24
ᤁᤢᤏᤢᤵᤔᤠ ᤕᤧᤴᤏᤡᤸᤗᤧᤴ ᤔᤡᤰᤛᤣ᤺ᤴᤜᤠ᤹
ᤔᤷᤁᤢᤛ ᥇᥉.᥇-᥈. ᤗᤢᤁᤠ ᥈᥇.᥋-᥌.ᤔᤷᤁᤢᤛ ᥇᥉.᥉-᥇᥉. ᤗᤢᤁᤠ ᥈᥇.᥍-᥇᥏
1 ᤕᤧᤛᤢ᤺ᤴ ᤔᤠᤱᤜᤡᤶᤔᤥᤗᤠᤶ ᤐᤣᤖ ᤐᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤔᤠᤱᤜᤡᤶᤔᤡᤸᤗᤧᤴ ᤏᤢ᤺ᤒ᤻ ᤏᤢ᤺ᤒᤠ ᤜᤡᤶᤜᤠ᤹ ᤂᤢᤏᤧ᤹ ᤀᤥᤛᤣ᤺ᤴᤎᤠᤰᤔᤠ ᤑᤠ᤹ᤀᤠᤱ ᤁᤢᤒᤣᤛᤠᤱ ᤔᤧᤍᤩᤧ॥
2 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤁᤧᤏᤡ᤺ᤛᤢᤶᤒᤠ ᤜᤡᤶᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤛᤧᤰᤂᤠ ᤐᤠ᤺ᤴ ᤔᤧᤳᤏᤡᤱ. ᤌᤡᤰ ᤗᤢᤱᤛᤶᤍᤠᤱ ᤘᤣ᤹ ᤗᤢᤱᤎᤡᤰᤁᤠᤱ ᤔᤧᤴᤏᤧᤀᤣ ᤌᤠᤖᤡᤰ ᤁᤱᤜᤠ᤹ ᤁᤧᤖᤧᤰ ᤔᤧᤕ᤺ ᤔᤧᤒᤣ᤺ᤰᤗᤥ॥”
3 ᤕᤠᤱᤛᤡ ᤕᤧᤛᤢ᤺ᤴ ᤈᤤᤋᤢᤏ ᤁᤥ᤺ᤰᤔᤠᤀᤥ ᤘᤕᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤛᤫᤠ᤺ᤳᤋᤠᤱ ᤛᤣ᤺ᤴᤔᤧᤍᤥᤛᤢ. “ᤍᤠᤱᤒᤣ. ᤁᤴ ᤐᤠ᤺ᤴᤜᤠ᤹ ᤀᤠᤵᤑᤠᤸᤗᤧ ᤐᤥ᤺ᤱᤒᤠᤒᤣ᥅ ᤂᤧᤏᤧ᤹ ᤁᤧᤕᤢ᤺ᤔᤠ ᤕᤧᤶᤔᤡᤴ ᤏᤢ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤧᤶᤔᤡᤸᤗᤧ ᤁᤢᤏᤢᤵᤔᤠ ᤔᤡᤰᤛᤣ᤺ᤴᤏᤡᤴ ᤀᤠᤔᤧᤳᤋᤧ᤹ᤀᤥ॥”
4 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤀᤠᤳᤋᤡᤸᤗᤧᤀᤠᤱ ᤂᤡᤏᤡ᤹ ᤀᤡᤱᤃᤧᤴᤗᤧᤰᤋᤡᤴᤗᤖᤥ.
