यहोसु
ब्रेक्ब मुर: एको किताब ब्रेक्ब मुर आ नें तेइ मब्रेक्शो बाक्ब। तन्न “यहोसुमी मेको नेल्ल परमप्रभु आ अरेशो लोव़ ब्रेक्तीक किताबमी ब्रेक्ताक्व” दे ब्रेक्शो बाक्ब। टाल्मुत माइश्शो यहूदी आन माइत किताबमी “ब्रेक्ब मुर यहोसु बाक्ब। मिनु यहोसु बेक्म नोले ङा लोव़ फिनेहासम तेम्शो बाक्त” दे ब्रेक्शो बाक्ब। यहोसु २४:२९-३३
गेना ब्रेक्शो: एको किताब ब्रेक्ची ना यबुसीपुकी रागीम बाक्शो बाक्तेक्म। यहोसु १५:६३ पिप दाऊदमी आ सासन पची ना मेको आन कली खेरशो बाक्त। एको किताब ब्यवस्था आ नोले ङा दुम्शा, मोसा आ बेक्शो रे यहोसु आ बेक्शो सम्म इस्राएली आन इतिहासम बाक्ब।
मार ब्रेक्शो: एको किताबम इस्राएली आन १२ थर का का पा आन थेरशो रू योक्तीके ला ममाइ, मेको रागी कली ग्राशा, आंम के सेल्चा कली परमप्रभु यावे आ देंशो टितीकेम ला दुम्ब, दे शेंशो बाक्ब। मेको आ कोंइतीके आकान आ मटितीके बाक्त।
१. कनान रागी आंम के सेल्चा कली ठीक दुम्तीके यहोसु १:- ५:-
२. कनान रागी कली ग्राशो यहोसु ६:-१२:-
३. इस्राएली आन थेरशो रू योक्शो यहोसु १३:-२४:-
1
इस्राएली रागी ओव़चा सासीशो
1 परमप्रभु यावे आ गेय पाइब मोसा बेक्म नोले परमप्रभु यावेमी मोसा आ गेय पाइब नून आ तौ, यहोसु कली लोव़ पाप्तु।
2 परमप्रभु यावेमी मार लोव़ पाप्तु देंशा हना “आं गेय पाइब मोसा बेक्त। मोपतीके गे मुर नेल्ल आन कली लाइक्चा सासो। मिनु गो इस्राएली आन कली गेचा चिक्शो रागी यर्दन खोला आ आइक्ची हांबु लावो। ब्यवस्था ३४:५
3 गोमी मोसा कली देंशो खोदेंशो पा, इन खोइलीम थेक्शो रागी नेल्ल इन कली गेता। ब्यवस्था ११:२४
4 गोरशो रागी नु लेबानोन रे ठेयब युफ्रेटीस खोला सम्म, हित्ती आन रागी नेल्ल, पच्छिम गे ङा ठेयब समुन्द्र सम्म इन रागी दुम्ब।
5 गे मबेक्ङे सम्म इ कली सुइमी यो फ्रुने मचाप्नीम। गो दोपा मोसा नु बाक्ङा, मोपा गे नु यो बाक्नुङ। गो इ कली गेना हना यो कोव़नुङ। मिनु गेनायो मप्रोंइनुङ। ब्यवस्था ३१:७,८; हिब्रू १३:५
6 गे बोल्यो नु महिंब दुमो। मिनु गो ङोंइती ‘इ किकी पिपी आन कली गेनुङ’ दे कसम जशो रागी, गे इस्राएली आन कली आंम के सेल्पाइक्चा माल्नेवे। ब्यवस्था ३:२८;
7 गे थम बोल्यो नु महिंब दुमो। आं गेय पाइब मोसामी इ कली अरेशो लोव़ नेल्ल होस पा टिवो। मेको रे ग्युरा पेरा गे मलावो। मिनु गे ते लते हना यो ग्रानेवे। ब्यवस्था ५:२९; ब्यवस्था २९:८; १राजा २:३
