11
दूली शेंब आन पर्बम लोव़
1 गो इच्का निप्स ग्राइश्शो लोव़ पाइनुङ, गे आं लोव़ फाल्शा नेंशा गेयीनी।
2 इन कली मिम्शा, गो परमप्रभु यावेमी रुश पशो खोदेंशो दुम्ती। मारदे हना रिम्शो ग्युम्ली ग्युंबे पा गेशो खोदेंशो पा, इन कली ख्रीस्त कली गेतन्नी। एफिसी ५:२६-२७
3 बुस्सुमी हव्वा कली मिलो शिलो पा जोल पा आ थुं हिरपा, परमप्रभु यावे कली मटीब सेल्शो खोदेंशो पा, दूली शेंबपुकीमी इन थुं क्याल्शा, ख्रीस्त कली दाक्चा रे हेंथे लां खोइक्पाइक्नीम। उत्पत्ती ३:४,१३
4 मारदे हना मुर का जाक्शा, मेकोमी इन कली अर्को येसु आ पर्बम शेंब आंइ शेंशो खोदेंशो ममाइ, इन ङोंइती ताक्शो ममाइ, अर्को सोक्त ताक्पाइक्ब। अर्को ग्येरपाइक्तीक लोव़ नेंपाइक्ब। मिनु गे रीब पा बित्नीनी। गलाती १:८-९
5 गो मेको शुश जोक्ब तुइक्ब देखु पशो सोइश्शो आन क्येङा आइक्च मनङ। २कोरिन्थी १२:११
6 ब्वाक्स मजोक्ब बाक्ती हना यो, शुश जोक्ब बाक्नुङ। गो आंइ पतीकेमी कोंइताक्क। १कोरिन्थी २:१,२,१३; एफिसी ३:४
7 गो ब्रेम्शो दुम्शा, इन कली ठेयब सेल्चा कली परमप्रभु यावे आ ग्येरपाइक्तीक लोव़ क्येट मताक्थु शेंताक्ङ। मार, मेको पाप मिम्नीनी? २कोरिन्थी १२:१३; मत्ती १०:८; १कोरिन्थी ९:१२-१८
8 अर्को रागीम बाक्ब थमा सुइक्ब आन ग्रुम्तीके ङा आन क्येट रोइश्शो खोदेंशो पा ताक्शा, इन कली शेंताक्न्नी। फिलिप्पी ४:१०,१५
9 गेपुकी नु बाक्शा शेंदन्नीनु, मासीडोनीया रागी रे जाक्शो थमा सुइक्ब लोक्बपुकीमी आं कली माल्शो थोव़क गेशा, वारच पाइक्तीमी। मोपा आन पशोमी गेपुकीमी मोशा शेंसीचा ताइतीनी। मुल यो मारेइ ताक्चा ममाल्ङल, दे मिम्ताक्ङ।
10 ख्रीस्त थमा बाक्ब, देंशो लोव़ लीशो खोदेंशो पा “कोरिन्थी आन कली आन क्येट मताक्थु, मोशा शेंताक्व” देंशो लोव़ आकाया रागीम ब्रशा लील, दे मिम्शा, मारेइ मताक्गु।
11 मो पङानु, इन कली मदाक्ब दुम्नुङा ङा? गोमी इन कली दाक्शो मदाक्शो परमप्रभु यावेमी तुइक्ब।
12 मुल सम्म दोपा बाक्ङा, मुल यो मोपान बाक्नुङ। मारदे हना दूली लोव़ शेंबपुकीमी “पावल नु आ वारचपुकीमी पशो खोदेंशो पा गो यो पाइनीकी” दे नें बोरपा गाक्नीम। मेको आन जोल ग्रुंइचा कली गो मारेइ मताक्थु शेंनीकी।
13 मेकोपुकी परमप्रभु यावे आ सोइश्शो मनम। ख्रुइश्शा जोल पा गेय पाइनीम। ख्रीस्त आ सोइश्शो दुम्खु पा शेंथ गाक्नीम। २कोरिन्थी २:१७
14 मोपा गाक्तेक्म हना यो, मेको आन मोदेंशो पशो छक लाक्चा ङा ममाइ। मारदे हना सैतान यो परमप्रभु यावे आ स्वर्ग ङा गेय पाइब खोदेंब दुम्खु पा गेय पा गाक्ब।
15 मेकोपुकी रिम्शो गेय पाइब खोदेंशो दुम्खु पा गाक्नीम। मेको आन जोल नोले ग्रूब। मिनु आन गेय यो मलीब।
पावल श्येत जशो
16 गो इन कली लेंशा देंनुङ, मार देंती हना यो, आं लोव़ नेंचा मप्रोनीन। गो निप्स ग्राइश्शो लोव़ पाइब खोदेंशो पा, आ नें बोरपाइश्शो लोव़ पना पन बाक्ती हना यो, आं लोव़ नेनीने। २कोरिन्थी १२:६
17 मुल इन कली देंशो लोव़ प्रभुम गेशो अधिकार ङा लोव़ ममाइ। आं नें बोरपाइक्तीक लोव़ पा, गो निप्स ग्राइश्शो लोव़ पङ देंती।