5 ᤌᤣᤀᤠᤱᤓᤧᤸᤗᤧ ᤕᤖᤡᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤀᤡᤱᤃᤠ᤹ᤀᤣᤖᤥ ᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤀᤡᤱᤃᤠ᤹ ᤀᤠᤔᤡᤱᤅᤥ ᤔᤧᤍᤠᤖᤥ. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡ᤹ᤖᤥ॥
6 ᤂᤡᤏᤡ᤹ᤃ ᤌᤱ ᤏᤢ ᤌᤱᤜᤠ᤹ᤖᤧᤴ ᤜᤕᤱᤁᤡᤸᤗᤡᤱᤜᤠ᤹ ᤁᤧᤄᤧᤵᤛᤢᤶ. ᤁᤖ ᤂᤡᤏᤡ᤹ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹ᤀᤥ॥ ᤁᤱᤜᤠ᤹ᤃ ᤐᤥ᤺ᤱᤔᤠᤀᤣ ᤐᤥ᤺ᤱ. ᤁᤖ ᤒᤠ ᤂᤧᤴ ᤕᤧᤶᤔᤥᤀᤣᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠᤴ ᤔᤧᤍᤠᤏᤧᤴᤗᤥ॥
7 ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤢ ᤗᤠᤈᤣ᤹ᤜᤠ᤹ ᤗᤢᤶᤔᤥ ᤌᤱ ᤐᤥ᤺ᤰ. ᤕᤖᤡᤰ ᤋᤧᤴᤏᤥ ᤕᤶᤒᤠ ᤛᤠᤰ ᤐᤥ᤺ᤰ ᤜᤧᤰᤁᤩᤠᤱ ᤗᤢᤵᤗᤡ ᤌᤠᤱᤗᤥ॥
8 ᤁᤱᤃ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤁᤡᤵᤔᤠ ᤁᤧᤄᤢ᤺ᤒᤠ ᤋᤢᤰᤂᤣᤜᤠ᤹ᤖᤧ ᤁᤢᤜᤣ᤺ᤰᤛᤡᤱᤔᤠᤖᤰᤗᤥ॥
9 ᤜᤧᤰᤁᤩᤠᤱ ᤂᤡᤏᤡ᤹ᤃ ᤔᤏᤠᤜᤠ᤹ᤖᤧ ᤁᤧᤶᤍᤧᤶᤛᤡᤀᤠᤱ ᤋᤢᤰᤂᤣ ᤁᤧᤶᤈᤠ᤺ᤳᤋᤡ᤹. ᤜᤧᤰᤁᤩᤠᤱ ᤁᤧᤶᤛᤧᤖᤡ᤹ᤖᤥ॥ ᤂᤡᤏᤡ᤹ ᤕᤠᤵᤔᤡ ᤏᤛᤠ᤺ᤴ ᤁᤧᤈᤥᤃᤡᤒᤠᤸᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤁᤧᤶᤈᤡ᤺ᤳᤋᤡ᤹ᤖᤥ॥
10 ᤂᤧᤴ ᤕᤧᤶᤔᤥ ᤕᤖᤡᤰ ᤔᤏᤠᤜᤠ᤹ ᤏᤛᤠ᤺ᤴᤗᤠᤶ ᤔᤧᤏᤢ᤺ᤱᤅᤠᤱ ᤀᤡᤱᤔᤧᤗᤧᤰᤛᤡᤱᤅᤠᤱ ᤔᤧᤈᤡ᤺ᤳᤇᤡᤱᤗᤥ॥
11 ᤜᤧᤰᤁᤣᤗ᤹ᤖᤡᤰ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤗ᤺ᤴ ᤔᤧᤍᤠᤀᤠᤱ ᤕᤖᤡᤰ ᤔᤏᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡ᤹ᤖᤥ॥
12 ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤐᤥ᤺ᤖ ᤐᤣ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤕᤖᤡᤰ ᤔᤏᤠᤜᤠ᤹ᤖᤧ ᤛᤧᤰᤂᤠ ᤏᤡᤱᤘᤠ᤹ᤀᤥᤏᤢ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤔᤧᤗᤧᤖᤢᤖᤥ॥
13 ᤁᤖ ᤀᤠᤳᤋᤡᤸᤗᤧ ᤁᤢᤏᤢᤵᤔᤥ ᤌᤠᤖᤡᤰ ᤌᤖᤢ᤹. ᤂᤧᤸᤗᤧᤀᤣ ᤛᤧᤴᤗᤵ ᤂᤥ᤺ᤛᤢ᤹ᤖᤥ॥
14 ᤜᤧᤰᤁᤩᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤔᤧᤄᤧᤵᤛᤢᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤗᤧᤴ ᤛᤢᤏᤠᤀᤡᤱᤅᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤂᤠᤖᤠᤰ ᤀᤡᤱᤓᤥ᤹᤺. ᤜᤧᤰᤁᤩᤠᤱ ᤁᤢᤏᤢᤵᤔᤠᤴ ᤋᤠ᤺ᤖᤥ॥
ᤁᤡᤵᤔᤠ ᤁᤧᤄᤢ᤺ᤒᤠ ᤕᤧᤶ
ᤔᤷᤁᤢᤛ ᥇᥉.᥇᥊-᥈᥉. ᤗᤢᤁᤠ ᥈᥇.᥈᥆-᥈᥊
15 ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤍᤠᤏᤡᤀᤣᤗᤖᤧ ᤐᤠ᤺ᤳᤋᤢᤒᤠ ᤛᤡᤰᤁᤧᤗᤧ᤺ᤱᤒᤠᤴ ᤔᤠᤱᤜᤡᤶᤔᤥᤒᤠ ᤛᤣᤛᤣ ᤍᤧᤴᤏᤥ ᤕᤧᤵᤐᤠ ᤁᤧᤏᤡ᤺ᤛᤢᤶᤗᤥ॥” (ᤜᤠᤖᤠ᤹ ᤁᤧᤏᤡ᤺ᤵᤐᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤖᤥ᥄)
16 “ᤂᤧᤴ ᤕᤧᤶᤔᤥ ᤕᤜᤢᤍᤡᤕᤠᤒᤠ ᤔᤏᤠᤜᤠ᤹ ᤁᤥ᤺ᤰᤔᤠ ᤑᤠᤱᤈᤱ ᤜᤧᤱᤄᤠ᤺ᤳᤋᤡ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤖᤥ॥
17 ᤂᤧᤴ ᤕᤧᤶᤔᤥ ᤜᤡᤶ ᤛᤶᤍᤠᤱ ᤁᤧᤘᤠ᤹ᤒᤠ ᤔᤏᤠ᤺ᤴ ᤆᤡᤃ᤺ᤰᤘᤠ ᤗᤠ᤺ᤛᤧ ᤜᤡᤶ ᤛᤡᤃᤠᤱ ᤔᤧᤗᤠ᤺ᤳᤏᤧᤴᤗ॥
18 ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤁᤧᤘᤠ᤹ᤒᤠᤴ ᤜᤠᤖᤠ᤹ ᤁᤢᤛᤢᤱᤄᤣ᤺ᤰᤘᤠ ᤗᤠ᤺ᤛᤧ ᤁᤢᤜᤡᤶᤔᤥ ᤔᤧᤏᤢ᤺ᤱᤏᤧᤴ ᤔᤧᤒᤣ᤺ᤰᤏᤧᤴᤗᤖᤥ॥
19 ᤁᤴ ᤕᤧᤶᤔᤡᤱᤃ ᤔᤧᤴᤇᤢᤰᤔᤠ ᤏᤢ ᤛᤠᤘᤠᤔᤠᤜᤠ᤹ᤖᤧ ᤗᤠᤃᤡ ᤀᤠᤰᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤐᤥ᤺ᤱᤅᤡ᥄
20 ᤆᤢᤱᤘᤠ᤺ᤶᤔᤠ ᤕᤧᤶᤔᤥ ᤏᤢ ᤏᤠ᤺ᤶᤛᤡᤱ ᤕᤧᤴᤏᤥ ᤂᤡᤏᤡ᤹ ᤂᤧᤳᤇᤡᤱᤔᤠ ᤔᤧᤒᤥ᤺ᤱᤏᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥
21 ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤀᤰᤋᤱᤒᤠ ᤁᤡᤵᤔᤠ ᤁᤧᤄᤢ᤺ᤒᤠ ᤋᤢᤰᤂᤣ᤺ᤴ ᤋᤠ᤺ᤖᤥ॥ ᤀᤰᤋᤱᤒᤠ ᤋᤢᤰᤂᤣ᤺ᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤀᤠᤸᤗᤥ ᤌᤠᤖᤡᤰ ᤔᤧᤶᤒᤥ᤺ᤱᤅᤣ ᤘᤠ᤹. ᤜᤧᤰᤁᤩᤠᤱ ᤋᤠ᤺ᤴᤍᤡ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤔᤧᤒᤥ᤺ᤱᤏᤧᤸᤗᤥ॥
22 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤕᤧᤴᤜᤠ᤹ ᤋᤠᤱᤛᤠ ᤔᤧᤈᤥᤃᤢᤴᤏᤡᤸᤗᤧᤃ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤜᤡᤱᤔᤠ ᤔᤧᤴᤇᤢᤰᤋᤧᤴᤒᤠᤖᤥ॥ ᤁᤖ ᤂᤢᤏᤧ᤹ ᤛᤣᤃᤢᤛᤡᤒᤠᤜᤠ᤹ ᤔᤧᤜᤡᤱᤗ ᤑᤠ᤹ᤀᤠᤱ ᤂᤧᤴ ᤕᤧᤴᤜᤠ᤹ ᤋᤠᤱᤛᤠ ᤐᤥ᤺ᤰᤂᤧᤒᤠᤖᤥ॥
