नाक्ती मेकोपुकीमी मेको सहर ७ खेयप हिरसाक्म।
16 मिनु ७ खेयप हिरसीमा नोले चढ़ेबपुकीमी ताप्तीक ग्रोव़ ताप्ची ना, यहोसुमी मुर आन कली “वाइ ब्रेश्शा ग्रीङीन। मारदे हना परमप्रभु यावेमी एको सहर इन कली गेप्तु।
17 एको सहर नु एको आगा बाक्शो मारेइ मारेइ खतम सेल्तीक परमप्रभु यावे केन बाक्ब। राहाब तेल्लेम नु आ खिंमी बाक्ब मुर ला ब्रोंइचा ताइनीम। मारदे हना मेकोमी आंइ सोइश्शो क्यारी पाइब मुर आस कली ख्रुइश्शा प्रोंइशो बाक्त। ब्यवस्था २०:१६-१७; यहोसु २:१२-१३; हिब्रू ११:३१
18 मिनु परमप्रभुमी खतम सेल्चा, देंशो थोव़क लाइक्चा मदुम्ब। होस पा बाक्कीन। गे परमप्रभु आ देंशो मटिथु, मारेइ लाइक्तीनी हना, गे आंमा खतम दुम्नीनी। सुइमी मारेइ खुइ पा, इस्राएली आन बाक्तीकेम वोइक्तीनी हना, मेको खतम दुम्ब। मिनु मुर नेल्ल आन कली श्येत जपाइक्ब। लेवी २७:२८; ब्यवस्था १३:१८
19 सुन चांदी, कांसा नु फलाम के सेल्शो थोव़क नेल्ल परमप्रभु यावे केन बाक्नीम। मेको परमप्रभु यावे आ शोंप वोइक्तीकेमी वोइक्चा माल्नीम” देंत।
20 मिनु मुरपुकी वाइ ब्रेश्शा ग्रीतेक्म। मिनु चढ़ेबपुकीमी ग्रोव़ ताम्ना ताम्न बाक्तेक्म। मुरपुकीमी ग्रोव़ ताप्शो नेंशा, शुश ग्रीतेक्म। मिनु मेको गारो ब्रेत्त। मिनु मुरपुकी ग्येत्थ बारशा, मेको सहर आंम के सेल्तेक्म। हिब्रू ११:३०
21 मिनु सहर ङा मीश मुर वोंइश मुर, आल, खाल्पी खाल्पा बी ब्यफ, क्यारश भेडा, गधा नेल्ल आन कली तरवारम साइक्तेक्म।
22 मिनु यहोसुमी मेको क्यारी पाइब निक्शी आस कली “गे मेको तेल्लेम आ खिं लस। मिनु इस कसम जशो खोदेंशो पा मेको मीश मुर नु आ खिं ङा मुर नेल्ल आन कली ग्रुंइदीस” देंत। यहोसु २:१२-१४
23 मिनु मेको ङोंइती क्यारी पाइब ठिटा निक्शी मेको आ खिं ओव़शा, राहाब कली ग्रुंइताक्स। मेको नु आ आम आफ आ लोक्ब नु आ खिं ङा मुर नेल्ल आन कली यो ग्रुंइताक्स। मिनु मेको आन कली इस्राएली आन बाक्तीके आ लाङगाम बाक्चा गेम्ताक्स। गन्ती ३१:१९
24 मिनु मी सुइश्शा, मेको सहर नु आगा ङा थोव़क नेल्ल क्रोइक्तेक्म। सुन चांदी, कांसा नु फलाम के सेल्शो थोव़कपुकी ला परमप्रभु यावे आ खिं ङा शोंप वोइक्तीकेमी वोइक्तेक्म।
25 तन्न यहोसुमी राहाब तेल्लेम नु आ खिं ङा मुर आन कली प्रोंइतु। मारदे हना मेकोमी यहोसु आ यरीको सोइश्शो क्यारी पाइब निक्शी आस कली ख्रुइश्शा प्रोंइशो बाक्त। मेको नाक्त रे राहाब आ खिं ङा मुरपुकी इस्राएली आन दातेमी बाक्तेक्म। मत्ती १:५; न्यायाधीस १:२५
26 मेना यहोसुमी “सुमी यरीको सहर लेंशा सेल्बा, मेको परमप्रभु यावे आ ङोंइती सराप राइब। मेकोमी जग फुल्लु वोदानु, आ ङोंइती जरमेशो तौ बेक्ब। मिनु आ गारो ङा ठेयब लाप्चो वोदानु, आ कान्छा तौ बेक्ब” दे कसम जाप्तु। १राजा १६:३४
27 मिनु परमप्रभु यावेमी यहोसु कली वारच पाप्तु। मेको रागी ङा मुर नेल्ल मेको तुइश्शा, यहोसु तशा हिंतेक्म।