28
हनन्याहम जोल पशो
1 मेको बर्समीन यहूदा ङा पिप सिदकीयाहम सासन पशो ४ बर्स ५ महिनाम गिबोनम बाक्ब अज्जुर आ तौ परमप्रभु यावे आ लोव़ पाइब हनान्याहम परमप्रभु यावे आ खिंम चढ़ेब नु मुर नेल्ल आन ङोंइती लोव़ पा, आं कली २इतिहास १:३,१३
2 “मुर नेल्ल आन परमप्रभु यावे, इस्राएली आन परमप्रभुमी ‘गो बेबीलोन ङा पिप आ जुवा जिक्ता।
3 बेबीलोन ङा पिप नेबुकदनेसरमी आं खिं ङा मार मार नु ग्योंब एकेर रे बेबीलोनम लाइश्शो बाक्मे, मेको नेल्ल बर्स निक्शी क्येङा ङोंइती गो लेश्शा एक चाक्नुङमी। येरमीया २७:१६
4 मिनु गो यहूदा ङा पिप येहो-याकीम आ तौ येकोन्याह नु यहूदा रे ग्याइश्शा लाइक्चा पुंइसीशो नेल्ल आन कली बेबीलोन रे चाक्नुङमी। मारदे हना गो बेबीलोन ङा पिप आ जुवा जिक्शा गेनुङ’ ” दे परमप्रभु यावेमी देंत। येरमीया २७:२०
5 मिनु नोले परमप्रभु यावे आ लोव़ पाइब येरमीयाम परमप्रभु यावे आ खिंम राप्शा बाक्शो चढ़ेब नु मुर नेल्ल आन ङोंइती मेको परमप्रभु यावे आ लोव़ पाइब हनान्याह कली
6 “आमेन, परमप्रभु यावेम मो पवल। परमप्रभु यावेमी इ पशो लोव़ खबल। परमप्रभु यावे आ खिं ङा मार मार ग्योंबपुकी नु ग्याइश्शा लाइक्चा पुंइसीशो नेल्ल आन कली बेबीलोन रे लेश्शा चाक्गल।
7 तन्न इ ङोंइती नु मुर नेल्ल आन ङोंइती नेंचा ङा पा आं देंशो लोव़ नेनो।
8 गे नु गो इस ङोंइती जाक्ब साइ ङा परमप्रभु यावे आ लोव़ पाइबपुकीमी शुश रागी नु ठेयब राज्य आन पर्बम लडाइ, अन्काल नु मुर बेक्तीक रोइ आन पर्बम लोव़ पामे बाक्त।
9 तेको परमप्रभु यावे आ लोव़ पाइबम थुं नाइश्शा बाक्तीक आ पर्बम लोव़ पवा, मेको आ लोव़ गाप्त हना ला, मेको थमा पा परमप्रभु यावेम सोइश्शो आ लोव़ पाइब बाक्ब, दे तुंइसीब” दे माइक्तु। ब्यवस्था १८:२१-२२
10 मिनु नोले परमप्रभु यावे आ लोव़ पाइब हनान्याहम परमप्रभु यावे आ लोव़ पाइब येरमीया आ शुर रे मेको जुवा शोल्शा जिक्तु।
11 मिनु हनान्याहम मुर नेल्ल आन ङोंइती “परमप्रभु यावेमी मार देंत देंशा हना ‘गो मोपा बर्स निक्शी क्येङा ङोंइती रागी रागी ङा मुर नेल्ल आन शुर रे बेबीलोन ङा पिप नेबुकदनेसर आ जुवा जिक्शा गेनुङ’ ” देंत। मेना परमप्रभु यावे आ लोव़ पाइब येरमीया आ लां खोइक्तु। येरमीया २९:१०
12 मिनु परमप्रभु यावे आ लोव़ पाइब हनान्याहम, परमप्रभु यावे आ लोव़ पाइब येरमीया आ शुर ङा जुवा जिक्शा गेवा आ इच्का नोले परमप्रभु यावेम येरमीया कली लोव़ पाप्तु।
13 मार लोव़ पाप्तु देंशा हना “लशा, हनान्याह कली परमप्रभु यावेमी इ कली मार देंत देंशा हना ‘गे शी के जुवा जिक्तीवी। तन्न गो मेको आ पा ङा फलाम के जुवा चाक्नुङ’ देंशो बाक्ब मतो” देंत।
14 मिनु मुर नेल्ल आन परमप्रभु यावे, इस्राएली आन परमप्रभुमी “बेबीलोन ङा पिप नेबुकदनेसर आ वाइलीम वाइल दुम्पाइक्चा कली गो रागी नेल्ल ङा मुर नेल्ल आन शुरम फलाम के जुवा लाप्नुङमी। थमा पा, मेको आ वाइलीम वाइल दुम्नीम। गो ब्वाकी ङा जन्तु आन कली यो आ सासनमी गेतामी, देंशो बाक्ब, देनो” देंत। ब्यवस्था २८:४८; येरमीया २७:६
15 मिनु परमप्रभु यावे आ लोव़ पाइब येरमीयाम, परमप्रभु यावे आ लोव़ पाइब हनान्याह कली “ए हनान्याह, नेनो। परमप्रभु यावेमी इ कली मसोइक्त। मिनु गे एको मुर आन कली जोल लोव़ पा थमा सुइक्पाइश्शो बाक्नेवे।
16 मोपतीके परमप्रभु यावेम ‘गो इ कली एको रागी रे तिल्चा चिक्शो बाक्नुङ। गे एको बर्सम बेक्नेवे। मारदे हना गे परमप्रभु यावे कली काइ मटिथु जोल लोव़ पाप्तीवी’ देंत” देंत।
17 मिनु मेको बर्स ङा ७ महिनाम जोल पा परमप्रभु यावे आ लोव़ पाइब हनान्याह बेक्त।