8 एको आं अरेशो लोव़ ङा किताब इ थुं रे ङोन मवोतो। मेको कली नाक्दो नाक्ती मिम्तो। मेकेर ब्रेक्सीशो नेल्ल होस पा टिवो। मो पाप्तीवी हना, गे ग्राना ग्रान गाक्नेवे। मिनु इ पतीक नेल्ल थम रिम्शो दुम्ब। भजन संग्रह १:२-३
9 गो इ कली ‘बोल्यो नु महिंब दुमो’ देंती। इ थुं लुक्च मलल। गे गेनायो हिंशा ख्रिंख्रि मपावो। मारदे हना गे ते लते हना यो, गो, परमप्रभु यावे, इ परमप्रभु, गे नु बाक्नुङ” दे परमप्रभु यावेमी यहोसु कली देंत।
यर्दन खोला शोक्सीचा गोशो
10 मिनु यहोसुमी मेकेर ङा ठेयब मुर आन कली “गे नेल्ल मुर आन बाक्तीकेमी लने। मिनु मेको आन कली
11 ‘बुत लाम्ज कुरशा सासीन। मारदे हना सांबु नाक्ती परमप्रभु यावे, इन परमप्रभुमी गेशो रागी आंम के सेल्चा कली यर्दन खोला शोक्सीचा माल्नय’ देनीन” दे अरेप्तु।
12 मिनु यहोसुमी रूबेन आ थर, गाद आ थर नु मनस्से आ उइक्थ थर कली ब्यवस्था ३:१२-२०; गन्ती ३२:२०-२९
13 “परमप्रभु यावे आ गेय पाइब मोसामी इन कली अरेशो लोव़ मिम्तीन। मिनु मेकोमी इन कली ‘परमप्रभु यावे, इन परमप्रभुमी इन कली नाइक्पाइक्तीक गेशा, मेको रागी गेनुङ’ देंशो लोव़ मप्रेंदीन।
14 इन मीश नु आलपुकी, बी ब्यफ, क्यारश भेडा नेल्ल मोसामी इन कली गेशो रागी यर्दन ओंथ हांबुम बाक्चा माल्नीम। तन्न गे लडाइ पाइब वोंइश मुरपुकी या कुरशा इन लोक्ब आन कली वारच पचा कली मेको आन क्येङा ङोंइती आइक्ची हांबु लचा माल्नीनी।
15 मिनु परमप्रभु यावेमी इन लोक्ब आन कली, इन कली खोदेंशो पा नाइक्चा मगेवा सम्म, मेको रागी आंम के मसेल्मे सम्म नु परमप्रभु यावे, इन परमप्रभुमी मेको आन कली गेचा चिक्शो रागी मग्रामा सम्म मेको आन कली वारच पचा माल्नीनी। मिनु नोले परमप्रभु यावे आ गेय पाइब मोसामी यर्दन आ पूर्ब गे इन कली गेशो रागीमी लेश्शा, बाक्ने चाप्नीनी” देंत।
16 मिनु मेकोपुकीमी यहोसु कली “गे आंइ कली मार मार अरेनी, गो मेको नेल्ल पाइनीकी। मिनु गे आंइ कली ते ते सोइक्नीनी, गो मेक मेक लाइनीकी।
17 दोपा मोसा आ लोव़ नेल्ल टिशो नया, मोपान इन लोव़ यो टीनीकी। दोपा परमप्रभु यावे, इन परमप्रभु मोसा नु बाक्मे, मोपान गे नु यो बाक्ल।
18 सुमी इन अरेशो लोव़ ‘मपाइनुङ’ दे इन लोव़ मनेंबा, मेको साइक्चा पुंइसीब। मोपतीके गे बोल्यो नु महिंब दुमीन” देंतेक्म। यहोसु १:६