24
सीनै डांडाम कबल पशो
1 मिनु परमप्रभु यावेमी मोसा कली “गे, हारून, नादाब, अबीहु नु इस्राएली आन खाल्पा रे ७० जना मुर कुने। मिनु ङोन रे आं कली सेउ पचा माल्नीनी। प्रस्थान २८:१; लेवी १०:१; गन्ती ११:१६
2 गे ला आं नेक्था जाक्ने चाप्नेवे। अरु चहिं नेक्था मजाक्थु, बाक्चा माल्नीमी। मिनु मुरपुकी गे नु डांडा ङोइक्चा मदुम्नीम” दे परमप्रभु यावेमी देंत।
3 मिनु मोसा डांडा रे तोइश्शा, मुर आन कली परमप्रभु यावेमी देंशो नु अरेशो लोव़ नेल्ल नेंपाइक्तीमी। मिनु मुर नेल्लेमी मुर का खोदेंशो पा “परमप्रभु यावेमी देंशो लोव़ नेल्ल गो पाइनीकी” देंतेक्म। प्रस्थान १९:८
4 मिनु मोसामी परमप्रभु यावे आ देंशो लोव़ नेल्ल ब्रेक्ताक्व। मिनु सुनी कना बोक्शा, डांडा आ पुंमी चढ़ेतीक का नु इस्राएल आ १२ थर मिम्चा कली १२ ओटा फुल्लु ख्रुक्तु। प्रस्थान ३४:२७; यहोसु ४:२०
5 मिनु मोसामी इस्राएली ठिटा आन कली बोहोर क्योरशा, चोशा चढ़ेतीक नु परमप्रभु यावे नु दुशा बाक्चा आ पर्बम चढ़ेतीक चढ़ेपपाइक्तु। न्यायाधीस १७:७
6 मिनु चढ़ेशो बस्तु आन हुश आधा लाइश्शा, बोसपुकीम कुर पाप्तु। मिनु लीशो हुश चढ़ेतीकेम ब्रुइक्ताक्व।
7 नोले कबल ङा लोव़ ब्रेक्शो किताब मुर आन कली नेंपाइक्चा कली पढेप्तु। मिनु मेकोपुकीमी “परमप्रभु यावे आ देंशो नेल्ल पाइनीकी। आ लोव़ टीनीकी” देंतेक्म।
8 मिनु मोसामी बोस ङा हुश लाइश्शा, मुर आन कली ब्रुइश्शा “नेनीन, परमप्रभु यावेमी गेपुकी नु कबल पाप्तु। मेको हुश परमप्रभु यावे आ कबल ङा देंशो लोव़ आ छाप बाक्ब” देंत। हिब्रू ९:१९-२७; मर्कूस १४:२४
9 मिनु मोसा, हारून, नादाब, अबीहु नु इस्राएली आन खाल्पा रे ७० जना मुर डांडा ङोंइसाक्म।
10 मिनु मेकोपुकीमी इस्राएली आन परमप्रभु कली ताम्तेक्म। आ बाक्तीक बास साफीर माइश्शो हीरा खोदेंशो दिंम का बाक्शो बाक्त। मेको हाक्शो सरीङ खोदेंशो नीलो बाक्त। इजीकीएल १:२६
11 मिनु परमप्रभुमी इस्राएली आन खाल्पा आन कली मारेइ मपव। मिनु मेकोपुकीमी परमप्रभु कली तशा, जशा तूशा बाक्तेक्म। प्रस्थान १९:२१-२२; प्रस्थान ३३:२०-२३
मोसामी परमप्रभु आ अरेशो टिशो
12 मिनु परमप्रभु यावेमी मोसा कली “गे डांडा ङोइश्शा, आं नेक्था जाक्शा रिम्शा बाक्को। गो आं अरेशो लोव़ नु आं शेंशो लोव़ इस्राएली आन कली शेंचा कली फुल्लु निक्शीम मुशा ब्रेक्ताक्ङ। गो मेको फुल्लु इ कली गेनन्न” देंत। प्रस्थान ३१:१८; २कोरिन्थी ३:६
13 मिनु मोसा आ गेय पाइब यहोसु लाइश्शा, परमप्रभु आ डांडा ङोंइसाक्व। प्रस्थान ३३:११
14 तन्न ङोंइती मोसामी इस्राएली आन खाल्पा आन कली “गो मलेस्कु सम्म, एकेर रिम्दीन। नेनीन, हारून नु हुर गेपुकी नु बाक्नीस। मार निसाफ पचा माल्नीनी, मेको निक्शीमी गारपाइक्नीस” देंत। प्रस्थान १७:१२
15 मिनु मोसा डांडा ङोंइसाक्व। मिनु गोस्सुम मेको डांडा सुम्तु।
16 मिनु परमप्रभु यावे आ छेङछेङ सीनै डांडाम बाक्शो बाक्त। मेको गोस्सुम डांडा कली ६ नाक्त सम्म सुम्तु। मिनु नाक्त का नोले गोस्स आ दाते रे परमप्रभु यावेमी मोसा कली ब्रेत्ताक्व। प्रस्थान १६:१०
17 मिनु परमप्रभु यावे आ छेङछेङ इस्राएली आन कली डांडा तारी थम ठेयब ब्रशो मी खोदेंशो पा तांइसाक्व। ब्यवस्था ४:२४; ब्यवस्था ९:३; हिब्रू १२:२९
18 मिनु मोसा गोस्स आगा ओव़शा, डांडा ङोइश्शा, ४० नाक्दो नु ४० नाक्ती बाक्त। प्रस्थान ३४:२८