23 ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤔᤏᤠᤜᤠ᤹ᤖᤧ ‘ᤀᤥᤔᤧᤳᤋᤧᤶᤔᤧ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤁᤵᤔᤥ ᤘᤠ᤹’ ᤀᤡᤃᤪ ‘ᤂᤢᤏᤧ᤹ ᤂᤧᤵᤔᤥ ᤘᤠ᤹’ ᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤔᤧᤍᤠ᤺ᤸᤗᤧ ᤏᤛᤠ᤺ᤴ ᤔᤧᤈᤥᤃᤧᤶᤛᤡᤶᤔᤡᤴᤏᤧ᤹ᤀᤥ॥
24 ᤌᤣᤀᤠᤱᤓᤧᤸᤗᤧ ᤀᤡᤱᤗᤧᤰᤐᤠ ᤂᤪᤡᤛ᤻ᤋᤜᤠ᤹ ᤏᤢ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤗ᤺ᤴ ᤔᤧᤍᤠᤀᤠᤱ ᤐᤕᤶ ᤕᤶᤒᤠ ᤔᤡᤰᤛᤣ᤺ᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤜᤠ᤹ ᤔᤧᤈᤥᤃᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤔᤏᤠᤜᤠ᤹ᤀᤠᤱ ᤂᤢᤏᤡ᤹ ᤛᤢᤰᤛᤢᤰ ᤀᤡᤱᤔᤧᤗᤧᤰᤋᤢᤛᤡ᤹ᤖᤥ॥
25 ᤀᤥᤔᤧᤳᤋᤧᤶᤔᤧ᤹. ᤁᤴ ᤐᤠ᤺ᤴᤜᤠ᤹ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤡᤏᤡ᤹ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥
26 ᤂᤧᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ‘ᤀᤥᤔᤧᤳᤋᤧᤶᤔᤧ᤹. ᤂᤪᤡᤛ᤻ᤋᤧᤱᤃ ᤕᤧ᤺ᤱᤄᤠᤍᤧᤴᤏᤥ ᤘᤠ᤹’ ᤁᤧᤶᤔᤧᤳᤋᤡᤃᤪ. ᤀᤥᤔᤧᤳᤇᤧ ᤂᤧᤵᤔᤥ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ. ᤀᤡᤃᤪ ‘ᤀᤥᤔᤧᤳᤋᤧᤶᤔᤧ᤹. ᤂᤢᤏᤧ᤹ ᤁᤵᤔᤥ ᤛᤡᤃᤠᤱᤒᤠ ᤕᤠᤰᤑᤠᤱᤅᤥ ᤘᤠ᤹’ ᤁᤧᤶᤔᤧᤳᤋᤡᤛᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤏᤛᤠ᤺ᤴ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥
27 ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢ᤺ᤔᤠᤱᤃ ᤛᤠ᤺ᤶᤓᤣ ᤗᤧᤰᤁᤡᤸᤗᤧ ᤁᤧᤖᤧᤰ ᤋᤠᤱᤛᤠᤰᤐᤧᤴ ᤌᤥ᤹ᤖᤢᤒᤠ ᤁᤢᤀᤡᤛᤡ᤺ᤰᤁᤣ ᤐᤥ᤺ᤱᤗᤥ॥
28 ᤀᤠᤳᤋᤥ ᤛᤡᤏᤢ᤺ᤴ ᤏᤧ᤹. ᤂᤧᤵᤔᤥᤀᤣ ᤁᤡᤍᤠᤒᤠᤜᤠ᤹ᤀᤠᤱ ᤔᤧᤈᤢᤶᤗᤥ॥”
ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢ᤺ᤔᤠᤴ
ᤔᤷᤁᤢᤛ ᥇᥉.᥈᥊-᥈᥍. ᤗᤢᤁᤠ ᥈᥇.᥈᥋-᥈᥎
29 “ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤋᤢᤰᤂᤣ᤺ᤴ ᤀᤣᤃᤠᤱ ᤂᤡᤔᤥ
‘ᤏᤠᤶᤔᤡᤴ ᤂᤠᤔᤠᤰᤗᤥ.
