20
᥇᥆᥆᥆ ᤋᤱᤒᤣ ᤌᤠᤖᤡᤰ ᤁᤧᤏᤧᤒᤠ ᤜᤠᤱᤈᤢᤶ
1 ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤠᤱᤗᤠᤀᤡᤱᤒᤠᤎᤡᤰ ᤕᤧ᤺ᤖ ᤐᤳᤇᤧᤒᤠ ᤏᤡ᤺ᤛᤢᤱ॥ ᤂᤧᤸᤗᤧ ᤁᤢᤜᤢᤰᤁᤥ ᤂᤧᤴ ᤁᤢᤍᤪᤥ᤺ᤶ ᤔᤧ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤥᤒᤠ ᤋᤡᤔᤡᤰᤁᤡᤴ ᤏᤢ ᤐᤕᤶ ᤕᤶᤒᤠ ᤑᤧᤴᤌᤰᤁᤪᤱᤅᤡᤴ ᤁᤳᤋᤢᤖᤥ॥
2 ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤴ ᤋᤧᤶᤛᤢᤀᤠᤱ ᤋᤱᤒᤣ ᤜᤧᤴᤇᤡᤱ (᥇᥆᥆᥆) ᤌᤠᤖᤡᤰ ᤂᤧᤴᤏᤡᤴ ᤀᤡᤄᤣ᤺ᤰᤂᤢᤖᤥ॥ ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤱᤃ ᤀᤢᤴᤇᤥ᤺ᤴᤒᤠ ᤀᤛᤣ᤺ᤰ. ᤔᤠᤑᤧᤴᤛᤠᤶ ᤀᤡᤃᤪ ᤛᤤᤋᤠ᤺ᤴᤏᤠᤱ ᤔᤧᤔᤧᤳᤋᤢᤖᤥ॥
3 ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤔᤠᤑᤧᤴᤛᤠᤶᤔᤡᤴ ᤁᤢᤍᤪᤥ᤺ᤶ ᤔᤧ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤥ ᤗᤠᤵᤑᤢᤛᤢ ᤁᤣ᤺ᤳᤋᤢ. ᤜᤧᤰᤁᤩᤠᤱ ᤋᤱᤒᤣ ᤜᤧᤴᤇᤡᤱ (᥇᥆᥆᥆) ᤌᤠᤖᤡᤰ ᤀᤠᤳᤋᤡᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤠᤱ ᤀᤡᤱᤗᤧᤰ ᤔᤧᤵᤔᤠ ᤔᤧᤛᤢᤰᤋᤢᤴᤇᤡᤴᤗ ᤑᤠ᤹ᤀᤠᤱ ᤂᤧᤸᤗᤧ ᤁᤢᤛᤢ᤺ᤵᤏᤠ᤺ᤴ ᤛᤢᤒᤢᤀᤠᤱ ᤀᤣ᤺ᤵᤛᤠᤵ ᤗᤰᤋᤢᤖᤥ॥ ᤂᤧᤴ ᤀᤣᤃᤠᤱ ᤛᤵᤑᤠᤖᤧ ᤗᤠᤃᤡ ᤂᤧᤴ ᤗᤧᤵᤔᤠᤀᤣ ᤐᤥ᤺ᤱᤗᤥ॥
4 ᤜᤧᤰᤁᤩᤠᤱ ᤀᤡᤱᤃᤠ᤹ ᤜᤠᤱᤕᤢᤰᤏᤠᤜᤠ᤹ ᤏᤡ᤺ᤛᤢᤱᤛᤡᤱ॥ ᤂᤧᤵᤔᤥ ᤂᤠᤛᤧᤴ ᤗᤥ᤺ᤶᤔᤠ ᤕᤢᤰ ᤁᤧᤄᤥ᤺ᤒᤠᤜᤠ᤹ ᤔᤧᤕᤢᤅᤧ॥ ᤜᤧᤰᤁᤩᤠᤱ ᤕᤧᤛᤢ ᤂᤪᤡᤛ᤻ᤋᤖᤧ ᤀᤥᤛᤣ᤺ᤴᤍᤠᤱ ᤆᤥᤃᤢᤒᤠ ᤛᤧᤰᤂᤠ᤺ᤴ ᤏᤢ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤀᤡᤱᤓᤴ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤡ᤹ ᤌᤧᤃᤣ᤺ᤰᤐᤠ ᤔᤧᤄᤰᤋᤢ ᤔᤧᤛᤧᤖᤢᤛᤡᤒᤠᤜᤠ᤹ᤖᤧ ᤂᤢᤏᤡ᤹ ᤕᤠᤶᤛᤠᤶᤜᤠ᤹ ᤏᤡ᤺ᤛᤢᤛᤡᤱᤗᤥ॥ ᤂᤧᤱᤜᤠ᤹ᤖᤧᤃ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤏᤢ ᤁᤢᤏᤠᤘᤠᤀᤡᤳᤗᤠ᤺ᤴ ᤛᤣᤘᤠ ᤔᤧᤴᤈᤥᤃᤢᤴ ᤜᤧᤰᤁᤩᤠᤱ ᤀᤡᤒᤢᤃᤧᤴ ᤁᤢᤔᤡᤰᤛᤣ᤺ᤴᤏᤡᤴᤏᤠᤱ ᤂᤢᤏᤡ᤹ ᤋᤥᤘᤠᤒᤥ ᤀᤡᤃᤪ ᤜᤢᤰᤁᤥ ᤔᤧᤴᤍᤠ᤺ᤰᤋᤢᤴᤏᤠᤱ ᤘᤕᤧᤖᤥ॥ ᤂᤧᤱᤜᤠ᤹ᤃ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤅᤧᤀᤠᤱ ᤂᤪᤡᤛ᤻ᤋᤧᤴᤏᤢ ᤋᤱᤒᤣ ᤜᤧᤴᤇᤡᤱ ᤌᤠᤖᤡᤰ ᤜᤠᤱ ᤔᤧᤈᤥᤃᤢᤖᤥ॥
5 (ᤘᤣ᤹ ᤁᤧᤛᤡ᤺ᤒᤠᤜᤠ᤹ᤃ ᤋᤱᤒᤣ ᤜᤧᤴᤇᤡᤱ ᤔᤧᤸᤗᤧᤰᤁᤣ ᤌᤠᤖᤡᤰ ᤔᤧᤴᤜᤡᤅᤧᤴᤗᤥ॥) ᤁᤱᤃ ᤌᤡᤰᤛᤡᤃᤣ᤺ᤰᤐᤠ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤴᤗᤥ॥
6 ᤌᤡᤰᤛᤡᤃᤣ᤺ᤰᤐᤠ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤴ ᤁᤧᤄᤥ᤺ᤒᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡ ᤏᤢ ᤛᤣᤛᤣᤒᤠᤛᤡᤖᤥ॥ ᤂᤧᤱᤜᤠ᤹ ᤏᤡᤛᤡᤃᤣ᤺ᤰᤐᤠ ᤛᤡ᤺ᤔᤧᤸᤗᤧ ᤌᤣᤀᤠᤱ ᤔᤧᤵᤔᤠ ᤔᤧᤛᤢᤰᤋᤢᤛᤡᤴ. ᤁᤖ ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱ ᤏᤢ ᤂᤪᤡᤛ᤻ᤋᤖᤧ ᤁᤢᤏᤡᤱᤘᤠ᤹ᤑᤢᤛᤠᤶᤒᤠ ᤔᤧᤒᤥ᤺ᤱᤅᤠᤱ ᤂᤪᤡᤛ᤻ᤋᤧᤴᤏᤢ ᤋᤱᤒᤣ ᤜᤧᤴᤇᤡᤱ ᤌᤠᤖᤡᤰ ᤜᤠᤱ ᤔᤧᤈᤥ᤺ᤰᤗᤥ॥
ᤔᤠᤑᤧᤴᤛᤠᤶᤔᤡᤴ ᤜᤠᤖᤡ ᤋᤠ᤺
7 ᤜᤧᤰᤁᤩᤠᤱ ᤋᤱᤒᤣ ᤜᤧᤴᤇᤡᤱ ᤁᤧᤳ ᤆᤢ᤺ᤳᤋᤠᤱ ᤔᤠᤑᤧᤴᤛᤠᤶᤔᤡᤴ ᤛᤠᤰᤋᤧᤒᤠ ᤋᤧᤴᤏᤥᤗᤠᤶ ᤗᤧᤳᤗᤥ॥
