7
येरमीया कली लोव़ पपाइश्शो
येरमीया २६:-
1 परमप्रभु यावेम येरमीया कली,
2 “गे आं खिं ङा लाप्चोम राप्शा ‘गे यहूदा ङा मुर नेल्ल परमप्रभु यावे आ लोव़ नेनीन। गे परमप्रभु यावे कली ठेयब सेल्चा कली एक जाक्ब यहूदा ङा मुर परमप्रभु यावे आ लोव़ नेनीन’ देनो” देंत।
3 मुर नेल्ल परमप्रभु यावे, इस्राएली आन परमप्रभुमी मार, देंत देंशा हना “इन गाक्तीक लां नु इन पशो नेल्ल रिम्शो सेलीन। मो पाइतीनी हना, गो गेपुकी नु एकेर बाक्नुङ। येरमीया १८:११; येरमीया २५:५; येरमीया २६:१३; यसैया १:१६
4 मिनु ‘एको परमप्रभु यावे आ खिं बाक्ब। एको परमप्रभु यावे आ खिं बाक्ब। एको परमप्रभु यावे आ खिं बाक्ब’ देंशो जोल लोव़ थमा मसुतीन।
5 गेपुकीम थमा पा इन गाक्तीक लां नु इन पशो रिम्शो सेल्तीनी हना, गे थमा पा अरु मुर आन कली ठीक नु रिम्शो पाइतीनी हना,
6 गेपुकीमी अर्को रागी ङा मुर आन कली, रोम रोइक्च नु आन वोंइश बेक्शो मीश मुर आन कली मदिप्तीनी हना, दोस मताइब मुर आन कली मसाइक्तीनी हना नु आंम इन कली श्येत सेल्चा, दे देवी देवता आन नोले मखोइक्तीनी हना, येरमीया ५:२८
7 गो गेपुकी नु एक बाक्नुङ। साइ ङोंइती इन किकी पिपी आन कली गेशो रागीम गेना हना यो गेपुकी नु बाक्नुङ।
8 तन्न गेपुकी दा जोल लोव़ कली थमा सुइक्नीनी। मेको नेल्ल मोशा बाक्नीम।
9 गेपुकीम खुइ पाइनीनी, मुर साइक्नीनी, मुर आन मीश नु इप्नीनी, जोल पा कसम जाइनीनी, बाल देवता कली पूजा पाइनीनी नु इन मतुइश्शो देवी देवता आन नोले खोइक्नीनी। होसे ४:२
10 मो हना यो आं ङोंइती आं नें बाक्शो खिंम राप्शा बाक्नीनी। आं ङोंइती राप्शा ‘गो रिम्शो बाक्नीकी’ देंनीनी। मेकेर रे लेश्शा इन ग्रांग्रा दिचा ङा गेय लेंशा पाइनीनी।
11 मार, आं नेंमी बाक्शो आं खिं इन ङोंइती रोइक्ब आन बाक्तीक खिं दुम्मे? गो यो इन कली कोव़ना कोव़न बाक्नुङ। मत्ती २१:१३
12 मुल आं बाक्तीक शिलो लने। गो मेकेर ङोंइती आं नेंमी बाक्तीक सेल्शो नङ। मिनु गो इस्राएल ङा मुर आन कली आं अरेशो मटितीके मार पदु? मेकेर लशा कोव़ङीन। यहोसु १८:१; १सामुएल ४:४,१२; भजन संग्रह ७८:६०
13 मिनु गेपुकीम एको नेल्ल पना पन बाक्नीनु, गो इन कली गेना हना यो लोव़ पाता। तन्न गेपुकीम मनेंनी। गो इन कली ब्रेत्ताक्न्नी, तन्न गेपुकीम लोव़ मलेत्तीनी। येरमीया २५:३; यसैया ६५:१२
