44
मूर्ति पूजा पतीके जाम्शो
1 परमप्रभु यावेमी येरमीया कली इजीप्त मिग्दोल, ताहपनेस, मेम्फीस नु पथ्रोस रागीम बाक्ब यहूदी नेल्ल आन पर्बम लोव़ पाप्तु। येरमीया ४३:७
2 मुर नेल्ल आन परमप्रभु यावे, इस्राएली आन परमप्रभुमी मार लोव़ पाप्तु देंशा हना “गो यरूसलेम नु यहूदा ङा सहर नेल्ल आन कली शुश श्येत गेता। गेपुकीमी मेको आंमा ताइतीनी। मेको सहर कोव़ङीन। मुर मबाक्तीके श्येत्थ दुम्शो बाक्नीम।
3 मारदे मोदेंशो दुम्त देंशा हना, मेकेर ङा मुरुमी आं अरेशो मटिथु, गाइक्पाइक्तीमी। मेकोपुकीमी देवी देवता आन कली चढ़ेशा मेको आन नोले खोइक्तेक्म। ङोंइती मेकोपुकी, गेपुकी नु इन किकी पिपीमी यो मेको आन कली मतुइश्शो बाक्तेक्म।
4 मो हना यो गो आं गेय पाइब आं लोव़ पाइब आन कली मेको आन बाक्तीके सोइक्ना सोइक्न ‘गो इन कली मेको आं काइ मदाक्शो ग्रांग्रा दिशो गेय मपन’ देंपाइक्तामी। येरमीया २५:४
5 तन्न मेकोपुकीमी मनेनेम। आन नोफान मदाइक्तेम। मेको आं अरेशो मटितीक रे मलेम्म। मेकोपुकीमी देवी देवता आन कली चढ़ेचा मप्रोनेम।
6 मोपतीके गो यहूदा ङा सहर नु यरूसलेम ङा लांम आं शुश गाइश्शो नु चुरशो मोइक्ता। मिनु मेको सहर ब्रेश्शो नु मुर मबाक्तीके दुम्तेक्म। मुलाक्ती मोदेंशो बाक्ब” देंत।
7 मिनु मुल मुर नेल्ल आन परमप्रभु यावे, इस्राएली आन परमप्रभुमी “मारदे गेपुकीम आंम इन कली मोदेंशो श्येत गेनीनी? यहूदा आ दाते रे मीश मुर, वोंइश मुर, आल नु दूध तूब आल नेल्ल आन कली तिल्पाइश्शा, सुइ इन कली मलीपाइक्नी। येरमीया ४२:२२
8 मारदे गेपुकीमी इन गेयमी आं कली गाइक्पाइक्नीनी? मारदे गे इजीप्तमी बाक्शा, देवी देवता आन कली चढ़ेशा आं कली गाइक्पाइक्नीनी? गेपुकी क्याम्चा पुंइसीशा, रागी ङा मुर नेल्ल आन दातेमी सराप चीले राइब नु शुक्शी पाइक्चा पुंइसीब दुम्नीनी।
9 गे इन किकी पिपी आन मरिम्शो पशो प्रेंदीनी? यहूदा ङा पिप नु आन पिपीम आन मरिम्शो पशो, इन आंम मरिम्शो पशो, इन मीशेमी यहूदा रागीम नु यरूसलेम ङा लांमी मरिम्शो पशो प्रेंदीनी? येरमीया ७:१७-१८
10 मुल सम्म मेकोपुकीमी आंम कली ब्रेम्शो मसेल्सम। आं कली मान पा महिंम। गो आं अरेशो नु आं फुल्लुम मुशा ब्रेक्शो लोव़ इन ङोंइती नु इन किकी पिपी आन ङोंइती वोइक्ता। मिनु मेको, गेपुकी नु इन किकी पिपीमी मटिनी” देंत।
11 मोपतीके मुर नेल्ल आन परमप्रभु यावे, इस्राएली आन परमप्रभुमी “गो इन कली ठेयब श्येत गेशा, यहूदा ङा मुर नेल्ल आन कली क्याम्नुङ। आमोस ९:४
12 इजीप्त लशा बाक्चा कली मिम्ब यहूदा ङा लीशो मुर नेल्ल थमा पा जाम्शा लाइनीम। मेको नेल्ल इजीप्तमी साइक्चा पुंइसीनीमी। तरवार नु अन्कालमी बेक्नीम। ठेयब नु आइक्च नेल्ल तरवार नु अन्कालमी बेक्नीम। इन श्येत जशो तशा मुर हिंनीम। गेपुकी सराप राइब नु शुक्शी पाइक्चा पुंइसीब दुम्नीनी। येरमीया ४२:१४-१७
13 गो दोपा यरूसलेम कली तरवार, अन्काल नु मुर बेक्तीक रोइम सजाइ गेङा, मोपा इजीप्तम बाक्ब आन कली यो सजाइ गेनुङमी।
14 मोपा इजीप्तम बाक्शो यहूदा ङा लीशो मुर सुइ प्रोक्चा मताइनीम। सुइ मब्रोंइनीम। मिनु सुइ यहूदा रागी लेत्चा मताइनीम। मो हना यो मेकेर बाक्चा कली लचा दाक्नीम। ङोंइती प्रोक्शा लशो का निक्शी ला लेत्चा ताइनीमी” देंत।
15 मिनु आन मीशेम देवी देवता आन कली चढ़ेशो तुइक्ब वोंइश मुर नेल्ल, ठेयब हुल मीश मुर नु इजीप्त रागी ङा पथ्रोस रागीमी बाक्ब नेल्लेमी येरमीया कली यसैया ११:१
