5
मुर का यो रिम्शो मबाक्नीम देंशो
1 परमप्रभुमी “यरूसलेम ङा लां आ एर ओंथ कोव़शा गाक्को। नेल्ल कोव़शा इ तशो नेल्ल ब्रेक्तो। आ लाङगा मेर माल्शा कोव़ङो। मिनु मेकेर ठीक गेय पाइब नु थमा लोव़ माल्ब मुर का यो थित्तीवी हना, गो यरूसलेम कली माफ गेनुङ। उत्पत्ती १८:२२-३२
2 मेकोपुकीमी ‘परमप्रभु यावे ब्रोंइशा बाक्शो खोदेंशो पा’ दे कसम जाइनीम। मो हना यो मेकोपुकीमी जोल लोव़ पाइनीम” देंत। येरमीया ४:२
3 मिनु “परमप्रभु यावे, गे थमा लोव़ तचा ममाल्नीनी ङा? गे मेको आन कली तुप्तीनी। तन्न मेकोपुकी मखाइक्म। गे मेको आन कली खतम सेल्तीनी। तन्न मेकोपुकीमी इन देंशो पचा मबित्नीम। मेकोपुकीम आन कुल फुल्लु क्येङा यो खकटा सेल्तेक्म। मेकोपुकी लेश्शा जाक्ने मबिस्सम। येरमीया २:३०; येरमीया७:२८; येरमीया ९:२; यसैया ४८:४
4 मेकोपुकी दा प्रुङग ला बाक्नीम। मेकोपुकी मूर्ख बाक्नीम। मारदे हना मेकोपुकीम परमप्रभु यावे आ लां मतुइक्नीम। आन परमप्रभु आ अरेशो मतुइक्नीम।
5 गो शुश क्येट थीब मुर आन बाक्तीके लशा, मेको आन कली लोव़ पाइनुङ। मेकोपुकीम थमा पा परमप्रभु यावे आ लां, आन परमप्रभु आ अरेशो यो तुइक्नीम” देंती। तन्न मेकोपुकी खाल का ङा दुम्शा, जुवा जिक्शो बाक्तेक्म। मिनु डोरी यो प्रोइश्शो बाक्तेक्म। येरमीया २:२०
6 मोपतीके परमप्रभुमी “ब्वाकी ङा गुप्स कामी मेको आन कली ग्राम्शा साइक्ब। गोरशो रागी ङा फर कामी मेको आन कली खतम सेल्ब। जोइ का मेको आन सहर कोव़ना कोव़न बाक्शो बाक्ब। सु मेकेर रे ग्रूबा, मेकोमी मेको कली क्राइश्शा चोकटा लाम्टा सेल्ब। मारदे हना मेकोपुकी शुश हेंथे गाक्ब बाक्नीम। मेको आन मटितीके ठेयब बाक्ब” देंत। येरमीया ४:७
7 मिनु परमप्रभु यावेम “गो इन कली दोपा माफ गेने चाप्नुङा ङा? इन आलपुकीम आं कली प्रोंइतेक्म। मिनु परमप्रभु आ नेंम ममाइ, अर्को देवी देवता आन नेंमी कसम जाम्तेक्म। गो मेको आन माल्शो नेल्ल खाप्ता हना यो, मेकोपुकीम तेल्लेम पाम्तेक्म। मिनु तेल्लेम आन खिंम क्राक्थ्री चोक्थ्री दुम्तेक्म।
8 मेकोपुकी थाम्पा दोम्शो, गेय मपाइब शारा खोदेंशो बाक्नीम। मेको आंम नेक्था ङा मुर आन मीश आन पर्बम ग्रीनीम। इजीकीएल २२:११
9 मार, गो एको आ पर्बम मेको आन कली सजाइ मगेनुङमी ङा? मार, गो ओदेंशो रागी ङा मुर आन कली क्येक्क मलेत्नुङमी?” दे परमप्रभु यावेम देंत। येरमीया ५:२९; येरमीया ९:८
10 परमप्रभु यावेम आं कली “गे मेको आन अङगुर बोट दिम्शा ताइश्शा पावो। तन्न नेल्ल श्येत्थ मपोक्को। मेको आ राशी इत्तो। मारदे हना मेको परमप्रभु यावे आ मुर मनम।
11 मारदे हना इस्राएल नु यहूदा ङा मुरपुकीम थमा पा प्रोंइतीमी” देंत।
12 मेकोपुकीमी परमप्रभु यावे आ पर्बम “मेको मतुइक्नीकी। मेकोमी मारेइ मपाइब। गो मारेइ मरिम्शो मताइनीक। गो लडाइ नु अन्काल मताइनीक।
13 परमप्रभु यावे आ लोव़ पाइबपुकी फश बाक्नीम। मारदे हना परमप्रभु यावे आ लोव़ मेकोपुकी नु मबा। तन्न मेको लोव़ मेको मो देंब आन कली दुम्ब” देंतेक्म।
14 मोपतीके परमप्रभु यावे, मुर नेल्ल आन परमप्रभुमी मार देंत देंशा हना “मेकोपुकीमी मोदेंशो लोव़ पतीके, गो आं लोव़ इ शोव़म मी खोदेंशो सेल्नुङ। मेको मुर आन कली शी सेल्नुङ। मिनु मेको मीम नेल्ल आन कली दाक्ब सेल्नुङमी।
15 ए इस्राएल, इन कली खतम सेल्चा कली ङोन रागी ङा मुर चाक्नुङ। मेको रागी ङा मुरपुकी शुश बोल पाइश्शो बाक्नीम। आन रागी साइ ङोंइती ङा बाक्ब। गे मेको मुर आन लोव़ मतुइक्नीनी। आन ब्वाक्शो मरुप्नीनी। येरमीया ६:२२; यसैया २८:१