8 ᤜᤧᤰᤁᤩᤠᤱ ᤂᤧᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗ᤺ᤴ ᤌᤠᤱᤅᤠᤱ ᤁᤠᤰ ᤐᤡᤛᤠᤱᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹–“ᤃᤥᤃ” ᤏᤢ “ᤔᤠᤃᤥᤃ” ᤔᤧᤵᤔᤏᤠᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹–ᤀᤡᤱᤗᤧᤰᤋᤢᤛᤡᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤛᤢᤵᤛᤢᤛᤡᤖᤥ॥ ᤂᤧᤱᤜᤠ᤹ᤃ ᤀᤠᤳᤋᤠᤳᤋᤠᤴᤏᤣ ᤕᤧ᤺ᤱᤄᤠ ᤁᤢᤀᤡᤛᤡ᤺ᤰ ᤏᤡ᤺ᤵᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤔᤧᤈᤥ᤺ᤰᤗᤥ॥
9 ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤰᤛᤠ ᤂᤠᤶᤒᤣ᤺ᤰᤔᤠᤴ ᤛᤡᤍᤧᤵ ᤔᤧᤍᤧᤵᤋᤢᤖ ᤔᤧᤒᤣᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡ᤺ᤶᤈᤡ ᤔᤧᤳᤋᤢᤒᤠ ᤕᤧᤰᤕᤰᤁᤡᤴ ᤔᤧᤃᤒᤢᤖᤥ॥ ᤁᤖ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤡᤖᤠ᤺ᤰ ᤌᤩᤧᤀᤠᤱ ᤂᤧᤱᤜᤠ᤹ ᤗᤠᤒᤢ ᤛᤧᤖᤢᤛᤡᤖᤥ॥
10 ᤜᤧᤰᤁᤩᤠᤱ ᤂᤢᤏᤡ᤹ ᤀᤡᤱᤗᤧᤰ ᤁᤧᤔᤧᤵᤐᤠ ᤔᤠᤑᤧᤴᤛᤠᤶᤔᤡᤴ ᤔᤡᤖᤠ᤺ᤰ ᤏᤢ ᤁᤠᤴᤎᤠᤰ ᤁᤧᤍᤡ᤺ᤵᤐᤠ ᤗᤢᤶᤒᤠ᤺ᤳᤋᤥ ᤗᤠᤵᤑᤢᤛᤢᤖᤥ॥ ᤂᤧᤵᤔᤥᤃ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤏᤢ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴᤏᤠᤱ ᤋᤃᤡᤛᤠ ᤗᤠᤵᤔᤧᤓᤢᤛᤢᤛᤡᤀᤠᤱ ᤕᤠᤃᤧᤳᤇᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤛᤧᤴᤍᤡᤰ ᤗᤧᤴᤍᤡᤰ ᤛᤍᤠᤍᤡᤱ ᤂᤧᤵᤔᤥ ᤋᤢᤰᤂᤣ ᤔᤧᤈᤠᤖᤥ॥
