10
नां नाइश्शा बाक्शो
1 मिनु यरूसलेम ङा पिप अदोनी-सेदेकमी “यहोसुमी ऐ सहर ग्राशा, खतम सेल्तु। मिनु यरीको नु मेकेर ङा पिप कली पाइश्शो खोदेंशो पा मेको ऐ सहर नु मेकेर ङा पिप कली यो पाइक्तु। मिनु गिबोन ङा मुरपुकी इस्राएली नु गारशा, मुल आन दातेमी बाक्शो बाक्तेक्म” दे नेंतु। यहोसु ६:-; यहोसु ८:-; यहोसु ९:-
2 मिनु मेको नु आ मुर नेल्ल शुश हिंतेक्म। मारदे हना गिबोन थम ठेयब सहर, पिप आ बाक्तीक सहर खोदेंशो, बाक्त। मिनु मेको ऐ सहर क्येङा ठेयब बाक्त। मिनु मेकेर ङा वोंइश मुर नेल्ल बोल्यो लडाइ पाइब बाक्तेक्म।
3 मिनु यरूसलेम ङा पिप अदोनी-सेदेकमी हेब्रोन ङा पिप होहाम, यरमुथ ङा पिप पिराम, लाकीश ङा पिप याफीया नु एग्लोन ङा पिप देबीर बाक्तीकेमी लोव़ सोइक्ताक्व।
4 मिनु मेको आन कली “आं कली वारच पथ पिन। गो नेल्ल गारशा, गिबोन नु लडाइ पय। मारदे हना मेकोपुकी यहोसु नु इस्राएलीपुकी नु गारमा बाक्त” दे लोव़ सोइक्ताक्व।
5 मोपा एमोरी आन ५ जना पिप, यरूसलेम, हेब्रोन, यरमुथ, लाकीश नु एग्लोन ङा पिप खुम्सीशा, आन लडाइ पाइब नेल्ल नु जाक्शा, गिबोन नु लडाइ पाम्तेक्म।
6 मिनु गिबोन ङा मुरपुकीमी गिल्गाल सहरम बाक्शो यहोसु कली “मुल, गे इन गेय पाइब, गो आंइ कली मप्रेंदीन। गे रीब पा जाक्कीन। आंइ कली वारच पा प्रोनीन। मारदे हना पहाड रागीम बाक्ब एमोरी आन पिप नेल्ल गो नु लडाइ पचा कली खुम्सीशो बाक्नीम” दे लोव़ सोइक्ताक्म।
7 मिनु यहोसुमी आ लडाइ पाइब नेल्ल आन कली लाइश्शा, गिल्गाल रे लत। मिनु आ नेल्ल क्येङा बोल्यो लडाइ पाइबपुकी यो मेको नु लाम्तेक्म।
8 मोपा लमानु, परमप्रभु यावेमी यहोसु कली “मेको आन कली तशा, महिनो। मारदे हना गो मेको आन कली इन गुइमी गेता। मेको आन मुर का सम्म यो इन ङोंइती राप्ने मचाप्नीम” देंत।
9 मिनु नेल्ल नाक्दो यहोसु नु इस्राएली गिल्गाल रे गाक्शा, मेक जाक्दीश्शा, छक लाक्चा ङा पा मेको आन कली लडाइ तोम्तेक्म।
10 मिनु परमप्रभु यावेमी एमोरी ङा मुर आन कली इस्राएली आन ङोंइती वाम ग्याम सेल्शा, मेको आन कली गिबोन सहरम ब्रुपाइक्तु। इस्राएलीपुकीमी मेको आन कली गिबोन रे बेथ-होरोन ङा ग्येत्थ लां रे पा खेदा पाम्तेक्म। आजेका नु माकेदा सम्म खेदा पा साइक्तेक्म।
11 मिनु मोपा इस्राएली आन ङोंइती बेथ-होरोन रे आजेका सम्म ब्रुप्शा प्रोक्मानु, परमप्रभु यावेमी सरीङ रे ठेयब मुप्स यिपाइक्तु। इस्राएलीपुकीमी तरवारमी क्योरशा बेक्शो क्येङा ठेयब मुप्सीम ख्रशा बेक्शो मुर शुश बाक्तेक्म। प्रस्थान ९:२२-२५; अय्युब ३८:२२-२३; हबकुक ३:११; २सामुएल १:१८
12 मिनु परमप्रभु यावेमी एमोरी आन कली इस्राएली आन गुइमी गेशो नाक्ती यहोसुमी परमप्रभु यावे कली इस्राएली नेल्ल आन ङोंइती “नां, गे गिबोन तारी नांइसो। तास्ला, आइयालोन बेंसी तारी नाइश्शा बाक्को” देंत।