ᤗᤠᤒᤠᤸᤗᤧ ᤀᤥ᤺ᤳᤋᤡ ᤔᤧᤒᤡᤖᤢᤴᤗᤥ.
ᤋᤠᤱᤛᤠᤰᤐᤥᤒᤠ ᤂᤣ᤺ᤶᤛᤡᤰᤐᤠᤜᤠ᤹ ᤔᤰᤔᤧᤎᤠ᤺ᤖᤥ.
ᤜᤧᤰᤁᤩᤠᤱ ᤋᤠᤱᤛᤠᤰᤐᤥᤒᤠ ᤔᤢᤰᤛᤠᤶᤜᤠ᤹ ᤔᤧᤕᤱᤗᤥ॥’
30 ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤋᤠᤱᤛᤠᤰᤐᤥ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢ᤺ᤔᤠᤸᤗᤧᤴ ᤔᤡᤰᤛᤣ᤺ᤴᤏᤡᤴ ᤌᤠ᤺ᤵᤐᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤣᤖᤡᤱ ᤔᤧᤎᤰᤗᤥ॥ ᤂᤧᤱᤜᤠ᤹ᤖᤧ ᤔᤧᤴᤇᤠᤶᤛᤠ᤺ᤴ ᤋᤠᤱᤛᤠᤰᤐᤥ ᤔᤢᤰᤛᤠᤶ ᤜᤧᤰᤁᤩᤠᤱ ᤐᤕᤶ ᤔᤡᤔᤡᤍᤡᤱᤅᤡᤴᤏᤢ ᤂᤠᤵᤔᤡ᤺ᤳᤋᤥ ᤕᤢ᤺ᤖ ᤐᤵᤐᤠ ᤔᤧᤏᤡ᤺ᤛᤢ᤹ᤖᤥ॥
31 ᤜᤧᤰᤁᤩᤠᤱ ᤂᤢᤏᤧ᤹ ᤛᤣᤃᤢᤛᤡᤒᤠ ᤔᤏᤠᤜᤠ᤹ ᤛᤢᤶᤛᤧ ᤁᤧᤖᤧᤰ ᤐᤡᤛᤠᤱᤗᤠᤶ ᤋᤠᤱᤛᤠᤰᤐᤠᤸᤗᤧ ᤂᤥ᤺ᤵᤋᤢᤒᤠ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤋᤠ᤺ᤰᤋᤢᤒᤠᤀᤥ ᤌᤢᤳᤋᤢᤖᤡ᤺ᤵᤐᤠᤸᤗᤧᤴ ᤐᤕᤶ ᤀᤡᤰᤗᤠᤏᤢ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤠᤱᤄᤢ ᤕᤢ᤺ᤛᤢᤛᤡ᤹ᤖᤥ॥”
ᤐ᤺ᤳᤇᤣ᤹ᤒᤢᤱᤔᤠᤸᤗᤧ ᤁᤢᤒᤡ
ᤔᤷᤁᤢᤛ ᥇᥉.᥈᥎-᥉᥇. ᤗᤢᤁᤠ ᥈᥇.᥈᥏-᥉᥉
32 “ᤀᤠᤸᤗ ᤐ᤺ᤳᤇᤣ᤹ᤒᤢᤱᤔᤥᤗᤠᤶ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ. ᤂᤧᤸᤗᤧ ᤁᤢᤒᤥᤖᤠ᤺ᤰᤜᤠ᤹ᤗᤠᤶᤒᤠ ᤁᤢᤛᤱ ᤁᤢᤏ᤺ᤰᤜᤠ᤹ ᤗ᤺ᤶᤔᤠ ᤜᤣ᤺ᤰᤁᤡᤸᤗᤧ ᤜᤠᤱᤘᤠ᤺ᤶᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱ ᤋᤩᤧᤖᤥ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶ॥
33 ᤜᤧᤰᤁᤣᤗ᤹ᤖᤡᤰᤁᤣ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤳᤗ ᤐᤣ᤺ᤰᤐᤠ ᤁᤧᤏᤡ᤺ᤛᤢᤶᤔᤡᤸᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢ᤺ᤔᤠᤴ ᤏᤡ᤺ᤳᤋᤠᤱᤅᤣ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥
34 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤶᤒᤥ᤺ᤱᤅᤣ ᤌᤠᤖᤡᤰ ᤁᤴ ᤔᤧᤴᤇᤠᤶ ᤌᤠ᤺ᤰᤜᤠ᤹ ᤔᤧᤴᤇᤡ᤺ᤏᤧᤴ॥
35 ᤋᤠᤱᤛᤠᤰᤐᤧᤴ ᤏᤢ ᤂᤠᤶᤒᤣ᤺ᤰᤔᤠᤴ ᤗᤧᤰᤁᤠᤱ ᤐᤣ᤺ᤰ. ᤁᤖ ᤀᤡᤱᤃᤠ᤹ ᤀᤠᤒᤠ᤺ᤴᤈᤠᤰᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤰᤏᤧᤴ ᤔᤧᤒᤣ᤺ᤰᤏᤧᤴᤗᤥ॥”
ᤕᤧᤛᤢᤖᤧ ᤁᤢᤕᤢ᤺ᤔᤠᤀᤥ ᤕᤠᤖᤡᤵ ᤘᤠ᤹ᤔᤠᤴ
ᤔᤷᤁᤢᤛ ᥇᥉.᥉᥈-᥈᥍. ᤗᤢᤁᤠ ᥇᥍.᥈᥌-᥉᥆.᥉᥊-᥉᥌
36 “ᤀᤠᤸᤗ ᤂᤧᤴ ᤕᤧᤶ ᤏᤢ ᤕᤧᤴᤜᤠ᤹ ᤀᤠᤵᤑᤠᤸᤗᤧ ᤐᤥ᤺ᤱ ᤑᤠ᤹ᤀᤠᤱ ᤀᤠᤳᤋᤡᤸᤗᤧᤀᤠᤱ ᤔᤧᤏᤡ᤺ᤛᤢᤴ॥ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤠᤱᤗᤠᤀᤡᤱᤒᤠ ᤏᤢ ᤏᤡᤱᤘᤠ᤹ᤑᤢᤛᤠ᤺ᤸᤗᤧᤀᤠᤱ ᤔᤧᤏᤡ᤺ᤛᤢᤴᤗᤥ. ᤁᤖ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤖᤰ ᤏᤡ᤺ᤛᤢ᤹ᤖᤥ॥
37 ᤜᤧᤰᤁᤩᤠᤱ ᤔᤧᤴᤇᤠᤶᤛᤠ᤺ᤴ ᤏᤢ᤺ᤱ ᤕᤢ᤺ᤸᤗᤧ ᤏᤢᤜᤠᤖᤧ ᤁᤢᤕᤧᤶ ᤜᤧᤰᤁᤣᤀᤣ ᤐᤥ᤺ᤱᤗᤥ॥
38 ᤏᤢᤜᤠ᤺ᤴ ᤘᤠᤗᤠᤎᤠᤀᤥ ᤗᤠ᤺ᤛᤧᤒᤠ ᤕᤧᤶᤔᤥ ᤌᤠᤖᤡᤰᤁᤣ ᤔᤏᤠᤜᤠ᤹ ᤔᤧᤈᤖ ᤔᤧᤎᤢᤅᤢᤖ ᤜᤧᤰᤁᤩᤠᤱ ᤔᤣ᤺ᤰᤂᤡᤶ ᤔᤧᤈᤥᤃᤢᤖ ᤔᤧᤘᤕᤧ॥