16 मेको आन ब्रा कुरतीके रोक्शो तुरस खोदेंशो बाक्नीम। मेको मुर नेल्ल थम सक्ति पाइश्शो लडाइ पाइब बाक्नीम।
17 मेकोपुकीमी इन खुप्शो अन्न नु जचा थोव़क नेल्ल नेक्नीम। मिनु इन तमी तौ नेल्ल आन कली यो लाइक्नीम। मेकोपुकीमी इन क्यारश भेडा नु बी ब्यफ नेल्ल नेक्नीम। मेकोपुकीमी इन अङगुर नु फोव़शी नेल्ल नेक्नीम। मिनु इन थमा सुइश्शो बोल्यो गारो हिरशो सहर नेल्ल तरवारम क्याम्नीम।
18 मो हना यो, गो मेको नाक्ती इन कली नेल्ल मसाइक्पाइक्नुङ। येरमीया ४:२७
19 मिनु इन मुरपुकीम ‘मारदे इं परमप्रभु यावे, इं परमप्रभुमी इं कली ओदेंशो पवा?’ दे हिलो पाम्तेक्म हना, गे मेको आन कली ‘गेपुकीम दोपा आं कली प्रोंइशा, आंम रागीम अरु देवी देवता आन कली पूजा पनी, मोपा मुल गेपुकीम इन मतुइश्शो रागीम अर्को रागी ङा मुर आन गेय पाइनीनी’ देंशो बाक्ब माइक्मी। येरमीया १६:१०-१४
20 याकूब आ मुर आन कली एको लोव़ माइक्मी। यहूदामी एको लोव़ ठेयब सेंदा पा नेल्ल आन कली नेंपाइक्मी। यसैया ६:९-१०; मत्ती ८:१८
21 गे मूर्ख नु मिम्तीक मपाइश्शो मुरपुकी, एको लोव़ नेनीन। इन मिक्ची बाक्ब, तन्न मताइनीनी। इन नोफा बाक्ब, तन्न मनेंनीनी।
22 मार, गे आं कली मान पा हिंचा ममाल्नीनी ङा? गे आं ङोंइती ख्रिंख्रि मपाइनीनी? गो समुन्द्र आ सांद कली बाल्वा वोइक्ता। आ छाल बोक्तेक्म हना यो, मेको कली ख्राक्ने मचाप्नीम। मेकोपुकी शुश बोल पाम्तेक्म हना यो, मेको कली लाक्ने मचाप्नीम। ठेयब रेयके पाम्तेक्म हना यो, लाक्ने मचाप्नीम। बजन संग्रह १०४:९
23 तन्न मेको मुर आन थुं खकटा नु काइ मटीब बाक्ब। मेकोपुकी हिरशा लाम्तेक्म।
24 मेकोपुकीमी ‘गोपुकी परमप्रभु यावे, इं परमप्रभु कली मान पा हिंय। मेकोमी माल्ची ना रेउ गेब। मेकोम बर्खा नु हिंउद ङा रेउ गेब। मिनु अन्न रिक्शा खुप्ची ना ङा नाक्ती गेब’ मदेंम” देंत। ब्यवस्था ११:१४
25 परमप्रभु यावेमी “इन मरिम्शो पशोम एको नेल्ल मरिम्शो दुम्त। इन पाप आ पर्बम गे मेको रिम्शो मताइनीनी। यसैया ५९:२
26 आं मुर आन दातेमी मरिम्शो पाइब मुर बाक्नीम। मेकोपुकी चिक्ब साइक्ब मुर खोदेंशो पा, बाप्शा बाक्शो बाक्नीम। मेकोपुकीम मुर आन कली ग्याइक्चा कली ब्वारद दाइक्नीम।
27 चिक्बीम ब्रीशो ओगील खोदेंशो पा, मेको आन खिं खुइ पशो थोव़कम ब्रीशो बाक्ब। मोपतीके मेको ठेयब मुर नु शुश क्येट थीब दुम्तेक्म।
28 मेकोपुकी दोम्शा लल जिशो नु शोंप पाइश्शो दुम्शो बाक्नीम। मेको आन परमप्रभु यावे आ अरेशो मटितीके कली तेक्तीक मारेइ मबाक्ब। मेकोपुकीम रोम रोइक्च आन कली रिम्शो दुम्ल, दे मेको आन कली ठीक निसाफ मगेनीम। मेकोपुकीमी क्येट मथीब आन कली वारच पा ठीक निसाफ मपाइनीम। प्रस्थान २२:२१; यसैया १:१७
29 मार, एको आ पर्बम, गो मेको आन कली सजाइ मगेनुङमी? मिनु गो एको रागी ङा मुर आन कली क्येक्क मलेत्नुङमी?” दे परमप्रभु यावेमी देंत। येरमीया ५:९
30 मिनु परमप्रभु यावेम “एको रागीम ग्रांग्रा दिचा ङा नु शुश हिंचा ङा श्येत दुम्त।
31 परमप्रभु यावे आ लोव़ पाइबपुकीम जोल पा लोव़ पाइनीम। दोपा परमप्रभु यावे आ लोव़ पाइबपुकीम जोल पा लोव़ पाइनीमी, मोपा चढ़ेबपुकीम मुर आन कली हुकुम पाइनीम। मिनु आं मुरपुकी चहिं मोदेंशोन दुम्चा दाक्नीम। तन्न नोले ङा नाक्ती मार, पाइनीनी?” देंत। इजीकीएल १३:६