12
ᤔᤧᤴᤇᤢᤔᤠ᤹ ᤏᤢ ᤕᤶᤒᤠ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤴ
1 ᤜᤧᤰᤁᤩᤠᤱ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤥ ᤀᤡᤱᤃᤠ᤹ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴ ᤏᤡ᤺ᤛᤢᤱᤗᤥ॥ ᤂᤧᤵᤔᤥ ᤆᤠᤱ ᤆᤠᤱᤔᤏᤠᤒᤠ ᤁᤢᤀᤡᤛᤡ᤺ᤰ ᤏᤠᤶᤔᤡᤴ ᤁᤧᤈᤠᤱᤔᤠ ᤔᤧᤴᤇᤢᤔᤠ᤹ᤎᤡᤰ ᤘᤕᤧᤖᤥ॥ ᤂᤧᤸᤗᤧ ᤁᤢᤗᤠᤱᤓᤥᤛᤠᤱ ᤗᤠᤒᤠᤴ ᤐᤳᤇᤧ ᤜᤧᤰᤁᤩᤠᤱ ᤁᤢᤎᤧᤃᤣ᤺ᤰ ᤛᤶᤍᤠᤱ ᤌᤡᤰ-ᤏᤧᤳ ᤂᤣ᤺ᤶᤛᤡᤰᤜᤠ᤹ᤖᤧᤴ ᤋᤡᤆ᤺ ᤂᤢ᤺ᤰᤂᤢᤀᤠᤱ ᤐᤳᤇᤧ॥
2 ᤂᤧᤴ ᤔᤧᤴᤇᤢᤰᤔᤠ ᤘᤕᤧ ᤜᤧᤰᤁᤩᤠᤱ ᤁᤢᤛᤠᤘᤠ᤺ᤶᤔᤠ ᤕᤧᤶᤔᤡᤴ ᤋᤩᤧᤒᤠᤸᤗᤧ ᤛᤠᤘᤠ᤺ᤴᤍᤢᤱᤅᤡᤸᤗᤧ ᤋᤖᤢᤀᤠᤱ ᤕᤠᤖᤧᤖ ᤘᤕᤧ॥
3 ᤜᤧᤰᤁᤩᤠᤱ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤥ ᤕᤠᤶᤔᤥ ᤀᤡᤱᤃᤠ᤹ ᤘᤣ᤹ᤛ᤻ᤔᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤎᤡᤰᤁᤠᤱ ᤏᤡ᤺ᤛᤢᤱᤗᤥ–ᤂᤧᤵᤔᤥ ᤜᤧ᤺ᤳᤁᤧᤗ᤹ᤒᤠ ᤏᤢᤛᤡ ᤁᤢᤎᤧᤃᤣ᤺ᤰ ᤁᤧᤒᤵᤐᤠ ᤐᤕᤶ ᤕᤶᤒᤠ ᤁᤡᤵᤔᤠ ᤁᤧᤄᤢ᤺ᤒᤠ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤴ ᤘᤕᤧᤖᤥ॥ ᤂᤧᤸᤗᤧ ᤏᤢᤛᤡ ᤁᤢᤎᤧᤃᤣ᤺ᤰᤜᤠ᤹ᤀᤥ ᤏᤢᤛᤡ ᤋᤡᤆ᤺ᤜᤠ᤹ ᤂᤢ᤺ᤰᤂᤢᤀᤠᤱ ᤐᤳᤇᤧ॥ ᤂᤧᤸᤗᤧ ᤌᤡᤒᤥ᤺ᤱ ᤁᤢᤍᤠᤱᤜᤠ᤹ ᤕᤢᤅᤧᤖᤥ॥
4 ᤂᤧᤸᤗᤧ ᤁᤢᤔᤣ᤺ᤸᤗᤧ ᤋᤠᤱᤛᤠᤰᤐᤥᤒᤠ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤂᤣ᤺ᤶᤛᤡᤰᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤥ ᤛᤢ᤺ᤴᤍᤢ ᤌᤠ᤺ᤛᤢᤛᤡᤖᤥ॥ ᤜᤧᤰᤁᤩᤠᤱ ᤀᤅᤧ᤺ᤰᤘᤠ᤺ᤴ ᤛᤠᤘᤠ᤺ᤴᤍᤢᤸᤗᤧ ᤗᤖᤢᤱᤍᤣ᤺ᤛᤢᤱ ᤑᤠ᤹ᤀᤠᤱ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤍᤃᤡ ᤂᤧᤴ ᤐᤣᤀᤠᤱ ᤕᤧᤶᤛᤡᤱᤗᤥ॥
5 ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤑᤧᤴᤈᤣ᤹ ᤋᤰᤁᤠ᤺ᤳᤋᤡᤸᤗᤧ ᤁᤠᤰ ᤔᤧᤴᤇᤠᤶ ᤛᤢᤘᤠᤱ ᤛᤶᤍᤠᤱ ᤜᤠᤱ ᤁᤧᤈᤥ᤺ᤰᤐᤠ ᤀᤅᤧ᤺ᤰᤘᤠᤛᤠ᤺ᤴ ᤛᤠᤘᤠ᤺ᤴᤍᤢ॥ ᤂᤧᤴ ᤀᤅᤧ᤺ᤰᤘᤠ᤺ᤴ ᤛᤠᤘᤠ᤺ᤴᤇᤡᤱᤏᤠᤔᤧ᤺ᤴᤏᤣ ᤏᤡᤱᤘᤠ᤹ᤑᤢᤔᤠᤱᤅᤥ ᤜᤧᤰᤁᤩᤠᤱ ᤁᤢᤜᤠᤱᤕᤢᤰᤏᤠᤀᤥ ᤌᤠ᤺ᤱ ᤔᤧᤄᤧᤳᤋᤢ ᤔᤧᤍᤣ᤹ᤖᤢᤖᤥ॥
6 ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤜᤧᤴᤇᤡᤱ ᤌᤡᤰ ᤁᤡᤵ ᤏᤧᤳᤇᤡᤀᤠᤱ ᤋᤢᤰᤐᤥ᤺ᤱ (᥇.᥈᥌᥆) ᤕᤧᤴ ᤌᤠᤖᤡᤰ ᤆᤠ ᤔᤧᤵᤔᤠ ᤑᤠ᤹ᤀᤠᤱ ᤀᤣ᤺ᤰᤛᤠᤍᤧᤴᤏᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤖᤡᤵ ᤆᤥᤃᤢᤒᤠ ᤋᤧᤴᤏᤥ ᤂᤧᤳᤇᤡᤱ ᤐᤣᤖᤥ॥
