13
हिंच कोंइशो
1 मुल गो इन कली ग्रुम्थ पिङानु, सां खेयप दुम्नुङ। निसाफ पामेनु, सांकछी निक्शी सां वोइश्शा, मेको आन लोव़मी दोस ग्रुंइशा, सजाइ गेचा माल्ब। ब्यवस्था १९:१५; मत्ती १८:१६
2 मोपतीके सजाइ गेचा पुंइसीब आन कली सजाइ मगेथु, मप्रोंइनुङ। मारदे हना एको क्येङा ङोंइती जाक्ङानु, मो मपचा, दे शेंशो नन्नी।
3 गेपुकीमी “पावल ख्रीस्त आ सक्ति तशा, अधिकार पाइश्शो बाक्माक्त” दे इन मिक्चीमी तचा माल्बाक्तीनी, दे तुइक्ताक्ङ। ख्रीस्त इन दातेमी मचाप्ब ममाइ, शुश सक्ति पाइश्शो बाक्ब, दे कोंइताक्व।
4 मारदे हना मेको मचाप्ब दुम्शा, शीम केप्शा कांटी थोक्शा क्याइश्शा साइक्चा पुंइसाक्व। तन्न परमप्रभु यावे आ सक्तिमी बेक्शो रे सेंचा पुंइसाक्व। मोदेंशो पा गो यो मेको नु मारेइ पने मचाप्ब दुम्नीकी। तन्न गेपुकी नु बाक्कानु, बेक्शो रे सेंचा पुंइसीशा, परमप्रभु यावे आ सक्ति तशो सक्ति पाइश्शो गेय कोंइनीकी।
5 इन थमा सुइक्तीके ठीक बाक्बा देय मबाक्ब आंमा नाक्शा कोव़ङीने। आंमा नाक्तीन। येसु ख्रीस्त इन आगाम बाक्ब, दे मप्रेंदीन। मबाक्त हना इन गेय शोर गाक्शो दुम्ब।
6 गो आंइ शेंशोमी इन कली रिम्शो पाइतक, दे तुइक्नीकी। मिनु गे यो मोदेंशो मिम्नीनी, दे आस पाइनीकी।
7 गे मारेइ मरिम्शो मपन, दे गो परमप्रभु यावे कली पुंइनीकी। गो ग्राशो मुर खोदेंशो दुम्चा ममाइ, तन्न ठीक पाइब दुम्मीन। गो ठीक मपाइब खोदेंशो दुम्तक हना यो, गे रिम्शो पाइब दुम्नीकी।
8 गोपुकीमी थमा लोव़ थमा पाइनीकी। दूली नु जोल लोव़ कली थमा देंने मचाप्नीकी।
9 गो मारेइ पने मचाप्ब दुम्शो बाक्तक। तन्न इन कली बोल्यो दुम्शो तशा ग्येरनीकी। गो परमप्रभु यावे कली “कोरिन्थीपुकी रिम्शो दुम्मल” दे पुंइना पुंइन बाक्नीकी।
10 गो इन नेक्था मबाक्ङानु, एको चिठी ब्रेक्नुङ। मिनु आं जाक्ची ना गो इन कली हुइश्शा, प्रभुमी आं कली गेशो अधिकार कोंइचा ममाल्ङल। मेको अधिकार सेल्चा कली गेशो बाक्त, प्रेत्चा कली ममाइ। २कोरिन्थी १०:११; २कोरिन्थी १०:८
नोले ङा लोव़
11 आं लोक्बपुकी, मुल रिम्शो बाक्कीन। रिम्शो पने। आं लोव़ नेंशा टीब दुमीने। इन दातेमी गारमुने। थुं नाइश्शा बाक्कीने। दाक्तीक नु थुं नाइक्तीक गेब परमप्रभु यावे गेपुकी नु बाक्ल। फिलिप्पी ४:४; रोमी १५:३३
12 प्रभु आ नेंमी मुम्मुशा, आसीक गेमुने।
13 गो नु बाक्ब थमा सुइक्ब नेल्लेमी इन कली “रिम्शो बाक्कीन” देंतेक्म।
14 इं प्रभु येसु ख्रीस्त आ शिशी, परमप्रभु यावे आ दाक्तीके नु परमप्रभु यावे आ सोक्त गेना हना यो गेपुकी नु लील।