39 ᤜᤧᤰᤁᤩᤠᤱ ᤘᤠᤍᤥ᤺ᤰᤔᤠ ᤌᤠᤅᤧᤀᤠᤱ ᤏᤡ᤺ᤶᤔᤠ ᤛᤡ᤺ᤔᤠᤏᤢ᤺ᤸᤗᤧ ᤋᤃᤡ ᤌᤣ ᤐᤥ᤺ᤱ ᤁᤧᤗ᤹ᤒᤠᤴ ᤂᤧᤱᤜᤠ᤹ᤖᤧ ᤌᤣᤀᤠᤱ ᤏᤡᤱᤘᤠ᤹ ᤔᤧᤱᤃᤳᤋᤢᤴᤗᤥ॥ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢ᤺ᤔᤠᤴᤏᤠᤱ ᤐᤥ᤺ᤱᤗᤥ॥
40 ᤂᤧᤴ ᤕᤧᤶᤔᤥ ᤏᤧᤵᤑᤢ ᤔᤏᤠᤜᤠ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥ᤺ᤰᤛᤢᤖ ᤕᤠᤰᤛᤡᤸᤗᤧ ᤌᤡᤰᤁᤡᤴ ᤋᤣ᤹. ᤘᤣ᤹ᤛ᤻ᤔᤠᤴ ᤘᤠ᤹ ᤗᤠ᤺ᤳᤗᤥ॥
41 ᤜᤧᤰᤁᤩᤠᤱ ᤏᤧᤵᤑᤢ ᤔᤧᤴᤇᤢᤔᤠᤜᤠ᤹ ᤗᤢᤱᤛᤢᤶᤔᤥ ᤕᤠ᤹ ᤕᤢ᤺ᤳᤏᤢ ᤕᤢᤱᤛᤡᤸᤗᤧ ᤌᤡᤰᤁᤡᤴ ᤋᤣ᤹. ᤘᤣ᤹ᤛ᤻ᤔᤠᤴ ᤕᤢᤱ ᤗᤠ᤺ᤳᤗᤥ॥
42 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤀᤠᤵᤑᤠᤸᤗᤧᤛᤠᤱ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤍᤠᤱᤒᤠᤴ ᤀᤠᤵᤑᤠᤸᤗᤧ ᤕᤢ᤺ᤒᤣ ᤁᤧᤗ᤹ᤒᤠᤴ ᤂᤡᤏᤡ᤹ ᤏᤡᤱᤘᤠ᤹ ᤁᤧᤱᤃᤳᤋᤢᤶᤔᤡᤴᤗᤥ॥
43 ᤜᤡᤶᤍᤠᤱᤒᤠᤸᤗᤧ ᤂᤢ᤺ᤴᤍᤪᤡᤰᤐᤧᤴ ᤀᤠᤳᤋᤡᤴ ᤕᤧᤶᤔᤥ ᤋᤠ᤺ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤂᤥ᤺ᤛᤢᤏᤧ ᤑᤠ᤹ᤃᤪ ᤂᤧᤸᤗᤧ ᤔᤧᤴᤀᤡᤶᤔᤣ ᤜᤡᤶᤔᤡᤴ ᤁᤥᤛᤢᤀᤠᤱ ᤂᤧᤴ ᤂᤢ᤺ᤴᤍᤪᤡᤰᤐᤧᤴ ᤂᤢ᤺ᤵᤔᤠ ᤔᤧᤒᤠᤱᤄᤢᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥
44 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤀᤠᤵᤑᤠᤸᤗᤧᤛᤠᤱ ᤕᤠᤖᤡᤵ ᤘᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤛᤠ᤺ᤴ ᤕᤢ᤺ ᤑᤠ᤹ᤀᤠᤱ ᤔᤧᤴᤀᤡ᤺ᤳᤋᤣ ᤁᤧᤘᤕᤡᤸᤗᤧ ᤂᤢᤏᤧ᤹ ᤕᤢ᤺ᤖᤥ॥”