18 मारदे हना शुश मुर रागी ङा लोव़मी ठेयब लेत्नीम। मोपतीके गो यो बोरनुङ।
19 गे ग्येरसीशा निप्स ग्राइश्शो आन लोव़ फाल्नीनी। मिनु आंम कली जोक्ब तुइक्ब मिम्नीनी। १कोरिन्थी ४:१०
20 सुइ मुरुमी इन कली वाइलीम वाइल सेल्तेक्म हना, रोइक्ताक्म हना, जोल पाम्तेक्म हना, बोरशा कोंइताक्म हना नु इन चोचो राप्तेक्म हना यो फाल्शा बाक्बाक्तीनी।
21 गो मुने पा देंनुङ, मेको आन पशो खोदेंशो पने मचाप्क। सुइ मुर मारेइ आ पर्बम ठेयब लेश्शा बोरतेक्म हना, गो यो मेको आ पर्बम ठेयब लेश्शा बोरनुङ। गो मूर्ख खोदेंशो पा ब्वाक्नुङ।
22 मार, मेको हिब्रू नमी? गो हिब्रू नङ। मार, मेको इस्राएली नमी? गो इस्राएली नङ। मार, मेको अब्राहाम आ चच युइ नमी? गो यो अब्राहाम आ चच युइ नङ। फिलिप्पी ३:५
23 मार, मेको ख्रीस्त आ गेय पाइब नमी? गो यो ख्रीस्त आ गेय पाइब नङ। गो मेको आन क्येङा रिम्शो गेय पाइब नङ। गो गशो मुरुम खोदेंशो लोव़ पाइनुङ। गो मेको आन क्येङा शुश गेय पाता। मेको आन क्येङा शुश चोक्चा पुंइसाक्यी। मेको आन क्येङा तुप्चा पुंइसाक्यी। हेर हेरा साइक्चा पुंइसाक्यी। १कोरिन्थी १५:१०; २कोरिन्थी ६:४-५
24 यहूदीपुकीमी आं कली ५ खेयप ३९ कोर्रा आप्तीनी। ब्यवस्था २५:३
25 खेयप सां कोक्केमी तुप्तीमी। काले फुल्लु आप्तीमी। खेयप सां आं ङोइश्शो जहाज समुन्द्रम ग्रुम्शा हेरा बेक्ती। मो दुम्मेनु, काब नाक्दो नाक्ती समुन्द्रम बाक्ती। प्रेरित १६:२२; प्रेरित १४:१९
26 रागी रागी हिरशा गाक्ङानु, खोला शोक्सीङानु, हेर हेरा योल्ताक्यी। लांम बाप्शा बाक्ब खुइपुकीमी हेर हेरा साइक्तीमी। आंम यहूदीपुकीमी यो शुश श्येत गेतीमी। अर्को रागी ङा मुरपुकीमी यो हेर हेरा साइक्तीमी। सहर, गोरशो रागी, समुन्द्र ते ते हिरशा गाक्ङा, मेक मेक हिंना हिंन गाक्चा माल्ताक्यी। आं लोक्ब दुम्खु पा, थमा सुइक्ब नकी देंब नु गाक्ङानु, मेकोपुकीमी यो शुश श्येत गेतीमी।
27 येसु आ लोव़ शेंना शेंन गाक्ङानु, शुश गेय पा, शुश श्येत जशा, शुश नाक्दो इप्चा यो मतङ। जचा तूचा यो मतङ। ग्यूमी फेक्चा यो मतङ। २कोरिन्थी ६:५
28 मोदेंशो श्येत आं रांमी जशो ला ममाइ। आं थुं यो मनाइक्स। मारदे हना थमा सुइक्ब आन कली दोपा मार पा रिम्शो सेलुमी, दे मिम्स ङा मिम्स बाक्ती। प्रेरित २०:१८-२१,३१
29 मुरुमी “मचाप्नीकी” देंनीम। गो चहिं गेना हना यो चाप्नुङा ङा? मुरुम पाप पाम्तेक्म हना, गो शुश सुर्ता पाइनुङ।
30 गो आं नें बोरपा लोव़ पचा माल्नुङ हना, आं मचाप्शो आ पर्बम आं नें बोरपाइक्नुङ। २कोरिन्थी १२:५
31 गेना हना यो ठेयब सेल्चा पुंइसीब प्रभु येसु आ आफ परमप्रभु यावेमी गो जोल मपाइनुङ, दे तुइक्ब।
32 साइ दमस्कस सहरमी बाक्ङानु, पिप अरेतस आ हुकुम पाइबमी आं कली ग्याइक्चा, दे सहर आ एर ओंथ आ सिपाहीपुकी वोइक्मी बाक्त।
33 तन्न थमा सुइक्बपुकीमी आं कली डोकोम कुरपा गारो ङा झेल रे ओंखां पा तोक्शा प्रोक्पाइक्तीमी। मोपा जोरी सत्रु आन गुइ रे ब्रोंइती। प्रेरित ९:२४-२५