14 मोपतीके गो मेको आं नेंम सेल्शो खिं कली नु इन किकी पिपी नु इन कली गेशो रागी कली शिलो खोदेंशो सेल्नुङ। गे मेको खिं कली थमा सुइक्तीनी।
15 मिनु गो इन कली आं ङोंइती रे ग्रुंइनन्नी। गो इन कली, इन लोक्ब एफ्राइम आ आल नेल्ल आन कली खोदेंशो पा खेरनन्नी” दे परमप्रभु यावेमी देंत। २राजा १७:१८,२०,२३
16 परमप्रभु यावेम आं कली “गे मेको मुर आन पर्बम मपुनो। मेको मुर आन पर्बम मारेइ मपुनो। मेको आन पर्बम आं कली लोव़ मपावो। मारदे हना गो इ पुंइशो मनेंनुङ। येरमीया ११:१४; येरमीया १४:११; येरमीया ३७:३; येरमीया ४२:२; प्रस्थान ३२:१-११; १सामुएल १२:२३
17 गे मेको यहूदा ङा सहर नु यरूसलेम ङा लां मेर पशो मतवी? येरमीया १९:१३; येरमीया ४४:१७-१९; यसैया ६:५,११
18 मेको आन आलपुकीम शी खुप्नीम। आन आफपुकीम मी मुइक्नीम। मिनु मीश मुरपुकीम सरीङ ङा पिपीम कली बटुक चोचा कली फस नीनीम। अरु देवी देवता आन कली तूचा थोव़क चढ़ेनीम। आं कली गाइक्पाइक्चा कली मो पाइनीम।
19 मिनु मार, मेकोपुकीमी आं कली गाइक्पाइक्चा कली मो पशो मनमी ङा? मिनु मार, मेकोपुकीमी श्येत जचा कली मो पशो मनमी ङा?” देंत
20 मोपतीके परमप्रभु, परमप्रभु यावेम “आं गाइश्शो नु आं चुरशो मेकेर मोइक्चा माल्ब। मुर, बी ब्यफ, क्यारश भेडा, रू ङा रवा नु रागी ङा मारेइ मारेइ आन तारी मोइक्चा माल्ब। मेको मकाप्ब मीम नेल्ल दाक्ब” दे परमप्रभु यावेमी देंत।
21 मिनु मुर नेल्ल आन परमप्रभु यावे, इस्राएली आन परमप्रभुमी मार देंत देंशा हना “इन चोशा चढ़ेतीकेम क्योरशा चढ़ेतीके तेम्दीन। मिनु मेको श्ये ब्वने। १सामुएल १५:२२; भजन संग्रह ५०:७-१५; होसे ८:१३; मीका ६:६-८
22 मारदे हना इन किकी पिपी आन कली इजीप्त रे ग्रुंइशा चाक्शो नाक्ती, गो मेको आन कली चोशा चढ़ेतीक नु क्योरशा चढ़ेतीक आ पर्बम लोव़ मपङ। मिनु मेको आन कली मअरेङमी।
23 तन्न गो मेको आन कली मार अरेतीक का गेतामी देंशा हना ‘आं देंशो टिने। मिनु गो इन परमप्रभु नङ। मिनु गे आं मुर दुम्नीनी। गो इन कली तेको लां लचा, दे अरेनुङा, मेको लां गाक्कीन। मो पाइतीनी हना, इन कली रिम्शो दुम्ब’ देंती। येरमीया ११:४; येरमीया २४:७; येरमीया ३०:२२; येरमीया ३१:१,३३; येरमीया ३२:३८; लेवी २६:१२; इजीकीएल ११:२०; इजीकीएल १४:११; इजीकीएल ३४:३०; इजीकीएल ३७:२७
24 तन्न मेकोपुकीमी आं अरेशो मटीम। आं लोव़ मनेनेम। मेको आन खकटा थुं ङा मरिम्शो पतीकेमी आंम दला दाक्स पाम्तेक्म। आन ची हिरताक्म, आं कुल गे मकोव़यीमी। येरमीया ११:८; यसैया ६५:२