7 ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤕᤶ ᤕᤶᤒᤠ ᤋᤧᤴᤎᤱ ᤐᤥ᤺ᤰᤂᤧᤖᤥ॥ ᤔᤡᤂᤠᤀᤣᤗᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤴ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤏᤢ ᤌᤱ ᤔᤧᤈᤥᤃᤢᤖᤥ॥
8 ᤁᤖ ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤴ ᤏᤢ ᤂᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤌᤱᤅᤥ ᤜᤠᤖᤡ ᤔᤧᤍᤩᤧᤀᤠᤱ ᤂᤧᤱᤜᤠ᤹ᤖᤧ ᤛᤠᤱᤃᤪᤠᤶᤐᤣᤍᤠᤱᤅᤥ ᤂᤢᤏᤡ᤹ ᤕᤢᤱᤔᤠ ᤋᤧᤴᤏᤡᤴ ᤔᤧᤔᤠ᤺ᤛᤢ॥
9 ᤁᤴ ᤐᤕᤶ ᤕᤶᤒᤠ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤱᤃ ᤀᤢᤴᤇᤥ᤺ᤴᤒᤠ ᤀᤛᤣ᤺ᤰᤐᤧᤴᤗᤥ. ᤂᤧᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ ᤀᤡᤱᤗᤧᤰ ᤁᤧᤔᤧᤵᤐᤠ ᤔᤠᤑᤧᤴᤛᤠᤶ ᤀᤡᤃᤪ ᤛᤤᤋᤠᤏ ᤔᤧᤔᤧᤳᤋᤢᤖᤥ॥ ᤂᤧᤱᤃ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤏᤢ ᤕᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤵᤑᤢᤛᤧᤖᤥ॥
10 ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤀᤰᤋᤱᤒᤠ ᤕᤶᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱ.
“ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤴᤗᤵ. ᤁᤢᤔᤢᤰᤛᤠᤶ. ᤁᤢᤜᤠᤱᤈᤢᤶ ᤏᤢ ᤂᤢᤏᤧ᤹ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤸᤗᤧ ᤁᤢᤕᤢᤰᤁᤡᤴ ᤋᤩᤧᤀᤠᤱ ᤘᤠ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤛᤧᤴᤍᤡᤰ ᤗᤧᤴᤍᤡᤰ ᤀᤠᤏᤡ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤧ᤹ᤏᤢᤛᤠ᤹ᤜᤠ᤹ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤖ ᤁᤧᤏᤧᤒᤠᤴ ᤕᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤵᤔᤧᤓᤢᤛᤢ ᤔᤧᤎᤠᤛᤢᤖᤥ॥
11 ᤀᤠᤏᤡ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤧ᤹ᤏᤢᤛᤠ᤹ᤜᤠ᤹ᤖᤧᤃ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤔᤠᤰᤂᤡ᤹ ᤏᤢ ᤂᤧᤱᤜᤠ᤹ᤖᤧ ᤀᤡᤱᤔᤧᤓᤥ᤺ᤛᤢᤒᤠ ᤛᤧᤰᤂᤠ᤺ᤸᤗᤧ ᤂᤧᤴ ᤔᤠᤑᤧᤴᤛᤠᤶᤔᤡᤴ ᤔᤧᤏᤠ᤺ᤴᤍᤢᤀᤠᤱ ᤔᤧᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤛᤡ᤺ᤔᤠᤀᤠᤱ ᤔᤧᤱᤃᤡᤛᤧᤴᤗᤥ॥