13 मिनु यहोसुमी मेको आन कली क्येक्क मलेत्ता सम्म नां नु तास्ला नांइसाक्स। मेको लोव़ याशार ङा किताबमी यो ब्रेक्सीशो बाक्ब। मिनु नां सरीङ आ दातेमी नांइसाक्व। मिनु नां मेको नाक्त का मपेरस।
14 मोदेंशो ङोंइती नु नोले गेनायो मदुम्शो बाक्त। मारदे हना परमप्रभु यावेमी मुर आ लोव़ नेंशा, इस्राएली आन पर्बम लडाइ पाप्तु।
15 मिनु नोले यहोसु नु इस्राएली नेल्ल आंम बाक्तीके गिल्गाल लेत्तेक्म।
एमोरी आन पिप साइश्शो
16 मिनु मेको ५ जना पिपपुकी चहिं प्रोक्शा, माकेदा ङा पुक्खीमी ख्रुंइसाक्म।
17 मिनु मुरपुकीमी यहोसु कली “मेको ५ जना पिपपुकी माकेदा ङा पुक्खीमी ख्रुइश्शो बाक्नीम” दे नेंपाइक्तेक्म। ब्यवस्था २१:२२-२३
18 मिनु यहोसुमी “ठेयब ठेयब फुल्लु लोक्शा लाइश्शा, मेको पुक्खी आ ओव़तीके सुने। मिनु आ ङोंइतीमी खाल पाइबपुकी वोतीन।
19 तन्न गेपुकी मो मबाक्कीन। इन जोरी सत्रु आन कली खेदा पना पन ङोंइती बारीन। नेल्ल क्येङा नोले ङा सम्म यो सतीन। मेको आन कली लेंशा, आन सहर ओव़चा मगेन। मारदे हना परमप्रभु यावे, इन परमप्रभुमी मेको इन गुइमी गेशो बाक्ब” देंत।
20 मिनु यहोसु नु इस्राएलीपुकीमी मेको आन कली खतम सेल्तेक्म। का निक्शी चहिं प्रोक्शा, गारो पाइश्शो सहर आगा ओव़तेक्म।
21 मिनु मुर नेल्ल माकेदा, यहोसु आ बाक्तीकेमी, रिम्शो पा लेत्तेक्म। मेको इस्राएली आन पर्बम सुइ मुरुमी यो शुक्शी लोव़ पने मचबेम।
22 मिनु यहोसुमी “पुक्खी रोक्शा, मेको ५ जना पिप आन कली आं बाक्तीक चाक्कीन” देंत।
23 मिनु मेकोपुकीमी मेको ५ जना पिप आन कली चाक्तेक्म। यरूसलेम ङा पिप, हेब्रोन ङा पिप, यरमुथ ङा पिप, लाकीश ङा पिप नु एग्लोन ङा पिप कली पुक्खी रे ग्रुंइशा, यहोसु आ बाक्तीकेम चाक्तेक्म।
24 मिनु मेको आन कली यहोसु आ बाक्तीक चाक्ग्मे नोले, यहोसुमी इस्राएली नेल्ल आन कली खुप्शा, लडाइ पाइब आन ठेयब मुर आन कली “एको पिप आन शुरमी इन खोइलीमी दिम्दीन” देंत। मिनु मेकोपुकीमी जाक्शा, आन खोइलीमी मेको पिप आन शुर दिम्ताक्म।
25 मिनु यहोसुमी मेको आन कली “बोल्यो नु महिंब दुमीन। मारदे हना इं परमप्रभु यावेमी गे सु नु लडाइ पाइनीनी, मेको आन कली मोदेंशो पाइब” देंत।
26 मेको नोले यहोसुमी मेको ५ जना पिप आन कली तुप्शा साइश्शा, ५ ओटा रवामी क्युक्पाइक्तु। मिनु नाक्दो सम्म क्युक्शा, वोइक्तेक्म।
27 मिनु नां रिक्ची ना, यहोसुमी “मेको आन कली लाइश्शा, ङोंइती आन ख्रुइश्शो पुक्खीमी वोतीन। मिनु मेको पुक्खी आ ओव़तीकेमी ठेयब फुल्लुपुकी लाइश्शा सुने” दे अरेप्तु। मिनु मेको फुल्लु मुल सम्म बाक्नीम। ब्यवस्था २१:२२-२३
कनान रागी कली ग्राशो
28 मिनु मेको नाक्ती यहोसुमी माकेदा आंम के सेल्तु। मेको सहर ङा मुर नेल्ल आन कली नु मेकेर ङा पिप कली तरवारमी साइक्तु। मेकोमी मेकेर ङा मुर नेल्ल आन कली खतम पोक्तु। सुइ कली यो मप्रोन। मेकोमी यरीको ङा पिप कली पशो बुदी माकेदा ङा पिप कली यो पाइक्तु।
