2
निक्शी खेयप नाक्शो
1 मिनु काबु स्वर्गम बाक्ब परमप्रभु आ मुरपुकी परमप्रभु यावे आ ङोंइती जाक्मानु, सैतान यो मेकोपुकी नु परमप्रभु यावे आ ङोंइती जाक्माक्त। अय्युब १:६
2 मिनु परमप्रभु यावेम सैतान कली “गे ते रे जाक्ङे?” दे हिल्लो पवा बाक्त। मिनु मेकोमी परमप्रभु यावे कली “रागी ङा एर ओंथ नेल्ल हिरशा जाक्ती” देंमाक्त।
3 मिनु परमप्रभु यावेम सैतान कली “गे आं गेय पाइब अय्युब कली तवी? रागीमी मेको खोदेंशो अरु सुइ मबाक्नीम। मेको दोस मताइब, गेना हना यो ठीक पाइब नु आं कली मान पा हिंब बाक्ब। मेकोम मरिम्शो मपाइब। गे मेको कली श्येत गेचा कली आं कली क्युक्ती, हना यो मुल सम्म मेको आ थमा सुइक्तीके ग्येत्थ लुक्च मदुम्शो बाक्ब” दे मदा बाक्त।
4 मिनु सैतानम परमप्रभु यावे कली “कुशुल आ पा ङा कुशुल। मुरुम ब्रोंइचा कली आ मारेइ मारेइ मगेबा ङा?
5 इन गुइ दिंशा, मेको आ रुश नु श्ये थिने। मिनु मेकोम इन ङोंइतीन इन कली सराप चीले पाइब” दे लोव़ लेत्ता बाक्त।
6 मिनु परमप्रभु यावेम सैतान कली “लो मो हना, मेको कली इ मिम्शो पावो। तन्न मेको कली मसतो” देंमाक्त।
7 मिनु सैतान परमप्रभु यावे आ ङोंइती रे गाक्माक्त। मेकोमी अय्युब आ पिया रे खोइल सम्म गार मुपदा बाक्त। ब्यवस्था २८:२७
8 मिनु अय्युबम ब्वाम्सीचा कली गर आ गम्टे का शेशा पुलु तार निस्से बाक्त।
9 मिनु मेको आ मीशेमी मेको कली “मार, गे मुल सम्म थमा सुइक्चा मप्रोंइनीनी? परमप्रभु कली सराप चीले पा बेक्कीन” दे मदा बाक्त।
10 तन्न अय्युबमी “गे मूर्ख मीश मुर खोदेंशो पा लोव़ पाप्तीवी। परमप्रभु आ गेशो रिम्शो चहिं ताक्शा, मरिम्शो चहिं मताक्चा ङा?” दे मदा बाक्त। मेको लोव़ नेल्लेम अय्युबमी मारेइ पाप मपवा बाक्त। अय्युब १:२२
अय्युब आ वारच सां जाक्शो
11 मिनु अय्युब आ वारच सांम मेको कली मोदेंशो श्येत दुम्शो लोव़ नेन्मे बाक्त। मेको आन नें तेमान ङा एलीफाज, शुआह ङा बिल्दाद नु नामा ङा सोफार बाक्मा बाक्त। मिनु मेकोपुकीम मेको कली लेम्चा कली नु मेको आ थुं नाइक्पाइक्चा कली गारशा आन खिं प्रोंइशा अय्युब आ खिंम जाक्मा बाक्त। उत्पत्ती ३६:१५; येरमीया ४९:७; उत्पत्ती २५:२; यहोसु १५:४१
12 मिनु मेकोपुकीम अय्युब कली ङोन रे तशा, अय्युब कली मतुइक्तमे बाक्त। मिनु मेकोपुकीम अय्युब कली तुइक्तमे नोले वाइ ब्रेश्शा ङाक्शा, श्येत लाक्शा आन वा खाक्शा, आन पियाम फुरक फुंइसमा बाक्त।
13 मिनु मेकोपुकी ७ नाक्ती नु ७ नाक्दो मारेइ लोव़ मपथु, मेको आ नेक्था खपीम निस्समा बाक्त। मारदे हना मेकोपुकीम अय्युब कली शुश श्येत दुम्शो तामे बाक्त।