12 ᤂᤧᤸᤗᤧ ᤆᤥᤃᤢᤸᤗᤧ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠᤛᤣ. ᤛ᤺ᤳᤋᤧᤶᤔᤧ᤹ᤀᤥ᥄ ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤏᤢ ᤘᤠᤜᤱᤅᤥ ᤁᤧᤘᤠ᤹ᤒᤠᤛᤣ. ᤂᤡᤏᤡ᤹ᤃ ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ. ᤌᤣᤀᤠᤱᤓᤧᤸᤗᤧ ᤔᤠᤑᤧᤴᤛᤠᤶᤔᤡᤱᤃ ᤂᤡᤏᤡ᤹ᤀᤥ ᤌᤩᤧᤀᤠᤱ ᤘᤠ᤹ᤖᤥ॥ ᤂᤧᤸᤗᤧ ᤛᤠ᤹ᤖᤡᤰ ᤁᤢᤛᤡᤰᤁᤧᤴ ᤐᤥᤃᤧ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤕᤧᤶᤔᤡᤴ ᤛᤢ᤺ᤸᤗᤡᤰᤗᤰ ᤘᤠ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤘᤠ᤹॥”
13 ᤜᤧᤰᤁᤩᤠᤱ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤸᤗᤧ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤵᤔᤧᤓᤢᤛᤠᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤧᤴ ᤀᤅᤧ᤺ᤰᤘᤠᤛᤠ᤺ ᤁᤧᤃᤵᤔᤠ ᤔᤧᤴᤇᤢᤔᤠ᤹ᤀᤡᤴ ᤋᤢᤰᤂᤣ ᤆᤠ᤺ᤳᤇᤧ ᤏᤠ᤺ᤵᤔᤠ ᤜᤣ᤺ᤰᤋᤢ॥
14 ᤁᤖ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤸᤗᤧ ᤔᤧᤕᤠᤱᤄᤢᤴᤗ ᤑᤠ᤹ᤀᤠᤱ ᤀᤣ᤺ᤰᤛᤠᤍᤧᤴᤏᤥ ᤕᤠᤖᤡᤵ ᤆᤥ᤺ᤰᤔᤏᤠᤒᤠ ᤆᤡᤱᤛᤡᤱᤔᤠᤍᤧᤴᤏᤥ ᤂᤧᤳᤇᤡᤱᤔᤠ ᤐᤣ᤺ᤰᤔᤠ ᤛᤢᤰᤗ ᤑᤠ᤹ᤀᤠᤱ ᤐᤕᤶ ᤕᤶᤒᤠ ᤏᤧᤳᤇᤡ ᤔᤢᤕᤠ ᤗᤠᤵᤜᤠ᤹ ᤔᤧᤒᤡᤖᤢᤖᤥ॥ ᤂᤧᤵᤔᤥ ᤋᤱᤒᤣ ᤛᤢᤶᤛᤡᤀᤠᤱ ᤁᤢᤓᤪᤧ᤺ᤱ ᤌᤠᤖᤡᤰ ᤂᤢᤏᤧ᤹ ᤆᤠ ᤔᤧᤔᤧᤳᤋᤢ᤹ᤖᤥ॥
15 ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤆᤫᤠ᤺ᤳᤋᤡᤸᤗᤧ ᤘᤠᤍᤣ᤺ᤶᤔᤠ ᤋᤣ᤺ᤔᤠᤀᤠᤱ ᤛᤧᤵᤔᤠ ᤑᤠ᤹ᤀᤠᤱ ᤕᤱᤄᤱ ᤁᤩᤠ᤺ᤵᤐᤠ ᤆᤫᤠ᤺ᤳᤋᤡᤴ ᤁᤢᤔᤢᤖᤠᤀᤥᤗᤠᤶ ᤀ᤺ᤛᤢ ᤗ᤺ᤳᤋᤢᤖᤥ॥
16 ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤸᤗᤧ ᤁᤢᤔᤢᤖᤠᤀᤥᤗᤠᤶ ᤀ᤺ᤛᤢ ᤗ᤺ᤳᤋᤢᤒᤠ ᤕᤱᤄᤱᤅᤡᤴ ᤁᤠᤰ ᤗᤖᤢᤍᤣ᤺ᤛᤢᤀᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤁᤢᤓᤠ᤹ ᤐᤡᤖᤢᤖᤥ॥
17 ᤜᤧᤰᤁᤩᤠᤱ ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤸᤗᤧ ᤔᤧᤴᤇᤢᤔᤠ᤹ᤀᤡᤴᤏᤢ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤁᤧᤏᤠ᤺ᤵᤐᤠ ᤁᤧᤀᤡ᤺ᤵᤐᤠ ᤏᤢ ᤕᤧᤛᤢᤖᤧ ᤁᤢᤏᤡᤛᤠᤶ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤘᤣ᤹ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤏᤢ ᤌᤱ ᤆᤥᤃᤢᤖᤥ॥
18 ᤜᤧᤰᤁᤩᤠᤱ ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤴ ᤘᤠᤜᤱᤅᤡᤸᤗᤧ ᤁᤢᤕᤠᤀᤥ ᤕᤧᤶᤛᤡᤱᤗᤥ॥