उपदेसक
ब्रेक्ब मुर: सोलोमनम ब्रेक्शो बाक्ब देंसीब।
गेना ब्रेक्शो: सोलोमनमी एको किताब ९३० बि. सी. क्येङा ङोंइती, आ सासन पशो थुम्ची ना ब्रेक्शो बाक्ब, दे मिम्नीम।
मार ब्रेक्शो: मारेइ मारेइ जाम्शा लाइब। मुर ब्रोंइशो सम्म परमप्रभु आ गेशोम ग्येरशा बाक्चा माल्ब। थमा पा जोक्तीक तुइक्तीक थुं परमप्रभु कली मान पा हिंशा आ देंशो टिशा पचा माल्ब।
1
नेल्ल जाम्शा लाइब बाक्नीम
1 एको दाऊद आ तौ, यरूसलेम ङा पिप आ शेंशो लोव़ बाक्ब।
2 मेको शेंबमी “जाम्शा लाइनीम, मारेइ मारेइ जाम्शा लाइब बाक्नीम। जाम्शा लाइनीम, नेल्ल जाम्शा लाइब बाक्नीम।
3 मुरुम रागीम श्येत पा गेय पा, मार ताइनीमी ङा? नांम दुप्शा श्येत पा गेय पा, मार दुम्बा ङा? उपदेसक २:२३
4 पाला का लाइब। मिनु अर्को पाला जाक्ब। तन्न रागी गेना हना यो लीब। भजन संग्रह ९०:३
5 नां दाप्ब। मिनु नां पेरब। मेको लेंशा आ दाप्तीकेम रीब पा जाक्ब।
6 फश दक्खिन गे पाइब। मिनु उत्तर गे लाइब। मेको गेना हना यो आ हिरतीकेम हिरशा लेप्ब।
7 खोला नेल्ल शाइश्शा समुन्द्रम लाइनीम। तन्न समुन्द्र गेनायो मब्रीब। खोला ते गे शाइक्नीमी, मेक गेन शांइस ङा शांइस बाक्नीम।
8 तेकोइ आइदी रे आइक्था सम्म रिम्शो मबाक्नीम। सुइमी देंशा देंने मचाप्नीम। कोव़शा मिक्च गेनायो मरूब। नेंशा नोफा गेनायो मदाइब। भजन संग्रह ९०:१०; हितोपदेस २७:२०
9 मार मार दुम्शो बाक्मे, मेको लेंशा दुम्ब। मार पशो बाक्मे, मेको लेंशा पांइसीब। रागीम मारेइ नक मबाक्नीम” देंत।
10 मारेइ आ पर्बम सुइमी “कोव़ङीन, एको नक बाक्ब” देंने चाप्नीमी? मेको दा ङोंइती रेन मेकेर बाक्त। मेको साइ ङोंइती रेन बाक्त।
11 साइ ङोंइती ङा मुर आन कली सुइम ममिम्नीम। मिनु मुल जाक्ब मुर कली नोले ङा मुरुम यो ममिम्नीम।
जोक्तीक तुइक्तीक जाम्शा लाइब
12 गो, एको लोव़ शेंबमी यरूसलेममी इस्राएल ङा पिप दुम्शा सासन पाता।
13 गो आं जोक्तीक तुइक्तीकेम रागीमी मार मार पांइसीबा, मेको नेल्ल तुइक्चा दाक्ताक्ङ। परमप्रभुमी मुर आन कली मोदेंशो तुइक्चा माल्तीक थुं गेशा, श्येत गेप्तु।
14 गो रागीमी पशो गेय नेल्ल ताता। मेको नेल्ल जाम्शा लाइब बाक्नीम। मेको फश कली खेदा पशो खोदेंशो बाक्ब।
15 मार रोम्सीशो बाक्बा, मेको कली दिंपाइक्ने मचाम्सीब। मबाक्शो थोव़क हिक्ने मचाम्सीब। उपदेसक ७:१३
16 गो आं थुंमी “कोव़ङीन, गो आं क्येङा ङोंइती यरूसलेममी सासन पाइब नेल्ल आन क्येङा शुश जोक्ब तुइक्ब थुं पाइश्शो मुर दुम्ती। गो मारेइ मारेइ तशा तुइक्ताक्ङ।
17 गो जोक्तीक तुइक्तीक रुप्चा, बौला दुम्तीक नु मूर्ख दुम्तीक तुइक्चा थुं पाता। तन्न मेको दा फश कली खेदा पशो खोदेंशो ला बाक्त, दे तुइक्ताक्ङ। उपदेसक २:१२; उपदेसक ७:२५
18 मारदे हना शुश जोक्तीक तुइक्तीकेम शुश श्येत जपाइक्ब। गे दोशो जोक्ब तुइक्ब दुम्नीनी, मोशो श्येत जाइनीनी” दे तुइक्ताक्ङ।