29 मिनु यहोसु नु इस्राएली नेल्ल माकेदा रे गाक्शा, लिब्ना लाम्तेक्म। मिनु लडाइ पाम्तेक्म।
30 मिनु परमप्रभु यावेमी मेक ङा मुर नु पिप कली यो यहोसु नु इस्राएली आन गुइमी गेप्तु। मेकोपुकीमी लिब्ना ङा मुर नेल्ल आन कली तरवारमी साइक्तेक्म। सुइ कली यो मप्रोनेम। यरीको ङा पिप कली पशो खोदेंशो मेकेर ङा पिप कली यो पाम्तेक्म।
31 मिनु यहोसु नु इस्राएली नेल्ल लिब्ना रे गाक्शा, लाकीश लाम्तेक्म। मिनु लाकीश कली पुम्शा, लडाइ पाम्तेक्म।
32 परमप्रभु यावेमी लाकीश कली यो इस्राएली आन गुइमी गेप्तु। मिनु मेको आ दीसा नाक्ती यहोसुमी लाकीश आंम के सेल्तु। मिनु मेकेर ङा मुर नेल्ल आन कली लिब्ना कली पशो खोदेंशो पाप्तु। नेल्ल आन कली तरवारमी साइक्तु।
33 मेना गेजेर ङा पिप होराम लाकीश कली वारच पथ जाक्त। मिनु यहोसुमी मेको नु आ लडाइ पाइब नेल्ल आन कली फ्रुशा, का कली यो मप्रोंइथु, ग्याइश्शा साइक्तु।
34 मिनु यहोसु नु इस्राएली नेल्ल लाकीश रे गाक्शा, एग्लोन लाम्तेक्म। मिनु मेकेर यो पुम्शा, लडाइ पाम्तेक्म।
35 मेको नाक्ती मेकोपुकीमी एग्लोन कली ग्रातेक्म। मिनु मेकेर ङा मुर नेल्ल आन कली तरवारमी साइक्तेक्म। लाकीश कली दोदेंशो पामे, एग्लोन कली यो मोदेंशो पाम्तेक्म।
36 मिनु यहोसु नु इस्राएली नेल्ल एग्लोन रे ग्येत्थ ङोइश्शा हेब्रोन लाम्तेक्म। मेकेर यो लडाइ पाम्तेक्म।
37 मिनु मेकोपुकीमी हेब्रोन सहर कली ग्राशा, मेको सहर ङा पिप नु आ एर ओंथ गाउं ङा मुर नेल्ल आन कली तरवारमी साइक्तेक्म। सुइ कली यो मप्रोनेम। मेकोपुकीमी एग्लोन कली पशो खोदेंशो पा, नेल्ल मुर आन कली खतम पोक्तेक्म।
38 मिनु यहोसु नु इस्राएली नेल्ल देबीर गे लेश्शा, मेको नु लडाइ पाम्तेक्म।
39 मेकोमी मेकेर ङा सहर नेल्ल, आन पिप नु एर ओंथ ङा गाउं आन कली ग्रातेक्म। मुर नेल्ल आन कली खतम पोक्तेक्म। सुइ कली यो मप्रोनेम। मेकोपुकीमी हेब्रोन नु मेकेर ङा पिप नु लिब्ना कली दोदेंशो पामे, मोदेंशो पा देबीर नु मेकेर ङा पिप कली यो पाम्तेक्म।
40 मोपा यहोसुमी पहाड नेल्ल, नेगेब रागी, पच्छिम नेल्ल ङा आइक्च पहाड नु आइक्च डांडा ङा देम्सीलो ग्रात। पिप नेल्ल आन कली साइक्तु। का कली यो मप्रोन। मेको ब्रोंइशो नेल्ल आन कली खतम सेल्तु। परमप्रभु यावे, इस्राएली आन परमप्रभुमी दोदेंशो अरेवा, मोदेंशो पाप्तु। ब्यवस्था २०:१६-१८
41 मिनु यहोसुमी कादेश-बारनेआ, गाजा नु गोशेन रे लाइश्शा गिबोन सम्म नेल्ल ग्रात। यहोसु ११:१६
42 मिनु यहोसुमी मेको आन पिप आन कली नु आन रागी नेल्ल कली कालेम ग्रात। मारदे हना परमप्रभु यावे, इस्राएली आन परमप्रभुमी इस्राएली आन पा ङा लडाइ पाप्तु।
43 मिनु नोले यहोसु नु इस्राएली नेल्ल आन बाक्तीके गिल्गालमी लेत्तेक्म। यहोसु १०:१५