25 इन किकी पिपी इजीप्त रे ग्रूशा जाक्मा रे मुल सम्म नाक्त किंत किंत आं गेय पाइब, आं लोव़ पाइब नेल्ल आन कली मेको आन बाक्तीके सोइक्ताक्ङमी। येरमीया २५:४
26 तन्न मेकोपुकीमी आं लोव़ मनेनेम। आं लोव़मी आन नोफा मदाइक्तेम। मटीब ला दुम्तेक्म। मिनु मेकोपुकीमी आन किकी पिपी आन क्येङा यो शुश मरिम्शो पाम्तेक्म। येरमीया १६:१२
27 मिनु गे मेको आन कली एको लोव़ नेल्ल देंचा माल्नेवे। तन्न मेकोपुकीमी इ लोव़ मनेंनीम। गे मेको आन कली ब्रेत्तीनु, यो मेकोपुकीमी इ लोव़ मलेत्नीम।
28 गे मेको आन कली ‘एको परमप्रभु यावे, आन परमप्रभु आ लोव़ मटीब रागी ङा मुर बाक्नीम। सजाइ ताम्तेक्म हना यो, मरुबेम। मिनु मेको आ पचा माल्ब देंशो मपामे। थमा लोव़ जाम्त। मेकोपुकीम जोल ला पाइनीम। येरमीया ५:१
29 गे इ चां प्रेक्शा ताइक्तो। मिनु गोरशो डांडा मेर रोंका पा गाक्को। मारदे हना परमप्रभु यावेमी आ कली गाइक्पाइक्ब आन पाला ङा मुर आन कली प्रोंइशा तिल्तु’ देनो” देंत। मीका १:३६
मुर साइक्तीक बेंसी
30 परमप्रभु यावेम “यहूदा ङा मुरपुकीम आं ङोंइती मरिम्शो पशो बाक्नीम। मेकोपुकीमी आं नेंम सेल्शो खिंम आन ग्रांग्रा दिशो थोव़क वोइक्तेक्म। मोपा आं खिं ग्रांग्रा दिशो दुम्त। येरमीया ३४:३२; २राजा २१:४-५
31 मिनु मेकोपुकीमी तोफेथम आन थान सेल्तेक्म। मेको हिन्नोम आ तौ आ बेंसी बाक्ब। मेकेर आंम तमी तौ आन कली मीम चोशा चढ़ेम्तेक्म। गो मोदेंशो गेनायो ममिम्तु, मेको आन कली यो मअरेङमी। येरमीया १९:५-७; येरमीया ३२:३६; लेवी १८:२१
32 मोपतीके होस पा बाक्कीन। मेको बेंसी कली तोफेथ नु हिन्नोम आ तौ आ बेंसी देंचा प्रोंइनीम। शुश नाक्त रिम्चा ममाल्नीनी। तन्न मुर साइक्तीक बेंसी, दे नें वोइक्नीम। मारदे हना तोफेथमी आन बेक्शो मुर मरिक्थ्री थिम्नीम। येरमीया १९:६
33 मिनु मेको मुर आन बेक्शो रां सरीङ ङा चिक्बपुकी नु रागी ङा जन्तु आन कली ब्वतीक दुम्ब। मेको आन कली हिंच कोंइशा, प्रोक्पाइक्ब सुइ मबाक्नीम। येरमीया ९:२१
34 मिनु गो यहूदा ङा सहर नु यरूसलेम ङा लां रे थुं नाइश्शा बाक्तीक, ग्येरशो सेंदा नु ग्युम्ली ग्युम्ले आन सेंदा क्याम्नुङ। मारदे हना रागी मुर मबाक्तीके दुम्ब” दे परमप्रभु यावेमी देंत। येरमीया १६:९; येरमीया २५:१०; येरमीया ३३:११