16 “गे परमप्रभु यावे आ नेंमी आंइ कली पशो लोव़ गो मनेंनीकी।
17 मेको आ पा ङा आंइ कसम जशो खाप्नीकी। गोपुकी सरीङ ङा पिपीम कली चढ़ेशा, मेको कली तूचा थोव़क लुक्नीकी। गोपुकी, आंइ किकी पिपी, आंइ पिपीपुकी नु आंइ ठेयब मुरपुकीम यहूदा ङा सहर नु यरूसलेम ङा लांम मोदेंशो पाम्तेक्म। मेना गोपुकी शुश जचा ताइतक। मिनु आंइ माल्शो क्येङा शुश तशा, श्येत मजक। येरमीया ७:१७-१८; होसे २:७
18 तन्न गोपुकीम सरीङ ङा पिपीम कली चढ़ेचा प्रोंइशो रे नु तूचा थोव़क लुक्चा प्रोंइशो रे मारेइ मतक। तरवार नु अन्कालम जाम्ना जाम्न लाइतक” देंतेक्म।
19 मिनु मीश मुरपुकीम “गो थमा पा सरीङ ङा पिपीम कली चढ़ेना ढ़ेन बाक्नीकी। मिनु मेको कली तूचा थोव़क लुक्नीकी। आंइ वोंइशेम वारच मपथु, मेको कली बटुक चोका नु तूचा थोव़क लुक्तका ङा?” दे लोव़ पाम्तेक्म। गन्ती ११-१३
20 मिनु येरमीयामी आ कली लोव़ लेप्ब वोंइश मुर नु मीश मुर नेल्ल आन कली
21 “गेपुकी, इन किकी पिपी, इन पिप, इन ठेयब मुर नु एको रागी ङा मुरपुकीम यहूदा ङा सहर नु यरूसलेम ङा लांम चढ़ेशो परमप्रभु यावेम मतुइक्बा ङा? मार, मेकोमी ममिम्ता ङा?
22 परमप्रभु यावेम इन मरिम्शो पशो नु इन पशो ग्रांग्रा दिशो गेय तशा फाल्ने मचब। मोपतीके इन रागी श्येत्थ नु मुर मबाक्तीके दुम्त। सराप चीले रशा, मुर मबाक्शो रागी दुम्त। मेको मुल सम्म मोदेंशोन बाक्ब।
23 इन चोशा चढ़ेतीके, इन परमप्रभु यावे कली पाप पशो, आ देंशो मटिशो नु आ अरेशो, आ फुल्लुम मुशा ब्रेक्शो लोव़ नु आ शेंशो मटितीके इन कली ठेयब श्येत दुम्त। मेको आ पर्बम श्येत जाइनीनी” दे माइक्तीमी।
24 मिनु येरमीयामी मेको मुर नेल्ल नु मीश मुर नेल्ल आन कली “गे इजीप्तम बाक्ब यहूदा ङा मुर नेल्ल परमप्रभु यावे आ लोव़ नेनीन।
25 मुर नेल्ल आन परमप्रभु यावे, इस्राएली आन परमप्रभुमी ‘गे नु इन मीश, इन देंशो, गोपुकीमी आंइ कसम जशो खाप्नीकी। गो सरीङ ङा पिपीम कली धूप चढ़ेशा, मेको कली तूचा थोव़क लुक्नीकी’ दे इन कसम जशो थमा पा खपीन।
26 मोपतीके गे इजीप्तम बाक्ब यहूदी नेल्ल परमप्रभु यावे आ लोव़ नेनीन। परमप्रभु यावेमी गो आं ठेयब नेंमी कसम जाइनुङ। मुल मेको इजीप्त रागीम बाक्ब यहूदा ङा मुर आन शोव़ रे ‘परमप्रभु, परमप्रभु यावे ब्रोंइशा बाक्शो खोदेंशो पा’ दे देंतीकेमी आं नें गेनायो मदेंनीम।
27 मारदे हना गो मेको आन कली रिम्शो पचा कली ममाइ, मरिम्शो पचा कली कोव़ना कोव़न बाक्नुङ। इजीप्तम बाक्ब यहूदी नेल्ल मनुम्मा सम्म तरवार नु अन्कालम बेक्नीम। आमोस ९:४
28 तरवार रे ब्रोंइशोपुकी इजीप्त रे यहूदा रागीमी का निक्शी ला लेत्चा ताइनीम। मिनु इजीप्तम बाक्ब यहूदा ङा मुर नेल्लेमी ‘आं देंशो थमा बाक्म देय मेको आन लोव़ थमा बाक्ब’ दे नोले तुइक्नीम” देंत।
29 मिनु परमप्रभु यावेम “आं देंशो थमा पा पाइनुङ। मेको आ चिन्ड मार बाक्ब देंशा हना, गो इन कली मेको रागीमी सजाइ गेनुङ। मेको नोले गो आ देंशो पाइनुङ, दे इन कली तुइक्तीके बाक्ब” देंत।
30 परमप्रभु यावेम “गो इजीप्त ङा पिप फाराओ होफ्रा कली आ जोरी सत्रु नु मेको कली साइक्चा माल्ब आन गुइमी गेनुङ। दोपा गो यहूदा ङा पिप सिदकीयाह कली आ जोरी सत्रु बेबीलोन ङा पिप नेबुकदरेसर आ गुइमी गेङा, मोपा इजीप्त ङा पिप कली साइक्ब आन गुइमी गेनुङ” दे परमप्रभु यावेमी देंत। इजीकीएल २९:१९