ᤏᤛᤠ᤺ᤴᤛᤠᤒᤠ ᤏᤢ ᤋᤠᤵᤑᤧ᤺ᤶᤒᤠ ᤛᤣᤘᤠᤖᤥᤒᤠᤜᤠ᤹
ᤗᤢᤁᤠ ᥇᥈.᥊᥇-᥊᥎
45 “ᤀᤠᤳᤋᤡᤴ ᤛᤣᤘᤠᤖᤥᤒᤠᤴ ᤏᤛᤠ᤺ᤴᤛᤠᤒᤠ ᤏᤢ ᤛᤡᤰᤁᤢᤶᤛᤠᤒᤠ ᤆᤥ᤺ᤰ. ᤂᤧᤴᤏᤡᤴ ᤜᤡᤶᤍᤠᤱᤒᤠᤸᤗᤧ ᤁᤢᤜᤡᤶᤎᤠ᤺ᤱᤜᤠ᤹ ᤀᤥᤔᤧᤵᤔᤠ ᤕᤢᤰ ᤐᤡᤖᤢᤀᤠᤱ ᤂᤧᤸᤗᤧ ᤘᤣ᤹ ᤛᤣᤘᤠᤖᤥᤒᤠᤜᤠ᤹ ᤕᤧᤶᤕᤧᤶᤔᤥ ᤆᤠᤔᤠ-ᤌᤢᤱᤔᤠ ᤐᤡᤖᤢᤛᤡ᤹ᤖᤥ॥
46 ᤂᤧᤴ ᤜᤡᤶᤍᤠᤱᤒᤠᤴ ᤏᤢ᤺ᤱ ᤋᤠ᤺ᤸᤗᤧ ᤂᤧᤴ ᤛᤣᤘᤠᤖᤥᤒᤠᤸᤗᤧ ᤒᤠ ᤜᤧᤰᤁᤣᤀᤣ ᤆᤥᤃᤢᤖ ᤘᤠ᤹ᤒᤠ ᤋᤢᤔᤢᤏᤧ ᤑᤠ᤹ᤃᤪ ᤂᤧᤴ ᤌᤢᤶᤄᤥ ᤐᤡᤖᤢ᤹ᤖᤥ॥
47 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤴ ᤜᤡᤶᤍᤠᤱᤒᤠᤸᤗᤧ ᤂᤧᤴ ᤛᤣᤘᤠᤖᤥᤒᤠᤴ ᤁᤧᤖᤧᤰ ᤁᤢᤕᤠᤱᤛᤠᤁᤢᤴᤎᤣ ᤛᤶᤍᤠᤱ ᤕᤢᤰ ᤐᤡᤖᤢ᤹ᤖᤥ॥
48 ᤁᤖ ᤂᤧᤴ ᤋᤠᤰᤁᤧᤓᤧ᤹ᤒᤠ ᤛᤣᤘᤠᤖᤥᤒᤠᤸᤗᤧ ᤁᤢᤏᤡᤱᤘᤠ᤹ᤒᤥ ᤀᤠᤴᤍᤠᤱᤒᤠᤴ ᤔᤠ᤺ᤱᤄᤠ ᤐᤣᤀᤠᤱ ᤘᤠ᤹.
49 ᤜᤠᤖᤠ ᤔᤧᤍᤠᤏᤧᤴ ᤗ᤹ᤀᤠᤱ ᤁᤢᤴᤈᤢᤶ ᤛᤣᤘᤠᤖᤥᤒᤠᤜᤠ᤹ ᤜᤡᤵᤋᤢᤛᤡᤀᤠᤱ ᤌᤡ᤺ᤔᤛᤠᤱᤜᤠ᤹ᤏᤢ ᤆᤠᤔᤠ-ᤌᤢᤱᤔᤠ ᤜᤣ᤺ᤰᤋᤢ᤹ᤏᤧ ᤑᤠ᤹ᤃᤪ
50 ᤂᤧᤸᤗᤧ ᤁᤢᤴᤍᤠᤱᤒᤠᤴ ᤋᤠ᤺ ᤗ᤹ᤖᤡᤰ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤴᤒᤠ ᤕᤧᤶᤔᤥ ᤁᤢᤴᤍᤠᤱᤒᤠᤴ ᤋᤠ᤺ᤖᤥ॥
51 ᤜᤧᤰᤁᤩᤠᤱ ᤁᤢᤴᤍᤠᤱᤒᤠᤸᤗᤧ ᤂᤧᤴ ᤛᤠ᤹ᤖᤡᤰ ᤋᤧ᤺ᤶᤓᤢᤰ ᤕᤠᤰᤋᤢᤀᤠᤱ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ᤏᤢ ᤛᤥᤖᤡᤰ ᤂᤢᤶᤍᤡᤱ ᤐᤡᤖᤢ᤹ᤖᤥ॥ ᤂᤧᤵᤔᤥᤃ ᤜᤠ᤺ᤵᤔᤠᤴ ᤏᤢ ᤛᤠ᤹ᤖᤡᤰ ᤋᤢᤰᤂᤣ᤺ᤸᤗᤧ ᤜᤠᤒᤥ᤹ ᤕᤧ᤺ᤱᤔᤠᤴ ᤐᤥ᤺ᤱᤗᤥ॥”