ᤁᤢᤏᤢᤵᤔᤠ ᤂᤠᤛᤧᤴ
11 ᤜᤧᤰᤁᤩᤠᤱ ᤀᤡᤱᤃᤠ᤹ ᤐᤕᤶ ᤕᤶᤒᤠ ᤑ᤺ᤃᤧᤗ᤹ᤒᤠ ᤜᤠᤱᤕᤢᤰᤏᤠ᤺ᤴ ᤏᤢ ᤂᤧᤵᤔᤥ ᤁᤧᤕᤢᤱᤒᤠᤴ ᤏᤡ᤺ᤛᤢᤱᤗᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤧᤴ ᤂᤢᤏᤧ᤹ ᤁᤢᤍᤃᤡᤗᤠᤶ ᤂᤧᤳᤏᤧᤳᤇᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤏᤡ᤺ᤔᤧᤍᤧᤳᤋᤧᤳᤇᤡᤴᤗᤥ॥
12 ᤜᤧᤰᤁᤩᤠᤱ ᤀᤡᤱᤃᤠ᤹ ᤕᤶᤒᤠ ᤆᤢᤰᤐᤠ ᤁᤠᤰ ᤁᤧᤛᤡ᤺ᤒᤠᤜᤠ᤹ ᤂᤧᤴ ᤜᤠᤱᤕᤢᤰᤏᤠ ᤋᤃᤡ ᤔᤧᤕᤧᤒᤧᤒᤠ ᤏᤡ᤺ᤛᤢᤛᤡᤱ. ᤜᤧᤰᤁᤩᤠᤱ ᤂᤧᤵᤔᤥ ᤛᤠᤵᤐᤴᤜᤠ᤹ ᤔᤧᤜᤴᤍᤧ॥ ᤂᤧᤵᤔᤥ ᤘᤣ᤹ ᤛᤠᤵᤐᤴᤎᤡᤰᤁᤠᤱ ᤜᤴᤍᤧ॥ ᤂᤧᤱᤃ ᤜᤡᤱᤔᤴᤗᤧᤴ ᤛᤠᤵᤐᤴᤗᤥ॥ ᤜᤧᤰᤁᤩᤠᤱ ᤂᤧᤴ ᤛᤠᤵᤐᤴᤜᤠ᤹ᤀᤥ ᤛᤠᤵᤋᤧᤀᤠᤱ ᤐᤳᤇᤧᤒᤠ ᤁᤧᤛᤡ᤺ᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤏᤡ᤹ ᤕᤠ᤺ᤶᤒᤰ ᤁᤢᤀᤡᤛᤡ᤺ᤰ ᤂᤢᤏᤡ᤹ ᤂᤠᤛᤧᤴ ᤐᤥ᤺ᤰᤂᤧᤖᤥ॥
13 ᤜᤧᤰᤁᤩᤠᤱ ᤘᤠᤜᤱᤅᤡᤸᤗᤧᤀᤠᤱ ᤂᤧᤵᤔᤥ ᤁᤧᤕᤠᤰᤐᤠ ᤁᤧᤛᤡ᤺ᤒᤠᤜᤠ᤹ ᤏᤢ᤺ᤰᤋᤢᤛᤡᤖᤥ॥ ᤛᤡ᤺ᤔᤧᤴ ᤏᤢ ᤂᤧᤔᤠᤕᤱᤛᤱᤅᤡᤸᤗᤧᤀᤠᤱ ᤂᤢᤴᤇᤡ᤹ᤀᤥ ᤁᤧᤘᤠ᤹ᤒᤠ ᤁᤧᤛᤡ᤺ᤒᤠᤜᤠ᤹ ᤏᤢ᤺ᤰᤋᤧᤳᤇᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤏᤡ᤹ ᤕᤠ᤺ᤶᤒᤰ ᤁᤢᤀᤡᤛᤡ᤺ᤰ ᤁᤧᤖᤧᤰᤗᤧᤴ ᤂᤠᤛᤧᤴ ᤐᤥ᤺ᤰᤂᤧᤖᤥ॥
14 ᤜᤧᤰᤁᤩᤠᤱ ᤛᤡ᤺ᤔᤧᤴ ᤏᤢ ᤂᤧᤔᤠᤕᤱᤛᤱᤅᤡᤴ ᤔᤡᤖᤠ᤺ᤰ ᤁᤧᤍᤡ᤺ᤵᤐᤠ ᤗᤢᤶᤒᤠ᤺ᤳᤋᤥ ᤗᤠᤵᤑᤢᤛᤧᤳᤇᤡᤖᤥ॥ ᤁᤴ ᤔᤡᤖᤠ᤺ᤰ ᤗᤢᤶᤒᤠ᤺ᤳᤋᤡᤱᤃ ᤏᤡᤛᤡᤃᤣ᤺ᤰᤐᤠ ᤛᤡ᤺ᤔᤧᤴᤗᤥ॥
15 ᤜᤡᤱᤔᤴᤗᤧᤴ ᤛᤠᤵᤐᤴᤏᤥ ᤂᤢᤴᤇᤡ᤹ ᤔᤡᤱ ᤔᤧᤶᤒᤵᤔᤏᤠᤒᤠᤜᤠ᤹ ᤁᤧᤖᤧᤰ ᤔᤡᤖᤠ᤺ᤰ ᤁᤧᤍᤡ᤺ᤵᤐᤠ ᤗᤢᤶᤒᤠ᤺ᤳᤋᤥ ᤗᤠᤵᤔᤧᤓᤢ᤺ᤛᤧᤖᤥ॥