22
एलीफाजमी अय्युब कली दोस गेशो
1 मिनु तेमान ङा एलीफाजमी
2 “बेक्शा लाइब मुरुम परमप्रभु कली मार पने चाप्बा ङा? शुश जोक्ब तुइक्ब मुरुम यो मेको कली मार गेय पने चाप्बा ङा?
3 गे ठीक पाइब बाक्तीनी हना, नेल्ल क्येङा ठेयब सक्ति पाइश्शो कली मार रिम्शो दुम्बा ङा? इन पशो नेल्ल दोस मततीक बाक्त हना, मेको कली मार रिम्शो दुम्बा ङा? अय्युब ३५:६-८
4 इन परमप्रभु कली मान पा हिंतीके आ पर्बम इन कली महुइक्ब। मेको आ पर्बम इन कली निसाफ मपाइब।
5 इन परमप्रभु यावे आ अरेशो मटितीके ठेयब बाक्ब। इन मरिम्शो पतीके गेनायो मनुप्ब।
6 गे मोशान इन लोक्ब आ वा जाकटी लाइक्तीनी। आन वा रोइश्शा शिश्रा सेल्तीनी। प्रस्थान २२:२५-२६; अय्युब २४:९-१०
7 गे तूतू दाक्शा, लकचा सोव़शो मुर आन कली ब्वाक्कु मगेनी। मिनु शोव़लु बेक्शो मुर आन कली जचा थोव़क मगेनी। अय्युब ३१:१७; मत्ती २५:४२-४३
8 सक्ति पाइश्शो मुर आन के शुश रू बाक्नीम। मेको आन दाक्शो मुर आन कली मेकेर बाक्चा गेनीम।
9 गे आन वोंइश बेक्शो मीश मुर आन कली श्येत्थ गुइ सोइक्ताक्नी। मिनु रोम रोइक्च आन तचा माल्शो मगेनी। अय्युब २९:१२-१३
10 मोपतीके इन गाक्तीक लां आ एर ओंथ नेल्ल ब्वारद दाइश्शो बाक्नीम। मिनु इन कली इन मतुइक्चा ङा पा शुश हिंतीके जाक्ब।
11 मिनु तने मचाप्चा ङा छिङछिङम इन कली सुम्ब। मिनु ब्वाक्कु बारशा यिशा इन कली सुम्ब।
12 परमप्रभु इर स्वर्गम बाक्ब। सोरुल आन कली कोव़ङीन। गिश इर बाक्नीमी।
13 मोपतीके गे ‘परमप्रभुमी मार तुइक्बा ङा? मेकोम गोस्स आ छिङछिङ रे दोपा निसाफ पाइबा ङा?
14 गोस्स आ छिङछिङ मेको कली सुम्तीके, मेकोम आंइ कली तने मचाप्ब। मिनु मेको सरीङम एर ओंथ गाक्शा बाक्ब’ देंतीनी।
15 गे परमप्रभु यावे आ अरेशो मटीब आन माइत लां मप्रोंइब बाक्नीनी?
16 मेको आन नाक्त मजाक्थु साइक्चा पुंइसाक्म। मेको आन जग ब्वाक्कुम योल्ताक्व। अय्युब १५:३२-३३; उत्पत्ती ७:२१
17 मेको मुरपुकीम परमप्रभु कली ‘आंइ रे पा ङोन लन। नेल्ल क्येङा सक्ति पाइश्शोमी आंइ कली मार पने चाप्बा ङा?’ देंतेक्म। अय्युब २१:१४
18 मो हना यो मेकोमी, मेको आन खिं रिम्शो थोव़कमी प्रिंताक्व। तन्न परमप्रभु यावे आ अरेशो मटीब आन मिम्शो काइ मदाक्नुङ।
19 ठीक पाइबपुकी मेको आन कली तशा ग्येरसीनीम। दोस मताइबपुकीम मेको आन कली शुक्शी पा रित्नीम। भजन संग्रह १०७:४२
20 मेकोपुकीमी ‘थमा पा, इं जोरी सत्रु साइक्चा पुंइसाक्म। मिनु मेको आन शोंप मीम नेक्तु’ देंनीम।
21 परमप्रभु नु गारीन। मिनु थुं नाइक्तीन। मो पाइतीनी हना इन रिम्शो दुम्तीके लेंशा ताइनीनी।
22 मेको आ शेंशो पने। मिनु इन थुंम वोतीन।
23 गे नेल्ल क्येङा ठेयब सक्ति पाइश्शो गे लेतीन। मिनु ङोंइती ङा खोदेंशो दुम्नीनी। गे इन ठीक मपतीके इन क्येङा ङोन वोतीन। अय्युब ८:५-७; अय्युब ११:१४-१५
24 गे सुन फुरक खोदेंशो मिम्ताक्नी हना, ओफीर ङा सुन कली खोला ङा फुल्लु खोदेंशो मिम्ताक्नी हना,
25 नेल्ल क्येङा ठेयब सक्ति पाइश्शो इन शोंप दुम्ब। मेको इन सुन चांदी दुम्त हना,
26 मेना नेल्ल क्येङा ठेयब सक्ति पाइश्शो कली मिम्शा, ग्येरशा बाक्नीनी। मिनु गे इन पिया पोक्शा परमप्रभु गे कोव़नीनी।
27 गे मेको कली पुंइनीनु, मेकोमी इन पुंइशो नेंब। मिनु गे इन जशो कसम खाप्नीनी। भजन संग्रह ५०:१४-१५
28 गे मार पाइनुङ, दे मिम्नीनी, मेको दुम्ब। मिनु इन लांम छेङछेङ दुम्ब।
29 मारदे हना मेकोमी ठेयब लेश्शो लोव़ पाइब आन कली आइक्च सेल्ब। ब्रेम्शो मुर आन कली चहिं प्रोंइब। १ पत्रुस ५:५
30 मेकोमी दोस ताइब आन कली यो प्रोंइब। गे दोस मताइब बाक्तीके मेको आन कली प्रोंइब” दे एलीफाजमी अय्युब कली लोव़ लेत्ता बाक्त। भजन संग्रह १८:२१,२५; २कोरिन्थी ५:२